Magna iti Dana ti Kinatarnaw

“No maipapan kaniak, iti kinatarnawko magnaakto.”​—SALMO 26:11.

1, 2. (a) Apay a ti kinatarnaw ti tao ket maysa a napateg a paset ti isyu mainaig iti kinasoberano ti Dios? (b) Kasano a maipakita dagiti adda panunotda a parsua a dimmasigda iti soberania ni Jehova?

IDI nagrebelde ni Satanas iti minuyongan ti Eden, pinataudna ti sapasap nga isyu maipapan iti kalintegan ti Dios a mangituray kadagiti amin a parsuana. Idi agangay, kayatna a paneknekan nga agserserbi dagiti tattao iti Dios gapu laeng iti magunggonada. (Job 1:9-11; 2:4) Gapuna, ti kinatarnaw ti tao ket nagbalin a napateg a paset ti isyu maipapan iti sapasap a kinasoberano ni Jehova.

² Nupay ti kinasoberano ti Dios ket saan nga agpannuray iti kinatarnaw dagiti parsuana, maipakita dagiti tattao ken espiritu nga annak ti Dios no ania ti takderda mainaig iti dayta nga isyu. Kasano? Babaen ti panangikeddengda no agtalinaedda a natarnaw wenno saan. No kasta, ti kinatarnaw ti tao ket maysa a nalagda a pakaibatayan ti pakaukomanna.

3. (a) Ania ti kayat da Job ken David nga usigen ken timbangen ni Jehova? (b) Ania a salsaludsod ti tumaud maipapan iti kinatarnaw?

³ Sikokompiansa a kinuna ni Job: “[Ni Jehova] timbangennakto kadagiti umiso a timbangan ket ti Dios maammuannanto ti kinatarnawko.” (Job 31:6) Ni Ari David iti nagkauna nga Israel inkararagna nga usigen ni Jehova ti kinatarnawna idi inkararagna: “Ukomennak, O Jehova, ta siak nagnaak iti bukodko a kinatarnaw, ket nagtalekak ken Jehova, tapno saanak nga agdiwerdiwer.” (Salmo 26:1) Anian a nagpateg a magnatayo met iti dana ti kinatarnaw! Ngem ania ti kinatarnaw, ken ania ti kaipapanan ti pannagna iti dayta? Ania ti tumulong kadatayo nga agtultuloy a magna iti dana ti kinatarnaw?

“Nagnaak iti Bukodko a Kinatarnaw”

4. Ania ti kinatarnaw?

⁴ Ti kinatarnaw ipasimudaagna ti kinapalungdo, kinaawan iti mulit, kinalinteg, ken kinaawan iti pagkurangan. Ngem saan laeng a ti panagaramid iti umiso ti tuktukoyenna. Ti kinatarnaw ket moral a kinalinteg wenno naimpusuan a pannakarikna iti naan-anay a debosion iti Dios. Kinuestion ni Satanas ti motibo ni Job idi kinunana iti Dios: “Kas pamaliwan, iyunnatmo ta imam, pangngaasim, ket sagidem agingga iti tulang ken lasagna [ni Job] ket kitaem no saannakanto nga ilunod ita mismo a rupam.” (Job 2:5) Buyogen ti umiso a tignay, ti kinatarnaw kalikagumanna ti umiso a motibo ti puso.

5. Ania ti mangipakita a saan a masapul a perpektotayo tapno makapagtalinaedtayo a natarnaw?

⁵ Ngem saan a masapul a perpekto ti maysa tapno makapagtalinaed a natarnaw. Imperpekto ni Ari David ken nakaaramid iti sumagmamano a nadagsen a basol kabayatan ti panagbiagna. Kaskasdi, isu ket tinukoy ti Biblia kas maysa a tao a nagna “buyogen ti kinatarnaw ti puso.” (1 Ar-ari 9:4) Apay? Gapu ta ni David inayatna ni Jehova. Naipamaysa ti pusona iti Dios. Sipapasnek a binigbigna dagiti kamalina, inawatna ti pannubngar, ken inlintegna dagiti aramidna. Kinapudnona, makita ti kinatarnaw ni David babaen ti naimpusuan a debosion ken panagayatna iti Dios a ni Jehova.​—Deuteronomio 6:5, 6.

6, 7. Ania ti iraman ti pannagna iti kinatarnaw?

