DANDANI idin agtapus ti Nobiembre 1932 idiay Mexico City. Maysa a lawas sakbay dayta, damo a nausar dagiti traffic light iti daytoy a siudad, a nasurok a maysa a milion ti umilina. Ngem saanen a dayta ti kabaruan a damag. Nagpokusen dagiti reporter iti pasamak iti dayta a lawas. Nakasaganan dagiti kamerada, addada iti estasion ti tren a mangur-uray iti isasangpet ti espesial a bisita​—ni Joseph F. Rutherford, a presidente idi ti Watch Tower Society. Nakasagana metten dagiti kakabsat a mangsarabo ken Brother Rutherford, para iti tallo nga aldaw a kombension iti pagilian.

Kuna ti The Golden Age: “Awan duadua a karamanto daytoy a kombension iti historia kas nakapatpateg a pasamak iti panagwaras ti Kinapudno iti republika ti Mexico.” Ngem apay a nakallalagip daytoy a kombension uray no 150 laeng ti immatender?

Sakbay ti kombension, bassit laeng ti bunga ti Pagarian iti Mexico. Manipud idi 1919, addan dagiti babassit nga asamblea sadiay ngem dakkel ti bimmabaan ti bilang dagiti kongregasion kalpasan ti sumagmamano a tawen. Idi naipatakder ti sanga nga opisina idiay Mexico City idi 1929, kasla sumayaaten ti situasion. Ngem adda dagiti lapped. Idi naibilin a masapul a maisardeng a malaokan iti negosio ti trabaho a panangasaba, nagsakit ti nakem ti maysa a colporteur ket pinanawanna ti kinapudno sa nangbukel iti bukodna a grupo. Ken adda saan a nainkasuratan nga inaramid ti mangidadaulo iti sanga nga opisina ket masapul a masukatan. Kasapulan dagiti matalek a Saksi iti Mexico ti pammaregta.

Pinaregta ni Brother Rutherford dagitoy matalek a kakabsat bayat ti ibibisitana babaen ti dua a nagpintas a palawag iti kombension ken lima a lektiur iti radio. Dayta ti kaunaan a panangibrodkas dagiti estasion ti radio iti Mexico ti naimbag a damag iti intero a pagilian. Kalpasan ti kombension, inyurnos ti kabbaro a mangidadaulo iti sanga nga opisina ti trabaho, ket nagawid dagiti kakabsat nga addaan iti napabaro a regta ken pamendision ni Jehova.

Iti simmaruno a tawen, saan la a maysa no di ket dua a kombension ti naangay iti dayta a pagilian, maysa idiay Veracruz City ken maysa met idiay Mexico City. Makita metten dagiti nagpintas a resulta ti kinaregta dagiti kakabsat iti ministerio. Idi 1931, addan 82 nga agibumbunannag. Kalpasan ti sangapulo a tawen, naminsangapulon ti immaduanna! Agarup 1,000 ti immatender iti Theocratic Assembly idiay Mexico City idi 1941.

Idi 1943, nagusar dagiti Saksi iti maaw-awagan iti “sandwich signs” tapno ipakaammoda ti “Free Nation’s” Theocratic Assembly a maangay iti 12 a  siudad ti Mexico. * Agsumbangir a nakabitin dagiti plakard iti abagada, maysa iti sango ken maysa iti likud, nga us-usarenen dagiti Saksi a mangasaba manipud pay idi 1936.

Kuna ti magasin a La Nación maipapan iti balligi ti sandwich-sign parade idiay Mexico City: “Iti umuna nga aldaw [ti asamblea], naibilin [kadagiti Saksi] nga agawisda iti ad-adu pay a tao. Kabigatanna, napekpeken ti pagasambleaan.” Saan a naragsakan ti Iglesia Katolika isu a nangyurnosda iti kampania maikontra kadagiti Saksi. Ngem natured latta dagiti kakabsat a nangasaba kadagiti kalsada. Kuna pay ti La Nación: “Agkaiwarada iti siudad . . . lallaki​—ken babbai​—a nagbalinda a kasla pagiwaragawag a ‘sandwich.’” Naipakita iti dayta nga artikulo ti retrato dagiti kakabsat kadagiti kalsada ti Mexico City. Iti baba ti retrato, nakasurat ti: “Ti Panangsakup Kadagiti Kalsada.”

Kadagidi a tawen, nakaad-adu ti sakripisio dagiti kakabsat tapno makapagkombensionda idiay Mexico. Adu ti naggapu iti adayo a lugar, a saan a madanon ti tren wenno awan pay ketdi ti kalsadana. Insurat ti maysa a kongregasion, “Ti laeng linia ti telegrama ti linia a makadanon iti lugarmi.” Isu a masapul nga aglugan idi dagiti kakabsat iti kabalio wenno magmagnada iti mano nga aldaw sakbay a madanonda ti estasion ti tren a paglugananda a mapan iti pagkombensionan.

Marigrigat ti kaaduan a Saksi idiay, ket dandani awan pay ketdi pagpleteda a makikombension. Inton makadanondan, adu a kakabsat ti naayat a mangpadagus kadakuada. Maturog met ti dadduma kadagiti Kingdom Hall. Naminsan, dandani 90 ti imyan iti sanga nga opisina. Nagyaplagda iti “20 a karton ti libro a pagiddaanda.” Kuna pay ti Yearbook a para kadagiti kakabsat, “naluklukneng ken naim-imeng ngem semento a datar” dagita a pagiddaan.

Para kadagidiay a manangapresiar a kakabsat, saan a sayang ti sakripisioda tapno maatenderanda ti makaparagsak nga asamblea. Agingga ita, makita pay laeng ti kasta a kababalin dagiti kakabsat idiay Mexico bayat a dandanin agmaysa a milionda. * Kuna ti maysa a report ti sanga nga opisina ti Mexico idi 1949 maipapan kadagiti kakabsat: “Dida impalubos a dagiti rigatda ti mangpakapuy iti kinaregtada ta kada malpas ti asamblea, dayta ti kangrunaan a napaut a pagsasaritaanda. Ken kanayon nga isaludsodda, Kaano manen ti sumaruno nga asambleatayo?” Kasta ti mapaspasamak agingga ita.​—Manipud iti archives iti Central America.