Ti Umuna nga Ar-ari 8:1-66
8 Iti dayta a tiempo, inummong ni Solomon+ dagiti panglakayen ti Israel—ti amin a pannakaulo dagiti tribu ken panguluen dagiti pamilia iti Israel.+ Napanda ken Ari Solomon idiay Jerusalem tapno alaenda ti lakasa ti tulag ni Jehova manipud Siudad ni David,+ ti Sion.+
2 Naguummong ti amin a lallaki ti Israel iti sanguanan ni Ari Solomon bayat ti piesta* iti bulan ti Etanim,* wenno ti maikapito a bulan.+
3 Napan ti amin a panglakayen ti Israel, ket inawit dagiti papadi ti Lakasa.+
4 Insang-at dagiti papadi ken Levita ti Lakasa ni Jehova, ti tolda a pagkonsultaan,+ ken ti amin a nasantuan nga alikamen iti tolda.
5 Ni Ari Solomon ken ti amin nga Israelita a naayaban ket adda idi iti sanguanan ti Lakasa. Saan a mabilang ti kaadu ti naidaton a karnero ken baka.+
6 Impan dagiti papadi ti lakasa ti tulag ni Jehova iti lugarna,+ iti kaunegan a siled ti balay, iti Kasasantuan, iti sirok dagiti payak dagiti kerubin.+
7 Nakaukrad dagiti payak dagiti kerubin iti ngatuen ti Lakasa, ket salsalukobanda ti Lakasa ken dagiti assiwna.+
8 Nakaat-atiddog dagiti assiw+ nga uray la makita dagiti murdongda manipud iti Nasantuan iti sango ti kaunegan a siled, ngem saan a makita dagita iti ruar. Addada pay la sadiay agingga ita nga aldaw.
9 Awan ti sabali a linaon ti Lakasa no di ti dua a tapi a bato+ nga inkabil sadiay ni Moises+ idiay Horeb, idi nakitulag ni Jehova+ kadagiti Israelita kalpasan a rimmuarda idiay Egipto.+
10 Idi rimmuar dagiti papadi iti nasantuan a disso, napno iti ulep+ ti balay ni Jehova.+
11 Saan a naituloy dagiti papadi ti trabahoda gapu iti ulep, ta napno iti dayag ni Jehova ti balay ni Jehova.+
12 Iti dayta a tiempo, kinuna ni Solomon: “Imbaga ni Jehova nga agtalinaed iti nakaro a kinasipnget.+
13 Nagballigiak a nangibangon iti nadayag a balay a pagnaedam iti agnanayon.”+
14 Kalpasanna, simmango ti ari iti amin a naguummong nga Israelita ket binendisionanna ida bayat a sitatakderda.+
15 Kinunana: “Maidaydayaw koma ni Jehova a Dios ti Israel, a nagkari* ken David nga amak ken nangtungpal iti dayta babaen ti imana, idi imbagana,
16 ‘Manipud idi aldaw nga inruarko idiay Egipto ti ilik nga Israel, saanak a nangpili iti siudad manipud iti amin a tribu ti Israel a pakaibangonan ti maysa a balay a pagtalinaedan ti naganko,+ no di ket pinilik ni David a mangidaulo iti ilik nga Israel.’
17 Tinarigagayan idi ti puso ni David nga amak nga ibangon ti maysa a balay para iti nagan ni Jehova a Dios ti Israel.+
18 Ngem kinuna ni Jehova ken ni David nga amak, ‘Tarigagayan ti pusom nga ibangon ti maysa a balay para iti naganko, ket naimbag dayta a tarigagay ti pusom.
19 Ngem saanto a sika ti mangibangon iti balay, no di ket ti mismo nga anakmo* ti mangibangonto iti balay para iti naganko.’+
20 Tinungpal ni Jehova ti inkarina, ta siak ti simmaruno ken David nga amak ken agtugtugawak iti trono ti Israel, kas inkari ni Jehova. Imbangonko met ti balay para iti nagan ni Jehova a Dios ti Israel+
21 ken nangaramidak sadiay iti pagyanan ti Lakasa a nakaikabilan ti tulag+ ni Jehova kadagidi ammatayo idi inruarna ida idiay Egipto.”
