Ti nakaro nga ibubusor ti gobierno ti Russia kadagiti Saksi ni Jehova ket dimmanonen iti Crimea. Saan la nga imparit ti gobierno ti Russia dagiti korporasion dagiti Saksi no di ket impakitada ti nalawag a panggepda a naan-anay a mapasardeng ti natalna a panagdaydayaw dagiti Saksi. Sipud ti pannakaiparit idi Abril 2017, adun a panag-raid ti inaramid dagiti autoridad ti Russia kadagiti panagtataripnong dagiti Saksi iti intero a pagilian. Nagresulta dayta iti pannakaaresto ken pannakaibalud ti adu a Saksi. Kasta met laeng ti naulpit a maar-aramid kadagiti Saksi ni Jehova iti Crimea.

Ti kaunaan a naggigiddan a panag-raid iti Crimea ket napasamak idi Nobiembre 15, 2018, iti Dzhankoy. Agarup 200 a polis ken special forces officer ti nangserrek iti walo a balay a nagtataripnongan dagiti babassit a grupo dagiti Saksi tapno agadal iti Biblia. Di kumurang a 35 nga armado ken nakaabungot a polis ti puersado a simrek iti balay ni Sergey Filatov, a madama a pagtataripnongan idi ti innem a Saksi. Permi ti buteng dagiti Saksi gapu iti dayta a naranggas a panang-raid. Maysa a lakay nga agtawen iti 78 ti impidegda iti pader, puersado nga impaklebda, pinosasanda, sa nakaro a kinabkabilda nga uray la masapul a maitaray iti ospital. Dua met a lakay ti kasta unay ti pannaka-trauma-da nga uray la naitarayda iti ospital gapu ta ngimmato ti presion ti darada. Kasta met, makapaladingit ta naalisan ti maysa a masikog gapu iti panangserrek dagiti polis iti balayna.

Kalpasan a na-raid ti balay ni Mr. Filatov, isu ket naakusaran iti krimen nga ibilang ti Article 282.2(1) ti Russian Criminal Code kas panangorganisar iti aktibidad ti “maysa nga extremist nga organisasion.” Idi Marso 5, 2020, sinentensiaan ti district court iti Crimea ni Mr. Filatov iti innem a tawen a pannakaibalud. Dagus a naipan iti pagbaludan kalpasan a nasentensiaan.

Kadagiti tawtawen kalpasan dagiti panag-raid idi 2018 iti Dzhankoy, intultuloy dagiti special forces officer ti puersado a panangserrek kadagiti balbalay dagiti Saksi a pagsussuspetsaanda nga extremist. Ti nabiit pay a panag-raid-da ket idi Mayo 22, 2023. Iti 6:30 iti agsapa, nasurok a sangapulo a polis ti nangserrek iti maysa a balay iti Feodosia. Lima kadakuada ti armado. Pinagpaklebda dagiti Saksi bayat a sinukisokda ti balay iti nasurok a tallo nga oras. Maysa a lalaki a Saksi ti innala ken impanda iti Sevastopol tapno maimbestigaran.

Gapu kadagita a panag-raid iti balbalay ken pannakabista dagiti Saksi idi agangay, 12 a Saksi a lallaki ti agdama a nakabalud. Nasentensiaanda iti innem ket kagudua a tawen a pannakaibalud. Aminda ket naakusaran a mangor-organisar kadagiti aktibidad ti maysa nga extremist nga organisasion.

1. Oktubre 18, 2024

   Sangapulo ket dua a Saksi ni Jehova ti nakabalud ita iti Crimea.

2. Mayo 22, 2023

   Sinerrek dagiti polis ti balay ti maysa a Saksi iti Feodosia. Kinompiskarda dagiti gadyet ken inarestoda ti maysa a Saksi.

3. Agosto 5, 2021

   Walo a balbalay dagiti Saksi ti nasukisok. Naaresto da Aleksandr Dubovenko ken Aleksandr Litvinyuk.

4. Oktubre 1, 2020

   Siam a balay ti na-raid iti Sevastopol. Naaresto ken naipan iti pretrial detention ni Igor Shmidt.

5. Hunio 4, 2019

   Sinerrek dagiti special forces officer ti sangapulo a balay iti Sevastopol. Naakusaran ni Mr. Stashevskiy a mangor-organisar kadagiti aktibidad ti maysa nga extremist.

6. Marso 20, 2019

   Sinerrek dagiti special forces officer ti walo a balay iti Alupka ken Yalta. Naimbestigaran ni Mr. Gerasimov ken naakusaran a mangor-organisar kadagiti aktibidad ti maysa nga extremist.

7. Nobiembre 15, 2018

   Walo a balay ti sinerrek ti nasurok a 200 a polis ken special forces officer iti Dzhankoy, agraman ti balay ni Mr. Filatov.