Adu a danum a saan unay a naapgad ti naurnong iti baba ti lansad dagiti baybay (seabed). Maipagarup nga uray la umabot dayta iti 500,000 kilometro kubiko. “Adayo a nababbaba idi ti patar (level) ti baybay kumpara ita,” kuna ni Vincent Post iti Flinders University iti Adelaide, isu a nalawlawa idi ti kadaratan wenno daga iti igid ti baybay. No agtudo idi a tiempo, “maurnong ti danum kadagita a paset nga adda itan iti uneg ti baybay.” Namnamaen dagiti sientista a dagita a naurnong a danum iti baba ti lansad ti baybay ti makatulongto iti nasurok a 700 a milion a tattao nga agkurkurang iti nadalus a danum.

Napukawen ti 50% kadagiti kangrunaan a kita ti animal a masarakan idi iti Sahara wenno awanen ti 99% ti orihinal a paggigiananda. Saan laeng a ti riri dagiti nasion iti dayta a lugar ken ti nasaknap a panaganup ti rason. Kuna pay dagiti researcher nga uray no nagadu ti kita ti parsua iti desierto a kas met laeng iti kabakiran, “dagiti desierto ket saan unay a maik-ikkan dagiti sientista iti atension gapu iti kurang a pondo.” Isu a marigatan dagiti eksperto a mangsalbar ken mangmonitor kadagiti mapukpukawen a kita dagiti animal nga aggigian iti desierto.

Natantia a 1 iti kada 8 a natay idi 2012 ket gapu iti polusion iti angin. Kuna ti World Health Organization nga “iti intero a lubong, ti kangrunaan itan a mamagpeligro iti salun-at ti tao a problema iti aglawlaw ket ti polusion iti angin.”