22 Kalpasanna, nagtakder ni Solomon iti sango ti altar ni Jehova iti sanguanan ti amin a naguummong nga Israelita, ket inyunnatna dagiti imana iti langit,+
23 sa kinunana: “O Jehova a Dios ti Israel, awan ti Dios a kas kenka+ iti langit wenno ditoy daga. Tungtungpalem ti tulagmo ken ipakpakitam ti napudno nga ayatmo+ kadagiti adipenmo nga agserserbi kenka* iti amin a pusoda.+
24 Tinungpalmo ti karim ken amak a David nga adipenmo. Inkarim a mismo dayta, ket tinungpalmo ita nga aldaw.+
25 Ita, O Jehova a Dios ti Israel, tungpalem koma ti karim ken amak a David nga adipenmo idi kinunam: ‘Kanayon nga addanto lalaki a miembro ti pamiliam nga agtugaw iti trono ti Israel, no simamatalek nga agtulnog kaniak dagiti annakmo, kas iti panagtulnogmo kaniak.’+
26 Ita, O Dios ti Israel, pangngaasim ta paneknekam a mapagtalkan ti karim ken amak a David nga adipenmo.
27 “Ngem agnaedto kadi ti Dios ditoy daga?+ No ti langit, wen, ti nakalawlawa a langit, saannaka a malaon;+ anian nga ad-adda pay daytoy a balay nga imbangonko!+
28 Denggem koma ti kararag ti adipenmo nga agpakpakaasi kenka, O Jehova a Diosko, ken ipangagmo ti panagpatulong ken ti kararag daytoy adipenmo iti sanguanam ita nga aldaw.
29 Rabii ken aldaw koma a bantayan dagita matam daytoy a balay, ti lugar nga imbagam, ‘Addanto sadiay ti naganko,’+ tapno denggem ti kararag ti adipenmo nga agkarkararag a sumango iti daytoy a lugar.+
30 Ket ipangagmo ti panagpakaasi ti adipenmo ken ti kiddaw ti ilim nga Israel nga agkararag a sumango iti daytoy a lugar, ket denggem koma manipud dita langit a pagnanaedam;+ wen, dumngegka koma ken mamakawanka.+
31 “No nakabasol ti maysa a tao iti padana a tao sa pagsapataen* ti nakabasolanna ket umay iti sanguanan ti altarmo iti daytoy a balay gapu iti sapatana,*+
32 dumngegka koma dita langit sa agtignayka ken ukomem dagiti adipenmo ket ipakaammom a nagbasol* daydiay dakes ken dusaem gapu iti inaramidna, ken ipakaammom nga inosente* daydiay nalinteg ken gunggonaam maitunos iti kinalintegna.+
33 “No abaken ti kabusor ti ilim nga Israel gapu ta itultuloyda ti agbasol kenka,+ ket agsublida kenka ken idayawda ti naganmo+ sa agkararag ken agpakpakaasida kenka iti daytoy a balay,+
34 dumngegka koma dita langit ken pakawanem ti basol ti ilim nga Israel ken isublim ida iti daga nga intedmo kadagidi ammada.+
35 “No maserraan ti langit ket saan nga agtudo+ gapu ta itultuloyda ti agbasol kenka,+ ngem agkararagda a sumango iti daytoy a lugar ket idayawda ti naganmo ken pagbabawyanda ti basolda ta pinagpakumbabam* ida,+
36 dumngegka koma dita langit ket pakawanem ti basol dagiti adipenmo, ti ilim nga Israel, ta isuromto kadakuada+ ti naimbag a dalan a rumbeng a pagnaanda; ket pagtuduem iti daga+ nga intedmo kas tawid ti ilim.
