Jeremias 29:1-32
29 Dagitoy ti linaon ti surat nga impatulod ni propeta Jeremias manipud Jerusalem kadagiti nabati a panglakayen dagiti naipanaw a tattao, papadi, propeta, ken amin a tattao nga innala ni Nabucodonosor manipud Jerusalem ken impanna idiay Babilonia,
2 kalpasan a naipanaw ni Ari Jeconias,+ ti ina ti ari,+ dagiti opisial ti palasio, dagiti prinsipe ti Juda ken Jerusalem, ken dagiti nalaing a trabahador ken latero* manipud Jerusalem.+
3 Impaw-itna ti surat kada Elasa nga anak ni Safan+ ken ni Gemarias nga anak ni Hilkias, nga imbaon ni Ari Zedekias+ ti Juda a mapan ken Ari Nabucodonosor idiay Babilonia. Kastoy ti linaonna:
4 “Daytoy ti imbaga ni Jehova a panguluen dagiti armada, ti Dios ti Israel, kadagiti amin a tattao nga impalubosko a maipanaw iti Jerusalem ken maipan idiay Babilonia,
5 ‘Agaramidkayo kadagiti balay ken agyankayo kadagita. Agmulakayo ken kanenyo dagiti bungada.
6 Mangasawakayo tapno maaddaankayo iti annak a lallaki ken babbai; iyalaanyo dagiti annakyo iti assawada tapno maaddaanda met iti annak. Umadukayo sadiay ket diyo ipalubos a bumassit ti bilangyo.
7 Ket agbalinkayo a mannakikappia iti siudad a nangipanak kadakayo. Ikararagyo ken Jehova ti pagimbagan ti siudad, ta no natalna ti siudad, natalnanto met ti kasasaadyo.+
8 Ta daytoy ti imbaga ni Jehova a panguluen dagiti armada, ti Dios ti Israel: “Dikay agpaallilaw kadagiti propeta ken mammuyon nga adda iti tengngayo,+ ken saanyo nga ipangag dagiti tagtagainepda.
9 Ta ‘us-usarenda ti naganko nga agipadto kadakayo iti ulbod. Saanko ida nga imbaon,’+ kuna ni Jehova.”’”
10 “Ta daytoy ti imbaga ni Jehova, ‘Inton natungpalen ti 70 a tawen a kaaddayo idiay Babilonia, asikasuenkayto+ ken tungpalekto ti inkarik ket isublikayo iti daytoy a lugar.’+
11 “‘Ta sigurado nga ammok ti pampanunotek para kadakayo,’ kuna ni Jehova, ‘ikkankayo iti talna, saan a didigra,+ tapno maaddaankayo iti nasayaat a masakbayan ken namnama.+
12 Umawagkayto ken agkararagkayto kaniak ket denggenkayto.’+
13 “‘Birokendakto ket masarakandak,+ ta birokendakto iti amin a pusoyo.+
14 Ipaluboskonto a mabirokandak,’+ kuna ni Jehova. ‘Ket urnongekto dagiti naipanaw kadakayo ken ummongenkayo manipud iti amin a nasion ken lugar a nangiwarawaraak kadakayo,’+ kuna ni Jehova. ‘Isublikayto iti lugar a nangalaak kadakayo.’+
15 “Ngem kinunayo, ‘Inikkannakami ni Jehova kadagiti propeta idiay Babilonia.’
16 “Ta daytoy ti imbaga ni Jehova iti ari nga agtugtugaw iti trono ni David+ ken iti amin nga umili iti daytoy a siudad, iti kakabsatyo a saan a naipanaw a kas kadakayo,
17 ‘Daytoy ti imbaga ni Jehova a panguluen dagiti armada: “Mangyegak kadakuada iti espada, nakaro a bisin, ken makapapatay a sakit,+ ket pagbalinek ida a kas kadagiti naperdi ken malunglungsoten* a higos a saanen a makan.”’+
18 “‘Ket rautekto ida iti espada,+ nakaro a bisin, ken makapapatay a sakit, ket pagbalinekto ida a nakabutbuteng iti amin a pagarian iti daga,+ ken lunod, pagsidsiddaawan, mauy-uyaw,*+ ken maum-umsi iti amin a nasion a pangiwarawaraak kadakuada,+
19 gapu ta saanda nga impangag ti impaibagak kadagiti adipenko a propeta,’ kuna ni Jehova, ‘a maulit-ulit nga imbaonko kadakuada.’*+
“‘Ngem saankayo a nangipangag,’+ kuna ni Jehova.
