NAPALAWLAWAN ti Kyrgyzstan kadagiti nangato a bambantay a naabbongan iti yelo. Adda dayta iti Central Asia ken adda iti aglawlawna dagiti nasion a Kazakhstan, Uzbekistan, Tajikistan, ken China. Dandani 90% ti Kyrgyzstan ket kabambantayan. Adda idiay ti kangatuan a paset ti kabambantayan ti Tian Shan, a 7,439 a metro ti kangatona manipud iti lebel ti baybay. Nasurok-kumurang a 4% laeng ti kabakiran ti Kyrgyzstan. Isu a nakaskasdaaw ta makita sadiay ti maysa kadagiti kalawaan a kabakiran ti walnut iti intero a lubong.

Pagaammo dagiti Kyrgyz gapu iti kinamanangsangaili ken respetoda iti padada a tao. Idiay Kyrgyztan, kas panangipakita iti respeto iti in-inauna ngem sika, masapul nga agusarka kadagiti sasao a nakaturong iti adu a tao no kasarsaritam isuna, pagtugawem iti tugawmo no addaka iti pangpasahero a lugan, ken pagtugawem iti kadadayawan a pagtugawan iti lamisaan.

Kaaduanna a tallo wenno ad-adu pay ti annak iti kada pamilia. Ti inaudi nga anak a lalaki ti gagangay a mabati  a kadua dagiti nagannakna ken mangaywan kadakuada inton lumakay wenno bumaketdan, uray nangasawan.

Manipud kinaubing dagiti babbai, maisuron dagiti trabaho a makatulong kadakuada nga agbalin a nasayaat nga asawa. No agtawendan iti 15 wenno nasursurok bassit, kayadan nga asikasuen dagiti kasapulan ti pamiliada. Normal nga adda isagana a sab-ong ti maikasar a babai. Mabalin a karaman iti dayta ti bed sheet, ules, agduduma a klase ti bado, ken karpet a manomano a naaramid. Ti met sab-ong nga isagana ti mangikasar a lalaki ket kuarta ken mataraken nga an-animal.

No adda dagiti selebrasion ken seremonia ti pumpon, agpartida iti maysa a karnero wenno kabalio. Mabingaybingay dayta, ket adda espesipiko a bingay ti kada bisita. Ti maited a bingay ti tunggal bisita ket depende iti edad ken posisionna. Respeto manen ti kangrunaan a nakaibatayan daytoy a tradision. Kalpasan dayta, maidasar ti nasional a putahe a beshbarmak. Agkammetda no kanenda dayta.