⁶ Ti kinatarnaw ket saan laeng a tumukoy iti dadduma a kababalin ti tao, kas iti panagbalin a relihioso. Imbes ketdi, saklawenna ti intero a panagbiagtayo. ‘Nagna’ ni David iti kinatarnawna. “Ti sao a ‘magna’ ipasimudaagna ti ‘dana ti biag’ wenno ‘estilo ti panagbiag,’” kuna ti The New Interpreter’s Bible. No maipapan kadagidiay ‘awan  pagkurangan ti dalanda,’ inkanta ti salmista: “Naragsak dagidiay mangsalsalimetmet kadagiti pammalagip [ti Dios]; buyogen ti isuamin a puso agtultuloyda a mangbirok kenkuana. Pudno a saanda nga inannurot ti kinakillo. Iti daldalanna nagnada.” (Salmo 119:1-3) Ti kinatarnaw kalikagumanna ti agtultuloy a panagregget nga aramiden ti pagayatan ti Dios ken magna iti danana.

⁷ Ti pannagna iti kinatarnaw kalikagumanna ti panagbalin a nasungdo iti Dios, uray kadagiti narigat a kasasaad. No andurantayo dagiti pakasuotan, agtalinaed a natibker iti laksid dagiti pakarigatan, wenno sarangten dagiti pannulisog ti dakes a lubong, agminar ti kinatarnawtayo. ‘Maparagsaktayo ti puso ni Jehova’ gapu ta masungbatanna daydiay mangrurrurod kenkuana. (Proverbio 27:11) Gapuna, adda rasontayo nga agbalin a determinado a kas ken Job: “Agingga a mauyos ti biagko saankonto nga ikkaten kaniak ti kinatarnawko!” (Job 27:5) Matulongannatayo ti Salmo 26 a magna iti kinatarnaw.

“Pasudiem Dagiti Bekkelko ken ti Pusok”

8. Ania ti maadalyo iti araraw ni David a sukimaten ni Jehova dagiti bekkel ken pusona?

⁸ Inkararag ni David: “Sukimatennak, O Jehova, ket subokennak; pasudiem dagiti bekkelko ken ti pusok.” (Salmo 26:2) Masarakan dagiti bekkel iti kaunggan a paset ti bagi. Iti piguratibo a pamay-an, dagiti bekkel iladawanda ti pampanunot ken emosion ti tao. Ti met piguratibo a puso isimbolona ti katatao ti maysa​—ti motibo, rikrikna, ken isipna. Idi kiniddaw ni David nga isu ket sukimaten ni Jehova, kinapudnona ikarkararagna a sukisoken ken tingitingen ni Jehova dagiti pampanunot ken rikriknana.

9. Iti ania a wagas a gugoran ni Jehova dagiti piguratibo a bekkel ken pusotayo?

⁹ Inyararaw ni David a magugoran dagiti bekkel ken pusona. Kasano a gugoran ni Jehova ti katataotayo? Inkanta ni David: “Bendituekto ni Jehova, a nangipaay kaniak iti balakad. Pudno, bayat dagiti rabii linintegdak dagiti bekkelko.” (Salmo 16:7) Ania ti kayat a sawen dayta? Kayatna a sawen nga immukuok ti balakad ti Dios kadagiti kaunggan a paset ti katatao ni David, isu a nailinteg ti pampanunot ken riknana. Matagiragsaktayo met dayta no siyayaman nga utobentayo ti balakad nga ipapaay kadatayo ti Sao ti Dios, dagiti pannakabagina, ken ti organisasionna ket palubosantayo dayta a sumagepsep iti kaunggantayo. No regular nga ikararagtayo a gugorannatayo ni Jehova iti kasta a wagas, matulongantayo nga agtalinaed a natarnaw.

‘Ti Naayat a Kinamanangngaasim Adda iti Sanguanak’

10. Ania ti nakatulong ken ni David a magna iti kinapudno ti Dios?

¹⁰ “Ti naayat a kinamanangngaasim adda iti sanguanan dagiti matak,” intuloy ni David, “ket nagnaak iti kinapudnom.” (Salmo 26:3) Pagaammo  unay ni David dagiti aramid ti Dios a mangipakita iti naayat a kinamanangngaasina, ket buyogen ti apresasion nga inutobna dagita. “Bendituem ni Jehova, O kararuak,” inkantana, “ket dika lipaten dagiti amin nga aramidna.” Iti pananglagipna iti maysa ‘kadagiti aramid’ ti Dios, intuloy ni David: “Ni Jehova mangipakpakat kadagiti aramid ti kinalinteg ken kadagiti hudisial a pangngeddeng maipaay kadagidiay amin a masasaur. Impakaammona ti daldalanna ken Moises, dagiti pannakilangenna uray pay iti annak ti Israel.” (Salmo 103:2, 6, 7) Nalabit a pampanunoten ni David ti panangsaur dagiti Egipcio kadagiti Israelita idi kaaldawan ni Moises. No kasta, sigurado a natukay ti puso ni David ken napabileg ti determinasionna a magna iti kinapudno ti Dios bayat nga inut-utobna no kasano nga impalgak ni Jehova ken ni Moises dagiti pamay-an ti panangisalakanna.

