Awatenyo ti Espiritu ti Dios, Saan a ti Espiritu ti Lubong

“Inawattayo, saan a ti espiritu ti lubong, no di ket ti espiritu nga aggapu iti Dios, tapno maammuantayo ti bambanag a siaasi nga impaay kadatayo ti Dios.”​—1 COR. 2:12.

1, 2. (a) Iti ania nga anag a makidangdangadang dagiti pudno a Kristiano? (b) Ania dagiti saludsod nga usigentayo?

 MAKIDANGDANGADANG ita dagiti pudno a Kristiano! Ti kabusortayo ket nabileg, nasikap, ken batidon iti gubat. Nakaep-epektibo ti igamna ta naparmekna ti kaaduan iti sangatauan. Ngem ditay koma panunoten nga awan gawaytayo wenno ditay agballigi maibusor kenkuana. (Isa. 41:10) Adda pangdepensatayo iti aniaman nga iraraut.

² Saan a literal ti pannakidangadangtayo no di ket naespirituan. Ni Satanas a Diablo ti kabusortayo, ken ti maysa a kangrunaan nga igam nga us-usarenna ket “ti espiritu ti lubong.” (1 Cor. 2:12) Ti kangrunaan a pangdepensatayo iti irarautna ket ti espiritu ti Dios. Tapno agballigitayo iti daytoy a dangadang ken agtalinaedtayo a naregta iti naespirituan, masapul a kiddawentayo ti espiritu ti Dios ken iparangarangtayo ti bungana. (Gal. 5:22, 23) Ngem ania ti espiritu ti lubong, ken apay a nakasaksaknap ti impluensiana? Kasanotayo nga ammo no naimpluensiaantayon iti espiritu ti lubong? Ken ania ti maadaltayo ken Jesus maipapan iti panangawat iti espiritu ti Dios ken panangsaranget iti espiritu ti lubong?

Ti Espiritu ti Lubong ​—Apay a Nakasaksaknap?

3. Ania ti espiritu ti lubong?

³ Ti espiritu ti lubong ket namunganay ken Satanas, “ti agturay iti lubong,” ken busbusorenna ti nasantuan nga espiritu ti Dios. (Juan 12:31; 14:30; 1 Juan 5:19) Ti espiritu ti lubong ti kangrunaan nga iparparangarang dagiti tattao ken mangim-impluensia kadakuada. Daytoy nga agtigtignay a puersa ituggodna dagiti tattao a bumusor iti pagayatan ken panggep ti Dios.

4, 5. Apay a nakasaksaknap ti espiritu nga itantandudo ni Satanas?

⁴ Apay a nakasaksaknap ti espiritu nga itantandudo ni Satanas? Umuna, ni Satanas inallilawna ni Eva iti hardin ti Eden. Kinombinsirna a sumayaat ti biagna no saan nga agpasakup iti Dios. (Gen. 3:13) Anian a kinaulbod ni Satanas! (Juan 8:44) Kalpasanna, inusarna ni Eva a mangsulisog ken Adan nga agsukir ken Jehova. Gapu iti pangngeddeng ni Adan, nailako iti basol ti sangatauan isu nga agannayas dagiti tattao a mangyanninaw iti espiritu ti kinasukir nga itantandudo ni Satanas.​—Basaen ti Efeso 2:1-3.

 ⁵ Inimpluensiaan met ni Satanas ti adu nga anghel, a nagbalin a demonio. (Apoc. 12:3, 4) Napasamak dayta a panangliput iti Dios sakbay ti Layus idi kaaldawan ni Noe. Namati dagita nga anghel a nasaysayaat no panawanda ti saadda idiay langit ket awanan-bain a pennekenda ti di nainkasigudan a tarigagayda ditoy daga. (Jud. 6) ‘Iyaw-awan ni Satanas ti intero a mapagnaedan a daga’ iti tulong dagiti demonio, a nangpanawen iti nainlasagan a bagida. (Apoc. 12:9) Nakalkaldaang ta kaaduan a tattao ti saan a makaammo iti impluensia dagiti demonio.​—2 Cor. 4:4.

Agpapaimpluensiakayo Kadi iti Espiritu ti Lubong?

