Umuna Kadagiti Taga-Corinto 15:1-58
15 Ita, ipalagipko kadakayo, kakabsat, ti naimbag a damag nga impakaammok kadakayo,+ nga inawatyo met, ken agtultuloy a sursurotenyo.
2 Maisalakankayo met no petpetpetanyo a naimbag ti impakaammok kadakayo a naimbag a damag. Ta no saan, awan serserbi ti panamatiyo.
3 Ta ti immuna kadagiti banag nga inyawatko kadakayo ket isu met ti inawatko, a natay ti Kristo para kadagiti basoltayo sigun iti Kasuratan;+
4 ken naitabon,+ wen, sa napagungar+ iti maikatlo nga aldaw+ sigun iti Kasuratan;+
5 ken nagparang ken Cefas,*+ sa iti Sangapulo ket Dua.+
6 Kalpasanna, nagparang iti nasurok a 500 a kakabsat iti maysa a gundaway,+ a kaaduan kadakuada ti kaduatayo agingga ita, nupay naturogen ken patay ti dadduma.
7 Kalpasanna, nagparang ken Santiago,+ sa iti amin nga apostol.+
8 Ngem siak ti kaudian a nagparanganna,+ a kaslaak nayanak a kurang ti bulanna.
9 Ta siak ti kanunumuan kadagiti apostol, ken saanak a maikari a maawagan iti apostol ta indadanesko ti kongregasion ti Dios.+
10 Ngem gapu iti nagpaiduma a kinaimbag ti Dios, maysaak nga apostol. Nasayaat ti bunga ti nagpaiduma a kinaimbagna kaniak, ta ad-adu ti panagbannogko ngem kadakuada amin; ngem saan nga iti bukodko a pigsa, no di ket iti nagpaiduma a kinaimbag ti Dios nga adda kaniak.
11 Nupay kasta, siak man wenno isuda, kastoy ti panangasabami isu a nagbalinkayo a manamati.
12 No maikaskasaba a napagungar ni Kristo,+ apay ngarud nga ibaga ti dadduma kadakayo a saan a mapagungar dagiti natay?
13 No talaga a saan nga agungar dagiti natay, saan met ngarud a napagungar ni Kristo.
14 Ngem no saan a napagungar ni Kristo, awan serserbi ti panangasabatayo ken ti pammatiyo.
15 Kasta met, ulbodtayo a saksi ti Dios+ no ibagatayo a pinagungarna ti Kristo,+ ngem saanna met gayam nga inaramid dayta no agpayso a saan a mapagungar dagiti natay.
16 Ta no saan a mapagungar dagiti natay, saan met a napagungar ni Kristo.
17 Kanayonanna, no saan a napagungar ni Kristo, awan serserbi ti pammatiyo; saan met a napakawan dagiti basolyo.+
18 Kasta met, agnanayon nga awanen dagidiay naturog ken patay a naikaykaysa ken Kristo.+
19 No iti daytoy laeng a biag a mangnamnamatayo ken Kristo, napimpimantayo pay ngem iti asinoman.
20 Nupay kasta, napagungar ni Kristo, ti umuna a bungbunga kadagidiay naturogen ken patay.+
21 Ta no kasano nga adda ipapatay gapu iti maysa a tao,+ adda met panagungar dagiti natay gapu iti maysa a tao.+
22 Ta no kasano a matmatay ti amin gapu ken Adan,+ mapagbiagto met ti amin gapu iti Kristo.+
23 Ngem kastoy ti panagsasaruno dagiti mapagungar: ti Kristo ti umuna a bungbunga,+ kalpasanna, dagidiay kukua ti Kristo bayat ti kaaddana.+
24 Sumaganad, iti ngudo, inton iyawatna ti Pagarian iti Dios ken Amana, inton madadaelnan ti amin a gobierno ken amin nga autoridad ken pannakabalin.+
25 Ta masapul nga agturay kas ari agingga a maikabil ti Dios ti amin a kabusorna iti baba dagiti sakana.+
26 Ket mapukawto ti maudi a kabusor, ni patay.+
27 Ta ti Dios “impasakupna ti amin a banag iti baba dagiti saka ni Kristo.”+ Ngem ti sasao a ‘naipasakup ti amin a banag,’+ nalawag a saan a karaman Daydiay nangipasakup kenkuana iti amin a banag.+
28 Ngem inton naipasakupen kenkuana ti amin a banag, agpasakupto metten ti Anak iti Daydiay nangipasakup kenkuana iti amin a banag,+ tapno ti Dios ti mangituray iti amin a banag.+
29 Ta no saan, anianto ti gunggona dagidiay mabautisaran no mataydanto laeng?+ No saanto a pulos mapagungar dagiti natay, apay a mabautisaranda no mataydanto met laeng?
30 Apay nga agpegpeggadtayo pay laeng iti tunggal oras?*+
31 Inaldaw a maipaspasangoak iti ipapatay, kas iti panagrag-ok gapu kadakayo, kakabsat, kas ad-adalan ni Kristo Jesus nga Apotayo.
