MAYSA a kita ti lawwalawwa a maawagan iti jumping spider ti addaan iti espesial a sistema ti panagkita isu a matantiarna ti eksakto a distansia a masapul a lagtuenna. Kasano nga aramidenna dayta?

Usigem: Tapno marukodna ti distansiana iti maysa a banag, us-usaren ti jumping spider ti naisangsangayan nga aspeto ti dua a kangrunaan a matana. Tunggal maysa ket addaan iti uppat a katuon a retina. Ti berde a lawag ket klaro a makita ti maysa a katuon, idinto ta nakudrep met dayta iti sabali pay a katuon. No nakudkudrep ti ladawan a makita iti dayta a katuon, as-asideg dayta iti mata ti lawwalawwa. Gapu iti dayta, matantiarna ti eksakto a distansia a nasken a lagtuenna tapno matiliwna ti biktimana.

Kayat dagiti eksperto a tuladen ti teknik ti jumping spider tapno makaaramidda kadagiti 3-D a kamera ken uray robot a makarukod iti kaadayona iti maysa a banag. Sigun iti online news site a ScienceNOW, ti panagkita ti jumping spider ket “nakaskasdaaw a pagarigan no kasano a dagiti insekto a kagudua la a sentimetro ti kaatiddogda ken addaan iti utek a basbassit ngem iti utek ti ngilaw kabaelanda ti gumun-od iti komplikado nga impormasion babaen kadagiti matada sada agtignay maitunos iti dayta.”

Ania ti makunam? Babaen kadi iti ebolusion a timmaud ti panangusar ti jumping spider iti nakudrep a panagkitana? Wenno nadisenio dayta?