20 “Denggenyo ngarud ti sao ni Jehova, dakayo amin a naipanaw a tattao, nga innalak idiay Jerusalem ken impanko idiay Babilonia.
21 Daytoy ti imbaga ni Jehova a panguluen dagiti armada, ti Dios ti Israel, maipapan ken Ahab nga anak ni Kolaias ken maipapan ken Zedekias nga anak ni Maasias, a mangus-usar iti naganko nga agipadto iti ulbod,+ ‘Iyawatko ida ken Ari Nabucodonosor* ti Babilonia, ket patayennanto ida iti imatangyo.
22 Ti mapasamak kadakuada ti mausarto a pangilunod iti amin a naala idiay Juda ken naipan idiay Babilonia: “Aramiden koma kenka ni Jehova ti napasamak kada Zedekias ken Ahab nga intuno ti ari ti Babilonia!”
23 Ngamin, nakababain ti inaramidda iti Israel,+ ta nakikamkamalalada iti assawa dagiti kaarrubada ken inus-usarda ti naganko nga agsao iti ulbod a saanko nga imbilin kadakuada.+
“‘“Siak Daydiay makaammo, ken maysaak a saksi,”+ kuna ni Jehova.’”
24 “Ibagamto met ken Semaias+ iti Nehelam,
25 ‘Daytoy ti imbaga ni Jehova a panguluen dagiti armada, ti Dios ti Israel: “Gapu ta inusarmo ti naganmo a nangipatulod kadagiti surat para iti amin nga umili iti Jerusalem, para ken Sofonias+ nga anak ti padi a ni Maasias, ken para iti amin a padi, nga ibagbagam,
26 ‘Imbes a ni Jehoiada a padi, sika ti pinagbalin ni Jehova a padi a mangaywan iti balay ni Jehova, mangaresto iti asinoman nga agbagtit nga agtigtignay a kas propeta ken mangikabil kenkuana kadagiti tul-ong ken iti pagipitan;*+
27 apay ngarud a dimo binabalaw ni Jeremias iti Anatot+ nga agtigtignay a kasla propeta kadakayo?+
28 Ta imbaonnakami pay ketdi idiay Babilonia nga ibagbagana: “Napautto dayta! Agaramidkayo kadagiti balay ken agyankayo kadagita. Agmulakayo ken kanenyo dagiti bungada,+—”’”’”
29 Idi imbasa ni Sofonias+ a padi daytoy a surat tapno mangngeg ni propeta Jeremias,
30 kinuna ni Jehova ken Jeremias:
31 “Ipakaammom iti amin a naipanaw a tattao: ‘Daytoy ti kinuna ni Jehova maipapan ken Semaias iti Nehelam: “Gapu ta nagipadto kadakayo ni Semaias, nupay saanko nga imbaon, ken pinadasnakayo nga allilawen kadagiti ulbod nga imbagana,+
32 daytoy ngarud ti imbaga ni Jehova, ‘Dusaek ni Semaias iti Nehelam ken dagiti kaputotanna. Awanto iti pamiliana ti makalasat kadagitoy a tattao, ken saannanto a makita dagiti nasayaat nga aramidek kadagiti tattaok,’ kuna ni Jehova, ‘ta insungsongna dagiti tattao nga agrebelde ken Jehova.’”’”
Footnotes
^ Wenno “agibangbangon iti baluarte.”
^ Wenno mabalin a, “nabtaken.”
^ Lit., “banag a masagawisiwan.”
^ Lit., “a nasapaak a bimmangon ken nagbaon.”
^ Lit., “Nabucodorosor,” sabali pay nga ispelingna.
^ Wenno “landok iti tengnged.”
