Sangalubongan a Panangasaba ken Panangisuro

AFRICA

PAGILIAN 57

POPULASION 878,000,158

AGIBUMBUNANNAG 1,171,674

PANANGYADAL ITI BIBLIA 2,382,709

Benin

Ni Claude ken ti asawana a ni Marie-Claire ket sireregta nga agserserbi kas misionero iti 27 a tawenen. Idi Pebrero, naikaglis ni Marie-Claire ket nablo ti sakana. Dua a lawas kalpasanna, natnag ni Claude bayat nga agtartrabaho iti pagtaengan dagiti misionero ket natukkol ti sakana. Agpada a nabedbedan dagiti sakada​—kannawan a saka ken Marie-Claire, kannigid met ken Claude. Inyangaw ni Claude, “Kanayon ngamin a kayatmi a pagkaduaan nga aramiden dagiti bambanag!”

Makapagna ni Claude ngem saan a makapagna ni Marie-Claire isu a sumagmamano a lawas a saan a rimrimmuar. Nupay nayadalanna ti uppat kadagiti 12 nga iyad-adalanna idiay pagtaengan dagiti misionero, isu ket naikapis iti dadduma nga aspeto ti ministerio. Gapuna, nagtugaw iti sango ti pagtaengan dagiti misionero ken adda lamisaanna a napno iti publikasion ket  kinasabaanna dagiti aglabas. Idi laeng Marso, nakabusbos ni Marie-Claire iti 83 nga oras a nangasaba iti kasta a pamay-an. Binendisionan kadi ni Jehova ti panangipamuspusanna? Iti dayta a bulan, isu ket nakaipaima iti 14 a libro, 452 a broshur, 290 a magasin, ken nasurok a 500 a tract.

Etiopia

Kayat ni Arega, nga agnanaed iti nasulinek a purok, ti mangipigket iti papel iti diding ti balayna. Kadawyanna a diario ti us-usaren ti dadduma a kailianna, ngem kaykayatna ti namaris. Iti tiendaan, nakitana ti maysa a lalaki a mangipapaima iti broshur a Tagiragsakenyo ti Biag nga Agnanayon Ditoy Daga! Nangala ni Arega iti kopiana, ngem saanna a binasa no di ket pinagsisinana tapno ipigketna iti diding ti balayna. Dua a tawen kalpasanna, nabasana ti nakasurat iti papel nga impigketna iti diding a “Ni Jesus ti Anak ti Dios.” Naiduma dayta iti Trinidad a naisuro kenkuana a saanna a maaw-awatan. Natukay ti interes ni Arega ket siam nga oras a nagnagna a napan iti kaasitgan nga ili tapno birokenna dagiti tattao a mangibagbaga nga adda Anak ti Dios ngem saanna a nasarakan ida isu a nadismaya a nagawid. Di nagbayag, napan manen iti dayta nga ili. Iti dayta a gundaway, imbaga kenkuana dagiti tattao ti balay ti kabsat a nakaalaanna iti broshur. Ngem nasubok ti determinasion ni Arega ta masapul nga aguray pay iti adu nga oras agingga a makaawid ti kabsat. Ti panagsarsaritada ket nagtungpal iti panagadal iti Biblia. Kadagiti simmaruno a bulbulan, namin-adu a nagsubli ni Arega iti dayta nga ili tapno itultuloyna ti agpayadal iti Biblia. Idi insarsaritana ti naadalna kadagiti kapurokanna, adu ti bimmusor ken nangliklik kenkuana. Ngem saan a naupay ket nagbalin nga interesado ti dadduma. Idi addan ti 13 nga interesado, dua nga special pioneer ti naidestino iti dayta a lugar. Idi agangay, nasuroken nga 40 ti mayad-adalan iti Biblia, ken dandani kasta met laeng ti kaadu dagiti tumabtabuno kadagiti gimong. Adda itan ti walo nga aktibo nga agibumbunannag iti dayta a lugar. Para iti kabbaro a kabsattayo a ni Arega, saan laeng a basta namaris a dekorasion dagiti ladawan a naipigket iti diding ti balayna.

 Ghana

Gapu iti napartak a panagsaknap dagiti selpon iti intero nga Africa, maikuna a sumaysayaaten ti sistema ti komunikasionda. Kas pangay-ayo kadagiti agus-usar iti selpon, adu a kompania ti mangipapaay iti libre nga awag iti telepono kadagiti espesipiko nga oras iti rabii. Dayta a probision ket inaprobetsar ti maysa a kabsat nga agnagan iti Grace. Kanayon nga okupado ti iyad-adalanna a ni Monica isu a manmano a makapagadalda. Inaramid ni Grace ti amin a kabaelanna tapno maitultuloy ti panagadalda. Inyurnosna pay ketdi a sarungkaran ni Monica idiay balayda iti 5:00 ti agsapa tapno agadalda. Ngem nagbaliw ti eskediul ni Monica isu a saanen a praktikal dayta nga oras ti panagadalda. Gapuna, insingasing ni Grace nga agadalda laengen babaen ti telepono iti oras a libre ti umawag. Immanamong ni Monica ket nagtulagda nga agadalda iti 4:00 ti agsapa. Ngem makapaupay ta okupado ti linia kabayatan dayta nga oras ken dandani saanda a makontak ti maysa ken maysa. Gapuna, nagtulagda nga isapsapada ti agriing tapno makapagadalda iti 3:00 ti parbangon, nupay narigat daytoy para kadagitoy dua nga agtartrabaho nga inna. Kinuna ni Grace: “Inkararagko ken Jehova nga ikkannak koma iti bileg ken tarigagay nga agtultuloy a mangyadal tapno saan a  bumaaw ti interes ti estudiantek. Inusarko ti alarma ti selponko ken dinisiplinaak ti bagik nga agriing iti dayta nga oras. Uray no nabambannogak, diak impalubos a dayta ti mangupay kaniak.” Anian a ragsakna ta inkagumaanna nga inaramid dayta, yantangay naimatanganna ti panagpabautisar ni Monica iti “Agpaidalankayo iti Espiritu ti Dios” a Kombension Distrito idi 2008! Itay laeng nabiit, inusar ni Grace ti isu met laeng a libre nga iyaawag iti rabii tapno iyadalanna ti maysa a babai a makigimgimong itan.