6. Kasanonatayo a maimpluensiaan ti espiritu ti lubong?

⁶ Adu ti saan a makaammo no kasano nga im-impluensiaan ni Satanas dagiti tattao, ngem ammo dayta dagiti pudno a Kristiano. (2 Cor. 2:11) Kinapudnona, dinatay maimpluensiaan ti espiritu ti lubong no saantayo nga ipalubos dayta. Usigentayo ti uppat a saludsod a makatulong kadatayo a mangammo no ti espiritu ti Dios wenno ti espiritu ti lubong ti mangim-impluensia kadatayo.

7. Ania ti maysa a pamay-an nga us-usaren ni Satanas a mangisina kadatayo ken Jehova?

⁷ Ania ti ipalgak dagiti pilpiliek a paglinglingayan maipapan kaniak? (Basaen ti Santiago 3:14-18.) Ikagkagumaan ni Satanas nga isinanatayo iti Dios babaen ti panangsulisogna kadatayo a mangayat iti kinaranggas. Ammo ti Diablo a kagura ni Jehova ti asinoman a mangayat iti kinaranggas. (Sal. 11:5) Gapuna, us-usaren ni Satanas dagiti pagbasaan, pelikula, musika, ken elektroniko nga ay-ayam​—a dadduma kadagita ti mangtignay kadagiti agay-ayam a mangtulad iti nakaro nga imoralidad ken kinaranggas​—tapno maatrakarna ti nainlasagan a tarigagaytayo. Naragsaken ni Satanas no adda bassit a panagayattayo iti kinadakes uray no ay-ayatentayo latta ti kinalinteg.​—Sal. 97:10.

8, 9. Ania dagiti masapul nga isaludsodtayo iti bagitayo maipapan iti paglinglingayan?

⁸ Iti kasumbangirna, ti espiritu ti Dios tignayenna dagiti mangawat iti dayta nga agbalin a nadalus, natalna, ken naasi. Nasayaat nga isaludsodtayo iti bagitayo, ‘Ti kadi paglinglingayak paregtaennak a maaddaan kadagiti nasayaat a galad?’ Ti sirib nga aggapu iti Dios ket “saan a managinsisingpet.” Dagidiay agpapaimpluensia iti espiritu ti Dios dida ikasaba kadagiti kaarrubada ti maipapan iti kinadalus ken talna sa kalpasanna, maragsakanda nga agbuya iti mismo a pagtaenganda kadagiti programa a mangitampok iti nakaro a kinaranggas ken imoralidad.

⁹ Kalikaguman ni Jehova ti naipamaysa a debosiontayo. Ngem mapneken ni Satanas uray iti maysa laeng a tignay ti panagdayaw, kas iti inkalikagumna idi ken Jesus. (Luc. 4:7, 8) Mabalintayo nga isaludsod iti bagitayo: ‘Ti kadi pilpiliek a paglinglingayan tultulongannak a mangipaay iti Dios iti naipamaysa a debosion? Pagbalinenna kadi a narigrigat wenno nalaklaka ti panangsarangetko iti espiritu ti lubong? Iti masanguanan, adda kadi masapul a balbaliwak no iti panagpilik iti paglinglingayan?’

10, 11. (a) Ania a kababalin ti itantandudo ti espiritu ti lubong maipapan iti material a sanikua? (b) Ania a kababalin ti iparparegta ti Sao ti Dios nga impaltiing ti espirituna?

¹⁰ Ania ti panangmatmatko kadagiti material a sanikua? (Basaen ti Lucas 18:24-30.) Ti espiritu ti lubong itantandudona “ti derrep dagiti mata” babaen ti panangiparegtana iti kinaagum ken materialismo. (1 Juan 2:16) Patpatanorenna iti adu a tattao ti tarigagay a bumaknang. (1 Tim. 6:9, 10) Kayat dayta nga espiritu a patientayo a ti adu a kinabaknang ket mangipaay iti manayon a kinatalged. (Prov. 18:11) No ad-adda ti panagayattayo iti kuarta ngem iti Dios, agballigi ni Satanas. Rumbeng nga isaludsodtayo iti bagitayo, ‘Naipamaysa kadi ti biagko iti panagbirok iti material a pagnam-ayan ken ragragsak?’