11. Ania ti makatulong kadatayo a magna iti dana ti kinatarnaw?

¹¹ Makatulong met kadatayo a magna iti dana ti kinatarnaw ti regular a panagadal iti Sao ti Dios ken panangmennamenna iti naadaltayo. Kas pagarigan, no silalagiptayo nga intarayan ni Jose ti imoral a pananggundaway ti asawa ni Potifar, sigurado a mapabilegtayo nga umadayo kadagiti umasping a pannulisog iti pagtrabahuan, eskuelaan, wenno iti sadinoman. (Genesis 39:7-12) Komusta met no maipasangotayo kadagiti oportunidad nga agbalin a nabaknang wenno nalatak ken naimpluensia iti sekular a lubong? Mapagwadantayo ni Moises, a nangiwaksi kadagiti nadayag a bambanag iti Egipto. (Hebreo 11:24-26) No sipapanunottayo iti panagibtur ni Job, awan duadua a mapabileg ti determinasiontayo nga agtalinaed a nasungdo ken ni Jehova iti laksid dagiti an-annayen ken didigra. (Santiago 5:11) No ngay agbalintayo a biktima ti pannakaidadanes? Ad-adda a tumuredtayo no lagipentayo ti kapadasan ni Daniel iti abut dagiti leon!​—Daniel 6:16-22.

“Saanak a Nakikatugaw Kadagiti Tattao ti Di Kinapudno”

12, 13. Ania a kita ti timpuyog ti nasken a liklikantayo?

¹² Iti panangtukoyna iti sabali pay a nangpatibker iti kinatarnawna, kinuna ni David: “Saanak a nakikatugaw kadagiti tattao ti di kinapudno; ket saanak a sumrek a kadua dagidiay mangilemmeng iti kinasiasinoda. Ginurak ti kongregasion dagiti managaramid iti dakes, ket saanak a makikatugaw kadagidiay nadangkes.” (Salmo 26:4, 5) Saan a nakikatugaw ni David kadagiti nadangkes. Kagurana dagiti dakes a kakadua.

¹³ Datayo met ngay? Ditay kadi kayat ti makitimpuyog kadagiti saan a napudno a tattao babaen dagiti programa iti telebision, video, pelikula, Internet, wenno dadduma pay a pamay-an? Adaywantayo ngata dagidiay mangilimlimed iti  kinasiasinoda? Mabalin a gayyemendatayo ti dadduma a kaeskuelaan wenno katrabahuantayo gapu ta addaanda kadagiti dakes a panggep. Talaga kadi a kayattay ti makisinninged kadagidiay saan a magmagna iti kinapudno ti Dios? Uray ibagada nga awan ti dakes a motiboda, mabalin nga ilimed dagiti apostata ti panggepda a mangisiasi kadatayo manipud iti panagserbi ken ni Jehova. Kasanon no adda dadduma iti kongregasion Kristiano a doble-kara ti panagbiagda? Mabalinda met nga ilimed ti pudno a katataoda. Ni Jayson, nga agserserbi ita kas ministerial nga adipen, naaddaan kadagiti kasta a gagayyem bayat ti kinaagtutubona. Kinunana maipapan kadakuada: “Naminsan, maysa kadakuada ti nagkuna kaniak: ‘Saan a napateg no ania ti aramidentayo ita gapu ta inton dumteng ti baro a sistema, mataytayonto. Ditayto ammo nga adda nakaikapisantayo.’ Ti kasta a panagpampanunot ti nangriing kaniak. Diak kayat ti matay inton dumteng ti baro a sistema.” Nainsiriban a ginuped ni Jayson ti pannakitimpuyogna kadagiti kasta a tattao. “Dikay payaw-awan,” imballaag ni apostol Pablo. “Dagiti dakes a pannakitimpuyog dadaelenda dagiti makagunggona nga ugali.” (1 Corinto 15:33) Anian a nagpateg a liklikantayo ti dakes a pannakitimpuyog!

‘Ideklarak ti Amin a Nakaskasdaaw nga Ar-aramidmo’

14, 15. Kasanotayo a ‘makapagmartsa iti aglikmut ti altar ni Jehova’?

