Ipamaysam ti Panunotmo iti Naaramidan Kenka ni Jehova

KALPASAN la unay ti panagungar ni Jesus, dua nga adalanna ti naggapu idiay Jerusalem nga agturong idiay Emmaus. “Bayat nga agpatpatang ken agsarsaritada idi,” kuna ti salaysay iti Ebanghelio ni Lucas, “ni Jesus a mismo immasideg ket nangrugi a nagna a makikuyog kadakuada; ngem nakullaapan dagiti matada a makailasin kenkuana.” Kalpasanna, kinuna kadakuada ni Jesus: “‘Ania dagitoy a banag a pagdebdebateanyo bayat a magmagnakayo?’ Ket nagintekda a naliday dagiti rupada.” Apay a naladingitda? Patien dagiti adalan nga iti daydi a tiempo nga ispalen ni Jesus ti Israel manipud iti panangituray dagiti Gentil, ngem saan a napasamak ti ninamnamada. Imbes ketdi, napapatay ni Jesus isu a maladingitanda.​—Luc. 24:15-21; Ara. 1:6.

Nakirinnason ni Jesus kadagiti adalan, a kinunana: “Nangrugi ken Moises ken kadagiti amin a Mammadto imbuksilanna kadakuada ti bambanag maipapan iti bagina kadagiti amin a Kasuratan.” Kinapudnona, adu nga agkakapateg ken makapabileg-pammati a bambanag ti napasamak bayat ti ministerio ni Jesus! Idi dumdumngeg dagiti adalan iti panangilawlawag ni Jesus, nabaliwan ti ladingitda iti ragsak. Karabiyanna, kinunada: “Saan kadi a rumayrayray ti pusota bayat nga agsasao idi kadata iti dalan, bayat a lukluktanna idi a naan-anay kadata dagiti Kasuratan?” (Luc. 24:27, 32) Ania ti masursurotayo iti reaksion dagiti adalan ni Jesus?

Ania ti Epektona Kadatayo no Saan a Matungpal Dagiti Namnamaentayo?

Naladingit dagiti dua nga adalan a nagpa-Emmaus gapu ta saan a napasamak dagiti ninamnamada. Napadasanda ti kunaen ti Proverbio 13:12: “Ti inanama a maitantan pagsakitenna ti puso.” Umasping iti dayta, dadduma kadatayo a dinekdekadan nga agserserbi a simamatalek ken Jehova ti mangipagarup a dimteng koman ti “dakkel a rigat.” (Mat. 24:21; Apoc. 7:14) Natural laeng a temporario a maladingitantayo no saan a matungpal ti namnamaentayo.

Ngem laglagipentayo a rimmagsak ti dua nga adalan kalpasan a tinulongan ida ni Jesus a mangipamaysa iti panunotda kadagiti padto a natungpalen​—a dadduma kadagita ti natungpal iti mismo a kaaldawanda. Mataginayontayo ti makin-uneg a rag-otayo ken mapagballigiantayo ti pannakapaaytayo iti kasta met la a  pamay-an. Kinuna ti nabayagen a Kristiano a panglakayen a ni Michael: “Diyo ipamaysa ti panunotyo kadagiti di pay inaramid ni Jehova. Imbes ketdi, utobenyo dagiti naaramidannan.” Talaga a nagsayaat dayta a balakad!

No Ania ti Naaramidanen ni Jehova

Usigentayo ti dadduma nga agkakaimbag a bambanag a naaramidanen ni Jehova. Kinuna ni Jesus: ‘Ti mangwatwat iti pammati kaniak, aramidennanto met dagiti trabaho nga aramidek; ket aramidennanto dagiti trabaho a dakdakkel ngem dagitoy.’ (Juan 14:12) Itungtungpal ita dagiti adipen ti Dios ti kadakkelan pay laeng a trabaho dagiti Kristiano. Nasurok a pito a milion ti mangnamnama a maisalakan iti dakkel a rigat. Agasenyo, ita pay laeng a nakaad-adu a matalek nga adipen ni Jehova ti aktibo a mangaskasaba iti adu a pagilian iti intero a daga! Wen, tinulongan ni Jehova dagiti adipenna a mangaramid iti “trabaho a dakdakkel ngem dagitoy,” kas impadto ni Jesus.

Ania pay ti inaramid ni Jehova agpaay kadatayo? Iti piguratibo a pamay-an, pinagbalinna a posible para kadagiti nasingpet a tattao a rummuarda iti dakes a lubong, ken sumrekda iti naespirituan a paraiso a pinarsuana. (2 Cor. 12:1-4) Iwayaam nga utoben ti dadduma nga aspeto dayta a paraiso a tagtagiragsakem. Kas pagarigan, kitaem dagiti publikasion iti librariayo wenno iti libraria ti Kingdom Hall. Ukagem ti Watch Tower Publications Index, wenno kitaem ti Watchtower Library. Denggem ti maysa a nairekord a drama iti Biblia. Biagem iti panunotmo dagiti nangngegam ken nabuyam iti nabiit pay a kombension. Kanayonanna, panunotem dagiti makapabileg a pannakilangenmo kadagiti Kristiano a kakabsattayo. Anian a kinaparabur ni Jehova gapu iti panangipaayna kadatayo iti aglaplapusanan a naespirituan a taraon ken iti naayat a panagkakabsat​—talaga a maysa a naespirituan a paraiso!

Kinuna ni salmista a David: “Adu a banag ti inaramidmo, O Jehova a Diosko, ti mismo a nakaskasdaaw nga ar-aramidmo ken ti pampanunotmo maipaay kadakami.” (Sal. 40:5) Wen, no ipamaysatayo ti panunottayo iti agkakaimbag a naaramidanen ni Jehova kadatayo ken utobentayo ti naayat a pannakaseknanna kadatayo, mapabilegtayo nga agibtur a simamatalek bayat ti naimpusuan a panagserbitayo iti nailangitan nga Amatayo a ni Jehova.​—Mat. 24:13.

[Ladawan iti panid 31]

Tinulongan ni Jesus dagiti adalanna a mangipamaysa iti panunotda iti naaramidanen ni Jehova kadakuada

[Dagiti Ladawan iti panid 32]

Biagem iti panunotmo dagiti nangngegam ken nabuyam iti nabiit pay a kombension