Inton Mapno ti Daga iti Pannakaammo ti Dios
Kapitulo 19
Inton Mapno ti Daga iti Pannakaammo ti Dios
1, 2. Kasano a nadadael ti parsua ni Jehova?
IPAPANTAYON a kailepleppas ti maysa a nalaing a pintor ti nakapimpintas a ladawan. Siuumiso a maibilangna dayta a nasayaat unay—maysa nga obra maestra! Ngem karabiyánna, dinadael ti karibalna gapu iti imon. Gagangay laeng, nasakit unay ti nakem ti pintor. Anian a gagarna a makita ti nangdadael a maipisok iti pagbaludan! Ken anian a panagtarigagay ti pintor a maisubli ti sigud a pintas ti gapuananna.
2 Kas iti dayta a pintor, nangaramid ni Jehova iti obra maestra babaen ti panangisaganana iti daga ken panangisaadna ti sangatauan iti dayta. Kalpasan ti panangparsuana iti lalaki ken babai, inawaganna amin nga inaramidna ditoy daga a ‘nasayaat unay.’ (Genesis 1:31) Da Adan ken Eva ket annak ti Dios, ken ay-ayatenna ida. Kasna la makitkita idin ti naragsak, nadayag a masakbayanda. Pudno, sinugsogan ida ni Satanas nga umalsa, ngem nupay nadadael ti nakaskasdaaw a parsua ti Dios, mabalin pay a tarimaanen.—Genesis 3:23, 24; 6:11, 12.
3. Ania “ti pudpudno a biag”?
3 Inkeddeng ti Dios a lintegen dagiti bambanag. Tarigagayannatay unay a makita nga agbiag iti wagas a pinanggepna idi damo. Ti ababa ken nariribuk a biagtayo ket saan nga isu ti “pudpudno a biag,” ta naiduma unay dayta iti pinanggep ni Jehova. “Ti pudpudno a biag” a kayat ti Dios para kadatayo isu ti “agnanayon a biag” iti sidong dagiti perpekto a kasasaad.—1 Timoteo 6:12, 19.
4, 5. (a) Kasano a matungpal ti namnama a Paraiso? (b) Apay a rebbengtay a panunoten ti namnamatayo iti masanguanan?
Santiago 4:17) Ngem panunotenyo dagiti bendision a masagrapyo no iyaplikaryo dayta a pannakaammo ken ikagumaanyo a gun-oden ti biag nga agnanayon. Iti Saona, ti Biblia, nagpintas ti panangiladawan ni Jehova a Dios iti kasasaad ti biag iti Paraiso a daga a nakaas-asidegen. Siempre, kas tattao ni Jehova, saantay nga agserbi iti Dios gapu laeng iti panagtarigagay iti gunggona. Agserbitayo iti Dios gapu ta ay-ayatentayo. (Marcos 12:29, 30) Maysa pay, saantay a mategged ti biag babaen ti panagserbi ken Jehova. Ti biag nga agnanayon ket sagut ti Dios. (Roma 6:23) Makagunggona kadatayo ti panangpampanunot iti kasta a biag agsipud ta ti namnama a Paraiso ipalagipna kadatayo no ania a kita ti Dios ni Jehova—ti naayat a “mananggunggona kadagidiay sipapasnek a mangsapsapul kenkuana.” (Hebreo 11:6) Ti naraniag a namnama nga adda iti panunot ken pusotayo tulongannatay a mangibtur kadagiti pakarigatan iti lubong ni Satanas.—Jeremias 23:20.
4 Adda kakuyog ti pannakaammo iti Dios a pagrebbengan iti sanguanan ni Jehova. (5 Ipamaysatay ita ti atensiontayo iti naibatay-Biblia a namnama a biag nga agnanayon iti naindagaan a Paraiso iti masanguanan. Aniat’ kasasaad ti biag inton mapno ti daga iti pannakaammo ti Dios?
