Salmo 145:1-21
Panangidaydayaw ni David.
א [Alef]
145 O Diosko nga Ari, itan-okka,+Idaydayawko ti naganmo iti agnanayon nga awan inggana.+
ב [Beth]
2 Agmalmalem nga idaydayawka;+Idaydayawko ti naganmo iti agnanayon nga awan inggana.+
ג [Gimel]
3 Naindaklan ni Jehova ken maikari unay a maidaydayaw,+Saan a matukod* ti kinanaindaklanna.+
ד [Daleth]
4 Amin a henerasion idaydayawda dagiti aramidmo;Ipakaammoda dagiti naindaklan nga aramidmo.+
ה [He]
5 Ipakaammoda ti nadayag a kinangayed ti kinatan-okmo+Ket panunotekto a naimbag dagiti nakaskasdaaw nga aramidmo.
ו [Waw]
6 Isarsaritadanto dagiti nakaskasdaaw nga aramidmo,*Ken ipakaammokto ti kinanaindaklanmo.
ז [Zayin]
7 Kanayonto nga idaydayawdaka bayat a lagipenda ti nakaad-adu a kinaimbagmo,+Ken agriawdanto a siraragsak gapu iti kinalintegmo.+
ח [Heth]
8 Ni Jehova ket mannakipagrikna* ken naasi,+Nabannayat nga agpungtot ken dakkel ti napudno nga ayatna.+
ט [Teth]
9 Ni Jehova ket naimbag iti amin a parsuana,+Ken makita ti asina iti amin nga aramidna.
י [Yod]
10 Idaydayawdaka ti amin nga aramidmo, O Jehova,+Ken idaydayawdaka dagiti napudno kenka.+
כ [Kaf]
11 Iwaragawagda ti dayag ti kinaarim+Ken isarsaritada ti kinabilegmo,+
ל [Lamed]
12 Tapno maipakaammoda kadagiti tattao dagiti naindaklan nga aramidmo+Ken ti nadayag a kinangayed ti kinaarim.+
מ [Mem]
13 Ti kinaarim ket agnanayon,Ken agtultuloy ti panangituraymo iti amin a henerasion.+
ס [Samekh]
14 Sarapaen ni Jehova ti amin a matumtumba,+Ket bangonenna ti amin a madagdagsenan.+
ע [Ayin]
15 Mangnamnama kenka ti amin a parsua;Ik-ikkam ida iti kanenda iti tiempo a kasapulanda.+
פ [Pe]
16 Uk-ukradem ta imamKen pempennekem ti tarigagay ti tunggal sibibiag a banag.+
צ [Tsade]
17 Nalinteg ni Jehova iti amin a daldalanna+Ken napudno iti amin nga ar-aramidenna.+
ק [Qof]
18 Asideg ni Jehova iti amin nga umaw-awag kenkuana,+Iti amin nga umawag kenkuana iti kinapudno.*+
ר [Resh]
19 Pempennekenna ti tarigagay dagiti agbuteng kenkuana;+Dengdenggenna ti panagpatulongda ket isalakanna ida.+
ש [Shin]
20 Bambantayan ni Jehova ti amin a mangay-ayat kenkuana,+Ngem ti amin a managdakdakes ket dadaelenna.+
ת [Taw]
21 Isarsaritakto ti pannakaidaydayaw ni Jehova;+Amin a sibibiag* idaydayawda koma ti nasantuan a naganna iti agnanayon nga awan inggana.+
Footnotes
^ Wenno “Saan a maawatan.”
^ Wenno “pannakabalinmo.”
^ Wenno “nakonsiderar.”
^ Wenno “a sipapasnek.”
^ Lit., “Amin a lasag.”
