Manipud Kadagiti Agbasbasa

Manipud iti editor: Nagadu nga agbasbasa ti nangapresiar iti serye ti akkub a “Makapnek Unay ti Biag.” (Oktubre 22, 2001) Apresiarenmi daytoy, ta ikagkagumaan ti “Agriingkayo!” ti mangted kadagiti praktikal ken naibasar iti Biblia nga impormasion a makatulong kadagiti tattao iti amin a pagilian, puli, ken narelihiosuan a kasasaad tapno madaeranda dagiti parikut iti kaaldawantayo.

Nabayagen nga agbasbasaak iti Agriingkayo! ngem ita pay laeng a natukayak gapu iti serye a “Makapnek Unay ti Biag.” Makatawenen ti napalabas, napukaw ti namnamak isu a kayatkon ti matay. Impanamnama kaniak dagitoy nga artikulo a maawatan ti Dios dagiti pagkapuyantayo.

S. H., Japan

Maladingitanak idi gapu iti pannakaraut ti Twin Towers idiay New York. No dadduma, pampanunotek ti agpakamatay ngem diak pay pulos binigbig nga adda problemak. Agpatulongakton ken surotek dagiti naisingasing iti artikulo.

M. M., Estados Unidos

Gapu ta saanak a nasalun-at, pampanunotek idin ti agpakamatay. Kayatko nga ibaga dayta, uray iyangawko laeng no dadduma, tapno makitak ti reaksion ti sabsabali. Nakasangitak idi nabasak a kanayon a maseknan ti Dios ken sidadaan a dumngeg kadatayo. Daytoy a magasin ti naan-anay a nangbalbaliw iti panangmatmatko iti biag.

T.E.J., Canada

Adun a tawen nga agsagsagabaak iti depression, ket itay nabiit, kayatkon nga ipaypayso ti agpakamatay. Idi agsagsaganaak a rummuar iti balay, nalagipko a nadakamat iti maudi nga artikulo iti serye ti Agriingkayo! a makisaritaak. Isu nga imbagak ken ni lakayko. Nakatulong kaniak dayta a panangitantan tapno diak ituloyen ti panggepko. Nakatulong daytoy a serye a nangsalbar iti biagko!

M. B., Estados Unidos

Sumagmamano a lawas sakbay a naipablaak daytoy a magasin, mingmingmingak idi ti sangatasa a pangpaturog a pildoras ket addaak idi iti kasasaad a dinakamat ti artikulo: “Tomarek ngata dagitoy wenno saan?” Ti magasinyo ti nangpakired iti pakinakemko nga agbiag nga isut’ kasapulak. Dadduma a sakit apektaranda ti isip agingga a mariknatayo a ditay kayaten ti agbiag, ngem makaparegta a maammuan a maseknan ti Dios uray kadagiti tattao a kasla didan tagipatgen ti sagut a biag.

E. S., Italia

Nairanudko ti impormasion kadagitoy nga artikulo iti doktorko. Imbagak a nagdakkel ti naitulong dagitoy kaniak. Ti laengen pammatalged a napategak iti Dios ti nangparegta kaniak nga agbiag. Kanayon nga ikarkararagko nga agsuratkayo iti ad-adu pay nga artikulo a kas kadagitoy!

J. S., Estados Unidos

Impagarupko idi nga awan ti makaawat kaniak, isu a nangrugin a panunotek a nasaysayaat laengen no matayak. Ngem idi nabasak dagitoy nga artikulo, nalagipko ti kapatgan a banag iti biag. Pulos a diakton panunoten ti matay!

M. M., Japan

Nakabkabil a Babbai Pagyamanan iti serye ti akkub a “Tulong Kadagiti Makabkabil a Babbai.” (Nobiembre 8, 2001) Idi ubingak, nakitak no kasano ti inaldaw a panangkabil ni tatangko ken ni nanangko. Kalpasanna, dakami kadagiti adiek a babbai ti insarunona. Dimmakkelak a napalalot’ gurak kadagiti lallaki. Ngem idi agangay, rinugianmi ti nakipagadal iti Biblia kadagiti Saksi ni Jehova. Saan a nalaka para ken ni Tatang ti agbalbaliw, ngem babaen ti tulong ni Jehova, naamirisna a dina maay-ayo ti Dios no maltratuenna dagiti makaay-ayo a parsua ni Jehova. In-inut a nagbalbaliw. Ita, ni tatangko ket kasla nakaam-amon a karnero. Mabalinen nga ayatek iti naimpusuan.

G. B., Estados Unidos