Ebanghelio ni Lucas 13:1-35
-
Agbabawi wenno matay (1-5)
-
Ilustrasion maipapan iti saan nga agbunga a higos (6-9)
-
Kubbo a babai a napaimbag iti Sabbath (10-17)
-
Ilustrasion maipapan iti bukel ti mustasa ken ti lebadura (18-21)
-
Masapul nga ikagumaan ti sumrek iti nailet a ridaw (22-30)
-
Herodes, “dayta a sora” (31-33)
-
Maladingitan ni Jesus iti Jerusalem (34, 35)
13 Iti dayta a tiempo, dadduma nga adda sadiay ti nangipadamag kenkuana a pinatay ni Pilato dagiti taga-Galilea idi inyegda dagiti datonda.
2 Kinunana kadakuada: “Panagkunayo, nakarkaro ngata ti basol dagidiay a taga-Galilea ngem ti amin a dadduma pay a taga-Galilea gapu iti kasta a napasamak kadakuada?
3 Saan; ngem no dikay agbabawi, mataykayto met amin a kas kadakuada.+
4 Wenno dagidiay 18 a natupakan iti torre ti Siloam, a nakatayanda, panagkunayo, ad-adu ngata ti basolda ngem ti amin a sabsabali pay nga agnanaed iti Jerusalem?
5 Saan; ngem no dikay agbabawi, mataykayto amin a kas kadakuada.”
6 Kalpasanna, inestoriana daytoy nga ilustrasion: “Adda higos a naimula iti kaubasan ti maysa a tao. Napanna kinita no adda bunganan ngem awan ti nasarakanna.+
7 Isu a kinunana iti paraaywan iti kaubasan, ‘Tallo a tawenen nga agkarasubliak ngem awan ti makitak a bunga daytoy a higos. Pukanemon! Apay koma a masayang ti daga gapu iti dayta?’
8 Insungbat ti paraaywan, ‘Apo, bay-am pay laeng iti makatawen ta kaliak ti aglawlawna sakonto abunuan.
9 No agbunganto, nasayaat. Ngem no saan, pukanemton.’”+
10 Iti Sabbath, mangisursuro idi iti maysa kadagiti sinagoga.
11 Ket adtoy! adda sadiay ti maysa a babai a 18 a tawenen a naluganan iti espiritu a mangpakpakapsut* kenkuana. Nakaron ti kubbona ket saan a makatakder iti diretso.
12 Idi makita ni Jesus, imbagana kenkuana: “Babai, umimbagkan.”+
13 Imparabawna ti imana kenkuana ket dagus a nakapagtakder iti diretso, ket indaydayawna ti Dios.
14 Nakapungtot ti opisial iti sinagoga gapu ta nangpaimbag ni Jesus iti Sabbath, isu a kinunana kadagiti tattao: “Innem nga aldaw ti panagtrabahotayo+ isu a kadagita laeng nga aldaw ti panagpaagasyo, saan nga iti aldaw ti Sabbath.”+
15 Ngem insungbat ti Apo kenkuana: “Aginsisingpet!+ Saan kadi a no aldaw ti Sabbath warwaranyo ti baka wenno ti asnoyo iti nakaigalutanda sa mapanyo painumen?+
16 Daytoy a babai nga anak ni Abraham ket 18 a tawenen a parparigaten ni Satanas. Saan kadi nga iti aldaw ti Sabbath ket maiparbeng laeng a mawayawayaan iti panagrigrigatna?”
17 Idi imbagana dagita, nabainan ti amin a bumusbusor kenkuana, ngem naragsakan ti intero a bunggoy gapu iti amin a nakaskasdaaw nga inaramidna.+
18 Intuloyna nga imbaga: “Ania ti kayarigan ti Pagarian ti Dios, ken ania ti pangipadaak iti dayta?
19 Mayarig dayta iti bukel ti mustasa nga immula ti maysa a tao iti hardinna. Dimmakkel ken nagbalin a kayo, ket nagumok dagiti billit kadagiti sangana.”+
20 Kinunana manen: “Ania ti pangipadaak iti Pagarian ti Dios?
21 Kayarigan dayta ti lebadura nga innala ken inlaok ti maysa a babai iti tallo a dadakkel a sukat* ti arina agingga nga immalsa ti intero a masa.”+
22 Iti dalanna a mapan idiay Jerusalem, napan kadagiti siudad ken purok a nangisursuro kadagiti tattao.
23 Insaludsod kenkuana ti maysa a lalaki: “Apo, manmano kadi ti maisalakan?” Kinunana kadakuada:
24 “Ikagumaanyo ti sumrek iti akikid a ruangan,+ ta ibagak kadakayo nga adu dagiti mayat a sumrek ngem saanda a kabaelan.
25 Inton bumangon ti bumalay ken iserranan ti ruangan, agtakderkayto iti ruar tapno agtuktok iti ruangan, a kunkunayo: ‘Apo, pastrekennakami.’+ Ngem isungbatnanto, ‘Dikay am-ammo.’
26 Ket ibagayonto, ‘Nagkakaduatayo idi a nangan ken imminum ken nangisursuroka kadagiti dadakkel a kalsadami.’+
27 Ngem ibagananto kadakayo, ‘Saankayo nga am-ammo! Pumanawkayo, dakayo amin nga agar-aramid iti kinakillo!’
28 Sadiay nga agsangit ken agngaretngetkayto, inton makitayo ni Abraham, Isaac, Jacob, ken amin a propeta iti Pagarian ti Dios ngem maipuruakkayto iti ruar.+
29 Umayto met dagiti tattao manipud iti daya, laud, amianan, ken abagatan, ket agsadagdanto iti lamisaan iti Pagarian ti Dios.
30 Ket adtoy! addanto dagiti maudi nga umuna, ket addanto met dagiti umuna a maudi.”+
31 Iti dayta met la nga oras, immasideg ti dadduma a Fariseo ket kinunada kenkuana: “Rummuarka. Pumanawkan ditoy, ta kayatnaka a patayen ni Herodes.”
32 Insungbatna kadakuada: “Inkay ibaga iti dayta a sora: ‘Ita ken inton bigat, paruarek dagiti demonio ken paimbagek dagiti masakit, ket iti maikatlo nga aldaw, malpaston ti trabahok.’
33 Nupay kasta, mapanak latta ita, inton bigat, ken iti sumaruno nga aldaw, ta saan a mabalin a mapapatay ti propeta iti ruar ti Jerusalem.+
34 Jerusalem, Jerusalem, a nangpapatay kadagiti propeta ken nangubor kadagiti imbaon ti Dios+—namin-adu a kayatko nga ummongen dagiti annakmo a kas iti panangummong ti upa kadagiti piekna iti sirok dagiti payakna! Ngem saanyo a kinayat.+
35 Adtoy! Mabaybay-anto ti balayyo.+ Sigurado a saandakton a makita manipud ita agingga nga ibagayo, ‘Mabendisionan koma daydiay umay iti nagan ni Jehova!’”*+
Footnotes
^ Wenno “espiritu a mangbalbaldado.”
