1, 2. (a) Ania ti imbaga ni Jehova a mapasamak iti panawentayo? (b) Ania dagiti saludsod a masungbatan iti daytoy nga artikulo? (Kitaen ti ladawan iti rugi ti artikulo.)

MAIPAPAN iti tiempo a pagbibiagantayo, impakpakauna ni Jehova: “Mapasamakto kadagidiay nga aldaw a sangapulo a lallaki manipud kadagiti amin a pagsasao ti nasnasion kumpetdanto, wen, pudno a kumpetdanto iti pandiling ti maysa a lalaki a Judio, a kunkunada: ‘Kumuyogkaminto kadakayo, ta nangngegmi a ti Dios adda kadakayo.’” (Zac. 8:23) Kas iti simboliko a sangapulo a lallaki, dagiti addaan iti namnama nga agbiag ditoy daga ‘kimpetda iti pandiling ti maysa a lalaki a Judio.’ Maragsakanda a makikadua iti napulotan iti espiritu nga “Israel ti Dios” ta ammoda a bembendisionan ni Jehova dagiti napulotan.—Gal. 6:16.

² Kas iti inaramid ni propeta Zacarias, dinakamat ni Jesus ti nagsayaat a panagkaykaysa a mapaspasaran dagiti adipen ti Dios. Imbagana a dagiti pasurotna ket kameng ti dua a grupo, ti “bassit nga ipastoran” ken ti “sabsabali a karnero,” ngem kinunana nga agbalindanto a “maymaysa nga arban” nga idauluan ti “maymaysa a pastor.” (Luc. 12:32; Juan 10:16) Ngem adda dagiti tumaud a saludsod maipapan iti relasion dagitoy dua a grupo: (1) Masapul kadi nga ammuen dagiti sabsabali a karnero ti nagan ti amin a napulotan  ita? (2) Ania koma ti panangmatmat dagiti napulotan iti bagida? (3) Ania ti reaksionmo no adda kakongregasionmo a mangrugi a makiraman iti emblema ti Memorial? (4) Pakaseknam kadi ti iyaadu dagiti makiramraman iti emblema? Usigentayo ti sungbat dagita a saludsod.

3. Apay a saan a sigurado a maammuantayo no asino dagiti agbalin a paset ti 144,000?

³ Masapul kadi a maammuan dagiti sabsabali a karnero ti nagan ti amin a napulotan ita? Saan. Apay? Gapu ta uray no addaan iti nailangitan a namnama ti maysa, naawis laeng, saanna a kayat a sawen a naawatnan ti gunggona. Dayta ti makagapu a mangpatpataud ni Satanas kadagiti “ulbod a mammadto . . . tapno mangyaw-awanda, no mabalin, uray pay kadagiti napili.” (Mat. 24:24) Awan ti makaammo no maawat ti napulotan a Kristiano ti nailangitan a gunggonana agingga nga ikeddeng ni Jehova nga isu ket maikari iti dayta a gunggona. Ni Jehova ti mangikeddeng ken mangted iti maudi a pannakaseliona—mabalin a sakbay a matay a matalek wenno sakbay a mangrugi ti “dakkel a rigat.” (Apoc. 2:10; 7:3, 14) Ngarud, awan serserbina no ammuen ti asinoman nga agbibiag ita ditoy daga no asino kadagiti adipen ti Dios ti agbalinto a paset ti 144,000. [1]

4. No saan a mabalin a maammuantayo ti nagan ti amin a napulotan ditoy daga ita, kasano ngarud a ‘kumuyogtayo’ kadakuada?

⁴ No saantayo a mabalin a maammuan ti nagan ti amin a naespirituan nga Israelita ditoy daga ita, kasano ngarud a ‘kumuyog’ kadakuada ti sabsabali a karnero? Kitaem no ania ti kuna ti padto ni Zacarias maipapan iti simboliko a sangapulo a lallaki. Dagitoy “kumpetdanto iti pandiling ti maysa a lalaki a Judio, a kunkunada: ‘Kumuyogkaminto kadakayo, ta nangngegmi a ti Dios adda kadakayo.’” Nupay maymaysa a Judio ti nadakamat, agpada a nausar ti sao a “kadakayo” a mangipakita nga adu a tattao ti tuktukoyenna. Ngarud, daytoy a naespirituan a Judio tumukoy iti maysa a grupo, saan a maymaysa a tao. Gapuna, saan a nasken nga ammuentayo ti nagan ti tunggal naespirituan a Judio tapno kumuyogtayo kenkuana. Imbes ketdi, masapul a mailasintayo dagitoy kas maysa a grupo ket suportarantayo ida. Pulos a saan nga iparparegta ti Biblia a sumurottayo iti maysa nga indibidual. Ni Jesus ti Lidertayo.—Mat. 23:10.

