Abụ Ọma 90:1-17
Ekpere Mosis, onye nke ezi Chineke, kpere.+
90 Jehova, ị bụ ebe mgbaba anyị*+ si n’ọgbọ ruo n’ọgbọ.
2 Tupu i kee ugwu dị iche iche,Ma ọ bụ, tupu i kee ụwa nakwa ala,+Ruo mgbe ebighị ebi,* ị bụ Chineke.+
3 Ị na-eme ka mmadụ efu laghachi n’ájá.
Ị na-asị: “Ụmụ mmadụ, laghachinụ n’ájá.”+
4 N’ihi na n’anya gị, otu puku afọ gara aga dị ka ụnyaahụ.+
Ọ dị ka awa ole na ole n’abalị.
5 Ị na-ekpochapụ ha,+ e chefuo ha ka nrọ a rọrọ n’abalị.
N’ụtụtụ, ha na-adị ka ahịhịa ndụ pupụtara epupụta.+
6 Ha na-awa okooko n’ụtụtụ, maakwa pokopoko.
Ma ná mgbede, ha na-achanwụ, kpọnwụọkwa.+
7 N’ihi na iwe gị na-ala anyị n’iyi,+Ọnụma gị na-emenyekwa anyị ụjọ.
8 Ị na-edowe mmehie anyị n’ihu gị.*+
Ị na-ahụ ihe niile anyị na-eme na nzuzo.+
9 Ndụ* anyị na-agwụ n’ike n’ike n’ihi iwe ị na-ewesa anyị.
Afọ ndụ anyị na-agwụ ọsọ ọsọ ka ebe mmadụ zere ume.*
10 Anyị na-adị ndụ ruo afọ iri asaa,Ma ọ bụkwanụ afọ iri asatọ,+ ma ọ bụrụ na anyị siri ezigbo ike.
Ma ihe juru n’afọ ndị a bụ nsogbu na ahụhụ.
Ha na-agwụ ngwa ngwa, nke anyị agaa.+
11 Ònye ga-aghọtali otú iwe gị nwere ike ịdịru ọkụ?
Ọ bụ otú egwu e kwesịrị ịna-atụ gị si dị ukwuu ka iwe gị sikwa dị ukwuu.+
12 Kụziere anyị otú anyị ga-esi na-agụ ụbọchị anyị,+Ka anyị* wee mara ihe.
13 Jehova, biko, lọghachi.+ Olee mgbe ihe a ga-ebi?+
Meere ndị ohu gị ebere.+
14 Mee ka ịhụnanya gị*+ zuo anyị ahụ́ n’ụtụtụ,Ka anyị wee na-eti mkpu ọṅụ ma na-enwe obi ụtọ+ n’oge niile anyị dị ndụ.
15 Mee ka ụbọchị ole anyị ga-aṅụrị ọṅụ hara ka ụbọchị ole i mesiri anyị ike,+Ka ọ dịkwa ọtụtụ ka afọ ole ọdachi dakwasịrị anyị.+
16 Mee ka ndị ohu gị hụ ihe ọma ndị ị na-eme,Meekwa ka ụmụ ha hụ ebube gị.+
17 Ka Jehova bụ́ Chineke anyị meere anyị amara.
Mee ka ihe ndị anyị na-eme gaziere anyị.
Biko, mee ka ihe ndị anyị na-eme gaziere anyị.+
Ihe E Dere n'Ala Ala Peeji
^ Ma ọ bụ “ebe anyị bi.”
^ Ma ọ bụ “Malite mgbe ebighị ebi ruo mgbe ebighị ebi.”
^ Ma ọ bụ “Ị ma ihe ọjọọ anyị na-eme.”
^ Na Hibru, “Ụbọchị.”
^ Na Hibru, “ka okwu a takwụnyeere mmadụ.”
^ Ma ọ bụ “obi anyị.”
^ Ma ọ bụ “ịhụnanya gị pụrụ iche.”
