MANGNGANUP ken mannalon dagiti nagkauna nga umili iti Brazil. Idi simmangpet dagiti Portugues nga eksplorador, impaannurotda ti relihionda a Romano Katoliko isu nga idi agangay, naibangon ti adu a simbaan ken kapilia—ti dadduma ket naarkosan kadagiti nagarbo a nakitikitan a kaykayo a nakalupkopan iti balitok.

Manipud idi katengngaan ti maika-16 agingga iti katengngaan ti maika-19 a siglo, nangisangpet dagiti barko iti agarup 4 a milion nga adipen nga Africano tapno agtrabaho kadagiti talon. Intultuloyda nga inannurot dagiti datin a ritualda. Idi agangay, dagita ti nagbalin kas Africano-Braziliano a relihion kas iti macumba ken iti sekta a candomblé. Agminar iti musika, sala, ken taraon dagiti Braziliano ti impluensia dagiti Africano.

Ti tradisional a feijoada ket natulad iti maysa a putahe dagiti Portugues. Gisado dayta a buklen dagiti karne ken nangisit a bukel ti utong. Maidasar dayta a kadua ti innapuy ken maysa a kita ti repolio. Idi maika-19 ken maika-20 a siglo, minilion manipud Europa (kangrunaanna iti Germany, Italy, Poland, ken Spain), Japan, ken dadduma pay a lugar ti nagnaed metten iti Brazil.

 Ita, addan agarup 750,000 a Saksi ni Jehova iti nasurok a 11,000 a kongregasion iti intero a Brazil. Nasurok a 800,000 ti yad-adalanda iti Biblia. Tapno makaibangonda kadagiti paggigimongan, ti 31 a grupo dagiti boluntario iti konstruksion ket mapan makipagtrabaho kadagiti lumugar a Saksi a mangaramid ken mangtarimaan iti agarup 250-300 a Kingdom Hall iti kada tawen. Sipud Marso 2000, nairingpasen ti 3,647 kadagita a proyekto.