Adda 25 ti tawenna a balasang a nagsurat: “Idi 1981 natay iti kanser ti babai a nangampon kaniak. Nasaem unay kaniak daydi ken ti kabsatko iti ampon. Agtawenak idi iti 17, ket agtawen ti 11 ti kabsatko iti ampon. Maikawaak unay kenkuana. Gapu ta naisuro kaniak a napan idiay langit, bueno, kayatko idi a gibusan ti biagko tapno agkaduakami. Isut’ kadekketan a gayyemko.”

Kasla saan a nainkalintegan nga adda pannakabalin ni patay a mangipusay iti ay-ayatenyo. Ket no mapasamaken, narigat unay nga ibturan a panunoten a dikayton pulos a makasarita, makakinnatawa, wenno maarakup ti inay-ayatyo. Ti saem ket saan a kanayon a mapunas babaen iti panagkunada a ti inay-ayatyo ket adda idiay langit.

Nupay kasta, itukon ti Biblia ti naiduma unay a namnama. Kas iti naammuantay itayen, ipasimudaag ti Kasuratan a posible a makaduatayto manen dagiti pimmusay nga inay-ayatyo iti asideg a masanguanan, saan a no sadino a langit no di ket ditoy daga a mismo iti sidong ti natalna, nalinteg a kasasaad. Iti dayta a tiempo namnamaento dagiti tattao a tagiragsaken ti perpekto a salun-at, ken didanto matayen a pulos. ‘Ngem sigurado nga arapaap la dayta!’ mabalin a kuna ti dadduma.

Aniat’ masapul tapno maallukoykayo a daytoy ket sigurado a namnama? Tapno patien ti kari, masapul a masinunuoyo a ti nagkari ket agpada a kayat ken kabaelanna nga itungpal dayta. Asino ngarud, ti nagkari a dagiti natay ket agbiagdanto manen?

Idi primavera ti 31 K.P., situtured nga inkari ni Jesu-Kristo: “Ta no kasano a ti Ama pagungarenna dagiti natay ken pagbiagenna ida, kasta met a ti Anak pagbiagenna dagidiay kayatna. Dikay agsiddaaw iti daytoy, agsipud ta um-umayen ti oras nga amin dagidiay adda kadagiti pakalaglagipan a tanem mangngegdanto ti timekna [ni Jesus] ket rummuardanto.” (Juan 5:21, 28, 29) Wen, inkari ni Jesu-Kristo a dagiti minilion a natay itatta ket agbiagdanto manen ditoy daga ken adda namnamada nga agtalinaed dita iti agnanayon iti sidong ti natalna, kas paraiso a kasasaad. (Lucas 23:43; Juan 3:16; 17:3; idiligyo ti Salmo 37:29 ken Mateo 5:5.) Tangay nagkari ni Jesus, natalged nga ibaga a sitatallugod a tungpalenna dayta. Ngem kabaelanna ngata?

 Awan pay dua a tawen kalpasan ti panagkarina, indemostra ni Jesus iti nabileg a pamay-an nga agpada a kayat ken kabaelanna ti mangpagungar.

Makapaladingit daydi a buya. Masakit unay ni Lazaro. Ti dua a kabsatna a babbai, da Maria ken Marta, impakaammoda ken Jesus, nga adda idiay ballasiw ti Karayan Jordan: “Apo, kitaem! masakit daydiay dungdunguem.” (Juan 11:3) Ammoda nga inay-ayat ni Jesus ni Lazaro. Saan ngata a kayat ni Jesus a makita ti masakit a gayyemna? No usisaen, imbes a dagus a napan idiay Betania, nagtalinaed ni Jesus iti yanna iti sumaruno a dua nga aldaw.​—Juan 11:5, 6.

Natay ni Lazaro idi kalpasan a naipakaammo a masakit. Ammo ni Jesus no kaano a natay ni Lazaro, ket adda panggepna nga aramiden maipapan iti dayta. Idi nakasangpet ni Jesus idiay Betania, ti ingungotenna a gayyem addan uppat nga aldaw a natay. (Juan 11:17, 39) Kabaelan ngata a biagen ni Jesus ti natay iti kastat’ kabayagna?