KALPASAN TI ARMAGEDON—MAYSA A PARAISO A DAGA
6. Ania ti Armagedon, ken aniat’ kaipapanan dayta iti sangatauan?
6 Kas naipakitan, din agbayag dadaelento ni Jehova a Dios ti agdama a dakes a sistema ti bambanag. Sipapartak nga umas-asideg ti lubong iti aw-awagan ti Biblia a Har–Magedon, wenno Armagedon. Mabalin a panunoten dagiti dadduma a tuktukoyen dayta a sao ti nuklear a panangikisap a gapuanan dagiti aggugubat a nasion, ngem naiduma unay ti Armagedon. Kas ipakita ti Apocalipsis 16:14-16, ti Armagedon isut’ “gubat ti naindaklan nga aldaw ti Dios a Mannakabalin-amin.” Maysa dayta a gubat a pakairamanan dagiti “ar-ari iti intero a mapagnaedan a daga,” wenno nasnasion. Din agbayag, makigubatto ti Anak ni Jehova a Dios, ti nadutokan nga Ari. Di pagduaduaan ti pagbanaganna. Maikisapto dagiti amin a bumusbusor iti Pagarian ti Dios ken paset ti dakes a sistema ni Satanas. Dagidiay laeng nasungdo ken Jehova ti makalasat.—Apocalipsis 7:9, 14; 19:11-21.
7. Sadinonto ti yan ni Satanas ken dagiti demoniona bayat ti Sangaribu a Tawen a Panagturay ni Kristo, ken aniat’ pagsayaatan daytoy iti sangatauan?
7 Ipapanyon a nakalasatkayo iti dayta a didigra. Aniantot’ kasasaad ti biag ditoy daga iti baro a lubong nga inkari ti Dios? (2 Pedro 3:13) Di kasapulan a pugtuantayo, ta ti Biblia ti mangibaga kadatayo, ket makapagagar ti ibagbagana. Ipakaammona kadatayo a maparautanto ni Satanas ken dagiti demoniona, a maipupokda iti mangliwengliweng a kinaawan-gaway bayat ti Sangaribu a Tawen a Panagturay ni Jesu-Kristo. Saanton nga umas-assibay dagidiay a dakes, naulpit a parsua, a mangriribuk ken mangsugsog kadatayo a tumallikud iti Dios. Anian a pannakabang-ar!—Apocalipsis 20:1-3.
8, 9. Iti baro a lubong, anianto ti mapasamak kadagiti an-annayen, sakit, ken panaglakay?
8 Iti saanen a mabayag, mapukawton amin a kita ti sakit. (Isaias 33:24) Tumakder, magna, agtaray, ken agsalanton dagiti pilay nga addaan iti nasalun-at, napigsa a saksaka. Kalpasan ti adu a tawen a panagbiag iti naulimek a lubongda, mangngegton dagiti tuleng ti nararagsak nga uni iti aglawlawda. Masdaawto dagiti bulsek a makakita kadagiti agkakangayed a bambanag a nagdudumat’ maris ken sukogda. (Isaias 35:5, 6) Kamaudiananna, makitadanton ti ruprupa dagiti ay-ayatenda! Nalabit agkudrepto iti apagbiit ti panagkitada gapu iti lua ti ragsak.
9 Panunotenyo laengen! Awanton dagiti anteohos, awanton dagiti saklay ken sarukod, awanton dagiti agas, awanton dagiti klinika para iti ngipen wenno ospital! Saanton a paidaman ti emosional a sakit ken leddaang dagiti tattao iti ragsak. Saanton nga agsakit dagiti ubbing. Awanton dagiti parikut a kakuyog ti panaglakay. (Job 33:25) Nasalsalun-at ken napigpigsatayton. Tunggal agsapa, agriingtayto manipud iti makapabang-ar a panaginana iti rabii nga addaan napabaro a pigsa, a nakaradkad ken magagaran a mangirugi iti naganaygay a biag ken makapnek a trabaho iti baro nga aldaw.
