Ebanghelio ni Mateo 18:1-35
18 Iti dayta nga oras, immasideg ken Jesus dagiti adalan ket kinunada: “Asino ti katan-okan iti Pagarian ti langit?”+
2 Nangayab iti maysa nga ubing ket pinagtakderna iti tengngada
3 sa kinunana: “Pudno kunak kadakayo, no saankay nga agbalbaliw ken agbalin a kas kadagiti ubbing,+ saankayto a makastrek iti Pagarian ti langit.+
4 Gapuna, asinoman nga agpakumbaba a kas iti daytoy nga ubing, isunto ti katan-okan iti Pagarian ti langit;+
5 ket asinoman nga umawat iti maysa a kas iti daytoy nga ubing maigapu iti naganko, awatennak met.
6 Ngem asinoman a mangitibkol kadagitoy a nanumo nga addaan pammati kaniak, nasaysayaat laengen a magalutan ti tengngedna iti gilingan a bato a puspusiposen ti asno sa maipalned iti baybay.+
7 “Kaasi pay dagiti tattao a mangitibtibkol iti sabsabali! Talaga nga adda dagiti tattao a mangitibkol iti sabsabali, ngem asi pay dagita a tattao!
8 No ta imam wenno sakam ti mangitibkol kenka, putdem ket ibellengmo.+ Nasaysayaat a pukol wenno pilayka nga umawat iti biag nga agnanayon ngem ti addaanka iti dua nga ima wenno saka a maitapuak iti agnanayon nga apuy.*+
9 No ta matam met ti mangitibkol kenka, suatem ket ibellengmo. Nasaysayaat a buldingka nga umawat iti biag nga agnanayon ngem ti addaanka iti dua a mata a maitapuak iti umap-apuy a Gehenna.*+
10 Siguraduenyo a diyo laisen ti maysa kadagitoy a nanumo, ta ibagak kadakayo a dagiti anghel idiay langit a mangay-aywan kadakuada ket kanayon a makakitkita iti rupa ni Amak nga adda idiay langit.+
11 * ——
12 “Ania ti panagkunayo? No adda 100 a karnero ti maysa a tao ket maysa kadagitoy ti mayaw-awan,+ saan aya a panawanna ti 99 iti kabambantayan tapno birokenna daydiay nayaw-awan?+
13 Ibagak kadakayo a no masarakanna dayta, ad-addanto ti ragsakna iti daytoy a karnero ngem iti 99 a saan a nayaw-awan.
14 Kasta met, saan a kayat ni Amak* idiay langit a mayaw-awan ti uray maysa laeng kadagitoy a nanumo.+
15 “No makabasol kenka ti kabsatmo, kasaritam a dakdakayo ket ibagam ti basolna.*+ No dumngeg kenka, natulongam ti kabsatmo nga agbabawi.+
16 Ngem no saan a dumngeg, mangikuyogka iti maysa wenno dua, tapno mapatalgedan ti tunggal banag iti testimonia* ti dua wenno tallo a testigo.+
17 No di dumngeg kadakuada, ibagam iti kongregasion. No saanna latta a denggen ti kongregasion, ibilangmo a kas iti tao kadagiti nasion+ ken kas agsingsingir iti buis.+
18 “Pudno kunak kadakayo, aniaman a galutanyo ditoy daga, nagalutanen idiay langit, ken aniaman a warwaranyo ditoy daga, nawarwaranen idiay langit.
19 Pudno kunak manen kadakayo, no immanamong ti dua kadakayo ditoy daga nga agkiddaw iti aniaman a banag a napateg, patganto dayta ni Amak nga adda idiay langit.+
20 Ta no adda aguummong a dua wenno tallo a tattao gapu iti naganko,+ addaakto iti tengngada.”
21 Kalpasanna, immasideg ni Pedro ket kinunana: “Apo, mamin-ano a pakawanek ti kabsatko nga agbasol kaniak? Mamimpito?”
22 Insungbat ni Jesus: “Ibagak kenka, saan laeng a mamimpito, no di ket mamim-77.+
23 “Ta mayarig ti Pagarian ti langit iti maysa nga ari nga agsingir iti utang dagiti adipenna.
24 Idi agsingiren, naiyeg kenkuana ti maysa nga adipen a nakautang iti 10,000 a talento.*
25 Ngem gapu ta awan ti maibayadna, imbilin ti ari a mailako kas adipen agraman ti asawa ken dagiti annakna ken ti amin a sanikuana tapno makabayad.+
26 Gapuna, nagparintumeng ken nagruknoy ti adipen ket impakpakaasina: ‘An-anusannak koma, apo, ta bayadakto amin nga utangko.’
27 Naasian ti ari isu a saannan a pinabayadan ti utangna sa pinagawidna.+
28 Idi rimmuar dayta nga adipen, nabirokanna ti padana nga adipen a nakautang kenkuana iti 100 a denario.* Ginammatanna sana binekkel, ket kinunana, ‘Bayadam ti utangmo.’
29 Nagparintumeng ti padana nga adipen ket impakpakaasina, ‘An-anusannak koma ta agbayadakto.’
30 Saanna a pinatgan dayta no di ket impaibaludna agingga a makabayad iti utangna.
31 Naladingitan unay dagiti padana nga adipen idi nakitada ti napasamak, ket imbagada dayta iti ari.
32 Pinaayaban ngarud ti ari ket kinunana, ‘Dakes nga adipen, idi nagpakaasika kaniak, saankon a pinabayadan ti utangmo.
33 Saan kadi a naasianka met koma iti padam nga adipen, kas iti panangngaasik kenka?’+
34 Gapu iti dayta, nakapungtot ti ari ket impaibaludna ti adipen agingga a mabayadanna ti amin nga utangna.
35 Kastanto met ti aramiden+ kadakayo ni Amak nga adda idiay langit no saanyo a pakawanen a naimpusuan ti kabsatyo.”+
Footnotes
^ Tumukoy daytoy iti agnanayon a pannakadadael.
^ Wenno mabalin nga, “Amayo.”
^ Lit., “ket tubngarem.”
^ Lit., “ngiwat.”
