Ti Umuna nga Ar-ari 9:1-28
9 Apaman a nalpas ni Solomon nga imbangon ti balay ni Jehova, ti balay* ti ari,+ ken ti aniaman a kayatna nga ibangon,+
2 nagpakita manen ni Jehova ken ni Solomon, kas iti panagpakitana kenkuana idiay Gibeon.+
3 Kinuna ni Jehova: “Nangngegko ti kararagmo ken ti panagpakaasim iti sanguanak. Pinagbalinko a nasantuan daytoy a balay nga imbangonmo babaen ti permanente a panangikabilko iti naganko iti dayta,+ ket kanayonto nga adda iti dayta dagiti mata ken pusok.+
4 No agtulnogka kaniak a kas iti panagtulnog ni David nga amam,+ buyogen ti naan-anay a puso+ ken kinalinteg,+ nga aramidem ti amin nga imbilinko kenka,+ ken tungpalem dagiti regulasion ken pangngeddengko,+
5 ipasdekkonto ti trono ti pagariam iti Israel iti agnanayon, kas inkarik ken David nga amam, idi kinunak, ‘Kanayon nga addanto lalaki a miembro ti pamiliam nga agtugaw iti trono ti Israel.’+
6 Ngem no agsukirka kaniak ken dagiti annakmo ken diyo tungpalen dagiti bilin ken paglintegak, ket agserbi ken agruknoykayo kadagiti sabali a dios,+
7 punasekto ti Israel iti rabaw ti daga nga intedko kadakuada,+ ken baybay-ak ti balay a pinagbalinko a nasantuan para iti naganko,+ ket laisen* ken uyawento dayta ti amin a tattao.+
8 Agbalinto a bunton dagiti rebba daytoy a balay.+ Masdaaw ken agsanaltekto* ti amin a lumabas ket ibagada, ‘Apay a kasta ti inaramid ni Jehova iti daytoy a daga ken iti daytoy a balay?’+
9 Kunadanto ngarud, ‘Pinanawanda ngamin ni Jehova a Diosda, a nangiruar kadagidi ammada idiay Egipto, ket nagserbi ken nagruknoyda kadagiti sabali a dios ken nagdayawda kadagita. Dayta ti makagapu nga impalak-am ni Jehova kadakuada amin daytoy a didigra.’”+
10 Naibangon ni Solomon ti dua a balay, ti balay ni Jehova ken ti balay* ti ari, iti 20 a tawen.+
11 Nangted ni Hiram+ nga ari ti Tiro ken ni Solomon iti adu a troso a sedro ken kayo a parwa ken balitok sigun iti kayatna a kaadu,+ isu nga inikkan ni Ari Solomon ni Hiram iti 20 a siudad iti Galilea.
12 Nagrubbuat ni Hiram manipud Tiro ket napanna kinita dagiti siudad nga inted kenkuana ni Solomon, ngem saanna a nagustuan dagita.*
13 Kinunana: “Ania a kita ti siudad dagitoy nga intedmo kaniak, kabsatko?” Gapuna, naawagan dagita iti Daga ti Cabul* agingga ita nga aldaw.
14 Nakaipatulod ni Hiram iti ari iti 120 a talento* a balitok.+
15 Daytoy ti salaysay maipapan kadagiti pinaayaban ni Ari Solomon nga agtrabaho kenkuana+ tapno maibangon ti balay ni Jehova,+ ti bukodna a balay,* ti Bunton,*+ ti pader ti Jerusalem, Hazor,+ Megiddo,+ ken Gezer.+
16 (Rinaut idi ni Faraon nga ari ti Egipto ti Gezer sa pinuoranna. Pinapatayna pay dagiti Canaanita+ nga agnanaed iti dayta a siudad. Intedna dayta kas sagut* iti anakna a babai,+ nga asawa ni Solomon.)
17 Tinarimaan* ni Solomon ti Gezer, Makimbaba a Bet-horon,+
18 Baalat,+ ken ti Tamar idiay let-ang, a sakup ti teritoriana,
19 kasta met ti amin a siudad a pagidulinan a kukua ni Solomon, dagiti siudad a pagyanan dagiti karuahe+ ken kumakabalio, ken aniaman a kayat nga ibangon ni Solomon idiay Jerusalem, Lebanon, ken iti intero a daga a pagturayanna.
20 Amin a natda nga Amoreo, Heteo, Perizeo, Heveo, ken Jebuseo,+ a saan a paset ti ili ti Israel,+
21 dagiti kaputotanda a nabati—dagidiay saan a napapatay dagiti Israelita—ket pinagtrabaho ni Solomon kas adipen agingga ita nga aldaw.+
22 Ngem awan ti Israelita a pinagbalin ni Solomon nga adipen,+ ta nagserbida kas soldado, opisial iti palasio, prinsipe, opisial iti militar, ken panguluen dagiti kumakaruahe ken kumakabalio.
23 Adda 550 a panguluen dagiti opisial a mangay-aywan iti trabaho ni Solomon, isuda ti mangidadaulo kadagiti trabahador.+
24 Immakar ti anak a babai ni Faraon+ manipud iti Siudad ni David+ ket nagnaed iti balay nga imbangon ni Solomon para kenkuana. Kalpasanna, imbangonna ti Bunton.*+
25 Mamitlo iti makatawen+ a nangipapaay ni Solomon kadagiti daton a mapuoran ken daton a pakikappia iti altar nga imbangonna para ken Jehova,+ ket nangidatag pay iti daton a mangpataud iti asuk iti altar, iti sanguanan ni Jehova. Iti kasta, nakompleto nga imbangon ni Solomon ti balay.+
26 Nangaramid ni Ari Solomon iti adu a barko idiay Ezion-geber,+ iti abay ti Elot, iti igid ti Nalabaga a Baybay idiay Edom.+
27 Nangibabaon ni Hiram kadagiti adipenna nga eksperto a marino, a makikadua kadagiti adipen ni Solomon ken tumulong iti panaglayag dagiti barko.+
28 Napanda idiay Ofir+ ket nangalada sadiay iti 420 a talento a balitok sa inyegda ken Ari Solomon.
Footnotes
^ Wenno “palasio.”
^ Lit., “agbalin a proverbio.”
^ Lit., “agsagawisiwto.”
^ Wenno “palasio.”
^ Lit., “saan nga umiso dagita iti imatangna.”
^ Wenno mabalin a, “Daga nga Awan Serserbina.”
^ Wenno “palasio.”
^ Wenno “Millo.” Hebreo a sao a kaipapananna, “gabur.”
^ Wenno “sagut iti kasar; sab-ong.”
^ Wenno “Pinatibker.”
^ Wenno “Millo.” Hebreo a sao a kaipapananna, “gabur.”