¹⁴ “Bugguakto dagiti imak iti mismo a kinaawan basol, ket agmartsaakto a manglikmut iti altarmo, O Jehova,” intuloy ni David. Apay? “Tapno ipangngegko a sipipigsa ti panagyaman, ken tapno ideklarak amin a nakaskasdaaw nga ar-aramidmo.” (Salmo 26:6, 7) Kayat ni David ti agtalinaed a nadalus iti moral tapno maidaydayawna ni Jehova ken maiwaragawagna ti debosionna iti Dios.

¹⁵ Amin a banag a mainaig iti pudno a panagdayaw iti tabernakulo ken kalpasanna iti templo ‘mangisimboloda a ladawan ken anniniwan ti nailangitan a bambanag.’ (Hebreo 8:5; 9:23) Isimbolo ti altar ti naimpusuan a panangakseptar ni Jehova iti daton ni Jesu-Kristo kas subbot iti sangatauan. (Hebreo 10:5-10) Binugguantayo dagiti imatayo kas inosente a tattao ken ‘agmartsatayo iti aglikmut ti altar ni Jehova’ babaen ti panangiparangarangtayo iti pammatitayo iti dayta a daton.​—Juan 3:16-18.

16. Ania ti magunggonatayo no ipakaammotayo dagiti nakaskasdaaw nga aramid ti Dios?

¹⁶ No panunotentayo ti amin a nagbalin a posible gapu iti subbot, saan kadi a mapno ti pusotayo iti panagyaman ken ni Jehova ken iti bugbugtong nga Anakna? Siyayaman ngarud nga ipakaammotayo kadagiti tattao dagiti nakaskasdaaw nga aramid ti Dios​—manipud iti pannakaparsua ti tao iti minuyongan ti Eden agingga iti naan-anay a pannakaisubli ti amin a bambanag iti baro a lubong ti Dios. (Genesis 2:7; Aramid 3:21) Pudno a naespirituan a proteksion ti panangikasaba iti Pagarian ken ti panagaramid kadagiti adalan! (Mateo 24:14; 28:19, 20) No okupadotayo kadagita a trabaho, agtultuloy a naraniag ti namnamatayo iti masanguanan, natibker ti pammatitayo kadagiti kari ti Dios, ken narayray ti ayattayo ken ni Jehova ken kadagiti padatayo a tattao.

“Inayatko ti Pagnaedan iti Balaymo”

17, 18. Ania koma ti panangmatmattayo kadagiti Nakristianuan a gimong?

¹⁷ Ti tabernakulo, agraman ti altarna a pagdatonan, ket sentro ti panagdayaw ken ni Jehova idiay Israel. Kaay-ayo ni David dayta a lugar yantangay inkararagna: “Jehova, inayatko ti pagnaedan iti balaymo ken ti lugar a pagtataengan ti dayagmo.”​—Salmo 26:8.

¹⁸ Pagay-ayattayo kadi ti agtataripnong kadagiti lugar a pakasursuruantayo kadagiti bambanag maipapan ken ni Jehova? Tunggal Kingdom Hall, agraman dagiti regular a programana a mangipaay iti naespirituan nga instruksion, agserbida a sentro ti pudno a panagdayaw iti komunidad. Maysa pay, addaantayo kadagiti tinawen a kombension, asamblea sirkito, ken espesial nga asamblea. Mapagsasaritaan kadagita a gimong ‘dagiti pammalagip’ ni Jehova. No masursurotayo nga ‘ayaten dagita iti kasta unay,’ sigagagar a tabunuantayo dagiti gimong ken agbalin nga atentibo bayat nga addatayo sadiay. (Salmo 119:167) Anian a makapagin-awa ti makitimpuyog kadagiti kapammatian nga interesado iti personal  a pagimbagantayo ken tumulong kadatayo nga agtalinaed iti dana ti kinatarnaw!​—Hebreo 10:24, 25.

‘Dika Ikkaten ti Biagko’

19. Ania a basbasol ti kayat a liklikan ni David?

¹⁹ Gapu ta naan-anay nga ammona dagiti pagdaksan ti isisiasi iti kinapudno ti Dios, impakaasi ni David: “Dika ikkaten ti kararuak a maikuyog kadagiti managbasol, wenno uray ti biagko a maikuyog kadagiti tattao a nakabasol iti dara, a kadagiti imada adda nalulok a kababalin, ket ti makannawan nga imada napno iti panagpasuksok.” (Salmo 26:9, 10) Saan a kayat ni David ti maibilang kadagiti nadangkes a tattao a nalulok ti kababalinda ken mapasuksokan.

20, 21. Ania ti mangiturong kadatayo iti dana dagiti saan nga agserserbi iti Dios?