32 No nakilabanak kadagiti narungsot nga animal idiay Efeso+ kas iti inaramid ti dadduma,* ania ti pagsayaatan dayta kaniak? No saan a mapagungar dagiti natay, “mangan ken uminumtayo, ta inton bigat mataytayo.”+
33 Dikay agpaallilaw. Dagiti dakes a kakadua dadaelenda dagiti nasayaat nga ugali.*+
34 Agpanunotkayo ken aramidenyo ti umiso ken diyo iyugali ti agbasol, ta ti dadduma kadakayo ket awan pannakaammona iti Dios. Ibagbagak daytoy tapno agbainkayo.
35 Ngem adda mangibaga: “Kasano koma a mapagungar dagiti natay? Wen, anianto ti bagida inton mapagungarda?”+
36 Saanka a nainkalintegan a tao! Saan nga agtubo ti imulam no saan a matay nga umuna.
37 Saan a ti mula a dimmakkel ti imulam no di ket ti bukel laeng, trigo wenno aniaman a bukel;
38 ngem padakkelen dayta ti Dios sigun iti kayatna, ken bayat ti panagtubo ti tunggal bukel, saanda nga agpapada.
39 Saan nga agpapada ti amin a lasag, ngem agpapada ti lasag ti tao. Sabali ti lasag dagiti animal, sabali ti lasag dagiti billit, ken sabali ti lasag dagiti ikan.
40 Adda dagiti nailangitan a bagi+ ken naindagaan a bagi;+ ngem naiduma ti dayag dagiti nailangitan a bagi, ken naiduma met dagiti naindagaan a bagi.
41 Naiduma ti dayag ti init, naiduma ti dayag ti bulan,+ ken naiduma met ti dayag dagiti bituen; kinapudnona, naiduma ti dayag ti maysa a bituen iti sabali a bituen.
42 Kastanto met ti mapasamak inton mapagungar dagiti natay. Maimula dayta nga agrupsa, mapagungar a di agrupsa.+
43 Maimula a maibabain, mapagungar a maipadayag.+ Maimula a nakapuy, mapagungar nga addaan pannakabalin.+
44 Maimula a pisikal a bagi, mapagungar a naespirituan a bagi. No adda pisikal a bagi, adda met naespirituan a bagi.
45 Isu a naisurat: “Nagbalin a sibibiag a parsua* ti umuna a tao a ni Adan.”+ Nagbalin nga espiritu a mangted iti biag ti maudi nga Adan.+
46 Nupay kasta, ti umuna a bagi ket saan a naespirituan. Ti pisikal a bagi ti umuna, kalpasanna, ti naespirituan.
47 Nagtaud iti daga ti umuna a tao ken naaramid iti tapok;+ naggapu idiay langit ti maikadua a tao.+
48 Dagiti tattao ditoy daga ket kas iti daydiay naaramid iti tapok. Ken dagidiay adda idiay langit ket kas iti daydiay naggapu idiay langit.+
49 No kasano a kaladladawantayo daydiay naaramid iti tapok,+ kaladladawantayto met daydiay naggapu idiay langit.+
50 Ngem ibagak daytoy kadakayo, kakabsat, a saan a makastrek ti lasag ken dara iti Pagarian ti Dios, isu a ti agrupsa saan met nga agbalin a di agrupsa.
51 Ibagak kadakayo ti sagrado a palimed: Saan a datayo amin ket maturog ken patay, ngem mabaliwantayto amin,+
52 iti apagbiit, iti panagkirem ti mata, bayat ti maudi a trumpeta. Ta mapuyotto ti trumpeta,+ ken mapagungarto a di agrupsa dagiti natay, ket mabaliwantayto.
53 Ta daytoy nga agrupsa ket agbalinto a di agrupsa,+ ken daytoy a mortal ket agbalinto nga immortal.+
54 Ngem inton agbalin a di agrupsa daytoy nga agrupsa ken agbalin nga immortal daytoy a mortal, mapasamakto daytoy a naisurat: “Maalimonto ni patay iti agnanayon.”+
55 “Patay, ayan ti panagballigim? Patay, ayan ti siludmo?”+
56 Ti silud a pakaigapuan ti ipapatay isu ti basol,+ ken ti pannakabalin ti basol ket ti Linteg.*+
57 Ngem pagyamanan iti Dios, ta pinagballiginatayo ken patay babaen ken Apotayo a Jesu-Kristo!+
58 Gapuna, patpatgek a kakabsat, agbalinkayo a natibker+ ken di magaraw, a kanayon nga adu ti aramidenyo iti trabaho ti Apo,+ ta ammoyo a saan a sayang ti panagbannogyo+ mainaig iti Apo.
Footnotes
^ Naawagan met iti Pedro.
^ Wenno “iti amin a tiempo?”
^ Wenno mabalin nga, “iti panangmatmat ti tao.”
^ Wenno “a kababalin.”
^ Wenno “kararua.”
^ Wenno “ken ti Linteg ikkanna ti basol iti pannakabalin.”
