Naisurat ti Nasantuan a Biblia tapno makasaritanatayo amin ti Dios. Masapul nga adalentayo daytoy tapno maam-ammotayo ti Autorna. (Juan 17:3; 2 Timoteo 3:16) Kadagiti panidna, impakaammo ni Jehova a Dios ti panggepna para kadagiti tattao ken iti daga a pagtaenganda.​—Genesis 3:15; Apocalipsis 21:3, 4.

Awanen ti sabali a libro nga addaan iti dakkel nga epekto iti biag dagiti tattao. Tignayennatayo ti Biblia a mangipakita kadagiti kualidad ni Jehova a kas iti ayat, asi, ken pannakipagrikna. Mangted iti namnama, a tumulong kadagiti tattao a mangibtur uray iti kakaruan a rigat. Ken agtultuloy nga ibutaktakna dagiti dakes a bambanag iti daytoy a lubong a maikontra iti perpekto a pagayatan ti Dios.​—Salmo 119:105; Hebreo 4:12; 1 Juan 2:15-17.

Orihinal a naisurat ti Biblia iti Hebreo, Aramaiko, ken Griego, ket naipatarus ti kompleto wenno ti dadduma a pasetna iti nasurok a 3,000 a lengguahe. Daytoy pay laeng a libro ti kaaduan ti nakaipatarusanna a lengguahe ken kasaknapan ti pannakaiwarasna iti historia. Ditay pakasdaawan dayta, ta impadto ti Biblia: “Ti naimbag a damag maipapan iti Pagarian [ti kangrunaan a mensahe a linaon ti Biblia] maikaskasabanto iti intero a daga tapno maammuan ti amin a nasion; kalpasanna, umayton ti panungpalan.”​—Mateo 24:14.

Gapu ta bigbigenmi a napateg ti mensahe ti Biblia, panggepmi ti mangpataud iti patarus a saan laeng a matalek kadagiti orihinal a manuskrito no di ket nalawag ken nalaka pay a basaen. Kadagiti artikulo iti Apendise a “Dagiti Prinsipio iti Panagipatarus iti Biblia,” “Dagiti Baro a Paset Daytoy a Rebision,” ken “No Kasano a Nakadanon Kadatayo ti Biblia,” nailawlawag ti dadduma a nabalbaliwan a sasao iti daytoy nga edision.

Dagidiay mangay-ayat ken Jehova a Dios ken agdaydayaw kenkuana kayatda ti umiso ken nalaka a maawatan a patarus ti Sao ti Dios. (1 Timoteo 2:4) Gapuna, inaramidmi daytoy a rebision iti Iloko, ta panggepmi a maipatarus ti New World Translation iti ad-adu pay a lengguahe agingga a posible. Namnamaen ken ikarkararagmi a makagunggona kenka, patgenmi nga agbasbasa, daytoy nga edision ti Nasantuan a Kasuratan bayat nga ikagkagumaam a ‘sapulen ti Dios tapno masapulam.’​—Aramid 17:27.