PARA ITI AGTUTUBO
9: No Asinoka
TI KAIPAPANANNA
Saan laeng a ti nagan ken langam ti karaman iti kinasiasinom. Ramanenna pay dagiti prinsipiom, patpatiem, ken kababalinmo. Kinapudnona, ti kinasiasinom ket tumukoy iti amin a maipapan kenka—ti makin-uneg ken makinruar a kinataom.
NO APAY A NAPATEG
No am-ammom a naimbag ti bagim, itakderam dagiti patpatiem imbes nga agpaimpluensiaka kadagiti kasadaram.
“Adu a tattao ti kasla manekin kadagiti pagtagilakuan. Saanda a mapili ti pagbadoda; sabali ti mangpili.”—Adrian.
“Nasursurok nga itakderan no ania ti umiso uray no narigat dayta. Mailasinko no siasino ti pudno a gagayyemko babaen ti tigtignayda ken no kasano ti tigtignayko no kaduak ida.”—Courtney.
PRINSIPIO TI BIBLIA: “Isardengyon ti agpaimpluensia iti daytoy a sistema ti bambanag, no di ket pabaruenyo ti kinataoyo babaen ti panangbalbaliwyo iti panunotyo.”—Roma 12:2.
TI MABALINMO NGA ARAMIDEN
Am-ammuem ti bagim iti agdama ken no ania ti kayatmo a pagbalinan babaen ti panangpanunotmo kadagiti paglaingam, pagkapuyam, ken kadagiti patpatiem. Makatulong dagiti sumaganad a saludsod.
Paglaingan: Ania dagiti talento ken abilidadko? Ania dagiti paglaingak? (Kas pagarigan: Managsapsapaak kadi? managteppel? nagaget? naparabur?) Ania dagiti nasayaat nga ar-aramidek?
TIP: Marigatanka kadi a mangkita kadagiti nasayaat a kababalinmo? Damagem iti nagannak wenno maysa a gayyemmo no ania dagiti makitkitana a paglaingam ken no apay.
PRINSIPIO TI BIBLIA: “Sukimaten koma ti tunggal maysa dagiti aramidna tapno addanto panggapuanna nga agrag-o kadagiti aramidna, ken saan a gapu iti panangikomparana iti bagina iti sabali.”—Galacia 6:4.
Pagkapuyan: Ania dagiti kababalin a masapul a parang-ayek? Kaano a nalaklakaak a masulisog? Ania dagiti situasion nga ad-adda a kasapulak ti agteppel?
PRINSIPIO TI BIBLIA: “No ibagbagatayo, ‘Awan ti basoltayo,’ loklokuentayo ti bagitayo.”—1 Juan 1:8.
Patpatien: Ania dagiti sursurotek a moral a prinsipio, ken apay? Mamatiak kadi iti Dios? Apay a kombinsidoak nga adda Dios? Ania dagiti aramid nga ibilangko a dakes, ken apay? Ania dagiti patpatiek maipapan iti masanguanan?
PRINSIPIO TI BIBLIA: “Bantayannakanto ti abilidad nga agpanunot, ken salaknibannakanto ti pannakatarus.”—Proverbio 2:11.
Baka Kayatmo Met ti
SUNGBAT ITI 10 A SALUDSOD DAGITI AGTUTUBO
Asinoak?
Tapno makaaramidka kadagiti husto a desision no padasendaka nga impluensiaan ti dadduma, makatulong no ammom dagiti prinsipiom, patpatiem, paglaingam, pagkapuyam, ken dagiti planom nga aramiden.
SALUDSOD DAGITI AGTUTUBO
Kasanoak Karesponsable?
Adda dagiti agtutubo a maipapaayan iti ad-adu a wayawaya ngem iti sabsabali. Apay ngata?
SALUDSOD DAGITI AGTUTUBO
Kasanoak a Makapili iti Nasayaat a Pagtuladan?
No adda pagtuladam, maliklikam dagiti problema, magaw-atmo dagiti kalatmo, ken agballigika. Ngem asino ti masapul a tuladem?