10. Ania a trabaho ti aramidento dagiti nakalasat iti Armagedon?
10 Adunto ti makaparagsak a trabaho nga aramiden dagiti nakalasat iti Armagedon. Pagbalinendanto a paraiso ti daga. Maikkatto amin a tidda ti narugit a daan a sistema. Tumpuarto dagiti parke ken minuyongan iti sigud a kaeskuateran ken nadadael a daga. Tagiragsakento ti amin ti komportable, makaay-ayo a pagtaengan. (Isaias 65:21) Iti panaglabas ti tiempo, lumawa ken agsaknapto dagiti pimmaraiso a paset ti daga agingga a maragpat ti intero a globo ti pagrukodan ti kinapintas nga impasdek ti Namarsua idiay minuyongan ti Eden. Anian a makapnek ti makiramanto iti dayta a trabaho a panangisubli!
11. Anianto ti relasion ti sangatauan iti aglawlaw ti daga ken kadagiti animal iti masanguanan?
11 Maaramidto amin daytoy iti sidong ti nadibinuan a panangiwanwan tapno saan a maranggasan ti aglawlaw. Aglalangento a sikakappia dagiti tao ken animal. Imbes a siuulpit a patayenna ida, iruginto manen ti tao ti responsable a panangaywan iti daga, nga aywanannanto ida a naimbag. Sirmataenyo dagiti lobo ken kordero, dagiti leon ken urbon a baka, nga agkakadua a mangan—ket naan-anay a natalged dagiti naamo nga animal. Uray ti bassit nga ubing awanto ti rumbeng a pagbutnganna kadagiti atap nga animal, ken saanto met a masinga ti kinatalinaay ti baro a lubong babaen dagiti naulpit, narungsot a tattao. (Isaias 11:6-8) Anian a nagtalna a baro a lubong!
MABALBALIWAN TI SANGATAUAN
12. Kasano a matungtungpal ita ti Isaias 11:9, ken kasanonto a matungpal idiay Paraiso?
12 Ibaga ti Isaias 11:9 kadatayo no apay nga awanto ti kinaranggas iti intero a daga. Kunana: “Ti daga mapnonto iti pannakaammo ni Jehova a kasla kadagiti dandanum saknapanda ti baybay.” Maipapan kadagiti tattao daytoy agsipud ta saan a makagun-od dagiti animal iti “pannakaammo ni Jehova” ken makapagbalbaliw, tangay iturturong ida ti nainkasigudan a sirib. Ngem ti pannakaammo ti Namarsua kadatayo kabaelanna a baliwan dagiti tattao. Awan duadua nga adda nagbalbaliwanyon kas resulta ti panangyaplikar iti pannakaammo ti Dios iti biagyo. Riniwriw ti nakaaramiden iti kasta. Gapuna, matungtungpalen daytoy a padto kadagidiay agserserbi ken Jehova. Nupay kasta, tuktukoyenna met ti panawen inton dagiti tattao iti intero a lubong iwaksida ti aniaman nga inaanimal wenno naranggas a kababalin ket agbalindan a mannakikappia iti agnanayon.
13. Ania a programa a panangisuro ti maaramidto ditoy daga?
13 Nagsayaat ketdin inton mapno ti daga iti pannakaammo ti Dios! Addanto nasaknap a programa a panangisuro iti panangiturong ti Ari a ni Jesu-Kristo ken ti 144,000 a kaduana nga agturay. Mausarto dagiti baro a “lukot.” Nalawag a dagitoy ti naisurat a bilbilin ti Dios a mausarto a pagibasaran iti panangisuro kadagiti agnaed iti daga. (Apocalipsis 20:12) Sursuruento ti sangatauan ti talna, saan a gubat. Mapukawton nga agnanayon dagiti amin a makadadael nga igam. (Salmo 46:9) Masursuruanto dagiti agnaed iti baro a lubong a makilangen kadagiti padada a tattao a buyogen ti ayat, panagraem, ken dignidad.
