Ti Umuna nga Ar-ari 2:1-46
2 Idi dandanin matay ni David, imbilinna ken Solomon nga anakna:
2 “Dandaniakon matay.* Bumilegka+ ken papigsaem ti pakinakemmo.+
3 Masapul nga itultuloymo nga aramiden ti pagrebbengam ken Jehova a Diosmo. Magnaka kadagiti dalanna ken tungpalem dagiti paglintegan, bilin, pangngeddeng, ken palagipna kas naisurat iti Linteg ni Moises;+ tapno agballigika* iti amin nga aramidem ken iti sadinoman a papanam.
4 Tungpalento ni Jehova ti inkarina maipapan kaniak: ‘No simamatalek nga agtulnog kaniak dagiti annakmo iti amin a puso ken kararuada,*+ kanayon nga addanto lalaki a miembro ti pamiliam* nga agtugaw iti trono ti Israel.’+
5 “Pagaammom met ti inaramid kaniak ni Joab nga anak ni Zeruia, ti inaramidna iti dua a pangulo ti armada ti Israel—da Abner+ nga anak ni Ner ken ni Amasa+ nga anak ni Jeter. Pinatayna ida+ iti tiempo nga awan ti gubat, ken naikkan iti dara ti gubat ti sinturon ken sandaliasna.
6 Agtignayka a simamasirib ket dimo ipalubos a bumaba a sitatalna dagiti ubanna iti Tanem.*+
7 “Ngem ipakitam ti napudno nga ayat kadagiti annak ni Barzillai+ a Gileadita, ket masapul a makipanganda kenka iti lamisaanmo, ta kasta ti panangsuportada kaniak+ idi intarayak ni Absalom a kabsatmo.+
8 “Laglagipem met ni Simei nga anak ni Gera a Benjaminita a taga-Bahurim. Nakadakdakes ti panangilunodna kaniak+ idi napanak idiay Mahanaim;+ ngem idi simmalog a sumabat kaniak idiay Jordan, insapatak kenkuana iti nagan ni Jehova: ‘Saankanto a patayen.’+
9 Dusaem a dusaen,+ ta masiribka ken ammom ti rumbeng nga aramidem kenkuana; masapul nga ibabam dagiti ubanna iti Tanem* nga addaan iti dara.”+
10 Naginana ni David a kas kadagidi ammana ket naitabon iti Siudad ni David.+
11 Ti kapaut* ti panagturay ni David iti Israel ket 40 a tawen. Nagturay iti 7 a tawen idiay Hebron,+ ken 33 a tawen idiay Jerusalem.+
12 Nagtugaw ni Solomon iti trono ni David nga amana, ket in-inut a bimmileg ti panagturayna.+
13 Idi agangay, nakisarita ni Adonias nga anak ni Haggit ken ni Bat-sheba nga ina ni Solomon. Insaludsod ni Bat-sheba: “Nasayaat kadi ti panggepmo nga immay?” Insungbat ni Adonias: “Wen, nasayaat.”
14 Kinunana: “Adda kayatko nga ibaga kenka.” Kinuna ni Bat-sheba: “Sige, ibagam.”
15 Intuloyna: “Ammom a siak koma ti agbalin nga ari, ket namnamaen dayta ti intero nga Israel;*+ ngem saan a naited kaniak ti kinaari no di ket iti kabsatko ta dayta ti pagayatan ni Jehova.+
16 Ngem adda laeng maysa a kiddawek. Dinak koma paayen.” Isu a kinunana kenkuana: “Agsaoka.”
17 Insungbat ni Adonias: “Pangngaasim ta ibagam ken Solomon nga ari nga itedna koma kaniak ni Abisag+ a Sunamita kas asawak. Ammok a dinaka paayen.”
18 Kinuna ni Bat-sheba: “Ala wen, bay-am ta ibagakto iti ari.”
19 Napan ni Bat-sheba ken ni Ari Solomon tapno ibagana ti kiddaw ni Adonias. Dagus a timmakder ti ari a sumabet ket nagdumog. Kalpasanna, nagtugaw iti tronona ket nagpaikabil iti trono para iti inana tapno agtugaw iti kannawanna.
20 Kinuna ni Bat-sheba: “Adda koma bassit a kiddawek. Dinak koma paayen.” Insaludsod ti ari: “Ania ti kiddawenyo? Ta saankayo a mabalin a paayen.”
21 Kinunana: “Itedmo koma ni Abisag a Sunamita kas asawa ni Adonias a kabsatmo.”
22 Insungbat ni Ari Solomon ken inana: “Apay a kidkiddawenyo nga itedko ken Adonias ni Abisag a Sunamita? Kasla met laengen kidkiddawenyo nga itedko kenkuana ti kinaarik,+ ta isu ket in-inauna ngem siak,+ ken supsuportaran ni Abiatar a padi ken ni Joab+ nga anak ni Zeruia.”+
23 Gapu iti dayta, insapata ni Ari Solomon iti nagan ni Jehova: “Dusaennak koma ti Dios no saan a ti mismo a biag* ni Adonias ti pagbayadna iti dayta a kiddawna.
24 Ita, isapatak iti nagan ti sibibiag a Dios a ni Jehova, ti Dios a sititibker a nangisaad kaniak+ iti trono ni David nga amak ken nangaramid iti balay* para kaniak+ kas iti inkarina, mapapatay ni Adonias+ ita nga aldaw.”
25 Dagus nga imbaon ni Ari Solomon ni Benaias+ nga anak ni Jehoiada ket kinabilna ni Adonias isu a natay.
26 Kinuna ti ari ken Abiatar+ a padi: “Agawidka idiay Anatot nga ayan ti talonmo!+ Maikarika a matay, ngem saanka a patayen ita nga aldaw ta inawitmo ti Lakasa ti Kangatuan* nga Apo Jehova idi tiempo ni David nga amak,+ ken gapu ta kaduanaka idi ni amak iti amin a napasaranna a rigat.”+
27 Isu nga inikkat ni Solomon ni Abiatar kas padi ni Jehova, tapno matungpal ti imbaga ni Jehova idiay Shilo+ maipapan iti pamilia ni Eli.+
28 Idi nadamag ni Joab ti napasamak, nagkamang iti tolda ni Jehova+ sa kimpet kadagiti sara ti altar, ta sinuportaran ni Joab ni Adonias+ ngem dina sinuportaran ni Absalom.+
29 Naipadamag ken Ari Solomon: “Nagkamang ni Joab iti tolda ni Jehova, ken adda iti abay ti altar.” Isu nga imbaon ni Solomon ni Benaias nga anak ni Jehoiada, ket kinunana: “Inka patayen!”
30 Napan ni Benaias iti tolda ni Jehova ket kinunana ken Joab: “Daytoy ti imbaga ti ari, ‘Rummuarka!’” Ngem insungbat ni Joab: “Diak kayat! Ditoyak a matay.” Indanon ni Benaias iti ari ti kinuna ni Joab: “Kastoy ti imbaga ni Joab, ket kastoy ti insungbatna kaniak.”
31 Kinuna ti ari: “Aramidem ti kas iti imbagana. Patayem ken itabonmo ket ikkatem kaniak ken iti balay ni amak ti dara a di nainkalintegan nga imbukbok ni Joab.+
32 Singiren ni Jehova kenkuana ti biag dagiti pinatayna ta saan nga ammo ni David nga amak a pinatayna ti dua a lallaki a nalinlinteg ken nasaysayaat ngem isuna: ni Abner+ nga anak ni Ner a pangulo ti armada ti Israel+ ken ni Amasa+ nga anak ni Jeter a pangulo ti armada ti Juda.+
33 Maisingir ti darada ken Joab ken iti annakna* iti agnanayon;+ ngem ipaay koma ni Jehova ti agnanayon a talna ken David ken iti annakna,* ken iti balayna, ken iti tronona.”
34 Napan ngarud ni Benaias nga anak ni Jehoiada iti ayan ni Joab ket pinatayna, sa naitabon iti asideg ti balayna idiay let-ang.
35 Kalpasanna, insaad ti ari ni Benaias+ nga anak ni Jehoiada kas pangulo ti armada a kasukat ni Joab, ken ni Zadok+ a padi a kasukat ni Abiatar.
36 Pinaayaban met ti ari ni Simei+ ket kinunana: “Mangbangonka iti balaymo ditoy Jerusalem, ket agyanka iti dayta; dika rummuar a mapan iti sabali a lugar.
37 Iti aldaw a rummuar ken bumallasiwka iti Tanap ti Kidron,+ sigurado a mataykanto ket basolmo dayta.”
38 Simmungbat ni Simei iti ari: “Mayatak iti imbagam, apo ari. Aramiden daytoy adipenmo ti imbilinmo.” Isu a nagyan ni Simei idiay Jerusalem iti adu nga aldaw.
39 Ngem iti ngudo ti tallo a tawen, dua nga adipen ni Simei ti nagtalaw a napan ken Akis+ nga anak ni Maaca nga ari ti Gat. Idi naipadamag ken Simei: “Napan idiay Gat dagiti adipenmo,”
40 dagus nga insagana ni Simei ti asnona sa nagsakay ket napan ken Akis idiay Gat tapno sapulenna dagiti adipenna. Idi nagsubli ni Simei manipud Gat a kaduana dagiti adipenna,
41 naipadamag ken Solomon: “Rimmuar ni Simei iti Jerusalem ket napan idiay Gat ngem nakasublin.”
42 Gapu iti dayta, pinaayaban ti ari ni Simei ket kinunana: “Saan aya a pinagsapataka iti nagan ni Jehova ken impakdaarko: ‘Iti aldaw a rummuar ken mapanka iti sabali a lugar, sigurado a mataykanto’? Ket saan kadi nga imbagam kaniak, ‘Umanamongak iti imbagam; agtulnogak’?+
43 Apay ngarud a dimo tinungpal ti insapatam ken Jehova ken ti imbilinko kenka?”
44 Kinuna ti ari ken ni Simei: “Ammom ti amin a kinadakes nga inaramidmo ken David nga amak,+ ket singirento dayta kenka ni Jehova.+
45 Ngem mabendisionanto ni Ari Solomon,+ ket agnanayon a natalgedto ti turay ni David iti sanguanan ni Jehova.”
46 Imbaon ti ari ni Benaias nga anak ni Jehoiada tapno patayenna ni Simei. Iti kasta, natay ni Simei.+
Gapuna, nagbalin a natalged ti pagarian iti panangituray ni Solomon.+
Footnotes
^ Lit., “Agturongakon iti papanan ti amin a tattao ditoy daga.”
^ Wenno “agtignayka a nainsiriban.”
^ Lit., “awanto ti matay a lalaki kenka.”
^ Lit., “Dagiti aldaw.”
^ Lit., “inturong ti intero nga Israel ti rupada kaniak.”
^ Wenno “kararua.”
^ Wenno “dinastia.”
^ Wenno “Soberano.”
^ Wenno “kaputotanna.”
^ Wenno “kaputotanna.”
