Nayanakak idiay Mulhouse, iti amianan a daya ti France, maysa a lugar nga adu ti aggigian a trabahador ken agdindinamag gapu iti kinaranggas. Idi ubingak, adu ti nakitkitak a naranggas a panagaapa dagiti pamilia iti lugarmi. Iti pamiliami, maipabpababa dagiti babbai ken saan unay a maikabkabilangan ti kapanunotanda. Naisuro kaniak a ti babai ket para laeng iti kosina ken paraasikaso iti asawa ken kadagiti annak.

Nagrigat ti napasarak idi ubingak. Idi 10 ti tawenko, natay ni tatangko gapu iti kinamammartekna. Kalpasan ti lima a tawen, nagpakamatay met ti maysa a manongko. Iti dayta met la a tawen, adda nakitak a panagpipinnatay iti uneg ti pamiliami, ket nagkaro ti epekto dagita iti biag ken emosionko. Sinuruandak dagiti kapamiliak nga agusar iti kutsilio ken paltog, ken makilaban no kasapulan. Magulguluanak idi, isu a nagin-inumak ken pinunnok ti bagik iti tattoo.

Idi 16 anyosakon, 10 agingga iti 15 a bote ti beer ti mainumko iti inaldaw. Idi kuan, nagdrogaak payen. Tapno adda igatangko iti arak ken droga, naglakoak iti retretaso ti landok ken nagtaktakawak. Idi 17 ti tawenkon, rummuar-umunegakon iti pagbaludan. No bilangen, namin-18 a nasentensiaanak gapu iti panagtakaw ken kinabayolente.

Idi nasurok bassit a 20 ti tawenko, kimmaro pay ti situasionko. Makasusopak agingga iti 20 nga istik ti marihuana iti kada aldaw ken nagus-usarak pay iti heroin ken dadduma pay a droga. Adda dagiti gundaway a dandaniak natay gapu iti pannaka-overdose. Naglaklakoak iti droga isu a kanayon nga adda dagiti awitko a kutsilio ken paltog. Naminsan, pinaltogak ti maysa a lalaki, ngem timmama ti bala iti landok ti sinturonna ket nagbalandra! Idi agtawenak iti 24, natay ni nanangko, ket ad-adda a nagrebeldeak. Mabutbuteng kaniak dagiti masabatko iti dalan isu a likliklikandak. Kada Sabado ken Domingo, masansan nga addaak iti presinto wenno ospital tapno madait dagiti sugatko gapu iti pannakiramrambolko.

Idi agtawenakon iti 28, nagasawaak. Kas iti manamnama, diak rinespeto ti asawak. Pagsasawak ken kabkabilek. Dikam agkadua a mangaramid iti aniaman a trabaho. Kunak idi no umanayen nga ikkak iti adu a tinakaw nga alahas. Idi kuan, adda napasamak a diak inekspektar. Nakipagadal iti Biblia ni baketko kadagiti Saksi ni Jehova. Kalpasan ti umuna a panagadalna, insardengnan ti agsigarilio, dinan kayat nga awaten ti tinakaw a kuarta, ken insublina payen kaniak dagiti alahas nga intedko. Nakaungetak unay. Diak kayat  a makipagadal isuna iti Biblia. Pug-awak idi ti rupana iti asuk ti sigarilio ken ibabainko iti sanguanan dagiti kaarrubami.

Iti maysa a rabii a nakaro ti bartekko, napuorak ti apartmentmi. Ni baketko ti nangsalbar kaniak ken iti balasitangmi a lima ti tawenna. Idi nausawanakon, makonkonsiensiaak la unay. Panagriknak, dinakon mapakawan ti Dios. Nalagipko ti imbaga ti maysa a padi a mapan kano idiay impierno dagiti managdakdakes. Imbaga pay ti psychiatrist-ko: “Awan namnamamon! Saankan a makapagbalbaliw.”

Kalpasan ti puor, immakarkami iti balay dagiti katugangak. Idi binisita dagiti Saksi ni baketko, dinamagko kadakuada, “Mapakawannak pay ngata ti Dios kadagiti basolko?” Imbasada kaniak ti kuna ti Biblia iti 1 Corinto 6:9-11. Mabasa dita dagiti ar-aramid a kagura ti Dios, ngem innayonna: “Kasta idi ti sumagmamano kadakayo.” Impasigurado kaniak dagita a sasao a posible a makapagbalbaliwak, sa imbasa pay dagiti Saksi ti 1 Juan 4:8 ket impasiguradoda nga ay-ayatennak ti Dios. Naaddaanak iti namnama isu nga imbagak kadagiti Saksi nga iyadalandak iti Biblia mamindua iti makalawas. Idi kuan, inrugik ti umatender kadagiti gimongda ken kanayon a nagkarkararagak ken Apo Jehova.

Iti uneg ti makabulan, inkarigatak nga isardeng ti agdroga ken agbartek. Narigatanak iti kasta unay gapu kadagiti aglalaok nga epektona! Mabangbangungotak, nasakit ti ulo ken bagbagik, ken mariknak ti dadduma pay a madi nga epekto ti panangisardengko kadagiti bisiok. Ngem nariknak nga ig-iggaman ni Apo Jehova ti imak ken pappapigsaennak. Nariknak ti kas iti kinuna ni apostol Pablo. Insuratna maipapan iti panangtulong ti Dios kenkuana: “Ta iti amin a bambanag addaanak iti bileg gapu iti daydiay mangmangted kaniak iti pannakabalin.” (Filipos 4:13) Idi agangay, naisardengko payen ti agsigarilio.—2 Corinto 7:1.

Gapu iti panagadalko iti Biblia, simmayaat ti biagko. Ngem saan la a dayta. Simmayaat pay ti relasionmi kas pamilia. Nagbaliw met ti panangtratok ken baketko. Nasursurok a respetuen ken ibaga kenkuana ti “pangngaasim” ken “pagyamanan.” Impaypaysok metten ti agbalin nga ama iti balasitangmi. Kas iti inaramid ni baketko, inkarik ken ni Apo Jehova nga isu laeng ti pagserbiak, ket nabautisaranak kalpasan ti makatawen a panagadalko iti Biblia.

Masiguradok a dagiti prinsipio ti Biblia ti nangsalbar kaniak. Uray dagiti saan a Saksi a kapamiliak, mamatida a natayak koman gapu iti droga wenno iti pannakiramrambolko.

Nagdakkel ti nagbaliwan ti biag ti pamiliami gapu kadagiti naadalko a prinsipio ti Biblia a nangilawlawag kadagiti responsabilidadko kas asawa ken ama. (Efeso 5:25; 6:4) Agkakaduakami itan kas pamilia a mangaramid kadagiti bambanag. Saan laengen a para iti kosina ni baketko. Full-time payen a mangaskasaba, ket maragragsakanak a mangsupsuporta kenkuana. Ken maragragsakan met a mangsuporta kaniak iti responsabilidadko kas maysa a mangidadaulo iti kongregasion.

Talaga a nagsayaat ti epektona iti biagko ti ayat ken asi ni Apo Jehova. Kayatko unay nga ipakaammo dagiti kababalinna kadagidiay maibilang a kasla awanen namnamana nga agbalbaliw pay, ta kastaak met idi. Ammok nga adda bileg ti Biblia a mangtulong iti asinoman tapno maaddaanda iti nadalus ken addaan direksion a biag. Gapu iti panagadalko iti Biblia, nasursurok a respetuen ti sabsabali, lalaki man wenno babai. Ngem saan la a dayta. Nasursurok pay a respetuen ti bagik.