¹¹ Iti kasumbangirna, ti Sao ti Dios nga impaltiing ti espirituna paregtaennatayo a maaddaan iti natimbeng a panangmatmat iti kuarta ken agbalin a nagaget tapno maipaaytayo ti material a kasapulan ti pamiliatayo. (1 Tim. 5:8) Ti espiritu ti Dios tulonganna dagidiay mangawat iti dayta a mangtulad iti kinaparabur ni Jehova.  Pagaammo dagitoy kas manangted. Napatpateg kadakuada dagiti tattao ngem kadagiti material a bambanag ken maragsakanda a mangiranud iti adda kadakuada agingga a posible. (Prov. 3:27, 28) Ken kangrunaan kadakuada ti panagserbi iti Dios saan ket a ti panagbirok iti kuarta.

12, 13. Maisupadi iti espiritu ti lubong, kasano a ti espiritu ti Dios impluensiaannatayo agpaay iti pagimbagantayo?

¹² Ania nga espiritu ti iparparangarangko? (Basaen ti Colosas 3:8-10, 13.) Ti espiritu ti lubong iparparegtana dagiti aramid ti lasag. (Gal. 5:19-21) Maipalgak no ania nga espiritu ti mangim-impluensia kadatayo no saan a nasayaat ti kasasaad kas koma no adda kabsat a di nangikankano, nangsair, wenno nakabasol kadatayo. Kanayonanna, nabatad no ania nga espiritu ti mangim-impluensia kadatayo no addatayo iti pagtaengantayo. Napateg ti panangsukimattayo iti bagitayo. Isaludsodtayo, ‘Iti napalabas nga innem a bulan, ad-adda kadi a naiparangarangko ti kababalin ni Kristo wenno agsubsubli manen ti di nasayaat a panagsasaok ken kababalinko?’

¹³ Ti espiritu ti Dios tulongannatayo a ‘manguksob iti daan a personalidad agraman dagiti aramidna’ ken mangikawes iti “baro a personalidad.” Dayta ti tumulong kadatayo nga agbalin nga ad-adda a nadungngo ken naasi. Nalaklakatayo a mangpakawan uray no adda nainkalintegan a rasontayo nga agreklamo. No adda ipagaruptayo a kinaawan hustisia, saantayo a dagus a mangisawang iti “makadangran a kinapait ken unget ken pungtot ken panagririaw ken nabassawang a panagsasao.” Imbes ketdi, ikagumaantayo ti agbalin a “nadungngo a mannakipagrikna.”​—Efe. 4:31, 32.

14. Ania ti panangmatmat ti kaaduan a tattao iti Sao ti Dios?

¹⁴ Adda kadi panagraem ken panagayatko kadagiti moral a pagalagadan ti Biblia? (Basaen ti Proverbio 3:5, 6.) Ti espiritu ti lubong iyan-anninawna ti panagsukir iti Sao ti Dios. Dagidiay agpapaimpluensia iti daytoy nga espiritu ilaksidda ti paset ti Biblia nga ibilangda a narigat nga annuroten, a kaykayatda dagiti tradision ken pilosopia ti tao. (2 Tim. 4:3, 4) Adda met dagidiay naan-anay a mangilaksid iti Sao ti Dios. Kuestionaranda ti kinapateg ken kinaumiso ti Biblia, nga ibilangda ti bagida a masirib. Tinagilag-anda dagiti nasin-aw a pagalagadan mainaig iti pannakikamalala, homoseksualidad, ken diborsio. Isursuroda a ti “naimbag ket dakes ken ti dakes ket naimbag.” (Isa. 5:20) Naimpluensiaantayo kadin iti daytoy nga espiritu? No adda parikuttayo, agpampannuraytayo kadi iti natauan a sirib, a pakairamanan ti bukodtayo a kapanunotan? Wenno ikagkagumaantayo kadi nga iyaplikar ti balakad ti Biblia?