Mozambique

Idi Agosto 2008, adda naitayab a jacket manipud iti limmabas a lugan ket nagdisso dayta iti asideg ti kalapaw a naaramid iti pitak a kukua ti nakurapay ken balo a kabsat a babai. Ti kabsat pinidutna ti jacket ket nakitana nga adda naibulsa a papeles, tallo a babassit a kahon ti nangingina nga alahas, ken nakurang a sangaribu a doliar. Impapilitna nga adda koma kapurokanna nga umawag kadagiti numero ti telepono a naisurat kadagiti papeles tapno ibagana nga isu ti nakapidut iti jacket. Karabianna, adda immay nga uppat a lallaki a nakakotse iti dayta a purok. Iti imatang dagiti opisial iti purok, inyawat ti kabsattayo ti jacket ken amin a nagyanna iti makinkukua. Nakasangit ti lalaki ken imbagana a no saan a maysa kadagiti Saksi ni Jehova ti nakapidut amangan no saanen a maisubli dagiti sanikuana. Nupay nakurapay ti matalek a kabsattayo, nakaipaay iti panangsaksi iti purokda a nangyeg iti dakkel a dayaw iti nagan ti Diosna a ni Jehova.

 DAGITI PAGILIAN TI AMERICA

PAGILIAN 55

POPULASION 910,761,124

AGIBUMBUNANNAG 3,575,123

PANANGYADAL ITI BIBLIA 3,778,321

Barbados

Napaneknekan ti adu a nagannak a makagunggona ti panangisuroda kadagiti annakda a mangikabesa kadagiti teksto ti Biblia. Maragragsakan ti maysa a pagassawaan idiay Grenada ta ti innem ti tawenna nga anakda inusarna ti teksto ti Biblia a mangitandudo iti kinapudno a ni Jehova ti kangatuan iti amin. Kinuna ti ama ti ubing: “Maysa a malem idi sinukon ni baketko a Laura ti anakmi a ni Stefan idiay eskuelaan, isu ket inayaban ti maestra ket kinunana: ‘Kayatko laeng nga ibaga kenka a maay-ayatanak iti anakmo. Uray no saantayo nga agkakapammatian, apresiarek unay ti kinalaingna a mangilawlawag kadagiti patpatienna.’

“Idi nakaawiddan, sigagagar a dinamag ni baketko ken ni Stefan no ania ti inaramidna ta pinadayawan ti maestrana. Inestoria ni Stefan a kabayatan ti umuna a klaseda, imbaga ti maestrana a ni ‘Jesus ti Dios.’

“Intayag ngarud ni Stefan ti imana, ket idi inawagan ti maestra, kinunana: ‘Saan Ma’am. Saan a ni Jesus ti Dios. Kuna ti Biblia a ni Jesus ket Anak ni Jehova, isu a ni Jesus ket saan a mabalin nga isu met laeng ni Jehova.’

“Simmungbat ti maestra: ‘Ngem mamatiak a ni Jesus ket isu met laeng ni Jehova.’

“Kinuna ni Stefan: ‘Ngem kuna ti Biblia a ni Jehova laeng ti Kangatuan, saan a ni Jesus. Ni laeng Jehova ti Kangatuan.’ Kinotarna ti Salmo 83:18, ti teksto nga  imbagami nga ikabesa ken tarusanna. Nupay istrikto ti maestrana, saanna a mabalusingsing ti panagrasrason ti innem ti tawenna nga ubing a nasursuruan iti umiso a pannakaammo iti Kasuratan.”

Ecuador

Kalpasan ti panangasaba dagiti kakabsat iti teritoria iti away nga ayan dagiti Quichua ti pagsasaona, nagluganda iti bus a nagawid iti pagtaenganda. Yantangay ti bus ket addaan iti video player ken telebision, napalubosan dagiti kakabsat a mangipabuya iti video maipapan ken Noe ken ni David tapno mabuya dagiti pasahero a Quichua. Anian a siddaawda a nakabuya iti video iti bukodda a lenguahe! Binuyada dayta a sipapasnek ket idi nagsardeng ti bus gapu ta adda aglugan, pinatugawda a dagus ti pasahero tapno saan a makalinged. Idi nalpasen ti pabuya, adu ti nagkiddaw iti video. Dadduma kadagiti pasahero ti nagsaludsod maipapan iti Biblia ken nagkiddawda  kadagiti literatura; adda met dagidiay nangited iti nagan ken adresda tapno adda sumarungkar kadakuada idiay siudad, ken naikkanda amin iti imbitasion iti Memorial a maangay iti pagsasao a Quichua. Awan duadua a maysa daytoy kadagiti makagapu nga adu ti timmabuno iti Memorial.

