Kalpasan ti adu a tawen a panangidaulo ni Josue kadagiti adipen ni Jehova, natay idi agtawen iti 110. Idi sibibiag ni Josue, nagdaydayaw dagiti Israelita ken Jehova. Ngem idi natayen, nagdayawda kadagiti imahen, kas iti ar-aramiden dagiti Canaanita. Gapu ta nagsukir dagiti Israelita ken Jehova, impalubosna a parigaten ida ni Jabin a maysa nga ari ti Canaan. Nagpatulong dagiti Israelita ken Jehova. Isu nga inikkan ida ni Jehova iti baro a lider, ni Barak. Isu ti tumulong kadakuada nga agsubli ken Jehova.

Ni Barak ket pinaayaban ti maysa a propeta a babai a ni Debora. Imbilin ni Jehova ken Debora nga ibagana ken Barak: ‘Mangikuyogka iti 10,000 a lallaki ket labananyo dagiti soldado ni Jabin iti karayan ti Kison. Abakemto sadiay ni Sisera, ti lider dagiti soldado ni Jabin.’ Imbaga ni Barak ken Debora: ‘Mapanak no kuyogennak.’ Kinuna ni Debora: ‘Kuyogenka. Ngem saan a sika ti mangpatay ken Sisera. Imbaga ni Jehova a maysa a babai ti mangpatay kenkuana.’

Kimmuyog ni Debora ken Barak iti Bantay Tabor tapno agsaganada a makigubat. Idi nangngeg dayta ni Sisera, inummongna dagiti  pakigubat a karuahe ken dagiti soldadona iti baba ti bantay. Imbaga ni Debora ken Barak: ‘Pagballigiennaka ni Jehova ita nga aldaw.’ Bimmaba ni Barak ken ti 10,000 a soldadona tapno labananda ni Sisera ken dagiti nabileg a soldadona.

Pinaglayus ni Jehova ti karayan ti Kison ket nailumlom iti pitak dagiti karuahe ni Sisera. Pinanawan ni Sisera ti karuahena ket nagtaray. Inabak ni Barak ken dagiti soldadona dagiti soldado ni Sisera, ngem nakalibas ni Sisera ket naglemmeng iti tolda ti babai nga agnagan Jael. Inikkan ni Jael iti gatas sa inulesanna ket nakaturog ti nabannog a soldado. Idi kuan, nagin-inayad nga immasideg ni Jael, sa nangipalok iti pasok ti tolda iti ulo ni Sisera ket natay.

Binirok ni Barak ni Sisera. Rimmuar ni Jael iti toldana ket imbagana: ‘Sumrekka. Ipakitak ti tao a birbirokem.’ Simrek ni Barak ket nakitana a natayen ni Sisera. Indaydayaw da Barak ken Debora ni Jehova babaen iti kanta ta tinulonganna dagiti Israelita tapno maabakda dagiti kalabanda. Iti simmaruno nga 40 a tawen, natalna iti Israel.