Salsaludsod Dagiti Agbasbasa

Ania ti aramidek no adda saanko a maawatan iti Biblia wenno no kasapulak ti balakad?

Paregtaennatayo ti Proverbio 2:1-5 nga ‘itultuloytayo a biroken’ ti pannakaawat ken panangilasin kas iti “nalmeng a gameng.” Ipamatmat dayta nga ikagumaantayo a sukimaten ti sungbat dagiti saludsodtayo iti Biblia ken biroken ti solusion dagiti problematayo. Kasanotayo nga aramiden dayta?

Ti libro a Magunggonaan iti Edukasion nga Ipaay ti Teokratiko nga Eskuelaan ti Panagministro, panid 33 agingga iti 38, ilawlawagna “No Kasano ti Agsukimat” babaen ti panangusar kadagiti katulongan nga ipapaay “ti matalek ken masirib nga adipen.” (Mat. 24:45) Ilawlawag ti panid 36 no kasano nga usaren ti Watch Tower Publications Index, a tunggal edision ket nabingay iti indise dagiti suheto ken indise dagiti teksto. Isu a mabalinmo nga usaren dagiti kangrunaan a sasao (key word) wenno teksto, ket makitam ti listaan dagiti reperensia a pagsukimatam. Anusam a biroken ti sungbat wenno instruksion a kasapulam. Laglagipem nga agbirbirokka kadagiti “nalmeng a gameng” isu a kasapulam ti tiempo ken panagregget.

Siempre, adda dagiti topiko ken teksto a saan pay a nailawlawag kadagiti publikasiontayo. Ken uray no nailawlawagen ti maysa a teksto, mabalin a saan nga isu ti sungbat ti saludsodmo. Ken tumaud dagiti saludsod gapu ta saan a detalyado ti dadduma a salaysay iti Biblia. Isu a ditay mabirokan a dagus ti sungbat ti tunggal saludsodtayo. Kadagiti kasta a kasasaad, ditay koma pugpugtuan ti bambanag a di pay masungbatan di la ket ta pagdedebateantayo ti “salsaludsod a siraraken” imbes a maiburaytayo ti aniaman a banag manipud iti Dios mainaig iti pammatitayo. (1 Tim. 1:4; 2 Tim. 2:23; Tito 3:9) Saan a responsabilidad ti sanga nga opisina wenno ti sangalubongan a hedkuarter nga analisaren wenno sungbatan dagiti saludsod a di pay nailawlawag kadagiti literaturatayo. Umdasen dagiti impormasion nga impaay ti Biblia a mangiwanwan kadatayo, nupay saan a detalyado, tapno maipakitatayo ti natibker a pammatitayo iti Autorna.​—Kitaem ti panid 185 agingga iti 187 ti libro nga Umadanika ken Jehova.

Kasanon no inaramidmo ti amin a kabaelam ngem awan latta ti mabirokam a sungbat ti saludsodmo? Dika bumdeng a makisarita iti maysa a nataengan iti naespirituan, nalabit maysa a panglakayen. Adu ti ammoda iti Biblia ken kapadasanda kas Kristiano. Mabalin a makatulong ti balakadda maipapan iti problemam wenno iti desisionmo ta am-ammodaka ken ti kasasaadmo. Ken dimo met liplipatan nga ikararag ken Jehova dagiti pakaseknam ken agpaiwanwanka iti nasantuan nga espirituna “ta ni met laeng Jehova mangted iti sirib . . . ken panangilasin.”​—Prov. 2:6; Luc. 11:13.