15. Imbes nga agpannuraytayo iti bukodtayo a sirib, ania ti rumbeng nga aramidentayo?

¹⁵ Ti espiritu ti Dios patanorenna kadatayo ti panagraem iti Biblia. Kas iti salmista, ibilangtayo ti sao ti Dios kas pagsilawan iti sakatayo ken silaw iti danatayo. (Sal. 119:105) Agpannuraytayo iti naisurat a Sao ti Dios saan ket nga iti bukodtayo a  sirib tapno mailasintayo ti umiso ken dakes. Iti kasta, masursurotayo a raemen ti Biblia ken ayaten ti linteg ti Dios.​—Sal. 119:97.

Ti Maadaltayo iti Ulidan ni Jesus

16. Ania ti ramanen ti panangtulad iti “panunot ni Kristo”?

¹⁶ Tapno magun-odtayo ti espiritu ti Dios, masapul a patanorentayo ti “panunot ni Kristo.” (1 Cor. 2:16) Tapno maadda kadatayo “ti isu met laeng a kababalin ti isip a naadda ken Kristo Jesus,” masapul nga ammotayo ti wagas a panagpampanunot ken panagtigtignayna sa tuladentayo dayta. (Roma 15:5; 1 Ped. 2:21) Usigentayo ti sumagmamano a pamay-an a maaramidtayo dayta.

17, 18. (a) Ania ti maadaltayo ken Jesus maipapan iti kararag? (b) Apay a masapul nga ‘itultuloytayo ti agdawat’?

¹⁷ Ikararag ti espiritu ti Dios. Sakbay a naipasango ni Jesus kadagiti suot, inkararagna ti tulong ti espiritu ti Dios. (Luc. 22:40, 41) Masapul met a kiddawentayo ti nasantuan nga espiritu ti Dios. Sibubulos ken sipaparabur nga ited dayta ni Jehova iti amin nga agkiddaw kenkuana buyogen ti pammati. (Luc. 11:13) Kinuna ni Jesus: “Itultuloyyo ti agdawat, ket maitedto dayta kadakayo; itultuloyyo ti agsapul, ket makasarakkayto; itultuloyyo ti agtuktok, ket mailukatto dayta kadakayo. Ta tunggal maysa nga agdawdawat umawat, ken tunggal maysa nga agsapsapul makasarak, ket iti tunggal maysa nga agtuktuktok mailukatto dayta.”​—Mat. 7:7, 8.

¹⁸ Ditay koma mauma a mangkiddaw iti espiritu ken tulong ni Jehova. Mabalin a kanayonentayo ti agkararag ken ditay agap-apura. No dadduma, kayat ni Jehova nga ipakita dagiti umar-araraw kenkuana no kasano kauneg ti pannakaseknanda ken kinapudno ti pammatida sakbay a sungbatanna dagiti kararagda. a

19. Ania ti kanayon nga inaramid ni Jesus, ken kasanotayo a matulad?

¹⁹ Naan-anay nga agtulnog ken Jehova. Kanayon nga inaramid ni Jesus ti bambanag a makaay-ayo iti Amana. Adda idi gundaway a naiduma iti pagayatan ni Amana ti kayat ni Jesus a panangtamingna iti maysa a situasion. Kaskasdi, sikokompiansa a kinunana ken Amana: “Saan koma a ti pagayatak, no di ket ti pagayatam ti maaramid.” (Luc. 22:42) Isaludsodmo iti bagim, ‘Agtulnogak kadi iti Dios uray no narigat nga aramiden dayta?’ Napateg iti biagtayo ti panagtulnog iti Dios. Maikari iti naan-anay a panagtulnogtayo yantangay isu ti Nangaramid kadatayo, ti Gubuayan ken Mangsussustiner iti biagtayo. (Sal. 95:6, 7) Awan ti kasukat ti panagtulnogtayo. Ditay magun-odan ti anamongna no saantay nga agtulnog kenkuana.