37 “No dumteng iti daga ti nakaro a bisin,+ wenno makapapatay a sakit, nakaro a pudot, panagbuot,+ dagiti rineprep a dudon, wenno dagiti narawet a dudon; wenno no rauten ida ti kabusorda iti aniaman a siudad iti daga* wenno no dumteng ti didigra wenno sakit,+
38 uray ania ti ikararag ken ipakaasi+ ti asinoman a tao wenno ti intero nga ilim nga Israel (ta ammo ti tunggal maysa ti sagsagabaen ti pusona)+ ket iyunnatda dagiti imada a maiturong iti daytoy a balay,
39 dumngegka koma dita langit a pagnanaedam,+ ket mamakawan+ ken agtignayka koma; ket gunggonaam ti tunggal maysa sigun iti amin nga aramidna,+ ta ammom ti pusona (sika laeng ti pudno a makaammo iti puso ti tunggal tao),+
40 tapno agbutengda koma kenka iti amin nga aldaw ti panagbiagda iti daga nga intedmo kadagidi ammami.
41 “No addanto met ganggannaet a saan a paset ti ilim nga Israel nga aggapu iti adayo a daga nga umay gapu iti naganmo*+
42 (ta madamagdanto a naindaklan ti naganmo,+ mannakabalin ti imam, ken nabileg* ti takiagmo), ket umay ken agkararag a sumango iti daytoy a balay,
43 dumngegka koma dita langit a pagnanaedam,+ ket aramidem ti amin a kidkiddawen ti ganggannaet, tapno maammuan ti amin a tattao iti daga ti naganmo ket agbutengda kenka,+ kas iti panagbuteng ti ilim nga Israel, ken maammuanda koma a naipanagan ti naganmo iti daytoy a balay nga imbangonko.
44 “No mapan makigubat ti ilim iti kabusorda iti pangibaonam kadakuada,+ ket agkararagda kenka,+ O Jehova, a sumango iti siudad a pinilim+ ken iti balay nga imbangonko para iti naganmo,+
45 denggem koma dita langit ti kararag ken panagpakaasida ket ipaayam ida iti hustisia.
46 “No agbasolda kenka (ta awan ti tao a saan nga agbasol),+ ket makapungtotka kadakuada ken baybay-am ida nga abaken ti kabusorda sa matiliw ken maipanda iti daga ti kabusor, adayo man wenno asideg;+
47 ket mabigbigda sadiay ti basolda, ken agsublida kenka+ ken agpakaasida iti daga dagiti nangala kadakuada,+ nga ibagbagada, ‘Nagbasol ken nagbiddutkami; dakes ti inaramidmi,’+
48 ket agsublida kenka iti amin a puso+ ken kararuada* iti daga dagiti kabusorda a nangipanaw kadakuada, sa agkararagda kenka a sumango iti dagada nga intedmo kadagidi ammada ken iti siudad a pinilim ken iti balay nga imbangonko para iti naganmo,+
49 denggem koma dita langit a pagnanaedam+ ti kararag ken panagpakaasida, ket ipaayam ida iti hustisia
50 ken pakawanem ti ilim a nagbasol kenka ken ti amin a salungasingda kenka. Tignayemto dagiti nangtiliw kadakuada ket kaasiandanto ida+
51 (ta adipen ken tawidmo ida+ nga inruarmo idiay Egipto,+ iti urno a pagtunawan iti landok).+
52 Kumita koma dagiti matam ket denggem ti panagpakaasi+ ti adipenmo ken ti panagpakaasi ti ilim nga Israel babaen ti panangipangagmo tunggal umawagda kenka.*+
53 Ta inlasinmo ida kas tawidmo manipud iti amin a nasion iti daga,+ kas imbagam ken Moises nga adipenmo idi inruarmo dagidi ammami idiay Egipto, O Kangatuan* nga Apo Jehova.”
