Proverbio 14:1-35
14 Ti pudno a masirib a babai bangonenna ti balayna,+Ngem rebbaen dayta ti maag babaen ti imana.
2 Daydiay magmagna iti kinalinteg agbuteng ken Jehova,Ngem daydiay nasikap* ti dalanna umsienna ti Dios.
3 Ti natangsit a panagsasao ti maag ket kas iti pang-or,Ngem ti bibig ti masirib salaknibanna ida.
4 Nadalus ti kulluong no awan dagiti baka,Ngem mangyeg iti adu nga apit ti pigsa ti kalakian a baka.
5 Saan nga agulbod ti matalek a testigo,Ngem kanayon nga agulbod ti ulbod a testigo.+
6 Agbirok iti sirib ti mananglais ket awan ti masarakanna,Ngem nalaka a maaddaan iti pannakaammo ti tao a mannakaawat.+
7 Adaywam ti maag a tao,Ta awan ti pannakaammo a mangngegmo iti bibigna.+
8 Babaen ti sirib, ammo ti masirib a tao ti pagturonganna,Ngem maallilaw dagiti maag* iti kinamaagda.+
9 Pagaangawan dagiti maag ti basol,*+Ngem nakasagana a makiareglo* dagiti nalinteg.
10 Ammo ti puso ti kinaladingitna,*Ken awan ti sabali a makarikna iti ragsakna.
11 Madadaelto ti balay ti dakes a tao,+Ngem dumakkelto ti tolda ti nalinteg.
12 Adda dalan a kasla umiso iti maysa a tao,+Ngem patay ti pagtungpalanna.+
13 Uray no agkatkatawa ti maysa, mabalin nga agpapaut-ot ti pusona,Ken mabalin nga agtungpal iti ladingit ti panagragsakna.
14 Ti nasukir ti pusona apitennanto ti bunga ti aramidna,+Ngem magunggonaanto ti naimbag a tao gapu iti aramidna.+
15 Patien ti awan ammona* ti tunggal sao,Ngem panunoten ti masirib ti tunggal addangna.+
16 Naannad ti masirib ken adaywanna ti dakes,Ngem saan a naannad* ti maag ken nalabes ti panagtalekna iti bagina.
17 Minamaag ti tignay daydiay alisto nga agpungtot,+Ngem magurgura ti tao a mangpanunot iti bambanag.*
18 Dagiti awan ammona* tawidendanto ti kinamaag,Ngem dagiti masirib makoronaanda iti pannakaammo.+
19 Agruknoyto ti dakes a tattao iti sanguanan ti naimbag,Ken agdumogto ti dakes a tao iti ruangan dagiti nalinteg.
20 Ti napanglaw a tao ket guraen uray dagiti kaarrubana,+Ngem adu ti gayyem ti nabaknang a tao.+
21 Agbasbasol ti mangumsi iti kaarrubana,Ngem naragsak ti asinoman a mangngaasi iti nanumo.+
22 Saan kadi a mayaw-awanto dagiti agpanggep iti dakes?
Ngem dagiti agpanggep nga agaramid iti naimbag umawatdanto iti napudno nga ayat ken kinamatalek.+
23 Makagunggona ti tunggal kita ti napinget a panagtrabaho,Ngem rigat ti pagtungpalan ti sao laeng.+
24 Ti korona dagiti masirib ket ti kinabaknangda;Ngem ti aramid ti maag agtungpal iti nakarkaro a kinamaag.+
25 Ti pudno a testigo mangisalakan iti biag,*Ngem kanayon nga agulbod ti manangallilaw.
26 Napigsa ti panagtalek daydiay agbuteng ken Jehova,+Ket agbalinto dayta a kamang dagiti annakna.+
27 Ti panagbuteng ken Jehova ket ubbog ti biag,A mangyadayo iti maysa kadagiti silo ni patay.
28 Nadayag ti maysa nga ari nga adu ti umilina,+Ngem awan serserbi ti agturay nga awan ti iturayanna.
29 Ti nabannayat nga agpungtot nauneg ti pannakatarusna,+Ngem ti saan a makaan-anus ipakpakitana ti kinamaagna.+
30 Ti kalmado a puso mangted iti biag* iti bagi,Ngem ti imon ti mangrunot iti tulang.+
31 Ti mangsaur iti nanumo insultuenna ti Nangaramid kenkuana,+Ngem ti mangngaasi iti napanglaw idaydayawna ti Dios.+
32 Maipababanto ti dakes a tao gapu iti kinadakesna,Ngem masalaknibanto ti nalinteg a tao gapu iti kinamatalekna.+
33 Ti sirib agtalinaed a naulimek iti puso ti mannakaawat a tao,+Ngem ipakaammo dayta dagiti maag.
34 Kinalinteg ti mangitan-ok iti maysa a nasion,+Ngem basol ti mangibabain iti maysa nga ili.
35 Maragsakan ti ari iti adipen a masirib ti panagtignayna,+Ngem makapungtot iti maysa a nakababain ti panagtignayna.+
Footnotes
^ Wenno “nakillo.”
^ Wenno mabalin nga, “allilawen dagiti maag ti sabsabali.”
^ Wenno “makikappia.”
^ Wenno “adda kinaimbag.”
^ Wenno “ti kinaladingit ti kararuana.”
^ Wenno “awan kapadasanna.”
^ Wenno “agpupungtot.”
^ Wenno “nga addaan iti abilidad nga agpanunot.”
^ Wenno “awan kapadasanna.”
^ Wenno “kararua.”
^ Wenno “mangpasalun-at.”
