Deuteronomio 19:1-21
19 “Inton dadaelen ni Jehova a Diosyo dagiti nasion iti daga nga ited kadakayo ni Jehova a Diosyo ken napapanawyon dagiti umili ken agnanaedkayon kadagiti siudad ken balayda,+
2 mangilasinkayo iti tallo a siudad iti daga nga ited kadakayo ni Jehova a Diosyo.+
3 Pagkatluenyo ti teritoria ti daga nga ited ni Jehova a Diosyo, ket isaganayo dagiti dalan tapno makapagkamang iti maysa kadagita a siudad ti asinoman a makapatay.
4 “Kastoy ti maaramid tapno agbiag ti nakapatay nga agkamang sadiay: No di inggagara a nadangranna ti padana a tao ngem saanna a kagurgura;+
5 kas koma no napanda iti kakaykaywan tapno agurnong iti kayo ket nauksot ti wasay iti putanna idi agpukan iti kayo sa napuntaan ti ulo ti kaduana a pakaigapuan ti ipapatayna, masapul nga agkamang ti nakapatay iti maysa kadagita a siudad tapno agbiag.+
6 Ta no saan, mabalin a kamaten ti mangibales iti dara ti napapatay a tao+ gapu iti pungtotna,* ket patayenna no makamatanna gapu ta adayo unay ti siudad a pagkamangan. Ngem saan a maikari a matay, ta saanna a kagurgura ti napatayna.+
7 Dayta ti makagapu nga ibilinko kadakayo: ‘Mangilasinkayo iti tallo a siudad.’
8 “Inton palawaen ni Jehova a Diosyo ti teritoriayo kas iti inkarina kadagidi ammayo+ ken naitednan kadakayo ti amin a daga nga inkarina nga ited kadagidi ammayo+
9 —no la ket ta surotenyo a naimbag ti amin a bilin nga ibagbagak kadakayo ita, nga ayatenyo ni Jehova a Diosyo ken kanayon a magnakayo iti dalanna+—nayonanyonto dagitoy a tallo a siudad iti tallo pay.+
10 Iti kasta, awan ti maibuyat a dara ti inosente+ a tao iti daga nga ited ni Jehova a Diosyo kas tawidyo, ken saankayo a makabasol iti dara.+
11 “Ngem no kagurgura ti maysa ti padana a tao+ ket padaananna sa dangranna a pakaigapuan ti ipapatayna, ken agkamang dayta a tao iti maysa kadagita a siudad,
12 masapul a mangibaon dagiti panglakayen iti dayta a siudad iti mangala kenkuana sa iyawatda iti mangibales iti dara ti napapatay a tao, ta masapul a matay.+
13 Dikay koma maasian* kenkuana, ken masapul nga ikkatenyo iti Israel ti basol mainaig iti dara ti inosente a tao,+ tapno nasayaatto ti pagbanaganyo.
14 “Inton maawatyo ti tawidyo iti daga nga ited ni Jehova a Diosyo, saanyo nga iyalis ti muhon+ ti kaarrubayo iti disso a nangikabilan dagidi ammayo.
15 “Saan nga umanay ti maymaysa a testigo a mangakusar* iti maysa a tao a nakaaramid iti aniaman a basol.+ Masapul ti testimonia* ti dua wenno tallo a testigo tapno mapatalgedan ti maysa a banag.+
16 No kas pagarigan ta padaksen ti maysa a testigo ti padana a tao ken akusaranna,+
17 dumatagda a dua iti sanguanan ni Jehova, iti sanguanan dagiti papadi ken dagiti agdama nga ukom.+
18 Agimbestigar a naimbag dagiti ukom,+ ket no agul-ulbod ti testigo a nangpadakes ken nangakusar iti kabsatna,
19 aramidenyo kenkuana ti pinanggepna nga aramiden iti kabsatna,+ ket masapul nga ikkatenyo ti dakes iti tengngayo.+
20 Madamagto dayta dagiti tattao ket agbutengda, ken awanton kadakayo ti agaramid iti aniaman a kinadakes a kas iti daytoy.+
21 Dikay koma maasian:*+ Biag* ti kasukat ti biag,* mata iti mata, ngipen iti ngipen, ima iti ima, saka iti saka.+
Footnotes
^ Lit., “gapu ta nabara ti pusona.”
^ Lit., “Saan koma a maasian ti matayo.”
^ Lit., “bumusor.”
^ Lit., “ngiwat.”
^ Lit., “Saan koma a maasian ti matayo.”
^ Wenno “Kararua.”
^ Wenno “kararua.”