14. Kasanonto a naiduma ti lubong inton agbalin ti sangatauan a maysa a nagkaykaysa a pamilia?
14 Agbalinto ti sangatauan a maysa a nagkaykaysa a pamilia. Awanto dagiti lapped iti panagkaykaysa ken panagkakabsat. (Salmo 133:1-3) Saanton a kasapulan a mabalunetan dagiti balay tapno saan a mastrek dagiti mannanakaw. Agarinto ti talna iti tunggal puso, iti tunggal balay, iti tunggal paset ti daga.—Mikias 4:4.
TI NARAGSAK A PANAGUNGAR
15. Ania dagiti dua a grupo a mapagungarto ditoy daga?
15 Kabayatan dayta a Milenio, maaramidto ti panagungar. Saan a mapagungar dagidiay sipapakinakem a nagbasol a maibusor iti nasantuan nga espiritu, wenno aktibo a puersa ti Dios, babaen ti awanan panagbabawi a panangbusor iti pannakaiparangarang Mateo 23:15, 33; Hebreo 6:4-6) Siempre, ti Dios ti mangikeddeng no asino ti nagbasol iti kasta. Ngem adda dua a nagduma a grupo a mapagungarto—“dagiti nalinteg ken dagiti nakillo.” (Aramid 24:15) Tangay addanto umiso nga urnos, nainkalintegan a kunaen a ti umunanto a mapagungar ditoy daga isu dagiti nalinteg, dagidiay sisusungdo a nagserbi ken Jehova.—Hebreo 11:35-39.
wenno panangiturongna. (16. (a) Siasino ti karaman kadagiti “nalinteg” a mapagungarto ditoy daga? (b) Siasino kadagiti matalek idi un-unana a panawen ti nangnangruna a kayatyo a maam-ammo, ken apay?
16 Imbes a makangngegda kadagiti damag maipapan kadagiti gubat, didigra, ken ipapatay, makaawatto dagiti adipen ni Jehova kadagiti makaparagsak a report maipapan iti panagungar. Makapagagarto a maammuan ti maipapan iti panagungar dagiti matalek a lallaki ken babbai a kas kada Abel, Enoc, Noe, Abraham, Sara, Job, Moises, Rahab, Ruth, David, Elias, Ester. Anian a makapagagar a historikal a pasamak ti idatagdanto bayat nga ipaayda dagiti detalye ti adu a salaysay ti Biblia! Awan duadua a magagarandanto met ken dagiti nalinteg a natay kadagiti kallabes a tiempo a makaammo maipapan iti panungpalan ti sistema ni Satanas ken no kasanot’ panangsantipikar ni Jehova iti nasantuan a naganna ken panangalangonna iti kinasoberanona.
17. Ania a tulong ti ipaayto dagiti matalek kadagiti dadduma a napagungar?
17 Dakkelto ti maitulong dagitoy a matalek bayat ti sumaruno a paset ti panagungar, inton maruk-atan kadagiti kawar ni patay ti binilion a “nakillo” a tattao! Awanan ti kaaduan iti sangatauan iti gundaway a mangammo ken Jehova. ‘Binulsek [ni Satanas] ti pampanunotda.’ (2 Corinto 4:4) Ngem mapukawto ti aramid ti Diablo. Mapagungarto dagiti nakillo iti napintas ken natalna a daga. Abrasaento ida dagiti tattao nga organisado unay a mangisuro kadakuada maipapan ken Jehova ken iti agturturay nga Anakna, ni Jesu-Kristo. Bayat a maammuan dagiti riniwriw a napagungar ti Namarsua kadakuada ken masursuroda nga ayaten, mapnonto ti daga iti pannakaammo ni Jehova iti awan kapadana a kasaknap.