5. Ania a pakdaar ti masapul nga usigen a naimbag dagiti napulotan, ken apay?

⁵ Dagidiay makiraman iti emblema ti Memorial masapul nga usigenda a naimbag ti pakdaar iti 1 Corinto 11:27-29. (Basaen.) Ania ti ipagpaganetget ni apostol Pablo ditoy? Saan a maikari a makiraman ti maysa a napulotan a Kristiano no saanna a pagtalinaeden a nasayaat ti relasionna ken Jehova. (Heb. 6:4-6; 10:26-29) Makatulong dayta a pakdaar kadagiti napulotan a Kristiano tapno laglagipenda a saanda pay nga inawat ti gunggona. Masapul nga itultuloyda ti agregget nga “agturong iti kalat maipaay iti gunggona a panagpangato nga ayab ti Dios babaen ken Kristo Jesus.”—Fil. 3:13-16.

6. Ania koma ti panangmatmat dagiti napulotan a Kristiano iti bagbagida?

⁶ Babaen iti paltiing, kiniddaw ni Pablo kadagiti napulotan a Kristiano a ‘magnada a maikari iti pannakaayab a nakaayabanda.’ Kasano a maaramidanda dayta? Kinuna ni Pablo: ‘Buyogen ti naan-anay a kinapakumbaba ken kinaalumamay, agraman ti mabayag a panagitured, nga agiinnanuskayo iti ayat, a sipapasnek nga ikagumaanyo a salimetmetan ti panagmaymaysa ti espiritu iti mamagkaykaysa a singgalut ti talna.’  (Efe. 4:1-3) Ti espiritu ni Jehova ti mangtignay iti maysa nga agbalin a napakumbaba, saan a napannakkel. (Col. 3:12) Sipapakumbaba a bigbigen dagiti napulotan a saan nga ad-adu ti nasantuan nga espiritu nga adda kadakuada ngem kadagiti addaan iti namnama nga agbiag ditoy daga. Saanda nga ibaga a naun-uneg wenno naisangsangayan ti pannakaammoda wenno panunoten pay ketdi a natantan-okda ngem iti dadduma. Pulos a saanda nga awisen ti sabali a masapul a makiraman met iti emblema. Imbes ketdi, sipapakumbaba a bigbigenda a ni Jehova ti mangayab kadagiti napulotan.

7, 8. Ania koma ti saan a namnamaen dagiti napulotan a Kristiano, ken apay?

⁷ Nupay naidumduma a pribilehio ti pannakaawisda a mapan idiay langit, saan a namnamaen dagiti napulotan a Kristiano ti naisangsangayan a pammadayaw ti sabsabali. (Efe. 1:18, 19; basaen ti Filipos 2:2, 3.) Ti espiritu ni Jehova ti mangpaneknek a napulotanda. Saan a naipakaammo dayta iti lubong. Gapuna, saanda a masdaaw no saan a dagus a patien ti dadduma a pudpudno a napulotanda iti nasantuan nga espiritu. Kinapudnona, ammoda ti balakad ti Kasuratan a saantayo a mamati a dagus no adda mangibaga nga isu ket pinili ti Dios. (Apoc. 2:2) No kasta, pulos a saanda koma nga usaren ti panagbalinda a napulotan a pangyam-ammo iti bagida iti sabsabali. Kaaduanna, saanda pay ketdi a dakamaten ti pannakapulotda iti sabsabali tapno maliklikan a maipaayanda iti naidumduma nga atension wenno pannakatrato. Saanda met nga ipagpannakkel ti gunggona nga awatenda.—1 Cor. 1:28, 29; basaen ti 1 Corinto 4:6-8.

⁸ Maysa pay, saan a matmatan dagiti napulotan a Kristiano a kamengda ti maysa a natan-ok a grupo. Saanda nga awisen ti dadduma nga agkuna a naayabanda met tapno aglalangenda wenno mangbukelda kadagiti grupo a mangadal iti Biblia. (Gal. 1:15-17) Ngamin, mangpataud dayta iti pannakabingaybingay iti kongregasion ken maikontra dayta iti panagtignay ti nasantuan nga espiritu a mangyeg iti talna ken panagkaykaysa.—Basaen ti Roma 16:17, 18.