Idi nangngegda nga umay ni Jesus, ni Marta, ti babai nga agtignay a dagus, nagtaray a simmabat kenkuana. (Idiligyo ti Lucas 10:38-42.) Gapu ta natignay babaen ti ladingitna, impatalged ni Jesus kenkuana: “Bumangonto ni kabsatmo.” Idi imparipiripna ti pammatina iti masanguanan a panagungar, imbaga laeng ni Jesus kenkuana: “Siak ti panagungar ken ti biag. Ti mangalagad iti pammati kaniak, uray no matay, agbiagto.”​—Juan 11:20-25.

Apaman a nakadanonda iti tanem, imbilin ni Jesus nga ikkatenda ti bato a nangserra iti ruangan [ti tanem]. Idin, kalpasan a nagkararag iti napigsa, imbilinna: “Lazaro, rummuarka!”​—Juan 11:38-43.

Nakaperreng amin a mata iti tanem. Idin, manipud iti sipnget, nagparang ti maysa a langa. Nabedbeddan dagiti saka ken imana, ken naabungotan iti lupot ti rupana. “Warwaranyo ket bay-anyo a mapan,”  imbilin ni Jesus. Ti kaudian a di nawarwar a bedbed natinnag iti daga. Wen, isu ni Lazaro, ti tao a natayen iti uppat nga aldaw!​—Juan 11:44.

Ti salaysay ti pannakapagungar ni Lazaro naiparang iti Ebangelio ni Juan a kas maysa a historikal a kinapudno. Nakalawlawag dagiti detalye tapno maibilang laeng a simboliko. No pagduaduaan ti kinapudnona kaipapananna ti panagduadua iti amin a datdatlag [a nailanad] iti Biblia, agraman iti panagungar ni Jesu-Kristo a mismo. Ket ti panangilibak iti panagungar ni Jesus isut’ panangilibak iti intero a Nakristianuan a pammati.​—1 Corinto 15:13-15.

Kinapudnona, no awatenyo ti kaadda ti Dios, awan parikutyo koma a mamati iti panagungar. Tapno mayilustrar: Mabalin nga i-videotape ti maysa a tao ti maudi a dawat ken testamentona, ket kalpasan a matay, mabalin nga isut’ buyaen ken denggen dagiti kabagian ken gagayyemna, bayat nga ilawlawagna no kasano a mataming ti sanikuana. No idi sangagasut a tawen ti napalabas, saan a nakapapati ti kasta. Ken iti dadduma a tattao nga agnanaed ita kadagiti nasulinek a paset ti lubong, ti teknolohia a panagusar iti video ket dida pay maawatan ta kasla maysa a datdatlag. No dagiti nasientipikuan a prinsipio nga impasdek ti Namarsua ket mabalin nga usaren dagiti tattao a mangputar manen iti kasta a makita ken mangngeg a buya, saan aya koma nga ad-adu pay ti mabalinan nga aramiden ti Namarsua? Saan kadi ngarud aya a nainkalintegan a Daydiay nangpataud iti biag kabaelanna a parsuaen manen dayta?

Ti datdatlag a pannakaisubli ti biag ni Lazaro ti nangpawadwad ti pammati ken Jesus ken iti panagungar. (Juan 11:41, 42; 12:9-11, 17-19) Iti makapikapik-rikna a wagas, ipanayagna pay ti panagayat ken panagtarigagay ni Jehova ken ti Anakna a mangpagungar.

Ti tignay ni Jesus iti ipapatay ni Lazaro ipanayagna ti napalaus a kinadungngo ti Anak ti Dios. Nalawag nga ipasimudaag ti nasneban a rikriknana iti daytoy nga okasion ti nasged a tarigagayna a mangpagungar kadagiti natay. Mabasatayo: “Ket ngarud ni Maria, idi dimteng iti yan ni Jesus ket nakitana, nagruknoy iti sakaananna, a kunkunana kenkuana: ‘Apo, no addaka koma idi ditoy, saan koma a natay ti kabsatko.’ Ni Jesus, ngarud, idi nakitana nga isu agsangsangit ken dagiti Judio nga immay a nakikuyog kenkuana agsangsangitda, nagsennaay iti espiritu ket nariribukan; ket kinunana: ‘Sadino ti nangikabilanyo kenkuana?’ Kinunada kenkuana: ‘Apo, umayka ket kitaem.’ Nagarubos dagiti lua ni Jesus. Gapuna dagiti Judio rinugianda a kunaen: ‘Kitaenyo, anian a panangdungngona idi kenkuana!’ ”​—Juan 11:32-36.

