Ubáyíbu cokonu ku ɔdā alɛwa klla ta alɔ ukɔ́ alɛwa duu. A lɔfu lɛ ɔka alɛwa lɛyikwu ɔdā nɛ Ubáyíbu gē nwu a, amáŋ a géē dɔka ō leyi kwɛɛcɛ ku ɔka ōhī nɛ a gē da a. A géē kpɔtuce aokonu ō ce mla aukɔ́ ŋma ɔkpá igble ɛgɔɔma gla a? A kpɔtuce ɛlā nɛ Ubáyíbu ka lɛyikwu ō jɔɔnyɛ oyeeyi babanya mla ɛcɔbu nōo yɔ i wa a? Umiliyɔn alɛwa ku ācɛ ya lɛ a. Alɔ kē yɔ i ta uwɔ ɔtu kwu ɔtu ku a leyi yɛ ɔ abɔyi uwɔ.

1. Aɔ̄kā nōo yɔ ipu Ubáyíbu a wɛ ɔkwɛyi?

Ubáyíbu ka aɛlā nōo yɔ ipu nu a ‘wɛ aɛlā ɔkwɛyi.’ (Ɔ̄cokóītá 12:10) Ó gē da alɔ aɔdā ɔkwɛyi nōo ya ipu oyeeyi ku ācɛ a. (Jé Ulúku 1:3; 3:1, 2.) Ācɛ alɛwa nōo gē kɔka lɛyikwu ɔdā nōo ya eko ku igble mla ācɛ ō bɔkwu ɔdā nōo ya eko ku igble a wa i le má peee ka aɛ̄cī, ācɛ, ɛga mla aɔdā nōo ya ipu Ubáyíbu a wɛ ɔkwɛyi.

2. Ɔdiya nɛ alɔ géē ka ka Ubáyíbu tiile icɛ kpɔ a, naana nōó wɛ ɔkpá néē ta eko ku igble a?

Igbalɛwa, Ubáyíbu gē kɛla nōó kóō ya ɛpleeko néē ta ɔ a ŋ. Ocabɔ, ó kɛla lɛyikwu aikpɛyi ɛlā ku usayɛnsi. Ācɛ alɛwa i kpɔtuce ɛlā nōó ka ɛpleeko néē ta ɔ a ŋ. Naana a, ācɛ usayɛnsi icɛ le ka peee ka aɛlā nɛ Ubáyíbu ka a wɛ ɔkwɛyi. Aɛlā ku Ubáyíbu wɛ “íne nɛ̄ ɔ̄cɛ gē lɛ ɔtūce ɔ́ [nōo] gē yɔ̄ piyóó.”​—Aíjē Kú Ɛ̄gbā 111:7, 8.

3. Ɔdiya nɛ alɔ cika ō kpɔtuce aɛlā nɛ Ubáyíbu ka lɛyikwu ɛcɔbu a?

Ubáyíbu ka akacɛ * ku ‘aɔdā nōó ya ɛɛ ŋ ma.’ (Ayisáya 46:10) Ó gē ka ɔdā alɛwa taajɛ kpaakpa lɛyikwu ɛgɛ nɛ odee géē ya lɛ ɛcɔbu gbɔbu ɛɛ ka eko a kóō ya. Ó klla da alɔ ɔdā alɛwa lɛyikwu āhɔ̄ ku ɛcɛ nyā duu. Ipu ɛlā ō nwu nyā, alɔ géē leyi yɛ akacɛ ku Ubáyíbu ōhī. Ɛgɛ nɛ ɛjɛɛji ɛlā nōo yɔ ipu Ubáyíbu le kpaakpa a wɛ ɔdā ō hidaago!

 ƆDI NƐ A NWU A?

Ɔ̄kā ku igble, usayɛnsi mla akacɛ mafu ku a kpɔtuce Ubáyíbu gla.

Aɔka ō tu alɔ ɛlá kwu ɔdā nɛ alɔ nwu

• Ubáyíbu wɛ ɔkpá ku ɔdā nōo ya ɔkwɔɔkwɛyi nɛɛ, kɛɛ kóō wɛ ɔkpá ku ɔdā nōó ya ŋ?

• Ɔwɛ ōhī nyá nɛ usayɛnsi cɛtɔha mla Ubáyíbu a?

• A gbɛla ku Ubáyíbu da alɔ ɔdā nōo géē ya ɛcɔbu a? Ɔdiya nɛ a ka lɛ a?