Ebanghelio ni Mateo 15:1-39
15 Napan ken Jesus ti sumagmamano a Fariseo ken eskriba+ a naggapu idiay Jerusalem, ket kinunada:
2 “Apay a saan a sursuroten dagiti adalam ti nagkauna a tradision ti tattao? Kas pagarigan, saanda a bugbugguan* ti imada sakbay a manganda.”+
3 Insungbatna kadakuada: “Apay a saanyo a tungtungpalen ti bilin ti Dios gapu iti tradisionyo?+
4 Kas pagarigan, kinuna ti Dios, ‘Dayawem da tatang ken nanangmo,’+ ken, ‘Mapapatay ti agsao iti dakes maibusor iti ama wenno inana.’+
5 Ngem kunayo, ‘Asinoman nga agkuna iti ama wenno inana: “Ti adda kaniak ket naikarin nga itedko iti Dios isu a saankayon a matulongan,”+
6 saannan a kasapulan a tulongan ni amana.’ No kasta ti ar-aramidenyo, pagbalbalinenyo nga awan serserbi ti sao ti Dios gapu iti tradisionyo.+
7 Dakayo a managinsisingpet, agpayso ti impadto ni Isaias maipapan kadakayo:+
8 ‘Daydayawendak dagitoy a tattao iti bibigda ngem adayo kaniak ti pusoda.
9 Awan serserbina a daydayawendak, ta dagiti isursuroda ket bilin laeng ti tao.’”+
10 Inayaban ni Jesus dagiti tattao ket kinunana: “Dumngegkayo ken tarusanyo daytoy:+
11 Ti mamagbalin a narugit iti tao ket saan a ti sumrek iti ngiwatna no di ket ti rummuar iti dayta.”+
12 Immasideg kenkuana dagiti adalan ket kinunada: “Ammom kadi a nakapungtot dagiti Fariseo iti imbagam?”+
13 Insungbatna: “Tunggal mula a saan nga immula ni Amak idiay langit maparutto.
14 Bay-anyo ida. Bulsekda a mangidaldalan. No idalan ti bulsek ti padana a bulsek, matnagdanto iti abut.”+
15 Kinuna ni Pedro: “Apo, ilawlawagmo man kadakami dayta nga ilustrasion.”
16 Gapuna, kinuna ni Jesus: “Saanyo met kadi a maawatan?+
17 Diyo kadi ammo nga aniaman a sumrek iti ngiwat ket mapan iti tian sa rummuar iti bagi?
18 Ngem ti rummuar iti ngiwat agtaud iti puso, ket dagita ti mamagbalin a narugit iti maysa a tao.+
19 Kas pagarigan, ti puso ti pagtaudan ti dakes a panagpampanunot:+ pammapatay, pannakikamalala, seksual nga immoralidad,* panagtakaw, panagulbod, ken panangpadakes.
20 Dagitoy ti mamagbalin a narugit iti maysa a tao, saan a ti pannanganna a di nabugguan* ti imana.”
21 Pimmanaw ni Jesus iti dayta a lugar ket napan idiay Tiro ken Sidon.+
22 Adtoy! Adda immasideg kenkuana a babai a taga-Fenicia ket kinunana: “Kaasiannak, Apo, Anak ni David! Marigrigatan ti balasangko ta linuganan ti demonio.”+
23 Ngem saan a sinungbatan ni Jesus. Gapuna, inasitgan dagiti adalanna ket kinunada: “Apo, papanawem ta agpukpukkaw a sumursurot kadatayo.”
24 Insungbat ni Jesus: “Dagiti laeng umili ti Israel a nayarig iti napukaw a karnero ti nakaibaonak.”+
25 Ngem nagruknoy kenkuana ti babai ket kinunana: “Apo, tulongannak!”
26 Imbaga ni Jesus: “Saan a rumbeng nga alaen ti kanen dagiti ubbing sa ipuruak kadagiti uken.”
27 Kinuna ti babai: “Wen, Apo, ngem kanen dagiti uken dagiti murkat a maregreg iti lamisaan dagiti amoda.”+
28 Insungbat ni Jesus: “Dakkel ti pammatim; mapasamak koma ti kiddawmo.” Dagus nga immimbag ti balasangna iti dayta nga oras.
29 Pinanawan ni Jesus dayta a lugar ket napan iti asideg ti Baybay ti Galilea.+ Simmang-at iti bantay sa nagtugaw.
30 Napan kenkuana ti nakaad-adu a tattao a nangikuyog kadagiti pilay, pukol, bulsek, umel, ken dadduma pay. Naipanda iti sanguananna ket pinaimbagna ida.+
31 Nagsiddaaw dagiti tattao idi nakitada a makapagsaon dagiti umel, naimbagen dagiti baldado, makapagnan dagiti pilay, ken makakitan dagiti bulsek, ket indaydayawda ti Dios ti Israel.+
32 Inayaban ni Jesus dagiti adalanna ket kinunana: “Maasianak kadagitoy a tattao.+ Tallo nga aldawdan ditoy ket awan ti kanenda. Diak kayat a pagawiden ida a mabisbisin,* ta amangan no matalimudawda iti dalan.”+
33 Ngem insaludsod dagiti adalan: “Adayo daytoy a lugar. Pangalaantayo ngarud iti ipakantayo iti kastoy kaadu a tattao?”+
34 Kinuna ni Jesus: “Mano a tinapay ti adda kadakayo?” Insungbatda: “Pito, ken sumagmamano a babassit nga ikan.”
35 Binilinna nga agdalupisak dagiti tattao
36 ket innalana ti pito a tinapay ken dagiti ikan. Kalpasan a nagyaman iti Dios, pinispisina dagita ket intedna kadagiti adalanna sa inwarasda kadagiti tattao.+
37 Nanganda amin ket nabsogda. Innala dagiti adalan ti pito a kuribot* a napno kadagiti natedda.+
38 Adda 4,000 a lallaki a nangan, malaksid pay kadagiti babbai ken ubbing.
39 Kalpasanna, pinagawid ni Jesus dagiti tattao ket naglugan iti bangka a napan idiay Magadan.+
Footnotes
^ Kayatna a sawen, nadalus sigun iti tradision dagiti Judio maipapan iti ritual a panagbuggo.
^ Kayatna a sawen, saan a nadalus sigun iti tradision dagiti Judio maipapan iti ritual a panagbuggo.
^ Wenno “saan a nangnangan.”
^ Wenno “kuribot a pagyanan iti makan.”