Mexico

Bayat ti panangasaba iti binalaybalay, ni Gabino a maysa a payunir ket nagtuktok iti maysa a ruangan ngem awan ti nangilukat. Inulitna ti nagtuktok agingga iti namitlo. Nagsardeng iti apagbiit sa nagtuktok manen iti maikapat a gundaway. Maysa a lalaki a mariribukan ken agsangsangit ti nangilukat iti ridaw. Dagus a pinastrekna ni Gabino ngem saan a matagtagari gapu ta malmaldaangan unay. Nagkalma ti rikna ti lalaki idi liniwliwa ni Gabino babaen ti naimbag a damag. “Makitam kadi daydiay a tugaw?” insaludsod ti lalaki. “Iti maikatlo a panagtuktokmo, nakatakderakon iti dayta. Makitam daydiay tali a nakabitin? Naigalutko daytan iti tengngedko iti maikapat a panagtuktokmo ngem winarwarko tapno luktak ti ridaw. Agyamanak ta saanka a nauma a nagtuktok ta no saan, nagbekkelak koman.” Inlawlawag ti lalaki a malmaldaangan unay gapu kadagiti parikutna ken baketna. Inyurnos ni Gabino ti panangyadalna iti Biblia kenkuana. Gagangay a maminsan wenno mamindua laeng nga agtuktok ni Gabino. Ngem iti daytoy a gundaway, nalabit babaen ti panangiwanwan ti  anghel, saan a nauma a nagtuktok ket nagsayaat ti resultana.

Chile

Kabayatan ti kampania a panangawis kadagiti interesado a tattao a tumabuno iti Panglaglagip iti ipapatay ni Kristo, adda ubing nga immasideg iti maysa a Saksi ket insaludsodna, “Mano ti tawenmon?” Nasdaaw ti kabsat isu nga insaludsodna met, “Sika, mano ti tawenmon?” Imbaga ti ubing nga innem ti tawenna ken adda surat nga ipapaited ni nanangna kadagiti Saksi ni Jehova. Isu ket imbaon ni nanangna a mangbirok iti Saksi a saan nga ubing ken saan met a nataengan. Imbaga ti kabsat nga isu ket agtawen iti 25. Gapuna, ti ubing intedna ti surat iti dayta a kabsat. Kastoy ti nailanad iti surat: “Itay simmarungkarkayo iti balaymi, diak linuktan ti ridaw. Nakaro ti leddaangko ken kidkiddawek iti Dios a tulongannak. Kayatko met koma a denggen ti mensaheyo ken basaen ti Biblia ngem marigatanak a mangaramid iti dayta. Kayatko nga adda mangyadal kaniak iti Biblia ken tumulong kaniak a mangdaer iti saan a naballigi a panagasawa. No matulongannak, pangngaasim ta umayka ditoy balaymi inton malem ta itay bigat ket addaak pay laeng iti iddak. Pagyamanan.”

Iti dayta a malem, sinarungkaran ti kabsat dayta a babai ken inawisna a tumabuno iti Memorial ken iti espesial a palawag, nga agpada a nakaliwliwa iti babai. Manipud idin, isu ket nagtultuloy a nagunggonaan gapu iti regular a pannakigimgimongna ken  nagsayaat ti irarang-ayna iti panagadalna iti Biblia babaen ti libro nga Ania a Talaga ti Isursuro ti Biblia? Uray ti innem ti tawenna nga anakna ken ti maysa pay nga anakna nga agtawen iti 12, tagtagiragsakenda met ti personal a panagadalda iti Biblia.

Puerto Rico

Insurat ti maysa a kabsat a babai: “Mangituktukonak kadagiti magasin iti lansangan idi nakitak ti maysa a babai a mangbombomba kadagiti pilid ti luganna. Inasitgak ngem sakbay pay a nakapagsaoak, nagkiddawen iti Pagwanawanan ken Agriingkayo! ken imbagana a kaay-ayona a basaen dagita. Imbagak nga iyadalak iti Biblia ngem saanna a kayat gapu ta agnanaed kano iti maikadua a kadsaaran ti balay ni nanangna a kasta unay ti panangbusorna iti trabahotayo. Idi innalak ti adresna, daydiay laeng nagan ti kalsada ti intedna. Naminsan, napanak iti kalsada nga imbagana tapno birokek ti balayna ngem diak nabirokan. Iti sabali manen nga aldaw, nagsubliak iti dayta a lugar ket nagsaludsodak kadagiti tattao no adda am-ammoda nga agnagan iti Nancy, nga addaan iti dua a babassit pay nga annak. Anian a ragsakko ta naammuak met laeng ti adresna. Ngem saanko latta a madandanon iti balayda isu a nangibatiak kadagiti magasin ken ababa a surat para kenkuana. Idi nadanonko met laengen idiay balayda, nakasangit ken imbagana a kayatna ti mapan iti Kingdom Hall. Immay iti Kingdom Hall ket sibabara nga inabrasa dagiti kakabsat. Kinunana a saanna nga ammo a napnapanak iti pagtaenganda gapu ta dinadael ni nanangna dagiti suratko ken dagiti magasin sakbay pay a makaawid. Inyadalak ni Nancy iti balay ni manangna ket di nagbayag, regularen a tumabtabuno kadagiti gimong. Saan pay a pulos a limmanglangan kadagiti gimong manipud idi ken nagpasalistan iti Teokratiko nga Eskuelaan ti Panagministro. Makaparagsak ta isu ken ti dua a babassit pay nga annakna ket agkomkomenton kadagiti gimong.”

