Uk-ukom 2:1-23
2 Manipud Gilgal,+ napan ti anghel ni Jehova+ idiay Bokim ket kinunana: “Inruarkayo idiay Egipto ken impankayo iti daga nga inkarik kadagidi ammayo.+ Imbagak pay, ‘Diakto pulos waswasen ti tulagko kadakayo.+
2 Saankayo met a makitulag kadagiti agnanaed iti daytoy a daga+ ken masapul a dadaelenyo dagiti altarda.’+ Ngem saankayo a nagtulnog kaniak.+ Apay nga inaramidyo daytoy?
3 Isu nga ibagak kadakayo, ‘Diakto papanawen ida iti tengngayo.+ Allilawendakayto+ ket masulisogkayto nga agdayaw kadagiti diosda.’”+
4 Idi naibagan daytoy ti anghel ni Jehova iti amin nga Israelita, nagsangitda iti napigsa.
5 Gapuna, pinanagananda dayta a lugar iti Bokim* ket nagidatonda ken Jehova sadiay.
6 Idi pinalubosan ni Josue dagiti Israelita, napanda iti tawidda a daga tapno tagikuaenda.+
7 Nagserbi dagiti tattao ken ni Jehova bayat a sibibiag ni Josue ken uray idi natayen, bayat a sibibiag dagiti panglakayen a nakakita iti amin a naindaklan nga inaramid ni Jehova para iti Israel.+
8 Natay ni Josue nga anak ni Nun, nga adipen ni Jehova, idi agtawen iti 110.+
9 Isu nga intabonda iti teritoria a tawidna idiay Timnat-heres+ iti kabambantayan ti Efraim, iti amianan ti Bantay Gaas.+
10 Natay amin dayta a henerasion, ket timmaud ti sabali a henerasion a saan a makaam-ammo ken Jehova wenno iti inaramidna para iti Israel.
11 Gapuna, inaramid dagiti Israelita ti dakes iti imatang ni Jehova ket nagserbida* kadagiti Baal.+
12 Iti kasta, pinanawanda ni Jehova a Dios dagidi ammada a nangiruar kadakuada idiay Egipto.+ Nagserbi ken nagruknoyda kadagiti sabali a dios dagiti tattao iti aglawlawda,+ ket napagpungtotda ni Jehova.+
13 Pinanawanda ni Jehova ket nagserbida ken Baal ken kadagiti imahen ni Astoret.+
14 Gapuna, nakapungtot ni Jehova iti Israel, isu nga inyawatna ida kadagiti managsamsam a nangala kadagiti sanikuada.+ Inyawatna* ida kadagiti kabusor iti aglawlawda+ ket saandan a kabaelan nga abaken dagiti kabusorda.+
15 Saan ida a tinulongan ni Jehova tunggal mapanda makigubat isu a nadidigrada,+ kas iti imbaga ni Jehova ken iti inkari ni Jehova kadakuada.+ Nakaro ti pannakariribukda.+
16 Gapuna, nangted ni Jehova kadagiti ukom a mangisalakan kadakuada kadagiti kabusorda.+
17 Ngem saanda a dimngeg uray kadagiti ukom. Nagdayaw ken nagruknoyda ketdi kadagiti sabali a dios. Saanda a kas kadagidi ammada a nagtulnog kadagiti bilin ni Jehova.+ Saan a kasta ti inaramidda.
18 No mangted ni Jehova kadagiti ukom para kadakuada,+ tulongan ni Jehova ti tunggal ukom ket ispalenna ida kadagiti kabusorda bayat a sibibiag dayta nga ukom; ta naasian* ni Jehova+ iti panagrigrigatda gapu kadagiti mangidaddadanes+ ken mangmalmaltrato kadakuada.
19 Ngem no matay ti ukom, agsublida manen iti sigud nga aramidda ken dakdakes pay ngem iti inaramid dagiti ammada ta agdaydayaw ken agrukruknoyda kadagiti sabali a dios.+ Saanda nga insardeng dagiti aramidda ken ti dakes a kababalinda.
20 Kamaudiananna, nakapungtot ni Jehova iti Israel+ ket kinunana: “Gapu ta saan a tinungpal daytoy a nasion ti tulagko+ kadagidi ammada ken sinukirdak,+
21 diakto papanawen iti tengngada ti uray maysa kadagiti nasion a saan a naparmek ni Josue idi sibibiag pay.+
22 Iti kasta, maammuakto no suroten ti Israel ti dalan ni Jehova+ ken no agtulnogda a kas kadagiti ammada.”
23 Impalubos ngarud ni Jehova nga agtalinaed dagitoy a nasion. Saanna ida a pinapanaw a dagus, ken saanna nga impalubos a maparmek ida ni Josue.
Footnotes
^ Kaipapananna, “Dagiti Agsangsangit.”
^ Wenno “nagdayawda.”
^ Lit., “Inlakona.”
^ Wenno “naladingitan.”
