Ti agassawa a da Mary ken John a ket agnanaed iti pagilian nga adu a trabahador ti naggapu iti Pilipinas. Maragragsakanda a mangipakaammo iti naimbag a damag kadakuada. Bayat ti COVID-19 pandemic, adu ti nairugi ni Mary nga iyadalan iti Biblia nga agnanaed iti pagilianda ken iti dadduma pay a pagilian. Kasano nga inaramidna dayta?

Isaludsod no kua ni Mary kadagiti iyad-adalanna iti Biblia, “Adda kadi am-ammom a kayatna met ti agpayadal iti Biblia?” No kunada nga adda, kiddawenna nga iyam-ammoda isuna kadakuada. Kaaduanna a nasayaat ti resultana ti panangdamagna iti dayta a simple a saludsod. Apay? Ngamin, no maapresiar dagiti tattao ti nasursuroda iti Biblia, gagangay a kayatda nga iranud dayta kadagiti kapamilia ken gagayyemda. Ania ti resulta ti panangdamag ni Mary iti dayta a saludsod?

Ni Jasmin ket maysa kadagiti iyad-adalan ni Mary. Inyam-ammona ti uppat pay a mayat nga agpayadal iti Biblia. Maysa kadakuada ni Kristine. Magusgustuanna ti agadal iti Biblia nga uray la kiniddawna ken Mary a mamindua nga agadalda kada lawas. Idi dinamag ni Mary no adda pay am-ammona a mayat nga agpayadal iti Biblia, kinuna ni Kristine, “Adda. Iyam-ammokanto kadagiti gagayyemko.” Iti sumagmamano laeng a lawas, adda uppat nga inyam-ammo ni Kristine ken Mary a mayat nga agpayadal iti Biblia. Idi agangay, adda manen dagiti inyam-ammo ni Kristine ken Mary a kayatda ti agpayadal, ket kasta met laeng ti inaramid ti dadduma kadakuada.

Kayat met ni Kristine a mayadalan iti Biblia dagiti kapamiliana iti Pilipinas, isu a kinasaritana ti balasangna a ni Andrea. Idi damo, napanunot ni Andrea, ‘Dagiti Saksi ket maysa laeng a kulto. Saanda a mamati ken Jesus, ken ti Daan a Tulag laeng ti us-usarenda.’ Ngem kalpasan laeng ti maysa a panagadal, nabalbaliwan ti kapanunotanna. Bayat ti panagad-adalna, maibagana, “No isu ti ibagbaga ti Biblia, isu dayta ti agpayso!”

Di nagbayag, inyam-ammo ni Andrea ken ni Mary ti dua a gagayyemna ken ti maysa a katrabahuanna nga agad-adalen iti Biblia. Kasta met, saan nga ammo ni Mary nga agdengdengngeg gayam iti panagadalda iti Biblia ti bulsek nga anti ni Andrea a ni Angela. Maysa nga aldaw, kiniddaw ni Angela ken ni Andrea nga iyam-ammona ken Mary ta kayatna met ti agpayadal iti Biblia. Magusgustuan ni Angela ti maad-adalna. Iti laeng maysa a bulan, adun a teksto iti Biblia ti naikabesana ken kayatna pay ti agadal iti mamimpat iti kada lawas! Iti tulong ni Andrea, regularen  a makigimgimong ni Angela babaen iti videoconference.

Naammuan ni Mary nga adda laeng iti asideg ni Kristine ti lakayna a ni Joshua no agad-adalda. Isu nga insaludsod ni Mary ken Joshua no kayatna met ti makipagadal. Nupay kasta, imbaga ni Joshua, “Agdengngegak laeng, saan a siak ti saludsodam, ta no saludsodannak, pumanawakon.” Ngem lima a minuto pay laeng nga agad-adalda, ad-adu pay ketdin ti saludsodna ngem ni Kristine ken kayatna payen ti agpayadal iti Biblia.

Gapu iti simple a saludsod ni Mary, immadu ti iyad-adalanna iti Biblia. Impayadalna iti sumagmamano a kakabsat ti dadduma kadakuada. Agdagup iti 28 ti nairugi ni Mary nga iyadalan iti Biblia iti uppat a pagilian.

Ni Jasmin nga umuna a nayadalan iti Biblia a nadakamat iti daytoy a kapadasan ket nabautisaran idi Abril 2021. Nagpabautisar met ni Kristine idi Mayo 2022 ken nagsublin iti Pilipinas tapno makaduana ti pamiliana. Ti dua a dadduma pay nga inyam-ammo ni Kristine ken Mary ket nagpabautisar metten. Sumagmamano a bulan kalpasanna, nagpabautisar met ni Angela ken agserserbin kas regular pioneer. Ni Joshua, nga asawa ni Kristine ken ti anakda a ni Andrea, agraman ti dadduma pay, ket agtultuloy a mayad-adalan ken rumangrang-ayda iti naespirituan.

Idi umuna a siglo, nagbiit a simmaknap ti naimbag a damag kadagiti agkakapamilia ken aggagayyem. (Juan 1:​41, 42a; Ara. 10:​24, 27, 48; 16:​25-33) Padasem nga isaludsod kadagiti iyad-adalam ken iti dadduma pay nga interesado: “Adda kadi am-ammom a kayatna met ti agpayadal iti Biblia?” Nalabit adunto met ti marugiam nga iyadalan iti Biblia gapu iti dayta a simple a saludsod.