 ASIA KEN TI MAKINTENGNGA A DAYA

PAGILIAN 47

POPULASION 4,073,556,172

AGIBUMBUNANNAG 635,896

PANANGYADAL ITI BIBLIA 579,554

South Korea

Nakita ti maysa a lalaki nga agnanaed iti asideg ti Kingdom Hall ti ababa a surat a naiparabaw iti kotsena a nakaparada iti sango ti balayna. Kastoy ti naisurat: “Nagaradgadak ti kotsem itay iparparadak ti luganko ngem diak inggagara. Pangngaasim ta awagannak ta siak ti mangipaestimar.” Gapu ta ammona ti kababalin dagiti Saksi a makigimgimong iti asideg a Kingdom Hall, naikunana iti un-unegna, ‘Saksi ni Jehova siguro daytoy a tao ta imbagana ti pudno.’

Ti kabsat a babai nga agnagan iti Su-yeon ti nangibati iti surat, ket idi inawagan ti lalaki, nagpadispensar ken imbagana manen nga ipaestimarna ti kotse. Panunotem ti siddaaw ti kabsat idi insaludsod ti lalaki: “Saksi ni Jehova-ka kadi?” Imbaga ti lalaki nga awan ti rumbeng a pagdanaganna ta isunan ti mangipaestimar iti kotsena. Imbagana pay a kayatna ti makipagkita iti kabsat gapu ta adu ti kayatna a maammuan maipapan kadagiti Saksi. Nagpakadua ni Su-yeon iti tatangna ken iti sabali pay a kabsat a lalaki ket sinarungkaranda ti lalaki. Kinuna ti lalaki: “Napalpaliiwko dagiti Saksi gapu ta agnanaedak iti asideg ti Kingdom Hall. Ammok a nasasayaatkayo a tattao isu a diak maawatan no apay nga adda dagiti manggurgura la unay kadakayo.” Ti tatang ni Su-yeon inusarna ti Biblia ken ti libro nga Ania a Talaga ti Isursuro ti Biblia? a nangsungbat iti amin a saludsod ti lalaki. Ita, daytoy a lalaki ket regularen  nga iyad-adalan ti tatang ni Su-yeon ken nagsayaat ti panagrang-ayna.

Dagiti pagilian a maing-ingetan wenno maiparit ti trabaho

Nagutugot ti maysa a koronel iti nagsayaat nga epekto ti kinapudno iti kababalin ti asawana a maysa kadagiti Saksi ni Jehova. Kas resultana, nakipagadal met iti Biblia. Naammuan daytoy ti komandantena, a maysa a heneral, isu a pinaayaban ken kinasarita ti heneral. Imbaga ti heneral a no saanna nga isardeng ti pannakipagadalna kadagiti Saksi ni Jehova, isu ket maidestino iti kasusulinekan a paset ti pagilian. Situtured a kinuna ti koronel a nabayagen nga agad-adal iti Biblia ni baketna ket awan ti makitana a dakes iti dayta. Dayta ti gapuna a saanna a kayat nga isardeng ti panagadalna. Kalpasan ti sumagmamano a tiempo, inkeddeng ti koronel ti aglusulos kas soldado. Ita, isu ket bautisadon a Saksi ken agserserbi kas regular pioneer ken ministerial nga adipen. Makaparagsak ta ti asawa ti heneral a kinasaritana ket nakipagadal met iti Biblia. Uray isu ket saan a kabaelan a pasardengen ti heneral. Ita, ti asawa ti heneral ket agserserbi metten kas regular pioneer.

Iti sabali pay a pagilian, adda babai nga iyad-adalan ti maysa a kabsat. Daytoy a babai ket busbusoren unay ni lakayna gapu iti pannakipagadalna. Yantangay saan a mabalin nga iyadalan daytoy a babai iti balayda, nagtulagda iti kabsat nga agadalda laengen idiay bassit a parke. Iti umuna a panagadalda, adda lakay nga agpagnapagna iti parke a mangsisiim ken dumdumngeg iti saritaanda. Maysa nga aldaw, immasideg kadakuada ti lakay ket nagsalsaludsod maipapan iti Biblia. Iti simmaganad a panagadalda, kasta manen ti inaramid ti lakay. Medio narurod ti babai a mayad-adalan ket kinunana: “Maysa nga oras laeng ti panagadalko iti Biblia ngem ag-agawem met aminen nga orasko gapu iti kasasaludsodmo.” Kalpasan dayta, nakisarita ti kabsat a babai iti maysa a kabsat a lalaki tapno isu ti mangyadal iti lakay. Daytoy a lakay ket nagpartak a rimmang-ay iti naespirituan ken tumabtabunon kadagiti  gimong. Isu ket makitkita ti dua a babbai a kaarrubana no rummuar iti balayna tunggal Domingo. Nagsayaat ti panagkawkawesna ken adda iggemna a portpolio. Kayatda a maammuan no sadino ti pappapananna ken nadamagda nga addan ti baro a relihionna. Gapuna, sinurot dagiti dua a babbai daytoy a lakay agingga iti Kingdom Hall. Adda sumagmamano a kakabsat a babbai a nakisarita kadakuada ken sinaludsodda no kayatda ti makipagadal iti Biblia. Immanamong daydiay maysa. Dagitoy a tallo nga indibidual​—ti babai a mayad-adalan idiay parke, ti lakay a nakasarita ti kabsat idiay parke, ken ti maysa kadagiti babbai a nangsurot iti lakay​—ket nagsayaat ti irarang-ayda iti naespirituan ken nabiit pay a nabautisaranda.