9. Apay a naannadtayo koma no maipapan iti panangtrato kadagiti makiramraman iti tinapay ken arak iti Memorial? (Kitaen ti kahon a “ Ti Ayat ‘Saan a Naalas ti Panagtigtignayna.’”)

⁹ Kasanom a tratuen ti maysa a makiramraman iti emblema ti Memorial? Kinuna ni Jesus kadagiti adalanna: “Agkakabsatkayo amin.” Kinunana pay: “Siasinoman a mangitan-ok iti bagina maipababanto, ket siasinoman a mangipababa iti bagina maitan-okto.” (Mat. 23:8-12) Gapuna, saan nga umiso nga itan-oktayo ti maysa nga indibidual, uray no isu ket maysa a napulotan a kabsat ni Kristo. No maipapan kadagiti Kristiano a panglakayen, iparparegta ti Biblia kadatayo a tuladentayo ti pammati dagidiay mangidadaulo, ngem saan a pulos nga imbilin ti Biblia nga itan-oktayo ti asinoman a tao kas lidertayo. (Heb. 13:7) Pudno nga ibaga ti Kasuratan a dadduma ket ‘maibilang a maikari iti mapamindua a dayaw.’ Nupay kasta, maikarida a mapadayawan saan a gapu ta napulotanda no di ket gapu ta ‘mangidadauloda iti nasayaat a wagas’ ken ‘agtrabtrabahoda a sipipinget iti panagsao ken panangisuro.’ (1 Tim. 5:17) Ngarud, pakaibabainan dagiti addaan iti nailangitan a namnama no ipaayan ida ti dadduma iti sobra a panangidayaw wenno atension. Dakdakes pay no maipaayanda iti naisangsangayan a pannakatrato ta mabalin nga agbalinda a natangsit. (Roma 12:3) Saantayo a kayat nga itibkol ti maysa kadagiti kakabsat ni Kristo!—Luc. 17:2.

10. Kasano a maipakitam nga adda panagraemmo kadagiti napulotan a Kristiano?

¹⁰ Kasano a maipakitatayo ti maitutop a  panagraem kadagiti pinulotan ni Jehova? Saantayo a damagen kadakuada ti maipapan iti pannakapulotda. Iti kasta, maliklikantayo ti makibiang iti saantayo a pakaseknan. (1 Tes. 4:11; 2 Tes. 3:11) Saantayo nga ipapan a napulotan met ti nagannak, asawa, wenno kabagian ti maysa a napulotan. Awan ti pakainaigan ti panagasawa wenno panagkakabagian iti panagbalin a napulotan. (1 Tes. 2:12) Liklikantayo met a pagsaludsodan ti assawa dagiti napulotan no ania ti riknada ta ammoda a saandanto a kadua ti asawada iti Paraiso a daga. Imbes nga agsaludsodtayo iti mabalin a pagsakitan ti nakemda, agtalektayo a ni Jehova ukradenna ti imana ken ‘penkenna ti tarigagay ti tunggal sibibiag a banag.’—Sal. 145:16.

11. Kasano a masalaknibantayo ti bagitayo no liklikantayo ti sobra a panangpadayaw kadagiti tattao?

¹¹ No umiso ti panangtratotayo kadagiti napulotan a Kristiano, masalaknibantayo manipud iti peggad. Ibaga ti Kasuratan a mabalin a makastrek iti kongregasion dagiti “sinankakabsat.” (Gal. 2:4, 5; 1 Juan 2:19) Mabalin nga ibaga pay ketdi dagitoy nga impostor a napulotanda. Kasta met, dadduma a napulotan a Kristiano ti mabalin a tumallikud iti kinapudno. (Mat. 25:10-12; 2 Ped. 2:20, 21) No liklikantayo ti sobra a panangpadayaw kadagiti tattao, saandatayo a mayadayo iti kinapudno. Saan met a kumapuy ti pammatitayo uray no saan nga agmatalek ti maysa a pagaammo wenno nabayagen nga agserserbi a Kristiano.—Jud. 16.

12, 13. Apay a saantayo koma a pakaseknan ti bilang dagiti makiramraman iti tinapay ken arak iti Memorial?

¹² Iti adu a dekada, ti bilang dagiti makiramraman iti emblema ti Memorial ket bumasbassit. Ngem iti nabiit pay, in-inut nga immadu ti bilangda. Pakariribukantayo kadi dayta? Saan. Usigentayo dagiti rason a masapul a laglagipentayo.