54 Idi nayebkasen ni Solomon daytoy a kararag ken panagpakaasina ken Jehova a nakaparintumeng ken nakaunnat dagiti imana iti langit, timmakder iti sanguanan ti altar ni Jehova.+
55 Kalpasanna, nagtakder iti sanguanan dagiti naguummong nga Israelita ket binendisionanna ida a sipipigsa nga imbagana:
56 “Maidaydayaw koma ni Jehova, a nangipaay iti paginanaan ti ilina nga Israel, kas inkarina.+ Awan uray maysa a sao ti napaay iti amin a nagsasayaat a karina babaen ken Moises nga adipenna.+
57 Adda koma kadatayo ni Jehova a Diostayo a kas iti kaaddana kadagidi ammatayo.+ Dinatay koma panawan wenno baybay-an.+
58 Tignayenna koma ti pusotayo+ a magna iti amin a dalanna ken mangtungpal kadagiti bilin, regulasion, ken pangngeddengna, nga imbilinna a tungpalen dagidi ammatayo.
59 Aldaw ken rabii koma a laglagipen ni Jehova dagitoy nga inyararawko ken Jehova a Diostayo, tapno maipaayanna ti adipenna ken ti ilina nga Israel iti panangukom a kasapulanda iti inaldaw,
60 tapno maammuan koma ti amin a tattao ditoy daga a ni Jehova ti pudno a Dios.+ Awanen sabali!+
61 Gapuna, pagbalinenyo a naan-anay ti pusoyo*+ ken Jehova a Diostayo babaen ti panangsurotyo kadagiti regulasionna ken panangtungpalyo kadagiti bilinna kas ita nga aldaw.”
62 Kalpasanna, nangipaay ti ari ken ti intero nga Israel iti nakaad-adu a daton iti sanguanan ni Jehova.+
63 Nangipaay ni Solomon iti 22,000 a baka ken 120,000 a karnero kas daton a pakikappia+ ken Jehova. Iti kasta, indedikar ti ari ken ti amin nga Israelita ti balay ni Jehova.+
64 Iti dayta nga aldaw, pinagbalin ti ari a sagrado ti tengnga ti paraangan iti sanguanan ti balay ni Jehova, ta sadiay nga ipaayna dagiti daton a mapuoran, daton a bukbukel, ken ti taba dagiti daton a pakikappia, ta saan a malaon ti altar a gambang+ iti sanguanan ni Jehova dagiti daton a mapuoran, daton a bukbukel, ken ti taba+ dagiti daton a pakikappia.
65 Iti dayta a tiempo, sinelebraran ni Solomon ti piesta+ iti sanguanan ni Jehova a Diostayo iti 7 nga aldaw ken sabali pay a 7 nga aldaw, 14 nga aldaw amin, a kaduana ti intero nga Israel—ti nakaad-adu nga umili a naggapu idiay Lebo-hamat* agingga iti Karayan* ti Egipto.+
66 Pinagawidna dagiti umili iti simmaruno* nga aldaw. Indawat dagiti umili a bendisionan koma ti Dios ti ari sa siraragsak a nagawidda kadagiti pagtaenganda a maragragsakan ti pusoda iti amin a kinaimbag+ nga impakita ni Jehova ken ni David nga adipenna ken iti Israel nga ilina.
Footnotes
^ Kayatna a sawen, ti Piesta ti Abong-abong.
^ Lit., “nagsao ti ngiwatna.”
^ Lit., “ti anakmo, daydiay naggapu kadagiti lomom.”
^ Lit., “a magmagna iti sanguanam.”
^ Kayatna a sawen, sapata nga adda kakuyogna a lunod kas dusa no ulbod ti sapata wenno saan a natungpal.
^ Lit., “lunodna.”
^ Lit., “dakes.”
^ Lit., “nalinteg.”
^ Wenno “pinarigatmo.”
^ Lit., “iti daga dagiti ruanganna.”
^ Wenno “reputasionmo.”
^ Lit., “nakaunnat.”
^ Wenno “iti tunggal kiddawenda kenka.”
^ Wenno “Soberano.”
^ Wenno “debosionyo.”
^ Wenno “pagserkan ti Hamat.”
^ Karayan a maaddaan laeng iti danum no panagtutudo.
^ Lit., “maikawalo,” kayatna a sawen, ti sumaruno nga aldaw kalpasan ti maikadua a pito nga aldaw.