20. Ania ti nakaisentruan ti biag ni Jesus, ken kasanotayo a matulad dayta?

²⁰ Agbalin a pamiliar iti Biblia. Idi direkta a sinubok ni Satanas ti pammati ni Jesus, nagadaw iti Kasuratan tapno masarangetna dayta. (Luc. 4:1-13) Idi sinangona dagiti relihioso a bumusbusor, inusar ni Jesus ti Sao ti Dios a pangkontra kadakuada. (Mat. 15:3-6) Naisentro ti biag ni Jesus iti panangammo ken panangtungpal iti linteg ti Dios. (Mat. 5:17) Kas ken Jesus, taraonantayo met ti isiptayo kadagiti makapabileg-pammati a Sao ti Dios. (Fil. 4:8, 9) Mabalin a maysa a karit iti dadduma ti panangbirok iti nawaya a tiempo para iti personal ken sangapamiliaan a panagadal. Ngem imbes a mangbiroktayo iti nawaya a tiempo, ikagumaantayo ti maaddaan iti tiempo para kadagita.​—Efe. 5:15-17.

21. Ania nga urnos ti mabalintayo nga aprobetsaren tapno ad-adda nga agbalintayo a pamiliar iti Sao ti Dios ken mayaplikartayo dayta?

²¹ Tinulongannatayo “ti matalek ken masirib nga adipen” a maaddaan iti tiempo para iti  personal ken sangapamiliaan a panagadal babaen ti panangyurnosda iti Panagdaydayaw ti Pamilia iti kada lawas. (Mat. 24:45) Ap-aprobetsarenyo kadi a naimbag daytoy nga urnos? Tapno maadda kadakayo ti panunot ni Kristo, mabalinyo kadi nga iraman iti panagadalyo ti sistematiko a panangusig iti insuro ni Jesus kadagiti topiko a piniliyo? Mabalinyo nga usaren ti Watch Tower Publications Index a mangsapul kadagiti impormasion maipapan iti topiko a paginteresanyo nga adalen. Kas pagarigan, manipud 2008 agingga iti 2010, ti publiko nga edision daytoy a magasin ket addaan iti serye ti 12 nga artikulo a napauluan iti “Ti Masursurotayo ken Jesus.” Mabalin a kayatyo nga usaren dagitoy nga artikulo kas pakaibasaran ti adalenyo. Sipud idi 2006, naglaon ti Agriingkayo! iti benneg a napauluan iti “Ania ti Sungbatmo?” Nadisenio daytoy a mangpalawa ken mangpauneg iti pannakaammoyo iti Sao ti Dios. Apay a diyo usaren sagpaminsan dagita a benneg iti Panagdaydayaw ti Pamiliayo?

Maparmektayo ti Lubong

22, 23. Ania ti aramidentayo tapno maparmektayo ti lubong?

²² Tapno maidalannatayo ti espiritu ti Dios, masapul a sarangtentayo ti espiritu ti lubong. Saan a nalaka nga aramiden dayta. Mabalin a kasapulantayo ti napinget a pannakidangadang. (Jud. 3) Ngem makapagballigitayo! Kinuna ni Jesus kadagiti adalanna: “Iti lubong addaankayo iti rigat, ngem bumilegkayo! Pinarmekko ti lubong.”​—Juan 16:33.

²³ Maparmektayo met ti lubong no sarangtentayo ti espirituna ken aramidentayo ti amin a kabaelantayo tapno magun-odantayo ti espiritu ti Dios. Kinapudnona, “no ti Dios adda kadatayo, siasinonto ti bumusor kadatayo?” (Roma 8:31) No adda kadatayo ti espiritu ti Dios ken agpaiwanwantayo iti dayta babaen ti panangtungpal kadagiti nailanad iti Biblia, maaddaantayo iti pannakapnek, talna, kinaragsak, ken biag nga agnanayon iti baro a lubong nga asidegen a dumteng.

[Footnote]

Malagipyo Kadi?

• Apay a nakasaksaknap ti espiritu ti lubong?

• Ania ti uppat a saludsod a masapul nga iyimtuodtayo iti bagitayo?

• Ania ti tallo a banag a maadaltayo ken Jesus maipapan iti panangawat iti espiritu ti Dios?

[Salsaludsod]

[Ladawan iti panid 8]

Kasano a nagbalin a demonio

ti dadduma nga anghel?

[Ladawan iti panid 10]

Us-usaren ni Satanas ti espiritu ti lubong a mangkontrol kadagiti tattao, ngem kabaelantayo a sarangten ti impluensiana