¹³ “Ammo ni Jehova dagidiay kukuana.” (2 Tim. 2:19) Saan nga ammo dagiti agbilbilang iti tiempo ti Memorial no asino a talaga dagiti addaan iti namnama nga agbiag idiay langit. Karaman a maibilang dagiti mangipagarup laeng a napulotanda. Dadduma a makiramraman idi iti emblema ti simmardeng a makiraman. Mabalin nga addaan iti mental wenno emosional a problema ti dadduma isu a patienda a makipagturaydanto ken Kristo  idiay langit. Gapuna, saan nga ipakita ti bilang dagiti makiramraman iti emblema ti umiso a bilang dagiti napulotan nga adda pay ditoy daga.

14. Ania ti ibaga ti Biblia no maipapan iti bilang dagiti napulotan nga addanto pay laeng ditoy daga inton mangrugi ti dakkel a rigat?

¹⁴ Addanto dagiti napulotan iti nagduduma a paset ti daga inton umay ni Jesus tapno urnongenna ida idiay langit. Iti dayta a tiempo, kuna ti Biblia maipapan ken Jesus: “Ibaonnanto dagiti anghelna a buyogen ti dakkel nga uni ti trumpeta, ket urnongendanto a sangsangkamaysa dagiti pinilina manipud iti uppat nga angin, manipud iti maysa nga ungto ti langlangit agingga iti sabali nga ungtoda.” (Mat. 24:31) Ipakita ti Kasuratan a bassitto laengen ti bilang dagiti napulotan a nabati ditoy daga bayat ti maudi nga al-aldaw. (Apoc. 12:17) Nupay kasta, saan nga ibaga ti Biblia no mano ti mabati inton mangrugi ti dakkel a rigat.

15, 16. Ania ti masapul a tarusantayo maipapan iti 144,000 a pinili ni Jehova?

¹⁵ Ni Jehova ti mangikeddeng no kaano a pilienna ti maysa a napulotan. (Roma 8:28-30) Nangrugi nga agpili ni Jehova kadagiti napulotan kalpasan ti ipapatay ken panagungar ni Jesus. Agparang a napulotan ti amin a Kristiano idi umuna a siglo. Manipud idi umuna a siglo agingga iti panangrugi ti maudi nga al-aldaw, kaaduan kadagidiay agkunkuna a pasurot ni Kristo ket saan a pudno a Kristiano. Inyarig ida ni Jesus iti “dakes a ruot.” Ngem intultuloy latta ni Jehova ti nangpulot kadagiti matalek a tattao iti dayta a tiempo, ket nagbalinda a kas iti “trigo” a dinakamat ni Jesus. (Mat. 13:24-30) Bayat ti maudi nga al-aldaw, nagtultuloy a nangpili ni Jehova kadagiti agbalin a paset ti 144,000. [2] No ikeddeng ni Jehova a pilien ti dadduma sakbay la unay ti panungpalan, asinotayo koma a mangkontra iti desisionna? (Isa. 45:9; Dan. 4:35; basaen ti Roma 9:11, 16.) [3] Masapul a saantayo a tuladen dagiti nagreklamo a trabahador maipapan iti panangtrato ti apoda kadagidiay nangrugi laeng a nagtrabaho iti maika-11 nga oras.—Basaen ti Mateo 20:8-15.

¹⁶ Saan nga amin nga addaan iti nailangitan a namnama ket kameng “ti matalek ken masirib nga adipen.” (Mat. 24:45-47) Kas idi umuna a siglo, pakpakanen met ita ni Jehova ken ni Jesus ti adu babaen iti ima ti sumagmamano. Sumagmamano laeng a napulotan a Kristiano idi umuna a siglo ti nausar a mangisurat iti Kristiano a Griego a Kasuratan. Kasta met ita, sumagmamano laeng a napulotan a Kristiano ti nadutokan a mangipaay iti naespirituan a ‘taraon iti umiso a tiempo.’

17. Ania dagiti naadalmo iti daytoy nga artikulo?

¹⁷ Ania ti naadaltayo iti daytoy nga artikulo? Inkeddeng ni Jehova nga adda dua a nagduma a gunggona—biag idiay langit para kadagiti naespirituan a Judio ken biag ditoy daga para iti simboliko a sangapulo a lallaki. Ngem agpada a kinamatalek ti kalikagumanna kadagiti addaan iti namnama nga agbiag idiay langit ken dagiti agbiag ditoy daga. Agpada a masapul nga agtalinaedda a napakumbaba. Agpada a masapul nga agkaykaysada. Agpada a masapul a tumulongda tapno maadda ti talna iti kongregasion. Bayat nga umas-asideg ti panungpalan, determinadotayo koma amin nga agserbi kas maymaysa nga arban iti panangiturong ni Kristo.