Cambodia

Ni Louy a maysa a payunir idiay Cambodia ket kanayon nga agbisbisekleta a mapan mangyadal iti purok a dagiti balbalay sadiay ket naaramid iti bulo ken nangato dagiti adigina. Napan iti dayta a purok tallo nga aldaw sakbay ti Memorial, ket bayat nga inlawlawagna ti panggep ti Memorial iti maysa kadagiti iyad-adalanna, immaribungbong dagiti ubbing ken adu ti insalsaludsodda. Immadu nga immadu ti bilang dagiti ubbing. Nakaiwaras ni Louy iti 57 nga imbitasion iti Memorial. Iti simmaganad nga aldaw, nagbisikleta ni Louy a napan iti dayta a purok ta adda pay maysa nga iyadalanna iti Biblia sadiay. Imbaga daytoy nga iyad-adalanna a kayat met dagiti kakabagian ken gagayyemna ti tumabuno. Gapuna, nangibati ni Louy iti 20 nga imbitasion nga iwaras ti iyad-adalanna. Madanagan ni Louy no kasanona a matulongan amin dagitoy a tattao tapno matabunuanda ti Memorial. Kalpasan ti panangikararagna iti daytoy a banag, kinasaritana ti tatang ti maysa kadagiti iyad-adalanna iti Biblia, nga isu ti koordineytor iti dayta a purok. Impanamnama daytoy ken Louy a no adda maarkilana nga uray maysa laeng a tuk-tuk (bassit a karuahe a gagangay a makalaon iti uppat a tao ken paguyoden ti motorsiklo), makatabunoda amin gapu ta mabalin nga agtakder wenno agsisinnaklotda. Kasta unay ti ragsak ni Louy a nakakita iti 18 a timmabuno manipud iti dayta a purok.

 India

Ti kabsat a lalaki nga agtartrabaho kas drayber ginundawayanna ti oportunidad a mangasaba iti pasahero a maysa a periodista. Inapresiar ti babai ti kinatured ti kabsat yantangay ti dadduma a Saksi iti dayta a lugar ket um-umsien dagiti bumusbusor bayat ti panangiranranudda iti naimbag a damag. Inkeddeng ti periodista nga ipablaakna iti pagiwarnak ti nagtungtonganda. Kastoy ti insuratna: “Kayatko a maammuan no ania ti mapasamak no medio rurodek ti drayber babaen ti panangikunak: ‘Nadamagmo kadin no kasano a namalmalo dagiti karelihionam ken no kasano a nadarup dagiti paggigimonganyo iti nadumaduma a paset ti estado?’ Kinunana, ‘Wen, nabasak tattay dayta iti pagiwarnak.’ ‘Ania ngarud ti aramidenyo no agtultuloy a riribukendakayo [dagiti bumusbusor]?’ Nagngilangil  sa kinunana: ‘Saan a bale. Itultuloymi latta a patien [ti kinapudno].’”

Kastoy ti insurat ti periodista maipapan iti tract nga inted kenkuana ti Saksi: “Idi nakasangpetak idiay balaymi, inruarko ti pampleta. Saan a nakappapati ti ladawan nga adda iti dayta​—dagiti berde a karuotan, dan-aw, dagiti agsabong a kaykayo, dagiti tattao nga agap-apit kadagiti bukbukel ken prutas, ken dagiti bantay a naabbungotan iti niebe. ‘Biag iti maysa a natalna a baro a lubong,’ ti nakasurat iti dayta. Narelihiosuan ti mensahe a linaonna. Gagangay nga awan ti agkedked no mayawatanda iti pampleta, mangyan-anunsio man dayta iti paggatangan iti kawes wenno maipapan iti wagas ti panagbiag. Ngem no isarsaritam ti maipapan iti natalna a baro a lubong, mabalin a guraendaka dagiti tattao.”

Pilipinas

Iti maysa a paset ti rehion ti Zamboanga, adda nakangatngato a bantay nga uray no 200 kilometro ti kaadayom, makitam latta ti tuktokna. No mapan mangasaba dagiti kakabsat nga agnanaed iti asideg dayta a bantay, masansan nga agiinnangawda, a kunkunada: “Ania ngata no adda interesado a tao nga agnanaed iti tuktok dayta a bantay?” Maysa nga aldaw, bayat a mangaskasabada iti arsadanan ti bantay, adda lalaki nga immasideg ket imbagana nga agbirbirok kadagiti Saksi ni Jehova. Kinunana a kayatna ti agpayadal iti Biblia. Sinaludsod dagiti kakabsat no sadino ti pagnanaedanna. Idi intudona ti tuktok ti bantay, saan a nakauni dagiti kakabsat. Kinuna ti lalaki a ti balayna ket saan nga idiay tuktok no di ket iti pay likudna. Ngem tapno makadanonka sadiay, masapul nga umulika iti tuktok ti bantay ta dayta ti kakaisuna a pagnaan. Idi naalan dagiti kakabsat ti riknada, immanamongda a sarungkaranda ti lalaki. Nairugi ti panangyadal iti Biblia ket ita, tabtabunuanen ti lalaki ti linawas a gimong idiay Kingdom Hall uray no nakaad-adayo dayta iti balayna. Daytoy a lalaki ket maysa itan kadagiti adu a tattao manipud iti amin a nasion nga umul-uli iti “bantay ti balay ni Jehova.”​—Isa. 2:2.

