UKỌCHẸ 03

Ẹ Neke Kẹdọno Baibul?

PLAY

Amugbalutanẹ kpai am’ọla ibe ki Baibul adu ñwu wa che wewe. I neke che kakini ẹ tene ma amẹñwu ki Baibul ka, ama ẹ tene li jali kaki ẹñwu k’ẹ kọchẹ lẹ ch’ochochi. Uwẹ neke kẹdọno amugbalutanẹ kpai am’ọla ibe ki kwefu ọtakada igbele-i? Ẹ neke kẹdọno jali kaki ẹñwu ki Baibul ka lugbo ej’ura abajọ-i kpai ogbegbelẹ ch’ochochi? Amonẹ wewe che kẹdọno. Awa atene k’ẹ li kp’ọla wẹ kaki ẹñwu ki Baibul ka ch’ochochi.

1. Baibul ch’ọtakada ọhiala ọlemi abẹki ochochi i che?

Baibul che ka k’ọla ki defu-wñ “ch’ọla ochochi.” (Akọla Ñw Ujeju 12:10) I k’ọla lugbo ọhiala amonẹ, amẹñwu ki la ka lugbo ma ch’ochochi. (Gba Luku 1:3; 3:1, 2.) Ojile am’anuma inabali-igbele kpai am’agwẹtẹ ẹñwu kwefu anẹ jẹ kakini amẹñwu ki Baibul ka lugbo am’iko kẹñwu che, amonẹ, am’ewo ojoji ojoji kpai amẹñwu ki wache ch’ochochi.

2. Ẹñwu chi k’a neke jile kwefu Baibul dagba ki ch’ọtakada igbele?

Amẹñwu wewe dọmọ ki Baibul kọla lugbo-wñ k’amonẹ ma n’uma-wñ iko ki Baibul ka n. Ka ch’ujiwe, Baibul kọla lugbo sayẹnsi. Ẹgba ki kọla lugbo am’oji-ola lẹ, amonẹ wewe kẹdọno amẹñwu ki Baibul ka n. Ama, abo sayẹnsi iko wa-i che jẹ kakini amẹñwu ki Baibul ka ch’ochochi. “I ch’ẹlonyanẹ gbogbo alo ogbegbelẹ.”—Eli Ekọ D’Ọjọ 111:8.

3. Ẹñwu chi k’a dukpẹ ekẹdọno amẹñwu ki Baibul ka lugbo ejọgba?

Am’achẹ a ki defu Baibul kọla lugbo “ẹwñ ku ma ma che ta n.” (Aizaya 46:10) Amẹñwu ki ka tanẹ lugbo am’inabali igbele tak’iko ku ma wa che ch’ochochi. I kọla jali lugbo amẹñwu ki ache eñini. Efu ukọche-i, a kọla lugbo am’achẹ ichẹka efu Baibul. Ọna k’amachẹ-i wachẹ ache wa awuwu.

N’UMA NYỌGBA

Ñwago ọna ki sayẹnsi eñini-i jẹ kpai Baibul, k’ẹ la d’ejugo am’achẹ ichẹka efu Baibul ki ache wa awuwu.

4. Sayẹnsi che jẹ kpai Baibul

Iko igbele, amonẹ wewe kẹdọno kaki i n’ẹñwu ki gb’ilẹ-i nẹ. G’IFIDIO-i.

IFIDIO: Anẹ Ilẹ Lọkọli, I N’ẹñwu Du Ki Gbọ Nẹ N(1:13)

Dejugo ẹñwu ku ma kọ tanẹ efu ọtakada Job efu ọdọ icham-nyọgwọkọ mẹta ny’ẹbọ (3500) ki wa lale-i. Gba Job 26:7, ubilẹ mẹ ch’oluka oji ene-i:

Ẹñwu chi ki che wa awuwu alu ki Job ma kakini ‘i n’ẹñwu du ki gb’ilẹ-i nẹ n’?

I dab’ọdọ ọgwọkọ (200) ki legwudu-i tak’abo sayẹnsi wa ma jali ọna k’omi ojale alọ kpai ọna ki adabi t’atẹ. Ama, dejugo ẹñwu ku ma kọ tanẹ efu Baibul efu ọdọ icham-nyọgwọkọ mẹta ny’ẹbọ (3500) ki legwudu-i. Gba Job 36:27, 28, ubilẹ mẹ ch’oluka oji am’ene-i:

Ẹñwu ach’uwẹ awuwu lugbo alu ki Baibul jiwe ọna k’omi ojale alọ kpai ọna ki adabi t’atẹ?
Am’ọgba Baibul-i k’ẹ gba fai jẹñwu ukẹdọno wẹ efu Baibul ki lonyanẹ?

5. Baibul kọla lugbo amẹñwu ogbogaga ki wa che

Gba Aizaya 44:27–45:2, ubilẹ mẹ ch’oluka oji ene-i:

Ẹñwu ch’amẹñwu ki Baibul ka tanẹ lugbo ọna k’ojanẹ Babilọn awanẹ ọdọ ọgwọkọ (200) tak’i wa che?

G’IFIDIO-i.

IFIDIO: Baibul Ka Tanẹ Kaki Ojanẹ Babilọn Ana Wanẹ (0:58)

Inabali igbele jẹ kaki Sairọs, Onu Pẹrsia, kpai abogwu-wñ f’ojanẹ Babilọn du efu ọdọ 539 T.I.K.W. b Ma t’ọkpa ñw aji ki adide Babilọn tak’omi-wñ le wanẹ. Todu k’alaku ewo lẹ chẹ bi tẹ, ma juja taku ma f’ojanẹ lẹ du n. I t’ọdọ icham-nyọgwọkọ meji ny’ẹbọ (2,500) le mẹ, ama dabalu ki Baibul ka, i n’ẹnẹ du ki dodo Babilọn eñini n. G’ẹñwu ki Baibul ka tane.

Gba Aizaya 13:19, 20, ubilẹ mẹ ch’oluka oji ene-i: