Ti Umuna nga Ar-ari 5:1-18
5 Idi nadamag ni Hiram nga ari ti Tiro+ a nadutokanen* ni Solomon kas ari a kasukat ni amana, nangibaon kadagiti adipenna a mapan ken Solomon, ta nabayagen nga aggayyem da Hiram ken David.*+
2 Impaibaga met ni Solomon ken ni Hiram:+
3 “Pagaammom unay a saan a napalubosan ni David nga amak a mangbangon iti balay para iti nagan ni Jehova a Diosna ta nakigubgubat kadagiti kabusorna agingga a pinarmek ida ni Jehova.+
4 Ngem ita, impaayannak ni Jehova a Diosko iti naan-anay a talna.+ Awan ti bumusbusor kaniak ken awan ti dakes a mapaspasamak.+
5 Isu nga inkeddengko nga ibangon ti balay a para iti nagan ni Jehova a Diosko, kas inkari ni Jehova ken ni David nga amak, idi kinunana: ‘Ti anakmo nga isaadko nga ari a sumukat kenka ti mangibangonto iti balay a para iti naganko.’+
6 Ita, ibaonmo dagiti tattaom nga ipukanandak kadagiti sedro ti Lebanon.+ Makipagtrabahonto dagiti adipenko kadagiti adipenmo, ket tangdanakto ida sigun iti kayatmo a sueldoda, ta ammom met nga awan kadakami ti makaammo nga agpukan kadagiti kayo a kas iti pamay-an dagiti Sidonio.”+
7 Idi naammuan ni Hiram ti imbaga ni Solomon, naragsakan unay ket kinunana: “Maidaydayaw koma ni Jehova ita nga aldaw, ta inikkanna ni David iti masirib nga anak a mangituray iti daytoy dakkel nga ili!”*+
8 Impaibaga ni Hiram ken ni Solomon: “Naawatko ti mensahem. Itedko ti amin a kiddawem a troso ti sedro ken parwa.+
9 Isalogto dagita dagiti adipenko manipud Lebanon agingga iti baybay, ket ibilinkonto a pagaabayenda a kasla balsa sa ipanda iti kayatmo a pakaisangladanda. Warwarendanto sadiay ket dakayton ti mangbagkat kadagita. Ti kiddawek a kasukatna ket taraon para iti palasiok.”+
10 Inted ngarud ni Hiram ti amin a troso a sedro ken parwa a kiniddaw ni Solomon.
11 Inikkan ni Solomon ni Hiram iti 20,000 a cor* a trigo a pagtaraon iti palasiona ken 20 a cor a puro a lana ti olibo.* Kasta idi ti tinawen nga it-ited ni Solomon ken ni Hiram.+
12 Inikkan ni Jehova ni Solomon iti sirib, kas inkarina kenkuana.+ Natalna idi ti relasion da Hiram ken Solomon, ket nagaramidda iti tulagan.
13 Nangpaayab ni Ari Solomon kadagiti agbalin a trabahadorna manipud intero nga Israel; 30,000 a lallaki.+
14 Agsisinnublatda a naibaon idiay Lebanon, 10,000 iti tunggal bulan. Makabulan nga agtrabahoda sadiay sa dua a bulan nga agyanda iti pagtaenganda. Ni Adoniram+ ti nangidaulo kadakuada.
15 Addaan idi ni Solomon iti 70,000 a trabahador* ken 80,000 a paratikap iti bato+ iti kabambantayan,+
16 ken 3,300 nga opisial+ a mangidaulo kadagiti trabahador.
17 Binilinna ida nga agtebbag iti dadakkel ken nangina a batbato,+ ket mausar dagiti natikap a bato+ kas pundasion+ ti balay.
18 Iti kasta, dagiti trabahador ni Solomon ken dagiti trabahador ni Hiram ken dagiti Gebalita+ ti nangtabas kadagiti bato, ket insaganada dagiti troso ken bato a pangibangon iti templo.
Footnotes
^ Wenno “napulotanen.”
^ Wenno “ta kanayon nga impatpateg ni Hiram ni David.”
^ Wenno “nakaad-adu nga umili.”
^ Lit., “ti nataltal nga olibo.”
^ Wenno “parabunag.”