 EUROPA

PAGILIAN 47

POPULASION 736,988,468

AGIBUMBUNANNAG 1,563,910

PANANGYADAL ITI BIBLIA 819,067

Finland

Adda dua a kakabsat a lallaki a mangaskasaba iti binalaybalay ken mangituktukon iti panangyadal iti Biblia babaen ti tract a Kayatmo Kadi a Maammuan ti Kinapudno? Maysa a lalaki ti nangilukat iti ridaw ket pinastrekna dagiti kakabsat uray no agsasaoda pay laeng. Kinuna ti lalaki: “Adu ti kayatko a saludsoden. Apay nga itattakayo la nga immay?”

“Kanayon nga um-umaykami ditoy,” insungbat dagiti kakabsat.

Kinuna ti lalaki: “Kanayon nga ikarkararagko nga adda koma umay a Saksi ni Jehova ditoy balaymi. Masansanak nga ag-jogging iti kastoy nga oras, ngem saanak a napan ita. Imbag laengen ta immaykayo!” Narikna ti lalaki a nasungbatanen dagiti kararagna. Idiay pagtartrabahuanna, masansan a negatibo ti komento dagiti tattao maipapan kadagiti Saksi ni Jehova. Gapu ta kayatna a maammuan no agpayso dagita a komento, napan nagsukimat iti libraria. Nakitana ti libro a Dagiti Saksi ni Jehova—Manangiwaragawag iti Pagarian ti Dios. Binasana dayta ket natakuatanna nga awan ti kinaagpaysuanna dagiti negatibo a komento maipapan kadagiti Saksi. Dayta ti gapuna a kayatna unay ti makisarita kadagiti Saksi ni Jehova. Nayadalan daytoy a lalaki ken dagus a timmabuno kadagiti gimongtayo. Kinasabaanna ti dati nga asawana ken ti anakda ket nayadalan met dagitoy iti Biblia.

 Britania

Ni Kirsty a maysa a regular pioneer ket nagsursuro iti Pranses ken Lingala tapno makasabaanna dagiti taga-Congo nga agnanaed iti teritoriada. Maysa nga aldaw, nakitana ti maysa a babai a taga-Congo a marigrigatan nga umuli iti bus gapu ta adu ti kargana. Nagsao ni Kirsty iti Lingala, nga imbagana iti babai a tulonganna a mangyuli kadagiti kargana. “Apay a makapagsaoka iti Lingala idinto ta maysaka a puraw?” insaludsod ti babai. Imbaga ni Kirsty a tumabtabuno iti kongregasion nga agus-usar iti lenguahe a Lingala ket dagiti Saksi iti dayta a lugar ti nangisuro kenkuana nga agsao iti dayta a lenguahe tapno makasaritana dagiti tattao maipapan iti Biblia. Kayat ni Kirsty nga itukon ti panagadal iti Biblia iti daytoy a babai isu a saan a bimmaba iti bus agingga a nakadanon ti babai iti papananna.  Binagkat ni Kirsty dagiti karga ti babai sa intulodna agingga iti maikatlo a kadsaaran ti apartment a pagnanaedanna. Ni Kirsty ket pinastrek ti asawa ti babai ken ti uppat nga annakda. Impakitana iti dayta a pamilia no kasano nga adalen ti Biblia babaen ti libro nga Ania a Talaga ti Isursuro ti Biblia? Ti babai ken ti dua nga in-inauna nga annakna ket agad-adalen iti Biblia ken ar-aramidenda amin a kabaelanda a mangay-ayo ken Jehova.

Georgia

Inkeddeng ti dua a kakabsat a lallaki a payunir ti umakar iti kabambantayan a paset ti pagilian a pagnanaedan ti sumagmamano laeng a Saksi. Inrugida ti nangasaba iti pinuronpurok ket nagsayaat ti resulta dayta. Nakaiwarasda iti ginasut a literatura ken nakairugida iti adu a panangyadal iti Biblia. Iti damo a panangasaba dagitoy a kakabsat iti kabambantayan, bassit laeng ti abastoda ken saanda nga ammo no sadino ti umyananda. Ngem nasupusopan amin a kasapulanda. Inawis ida dagiti pumurok nga umyan kadagiti pagtaenganda ken pinakanda ida. No dadduma, paumyanen ken pakanen met ida uray dagiti tattao a saan a mayat a dumngeg kadagiti mensaheda. Di nagbayag, nadutokan dagitoy a kakabsat nga agserbi kas special pioneer iti daytoy a lugar. Gapu ta nakaad-adu ti iyad-adalanda, nangikeddengda iti espesipiko a bilang dagiti estudiante a kabaelanda nga asikasuen. Gagangay nga asitgan ida dagiti tattao kadagiti kalsada tapno agpayadalda iti Biblia isu nga uray no linimitaran dagiti kakabsat ti bilang dagiti iyadalanda, binulan nga agpromedio iti nasurok a 20 ti iyad-adalan ti tunggal maysa kadakuada.

