Umuna Kadagiti Taga-Corinto 11:1-34
11 Tuladendak koma, kas iti panangtuladko ken Kristo.+
2 Komendarankayo ta pampanunotendak iti amin a banag ken sursurotenyo a naimbag dagiti tradision kas iti insurok kadakayo.
3 Ngem kayatko a maammuanyo a ti Kristo ti ulo ti tunggal lalaki;+ ti lalaki ti ulo ti babai;+ ti Dios ti ulo ti Kristo.+
4 Tunggal lalaki nga agkararag wenno agipadto a nakadalungdong, ibabainna ti ulona;
5 ngem tunggal babai nga agkararag wenno agipadto+ a saan a nakadalungdong, ibabainna ti ulona, ta kas man la kiniskisanna ti ulona.
6 Ta no saan nga agdalungdong ti maysa a babai, masapul nga ipapukisna ti buokna; ngem no nakababain kenkuana ti mapukisan wenno makalbo, agdalungdong koma.
7 Saan a rumbeng nga agdalungdong ti maysa a lalaki, ta isu ti ladawan ken dayag ti Dios,+ ngem ti babai ti dayag ti lalaki.
8 Ta saan a nagtaud ti lalaki iti babai, no di ket ti babai ti nagtaud iti lalaki.+
9 Maysa pay, saan a naparsua ti lalaki gapu iti babai, no di ket naparsua ti babai gapu iti lalaki.+
10 Dayta ti makagapu a masapul nga agdalungdong ti babai kas tanda ti panagpasakupna iti ulona, gapu kadagiti anghel.+
11 Ngem no maipapan iti Apo, kasapulan ti lalaki ti babai ken kasapulan ti babai ti lalaki.
12 Ta no kasano a nagtaud ti babai iti lalaki,+ nayanak met ti lalaki babaen ti babai; ngem nagtaud ti amin a banag iti Dios.+
13 Dakayo ti agdesision: Maitutop kadi a saan nga agdalungdong ti babai no agkararag iti Dios?
14 Saan kadi a gagangay a pakaibabainan ti lalaki no atiddog ti buokna,
15 ngem pakaidayawan ti babai no atiddog ti buokna? Ta naited ti buokna kas dalungdongna.
16 Ngem no adda saan nga umanamong iti daytoy gapu iti sabali a kostumbre, ammotayo nga awan ti sabali a kostumbretayo, ken uray dagiti kongregasion ti Dios.
17 Ngem bayat ti panangitedko kadagitoy nga instruksion, saankayo a komendaran, ta saan a pagsayaatan no di ket pagdaksan ti panagtataripnongyo.
18 Ta umuna iti amin, nadamagko a mabingaybingaykayo no agtataripnongkayo; ket mamatiak bassit iti dayta.
19 Sigurado nga addanto met dagiti tumaud a sekta iti nagtetengngaanyo;+ ngem iti kastoy a pamay-an, makitanto no asino kadakayo ti pakaragsakan ti Dios.
20 No agtataripnongkayo iti maysa a lugar, ti panggepyo ket saan a tapno mangan iti Pangrabii ti Apo.+
21 Ta no kanenyon dayta, nangrabiin ti dadduma kadakayo, isu nga adda mabisin ken adda met nabarteken.
22 Awan kadi ti balay a panganan ken uminumanyo? Wenno lalaisenyo kadi ti kongregasion ti Dios ken pabpabainanyo dagidiay napanglaw? Ania ngarud ti maibagak kadakayo? Komendarankayo? Saankayo a komendaran gapu iti daytoy.
23 Ta inawatko iti Apo daydiay inyawatko kadakayo, nga iti rabii+ a pannakatraidor ni Apo Jesus, nangala iti tinapay,
24 ket kalpasan a nagyaman, pinispisina sa kinunana: “Daytoy ti mangisimbolo iti bagik+ nga agpaay kadakayo. Itultuloyyo nga aramiden daytoy kas panglaglagip kaniak.”+
25 Innalana met ti kopa+ idi nalpasdan a nangrabii ket kinunana: “Daytoy a kopa ti mangisimbolo iti baro a tulag+ a patalgedan ti darak.+ Itultuloyyo nga aramiden daytoy, kaanoman nga uminumkayo iti daytoy, kas panglaglagip kaniak.”+
26 Ta kaanoman a kanenyo daytoy a tinapay ken uminumkayo iti daytoy a kopa, ipakpakaammoyo ti ipapatay ti Apo agingga iti iyaayna.
27 Gapuna, asinoman a saan a maikari a mangan iti tinapay wenno uminum iti daytoy a kopa ket makabasol mainaig iti bagi ken dara ti Apo.
28 Siguraduen koma nga umuna ti maysa a tao no maikari+ sakbay a mangan iti tinapay ken uminum iti kopa.
29 Ta ti mangan ken uminum a saanna a matarusan ti isimbolo ti bagi ti Apo, mangmangan ken umin-inum iti pannakaukomna.
30 Dayta ti makagapu nga adu kadakayo ti nakapuy ken masakit, ken sumagmamanon ti matmaturog ken patay.*+
31 Ngem no masiguradotayo no aniatayo, saantayto a maukom.
32 Nupay kasta, no maukomtayo, disiplinaennatayo ni Jehova,*+ tapno saantayo a makondenar a kadua ti lubong.+
33 Gapuna, kakabsatko, no agtataripnongkayo tapno kanenyo dayta, agiinnuraykayo.
34 No adda mabisin kadakayo, mangan koma iti balayna, tapno inton agtataripnongkayo, saanto a maukom.+ Ngem asikasuekto ti dadduma pay a banag inton addaak dita.
