Umuna Kadagiti Taga-Corinto 2:1-16
2 Isu nga idi immayko impakaammo kadakayo ti sagrado a palimed+ ti Dios, kakabsat, saankayo a pinagsiddaaw iti sasao+ wenno sirib.
2 Ta idi addaak kadakayo, inkeddengko a saanak nga agsao iti aniaman no di laeng ti maipapan ken Jesu-Kristo, a nabitay iti kayo.+
3 Idi immayak kadakayo, nakapuy ken mabutbuteng ken agpigpigergerak;
4 ket saanak a nagusar iti makaguyugoy a sasao nga us-usaren dagiti masirib, no di ket impakita ti sasaok ti pannakabalin ti nasantuan nga espiritu,+
5 tapno maibatay ti pammatiyo, saan nga iti sirib ti tao, no di ket iti pannakabalin ti Dios.
6 Agsaokami maipapan iti sirib kadagiti nataengan iti naespirituan,+ ngem saan a ti sirib daytoy a sistema ti bambanag* wenno ti sirib dagiti agtuturay daytoy a sistema ti bambanag, a mapukawto.+
7 No di ket sawenmi ti sirib ti Dios a nailemmeng iti sagrado a palimed,+ a pinanggep ti Dios sakbay daytoy a sistema tapno maipadayagtayo.
8 Daytoy a sirib ti saan a naammuan ti uray maysa kadagiti agtuturay iti daytoy a sistema ti bambanag,* ta no naammuanda dayta,+ saanda koma a pinatay* ti nadayag nga Apo.
9 Ngem kas iti naisurat: “Saan a nakita ti mata ken saan a nangngeg ti lapayag, ken saan a pinanunot ti puso ti tao ti bambanag nga insagana ti Dios kadagiti agayat kenkuana.”+
10 Ta impakaammo dagita ti Dios kadatayo+ babaen ti espirituna,+ ta sukimaten ti espiritu ti amin a banag, uray ti nauneg a bambanag ti Dios.+
11 Ta asino ti makaammo iti adda iti panunot ti maysa a tao no di laeng ti pusona?* Gapuna, awan met ti makaammo iti panunot ti Dios no di laeng ti espiritu ti Dios.
12 Inawattayo, saan a ti espiritu ti lubong, no di ket ti espiritu manipud iti Dios,+ tapno maammuantayo ti bambanag a siaayat nga inted kadatayo ti Dios.
13 Sawenmi met dagitoy a banag, saan a babaen ti sasao nga insuro ti sirib ti tao,+ no di ket babaen ti sasao nga insuro ti espiritu,+ bayat nga ilawlawagmi* ti naespirituan a bambanag babaen ti naespirituan a sasao.
14 Ngem saan nga akseptaren* ti pisikal a tao ti bambanag maipapan iti espiritu ti Dios, ta ibilangna dagita a kinamaag; ket saanna a matarusan, ta masukimat dagita iti naespirituan a pamay-an.
15 Nupay kasta, sukimaten ti naespirituan a tao ti amin a banag,+ ngem isu ket saan a sukimaten ti asinoman a tao.
16 Ta “asino ti makatarus iti panunot ni Jehova,* tapno mabalinna nga isuro?”+ Ngem adda kadatayo ti panunot ni Kristo.+
Footnotes
^ Wenno “binitay iti kayo.”
^ Lit., “espirituna.”
^ Wenno “itiptiponmi.”
^ Wenno “awaten.”