Hungary

Kanayon nga adda maitultulod a nakabotelia a gatas iti balay ti maysa a kabsat a babai. Naikabil dayta iti supot a maibitin iti alad. Maysa nga aldaw, idi insubli ti kabsat dagiti nagawangan a botelia, inkabilna iti supot ti tract a Kayatmo Kadi a Maammuan ti Kinapudno? Iti simmaganad a pannakaitulod dagiti gatas, nasdaaw ti kabsat ta ti paraitulod ket nangikabil iti bassit a papel a nakaisuratan  ti sumagmamano a saludsodna maipapan iti tract ken kidkiddawenna a mayadalan iti Biblia. Dagus a sinarungkaran ti kabsat ti paraitulod iti gatas idiay farm a pagnanaedanna ken inyadalanna iti Biblia babaen ti libro nga Ania a Talaga ti Isursuro ti Biblia? Sakbay dayta a pasamak, nabayagen nga agbirbirok ti babai iti sungbat dagiti saludsodna kadagiti nadumaduma a relihion ngem awan ti nasarakanna a makapnek a sungbat. Immadu ketdi dagiti saludsodna. Idi naginteres met ti maysa kadagiti annakna a babbai, inikkan ti kabsat iti libro nga Agsursuroka iti Naindaklan a Mannursuro. Imbaga ti ina a no rabii, masansan a bumaringkuas ti anakna gapu iti nakabutbuteng a tagtagainepna. Ngem idi nabasana ti sumagmamano a kapitulo ti libro, saanen a managbutbuteng ti anakna ken nasayaaten ti tuturoganna. Nagtultuloy ti panangyadal iti Biblia ket regularen a tumabtabuno iti gimong iti Domingo daytoy a babai ken ti dua nga annakna.

Italia

Da Cristina ken Manel nga agpada nga agserserbi iti amin a tiempo ket agiwarwaras iti tract a Kayatmo Kadi a  Maammuan ti Kinapudno? iti away ti makintengnga a deppaar ti Italia. Iti maysa a farm, nakangngegda iti ariwawa manipud iti arubayan. Impukkaw ti maysa a bumalay apaman a nakitana dagiti Saksi: “Darasenyo! Tulongandak!” Nagdardaras dagiti Saksi a napan nangtulong kenkuana ket nakitada nga ikarkarigatanna a tenglen ti ruangan ti kulongan tapno saan a makabulos ti dakkel ken nauyong a baboy. Nadadael ti ruangan ti kulongan isu a maamak ti babai amangan no makabulos ti baboy ket mapan iti asideg a kakaykaywan. Maymaysana laeng idi isu nga ar-aramidenna ti amin a kabaelanna a mangiserra iti ruangan. “Tenglenyo man daytoy ta mapanak mangbirok iti pangitrangkak!” impukkaw ti babai ken ni Cristina. Nagalisto a simmungbat ni Cristina a kabutengna ti baboy. Ti babai inikkanna ni Manel iti karabasa ken kutsilio sa kinuna: “Dika agdanag. Galipem daytoy a karabasa sa ipuruakmo iti baboy tapno agtalna ta mapanak mangbirok iti trangka.”

Kalpasanna, pimmanawen ti babai iti sumagmamano a minuto. Kabayatanna, karkarintaren ni Cristina ni Manel a mangipuruak iti karabasa ngem marigatan ni Manel nga aggalip ta nagtangken dayta. Nakasubli met laengen ti babai ket tinarimaanna ti ruangan. Uray la nakaanges iti nauneg ti babai gapu iti bang-arna ken kinunana: “Talaga nga imbaonnakayo ti Dios!”

“Husto ti kinunayo!” insungbat dagiti kakabsat bayat nga inruarda ti tract sa impakitada kenkuana.

Dagus a kinuna ti babai: “Napintas dayta a topiko. Nasaysayaat siguro no agtugawtayo ta pagsasaritaantayo ti maipapan iti dayta.” Gapuna, nangala ti babai iti sumagmamano a tugaw ket nagtugawda iti kainaran. Nakaad-adu ti sinaludsodna. Dimngeg a naimbag ket nagustuanna ti sungbat dagita. Di nagbayag, nayurnos ti panagadalna iti Biblia. Kuna da Cristina ken Manel nga imbag laengen ta adda baboy a dandani nakabulos iti dayta a gundaway ta naaddaanda iti kastoy a kapadasan.

 OCEANIA

PAGILIAN 30

POPULASION 38,338,482

AGIBUMBUNANNAG 99,816

PANANGYADAL ITI BIBLIA 59,619

Australia

Ni Fred a maysa a Saksi nga agnanaed iti natalna nga ili iti igid ti baybay ket nangibati iti tallo kadagiti DVD-tayo iti maysa a lalaki. Di nagbayag, nakaawat ni Fred iti surat manipud iti lalaki. Kastoy ti nadakamat iti sumagmamano a pasetna: “Nakataltalged ti riknak bayat a buybuyaen ken dengdenggek a naimbag dagiti DVD. Marikriknak ti talna, rag-o, ken isem dagiti tattao a buybuyaek. Adun a tawen a diak nakarikna iti kasta. Ita, mamatiakon nga adda nasaysayaat a biag nga agur-uray kaniak iti masanguanan. Nagubsangak idi kadagiti Saksi nga um-umay iti balaymi. Gapu iti daytoy, sipapasnek nga agpadispensarak. Mannakigayyemkayo a tattao ken kayatyo laeng nga iwaragawag ti naimbag a damag. Ditay la ammo amangan no maysa nga aldaw, addaakton iti nagbabaetanyo a makigimgimong iti Kingdom Hall.”