²⁰ Napno ti lubong ita kadagiti imoral nga aramid. Dagiti telebision, magasin, ken pelikula itandudoda ti nalulok a kababalin. (Galacia 5:19) Dadduma ti nasiluan iti pornograpia, a masansan nga agturong iti imoral nga aramid. Dagiti agtutubo ti kangrunaan a nalaka a matnag kadagita nga impluensia. Iti dadduma a pagilian, gagangay ti panagdeyt, isu nga ipagarup dagiti tin-edyer a masapul a makideytda. Adu nga agtutubo ti nakinobio wenno nakinobia, idinto ta ubingda pay unay tapno makiasawa. Tapno mapennekda dagiti seksual a tarigagayda, makiramandanto iti imoral nga aramid agingga a matnagda iti pannakiabig.

²¹ Maipasango met dagiti adulto kadagiti dakes nga impluensia. Dagiti kinasuitik iti negosio ken ti pagannayasan a mangaramid kadagiti inaagum a desision ket pagilasinan ti saan a kinatarnaw. Ad-adda a mayadayotayo ken ni Jehova no magnatayo kadagiti dana ti lubong. ‘Guraentayo ti dakes, ket ayatentayo ti naimbag’ ken itultuloytayo ti magna iti dana ti kinatarnaw.​—Amos 5:15.

“O Subbotennak ket Ipaayannak iti Parabur”

22-24. (a) Ania ti iparegta kadakayo ti pangserra a sasao ti Salmo 26? (b) Ania a silo ti mausig iti sumaganad nga artikulo?

²² Inngudo ni David ti ararawna iti Dios idi  kinunana: “No maipapan kaniak, iti kinatarnawko magnaakto. O subbotennak ket ipaayannak iti parabur. Ti bukodko a saka pudno unay nga agtakderto iti nalantag a disso; iti tengnga dagiti naguummong a reprep bendituekto ni Jehova.” (Salmo 26:11, 12) Ti determinasion ni David a mangsalimetmet iti kinatarnawna ket mainaig unay iti panangyararawna iti pannakasubbot. Anian a makaliwliwa dayta! Nupay managbasoltayo, tulongannatayo ni Jehova no determinadotayo a magna iti dana ti kinatarnaw.

²³ Sapay koma ta ti wagas ti panagbiagtayo ipakitana a raraemen ken ipatpategtayo ti kinasoberano ti Dios iti amin nga aspeto ti biagtayo. Tunggal maysa kadatayo ti mabalin a mangikararag ken ni Jehova a sukimaten ken gugoranna ti pampanunot ken rikriknatayo. Masalimetmetantayo ti kinapudno a naggapu kenkuana babaen ti siaanep a panagadaltayo iti Sao ti Dios. Ikagumaantayo ngarud a liklikan ti dakes a pannakitimpuyog ket bendituentayo ni Jehova kadagiti panaggigimongtayo. Sireregta koma a makipasettayo iti panangikasaba iti Pagarian ken panagaramid kadagiti adalan, a di pulos ipalubos a pagpeggaden ti lubong ti napateg a relasiontayo iti Dios. Bayat nga ar-aramidentayo ti amin a kabaelantayo a magna iti dana ti kinatarnaw, makapagtalektayo a paraburannatayto ni Jehova.

²⁴ Yantangay ramanen ti kinatarnaw ti amin nga aspeto ti biag, masapul nga agannadtayo iti maysa a makapapatay a silo​—ti nalabes a panaginum iti arak. Mausig dayta iti sumaganad nga artikulo.

Malagipyo Kadi?

• Apay a nainkalintegan a maukom dagiti adda panunotda a parsua maibatay iti kinatarnawda?

• Ania ti kinatarnaw, ken kasano a masalimetmetan dayta?

• Ania ti tumulong kadatayo a magna iti dana ti kinatarnaw?

• Tapno masalimetmetan ti kinatarnaw, aniada a peggad ti nasken a pagannadan ken liklikan?

[Salsaludsod]

[Ladawan iti panid 14]

Regular kadi nga ikarkararagyo ken ni Jehova a sukimatenna ti pampanunotyo?

[Ladawan iti panid 14]

Silalagipkayo kadi kadagiti aramid ni Jehova a mangipakita iti naayat a kinamanangngaasina?

[Dagiti Ladawan iti panid 15]

Maragsakan ti puso ni Jehova no salimetmetantayo ti kinatarnawtayo iti sidong dagiti pakasuotan

[Dagiti Ladawan iti panid 17]

Ap-aprobetsarenyo kadi dagiti probision ni Jehova a tumulong kadakayo a magna iti dana ti kinatarnaw?