LEKSION 4
Naparagsakna ni Jehova ken ni Tatangna
Makitam kadi ti ubing iti ladawan?— Isu ti balasitang nga anak ni Jefte. Awan ti naganna iti Biblia. Ngem ammotayo a naparagsakna ni Jehova ken ni tatangna. Ammuenta ti maipapan kenkuana ken ni tatangna a Jefte.
Naimbag a lalaki ni Jefte. Kanayon nga isursurona iti balasitangna ti maipapan ken Jehova. Natured met a lalaki ken nasayaat a lider. Isu a kayat dagiti Israelita nga agbalin a liderda a makilaban kadagiti kabusorda.
Nagkararag ni Jefte a tulongan koma ida ti Dios tapno mangabakda. Inkarina a no mangabakda, itednanto ken Jehova ti umuna a rummuar iti balayna a sumabat kenkuana. Agyanto ken agtrabaho iti
tabernakulo ti Dios iti intero a panagbiagna. Ti tabernakulo ket lugar a papanan idi dagiti tattao tapno agdayawda ken Jehova. Nangabak nga agpayso ni Jefte! Ammom kadi no asino ti umuna a simmabat kenkuana idi nagawid?—Wen, ti balasangna, ti agmaymaysa nga anakna! Ita, palubosanen ni Jefte a pumanaw, isu a malidayan unay. Ngem laglagipem nga adda kari ni Jefte, isu nga imbaga ti balasangna: ‘Tatang, tungpalem ti inkarim ken Jehova.’
Malidayan met ti balasang ni Jefte. Ngamin, dagiti agserserbi iti tabernakulo saanda a mabalin ti makiasawa wenno maaddaan iti annak. Ngem kayatna a tungpalen ti kari ni tatangna ken paragsaken ni Jehova. Napatpateg dayta kenkuana ngem ti makiasawa wenno maaddaan iti annak. Isu a napan iti tabernakulo tapno agserbi iti intero a panagbiagna.
Naparagsakna ngata ni Jehova ken ni tatangna?— Wen! No natulnogka ken ay-ayatem ni Jehova, kaslaka iti balasang ni Jefte. Maparagsakmo met ni Jehova ken da tatang ken nanangmo.