Idi napatay ni David ni Goliat, isu ket pinagbalin ni Ari Saul a lider dagiti soldadona. Nangabak ni David iti adu a gubat ket nagbalin a sikat. Kada agawid ni David nga aggapu iti gubat, agsasala dagiti babbai ken ikankantada: ‘Rinibu ti pinatay ni Saul, ken pinullo a ribu ti pinatay ni David!’ Nagimon ni Saul ket kayatna a patayen ni David.

Nalaing nga agtokar iti arpa ni David. Maysa nga aldaw, bayat nga agtoktokar iti arpa para ken Saul, ginayang ti ari. Naglisi a dagus ni David, ket timmama ti gayang iti diding. Kalpasan dayta, namin-adu pay a pinadas ni Saul a patayen. Idi agangay, naglibas ni David ket naglemlemmeng iti desierto.

Nangikuyog ni Saul iti 3,000 a soldado ket binirbirokda ni David. Nairana a simrek ni Saul iti kueba a paglemlemmengan ni David ken dagiti tattaona. Inyarasaas  dagiti tattao ni David: ‘Tsansamon a patayen ni Saul.’ Nagin-inayad nga immasideg ni David ken Saul ket napanna gineppas ti bado ti ari. Saan a nakadlaw ni Saul. Kalpasanna, nakonsiensia ni David ta saanna a rinespeto ti ari a pinili ni Jehova. Dina impalubos a patayen dagiti tattaona ni Saul. Impukkawna pay ketdi ken Saul a mabalinna koma a patayen idi adda tsansana. Agbaliw ngatan ti panangtrato ni Saul ken David?

Saan. Binirbirok latta ni Saul ni David. Maysa a rabii, simrek ni David ken ti kaanakanna a ni Abisai iti kampo ni Saul. Nakaturog uray ti guardia ni Saul a ni Abner. Imbaga ni Abisai: ‘Tsansata daytoyen! Patayekon.’ Kinuna ni David: ‘Makaammonton ni Jehova ken Saul. Alaenta lattan ti gayangna ken ti paginumanna ket pumanawtan.’

Napan ni David iti bantay a matantannawagan ti kampo ni Saul. Impukkawna: ‘Abner, apay a dimo binantayan ti arim? Ayan ti paginuman ken gayangna?’ Nailasin ni Saul ti boses ni David ket imbagana: ‘Napataynak koman, ngem dimo inaramid. Ammok a sika ti sumaruno nga ari ti Israel.’ Nagawid ni Saul iti palasiona. Ngem saan nga amin a kapamilia ni Saul ket manggurgura ken David.