18. Aniat’ panagkunayo a mariknayo inton abrasaenyo dagiti napagungar nga ay-ayatenyo?
18 Anian a rag-o ti ipaay ti panagungar kadagiti pusotayo! Siasino ti saan a nagsagaba gapu ken patay a kabusortayo? Wen, siasino ti saan a nalapunos iti liday iti pannakaguped ti singgalut ti ayat wenno panaggayyem iti ipapatay ti patpatgentayo gapu iti sakit, kinalakay, aksidente, wenno kinaranggas? No kasta, darepdepenyo ti rag-o ti panagkakadua manen idiay Paraiso. Agiinnarakupto dagiti inna ken amma, annak a lallaki ken babbai, gagayyem ken kakabagian, nga agkakatawa ken agsasangit gapu iti rag-o.
KINAPERPEKTO KAMAUDIANANNA!
19. Ania a milagro ti maaramidto bayat ti Milenio?
19 Iti las-ud ti Milenio, maaramidto ti nakaskasdaaw a milagro. Para iti sangatauan, nalabit a daytanto ti kararagsakan a paset ti Sangaribu a Tawen a Panagturay ni Kristo. Bilinento ni Jehova ti Anakna a mangipakat kadagiti gunggona ti daton a subbot iti tunggal matalek ken natulnog a lalaki ken babai. Babaen iti dayta a pamay-an, maikkatto amin a basol ken agbalinto a perpekto ti sangatauan.—1 Juan 2:2; Apocalipsis 21:1-4.
20. (a) Aniat’ kaipapanan ti panagbalin a perpekto? (b) Kaanonto a mangrugi nga agbiag a naan-anay dagiti nakalasat iti Armagedon ken dagiti napagungar?
20 Kinaperpekto! Aniat’ kaipapanan dayta? Kaipapanannanto ti pannakaisubli ti biag a tinagiragsak da Adan ken Eva sakbay a nagbasolda ken Jehova a Dios. Iti pisikal, mental, emosional, moral, espiritual—iti amin a pamay-an a mapanunottayo—maragpatto a naan-anay dagiti perpekto a tattao dagiti pagalagadan ti Dios. Ngem agpapadanto kadi amin a tattao? Adayo a kasta! Amin a parsua ni Jehova—dagiti kayo, sabong, animal—isurona kadatayo a kaay-ayona ti panagduduma. Nagdudumanto ti personalidad ken talento dagiti perpekto a tattao. Tagiragsakento ti tunggal maysa ti biag a kas iti pinanggep ti Dios idi damo. Kuna ti Apocalipsis 20:5: “Dagiti dadduma kadagiti natay dida nagbiag agingga a naturpos ti sangaribo a tawen.” Kas iti dakkel a bunggoy dagiti nakalasat iti Armagedon, agbiagto a naan-anay dagiti napagungar inton magtengda ti awanan basol a kinaperpekto.
21. (a) Anianto ti mapasamak iti ngudo ti Sangaribu a Tawen a Panagturay ni Kristo? (b) Anianto ti mapasamak kamaudiananna ken ni Satanas ken kadagiti amin a dumasig kenkuana?
21 Maipasangonto dagiti perpekto a tattao iti maudi a pannubok. Iti ngudo ti Milenio, maruk-atanto iti apagbiit ni Satanas ken dagiti demoniona iti mangliwengliweng ken mapalubosandanto a mangaramid iti maudi a panagregget a mangyadayo kadagiti tattao ken Jehova. Ad-addanto nga ipangruna ti sumagmamano dagiti dakes a tarigagay ngem ti panagayat iti Dios, ngem saanto nga agpaut daytoy nga iyaalsa. Dadaelento ni Jehova dagitoy a managimbubukod a maikanunong ken Satanas ken dagiti amin a demoniona. Mapukawton iti agnanayon dagiti amin a nadangkes.—Apocalipsis 20:7-10.
ANIAT’ ARAMIDENYO?
