Ti Maikadua a Samuel 11:1-27
11 Iti rugrugi ti tawen,* iti tiempo a panaggugubat dagiti ari, imbaon ni David ni Joab ken dagiti adipenna ken ti intero nga armada ti Israel tapno abakenda dagiti Ammonita. Pinalikmutanda ti Rabba+ bayat a nagbati ni David idiay Jerusalem.+
2 Maysa a rabii,* bimmangon ni David iti katrena ket nagpagnapagna iti tuktok ti palasiona. Manipud iti ayanna, natannawaganna ti maysa a nakapimpintas a babai nga agdigdigus.
3 Adda imbaon ni David a mapan mangammo no asino ti babai, ket impadamagna: “Isu ni Bat-sheba+ nga anak ni Eliam+ ken asawa ni Urias+ a Heteo.”+
4 Nangibaon ni David kadagiti mapan mangala ken Bat-sheba,+ isu a napan ti babai ket kinaidda ni David.+ (Napasamak daytoy bayat a sursurotenna ti linteg maipapan iti panangdalus iti bagina manipud iti kinarugitna.*)+ Kalpasanna, nagawiden ni Bat-sheba.
5 Nagsikog ti babai, ket impaibagana ken David: “Masikogak.”
6 Impaibaga ni David ken Joab: “Pagawidem ni Urias a Heteo ket ibagam nga umay kaniak.” Isu nga imbaon ni Joab ni Urias a mapan ken David.
7 Idi sumangpet ni Urias, dinamag ni David ti kasasaad ni Joab ken dagiti soldado ken no ania ti pagbambanagan ti gubat.
8 Kinuna ni David ken Urias: “Agawidka ken aginanaka.”* Idi nakapanawen ni Urias iti palasio ti ari, nangipatulod ti ari iti regalo* kenkuana.
9 Ngem naturog ni Urias iti pagserkan ti palasio ti ari a kadua ti amin a dadduma pay nga adipen ti apona. Saan a nagawid iti balayna.
10 Naipadamag ken David: “Saan a nagawid ni Urias iti balayna.” Isu a kinuna ni David ken Urias: “Saan kadi a sangsangpetmo? Apay a dika nagawid iti balaymo?”
11 Insungbat ni Urias ken David: “Ti Lakasa+ ken ti armada ti Israel ken Juda ket adda kadagiti tolda, ken agkamkampo ni apok a Joab ken dagiti adipenna iti tanap. Rumbeng ngata ngarud nga agawidak iti balayko tapno mangan ken uminumak ken makikaiddaak iti asawak?+ Ikarik kadakayo bayat a sibibiagkayo a diak pulos aramiden dayta!”
12 Kinuna ni David ken Urias: “Agyanka pay la ditoy ita nga aldaw, ta inton bigat, palubosankanto nga agawid.” Isu a nagtalinaed ni Urias idiay Jerusalem iti dayta nga aldaw ken iti simmaruno nga aldaw.
13 Kalpasanna, pinaayaban ni David tapno agkaduada a mangan ken uminum, ket binartekna ni Urias. Ngem karabiyanna, naturog ni Urias a kadua dagiti adipen ti apona, ken saan a nagawid iti balayna.
14 Kabigatanna, nagsurat ni David ken Joab ket impaw-itna dayta ken Urias.
15 Kastoy ti linaon ti suratna: “Ibaonmo ni Urias iti makinsango a paset ti paggugubatan a kakaruan ti panaglalaban, sa panawam ken baybay-am a mapapatay.”+
16 Sinipsiputan a naimbag ni Joab ti siudad, ket imbaonna ni Urias iti lugar nga ammona nga ayan dagiti nabileg a soldado dagiti kabusor.
17 Idi rimmuar dagiti kabusor manipud iti siudad ken nakilabanda ken Joab, napapatay ti dadduma kadagiti adipen ni David, a pakairamanan ni Urias a Heteo.+
18 Impadamag ni Joab ken David ti amin a napasamak iti gubat.
19 Imbilinna iti imbaonna nga agipadamag: “Inton maibagamon iti ari ti amin a damag maipapan iti gubat,
20 nalabit makapungtot ket ibagana kenka, ‘Apay ngamin a nakilabankayo iti asideg unay ti siudad? Diyo kadi ammo nga adda dagiti mangpana kadakayo manipud iti rabaw ti pader?
21 Asino ti nangpatay ken Abimelec+ nga anak ni Jerubeset?+ Saan aya a maysa a babai ti nangitinnag kenkuana iti makinrabaw a bato ti gilingan manipud iti rabaw ti pader isu a natay idiay Tebez? Apay ngamin nga immasidegkayo unay iti pader?’ Kalpasanna ibagam, ‘Uray ti adipenmo a ni Urias a Heteo ket natay.’”
22 Napan ngarud ti mensahero ket impadamagna ken David ti amin nga impaibaga ni Joab.
23 Kinuna ti mensahero ken David: “Nabilbileg dagiti soldadoda ngem dakami ket rimmuarda iti siudad a makirupak kadakami iti tanap; ngem pinagatrasmi ida agingga iti ruangan ti siudad.
24 Adda met dagiti nangpana kadagiti adipenmo manipud iti rabaw ti pader isu a natay ti dadduma nga adipenmo, a pakairamanan ti adipenmo a ni Urias a Heteo.”+
25 Gapu iti dayta, kinuna ni David iti mensahero: “Ibagam ken Joab, ‘Dimo pakariribukan ti napasamak, ta adda latta matay iti paggugubatan. Pabilgem ti puersa dagiti soldadom a mangraut iti siudad tapno maparmekyo dayta.’+ Papigsaem met ti pakinakem ni Joab.”
26 Nadamag ni Bat-sheba a napapatay ni Urias nga asawana isu a dinung-awanna ni lakayna.
27 Idi nalpasen ti tiempo ti panagladingitna, nangibaon ni David kadagiti mangala kenkuana. Inyegda iti palasiona ket nagbalin nga asawana,+ ken nangipasngay iti anak a lalaki. Ngem kinagura unay* ni Jehova ti inaramid ni David.+
Footnotes
^ Kayatna a sawen, iti primavera.
^ Wenno “Iti maysa a malem.”
^ Mabalin a ti panagreglana.
^ Lit., “bugguam dagita sakam.”
^ Wenno “bingay ti ari,” kayatna a sawen, ti bingay nga impatulod ti nangsangaili iti madaydayaw a bisita.
^ Lit., “nagdakes kadagiti mata.”