Naipasimudaag ditoy ti naimpusuan a pannakipagrikna ni Jesus babaen iti tallo nga ebkas: “nagsennaay,” “nariribukan,” ken “nagarubos dagiti lua[na].” Dagiti sao a nausar iti orihinal a pagsasao iti panangisuratna iti daytoy makapikapik-rikna a buya ipasimudaagna a napalaus ti liday ni Jesus iti ipapatay ti ingungotenna a gayyem a ni Lazaro ken iti pannakakitana iti kabsat a babai ni Lazaro nga agsangsangit nga isut’ nagarubusan dagiti luana. *

Ti nakaskasdaaw unay isut’ panangpagungar ni  Jesus iti dua pay a sabsabali sakbayna. Ket naan-anay a pinanggepna nga aramiden dayta ken ni Lazaro.  (Juan 11:11, 23, 25) Kaskasdi, “nagarubos dagiti lua[na].” No kasta, ti panangisubli iti biag dagiti tattao ket saan laeng a pamay-an para ken Jesus. Ti nadungngo ken nasneban a riknana kas naiparangarang iti daytoy nga okasion ipasimudaagna ti nasged a tarigagayna a mangwaswas kadagiti dinadael ni patay.

Gapu ta ni Jesus isut’ ‘apag-isu a ladawan ti mismo a kina-isu ni Jehova a Dios,’ maikari nga isu met laeng ti manamnamatayo iti nailangitan nga Amatayo. (Hebreo 1:3) Iti mismo a panaggusto ni Jehova a mangpagungar, kinuna ti matalek a tao a ni Job: “No matay ti tao, agbiagto aya manen? . . . Umawagka koma, ket sungbatanka. Agkalikagumkanto iti aramid dagita imam.” (Job 14:14, 15) Ti sasao ditoy a naggapu iti orihinal a pagsasao a naipatarus nga “agkalikagumkanto” ipakitana ti napasnek nga iliw ken tarigagay ti Dios. (Genesis 31:30; Salmo 84:2) Nalawag, a padpadaanan ni Jehova ti panagungar.

Pudno kadi a patientayo ti kari a panagungar? Wen, awan duadua nga agpada a kayat ken kabaelan ni Jehova ken ti Anakna a tungpalen dayta. Aniat’ kaipapanan daytoy kadakayo? Manamnamayo a makaduayonto dagiti pimmusay nga inay-ayatyo ditoy daga a mismo ngem iti sidong ti naiduma a kasasaad!

Ni Jehova a Dios, a nangisaad idi damo iti sangatauan iti makaay-ayo a hardin, nagkari nga isublina ti Paraiso ditoy daga iti sidong ti panagturay ti nailangitan a Pagarianna babaen iti naitan-oken a ni Jesu-Kristo. (Genesis 2:7-9; Mateo 6:10; Lucas 23:42, 43) Iti dayta naisubli a Paraiso, manamnamanto ti natauan a pamilia a tagiragsaken ti biag nga awan inggana, librenton iti amin a sakit ken an-annayen. (Apocalipsis 21:1-4; idiligyo ti Job 33:25; Isaias 35:5-7.) Awanto metten ti amin a guranggura, panangidumduma iti pulí, kinaranggas a naibatay iti tradision, ken rigat ti panagbiag. Idiayto nadalusan a daga a pagungaren ni Jehova a Dios babaen ken Jesu-Kristo dagiti natay.

Isu daytan ti namnama ti Kristiano a babai a nadakamat iti pangrugian daytoy a benneg. Sumagmamano a tawen kalpasan ti ipapatay ni inangna, tinulongan dagiti Saksi ni Jehova a siaannad a nangadal iti Biblia. Malagipna: “Idi naadalkon iti maipapan iti namnama ti panagungar, nakaluaak. Nakaskasdaaw a maammuan a makitakto manen ni inangko.”

No kasta met ti panangiliw ti pusoyo a makita manen ti inay-ayatyo, siraragsak a tulongandakayo dagiti Saksi ni Jehova a mangadal no kasano a mabalinyo a tagikuaen daytoy sigurado a namnama. Apay a diyo kasarita ida iti Kingdom Hall nga asideg kadakayo, wenno agsurat iti kaasitgan a direksion a nailanad iti panid 32.