22. Aniat’ namnamaenyo nga aramiden idiay Paraiso?
22 Agnaedto nga agnanayon iti Paraiso a daga dagidiay mangay-ayat ken Jehova a Dios. Ditay mailadawan ti rag-oda, ket mabalinyo met ti makiraman iti daytoy. Ti musika, arte, partuat—lab-awanto dagiti gapuanan ti perpekto a sangatauan ti kasasayaatan nga aramid dagiti agkakalaing a tattao iti daan a lubong! Wen, ta perpektonto ngaminen dagiti tattao ken awan pagpatinggaan ti panawenda. Darepdepenyo ti maaramidanyonto kas perpekto a tao. Panunotenyo met ti masursuroyonto ken dagiti padayo a tattao maipapan kadagiti parsua ni Jehova—manipud iti binilion a galaksi iti uniberso agingga kadagiti kababassitan a subatomic particle. Tunggal gapuanan ti sangatauan paragsakennanto nga ad-adda ti puso ti naayat a nailangitan nga Amatayo, ni Jehova.—Salmo 150:1-6.
23. Apay a saanto a pulos a makapasikor ti biag idiay Paraiso?
23 Saanto a makapasikor ti biag sadiay. Ad-addanto a makapainteres bayat ti panaglabas ti panawen. Ngamin, awan pagpatinggaan ti pannakaammo ti Dios. (Roma 11:33) Iti agnanayon, kanayon nga addanto dagiti baro a banag a sursuruen ken sukisoken. (Eclesiastes 3:11) Ken bayat nga itultuloyyo ti agsursuro maipapan ken Jehova a Dios, agtultuloy met ti panagbiagyo—saan laeng nga iti sumagmamano a tawen no di ket iti agnanayon!—Salmo 22:26.
24, 25. Apay a rumbeng nga agbiagkay itan a mayannurot iti pannakaammo ti Dios?
24 Saan kadi a maikari ti makaay-ayo a masakbayan iti paraiso a daga iti aniaman a panagregget wenno sakripisio nga aramidenyo? Ay ket, wen! Bueno, impaay ni Jehova kadakayo ti tulbek iti dayta nakaskasdaaw a masakbayan. Dayta a tulbek isu ti pannakaammo ti Dios. Usarenyo kadi dayta?
25 No ay-ayatenyo ni Jehova, pagragsakanyo nga aramiden ti pagayatanna. (1 Juan 5:3) No kastat’ aramidenyo, anian a bendision ti masagrapyo! No iyaplikaryo ti pannakaammo ti Dios, naragragsak ti biagyo uray iti daytoy nariribuk a lubong. Ken nagdakkel ti gunggona nga agur-uray, ta daytoy ti pannakaammo a mangiturong iti biag nga agnanayon! Itan ti nasayaat a tiempo a panagtignayyo. Determinadokay koma nga agbiag a mayannurot iti pannakaammo ti Dios. Ipakitayo ti ayatyo ken Jehova. Idaydayawyo ti nasantuan a naganna ken paneknekanyo nga ulbod ni Satanas. Iti kasta, maragsakan ni Jehova a Dios, ti Gubuayan ti pudno a sirib ken pannakaammo, gapu kadakayo iti naindaklan ken naayat a pusona. (Jeremias 31:3; Sofonias 3:17) Ken ayatennakayto iti agnanayon!
SUBOKENYO TI PANNAKAAMMOYO
Ania “ti pudpudno a biag”?
Kalpasan ti Armagedon, anianto ti maaramid ditoy daga?
Siasinonto dagiti mapagungar ditoy daga?
Kasanonto nga agbalin a perpekto ken aglasat iti maudi a pannubok ti sangatauan?
Ania ti namnamayo maipanggep iti Paraiso?
[Salsaludsod]
[Ladawan iti panid 188, 189]
Namnamaenyo kadi ti agbiag idiay Paraiso, inton mapno ti daga iti pannakaammo ti Dios?