New Zealand

Sinarungkaran ti dua a kakabsat a babbai ti maysa nga organisasion ti gobierno a mangas-asikaso kadagiti banag a mainaig iti pamilia ket kiniddawda no mabalinda a kasarita ti direktor. Kas panagsagana, nangbalkutda kadagiti literatura a magustuan la ketdi ti direktor ta mausarna dagita iti panangtulongna kadagiti pamilia. Dagitoy a literatura ramanenna dagiti libro a Ti Sekreto ti Kinaragsak iti Pamilia ken Dagiti Saludsod nga Iyimtuod ti Agtutubo—Dagiti Sungbat nga Epektibo, agraman ti Agosto 2007 a ruar ti Agriingkayo! a nakaitampokan ti serye a “Pito nga Addang iti Nasaysayaat a Panangpadakkel iti  Annak” ken ti Oktubre 2007 a ruar a nakaitampokan ti serye a “Salaknibanyo Dagiti Annakyo!”

Iti isasarungkar dagiti kakabsat, inlawlawagda a ti trabahotayo ket itungtungpal dagiti boluntario a tattao a maseknan unay a tumulong kadagiti pamilia nangnangruna iti naespirituan. Impakitada ti linaon ti nabalkut a pakete. Dimngeg ti direktor, inawatna dagiti literatura, ken imbagana a kayatna nga iranud dagita nga impormasion kadagiti 35 nga empleadona. Kinunana pay a ti 503 a pamilia nga adda iti listaanna ket magunggonaan kadagiti artikulo a linaon ti Agriingkayo! Nakaurnong dagiti kakabsat iti 557 a kopia ti Agriingkayo! Dua a lawas kalpasanna, nakaawatda iti awag iti telepono a mangipakpakaammo a naiwaras aminen a magasin kadagiti nagduduma a pamilia.

Fiji

Ti lalaki nga agnagan iti Viliame ket nalaing nga agay-ayam iti football ken tartarigagayanna nga irepresentar ti pagilianda iti daytoy nga ay-ayam. Kayat met ti adingna a ni Leone ti agbalin nga umaayam iti football ngem idi immanamong nga iyadalan ti maysa nga special pioneer, naamirisna a saanna a mabalin a pagserbian ti dua nga appo. Inrugi ni Leone ti tumabuno kadagiti gimong ken insardengnan  ti agay-ayam iti football. Ti nanangna ket maysa a Saksi. Isu ti gimmatang iti bado nga usarenna a makigimong ngem pinisang ni manongna a Viliame dagita bayat ti naminsan a panagsubangda. Nasakit ti nakem ni Leone ngem saan a nagibales. Di nagbayag, napan ni Leone idiay tiendaan tapno aglako iti sandia. Ti dadduma a naglakuanna ket inggatangna iti badona a makigimong kasta met iti Biblia, ballpen, ken highlighter. Inggatanganna met ni manongna. Natukay ti puso ni Viliame iti kinaimbag ni adingna uray no isu ket nagubsang kenkuana. Insuotna ti baro a kawesna ken sinorpresana ni Leone babaen ti itatabunona iti gimong. Nagpayadal met iti Biblia ni Viliame ket agpadada nga agkabsat a rimmang-ay iti naespirituan. Bayat a sagsaganaan dagiti agkabsat ti panagbautisarda, nakaawat ni Viliame iti maka-engganyo a tukon nga agay-ayam iti football idiay Europa. Dayta a tukon ket tartarigagayan ti adu nga agtutubo a lallaki ta dayta ti mangpabaknang ken mamagbalin kadakuada a nalatak. Ngem saanen a dayta ti kalat ni Viliame ta inkeddengnan nga idedikar ti biagna ken Jehova. Da Viliame ken Leone ket agpada a nagserbi kas auxiliary pioneer iti innem a bulan kalpasan ti bautismoda. Gapu ta napaliiw ni Waisea a tatangda ti nasayaat a kababalinda, immanamong met a mayadalan iti Biblia. Dakkel ti nagbalbaliwan ni Waisea ket nabautisaran a kadua ti dua nga annakna a babbai iti maysa nga aldaw ti espesial nga asamblea.

[Dagiti Ladawan iti panid 45]

Ti panangdisiplina iti bagi ken ti moderno a teknolohia ti nakatulong iti maysa a kabsat a mangyadal iti Biblia

[Ladawan iti panid 46]

Ti kinamatalekna ket nakaipaay iti panangsaksi

[Ladawan iti panid 48]

Ti sangapamiliaan a panagdaydayaw ket nakatulong ken Stefan a mangasaba iti eskuelaan

[Ladawan iti panid 49]

Adda naispal a biag gapu iti kinapingetna

[Ladawan iti panid 50]

Nakabirok iti Saksi a saan nga ubing ken saan met a nataengan

[Ladawan iti panid 55]

Nangarkila iti maysa laeng a “tuk-tuk”

[Ladawan iti panid 58]

Ti panagsursuro iti sabali a lenguahe ket nagbanag iti panangyadal iti Biblia

[Ladawan iti panid 60]

Nadumaduma ti pamay-an a mangasaba iti di pormal

[Ladawan iti panid 63]

Panangbalkut iti literatura

[Ladawan iti panid 64]

Insardengda ti agay-ayam iti football tapno makapagserbida ken Jehova