ITI bassit nga ili idiay Gujarat, India, nabautisaran ti tatang ni John kas maysa a Saksi ni Jehova idi maudi a paset ti 1950’s. Napeklan a Romano Katoliko ni John ken ti lima a kakabsatna pati ni nanangda, ket busbusorenda ti pammati ni tatangda.

Naminsan, imbaon ni tatangna a mangitulod iti sobre iti maysa a gayyemna iti kongregasion. Ngem iti dayta a bigat, nasugat ti ramay ni John gapu iti pananglukatna iti maysa a dram. Ngem gapu ta kayatna ti agtulnog ken tatangna, binedbedanna ti agdardara a ramayna sa nagnagna a nangitulod iti sobre.

Idi nakadanon ni John iti pangitulodanna, ti asawa ti pangtedanna, a maysa met a Saksi, ti nangawat iti sobre. Nakitana ti sugat ni John isu a kayatna a tulongan. Inruarna ti first-aid kit-na, dinalusanna ti sugat, inagasanna, sa binedbedanna ti ramay ni John. Intemplaanna met ni John iti tsaa, ket nagmayat ti saritaanda maipapan iti Biblia.

Iti dayta a nangrugi nga agbaliw ti di nasayaat a kapanunotan ni John kadagiti Saksi isu a nagsaludsod iti sister iti dua a banag a patpatien ni tatangna a naiduma iti patpatienna—no ni Jesus ti Dios ken no masapul nga agkararag dagiti Kristiano ken Maria. Gapu ta ammo ti sister ti agsao iti Gujarati a lengguahe ni John, sinungbatanna dagita manipud iti Biblia ken inikkanna iti bokleta a “Ti Naimbag a Damag ti Pagarian.”

Binasa ni John dayta, ken panagriknana, dayta ti damo a pannakaammona iti kinapudno iti Biblia. Napan iti padida ket insaludsodna met laeng ti dua a saludsod. Nakaunget kenkuana ti padi ket binatona iti Biblia sa imbugkawna: “Nagbalinkan a Satanas! Pakabasaam iti Biblia a saan a ni Jesus ti Dios. Ipakitam kaniak iti Biblia no adda ibagbagana a saanmo a dayawen ni Maria. Ipakitam!” Nabigla ni John iti inaramid ti padi ket imbagana kenkuana, “Diakton pulos sumrek iti simbaan ti Katoliko.” Ket talaga a saanen a simsimrek!

Nakipagadal ni John kadagiti Saksi, tinakderanna ti pammatina, ket nagserbi ken Jehova. Kasta met laeng ti inaramid ti dadduma a kapamiliana. Adda pay laeng piglat iti tammudo iti kannawan nga ima ni John uray no 60 a tawenen ti limmabas. Maragragsakan no malagipna ti kinaimbag ti maysa a Kristiano a nangyasideg kenkuana iti pudno a panagdaydayaw.—2 Cor. 6:4, 6.