Tuladenyo ti Kinaridam ni Jesus

“Agtultuloykayo nga agbantay ken agkararagkayo.”​—MAT. 26:41.

ANIA TI SUNGBATMO?

Kasano nga ipakita dagiti kararagtayo a naridamtayo?

Kadagiti ania a pamay-an a maipakitatayo ti kinaridamtayo iti ministerio?

Apay a napateg nga agtalinaedtayo a naridam no masuottayo, ken kasanotayo a maaramid dayta?

1, 2. (a) Ania dagiti saludsod a tumaud maipapan iti kinaridam ni Jesus? (b) Makatulong kadi ti perpekto nga ulidan ni Jesus kadagiti imperpekto a tattao? Iyilustraryo.

MABALIN a maisaludsodmo: ‘Kabaelak kadi a tuladen ti kinaridam ni Jesus? Perpekto ngamin ni Jesus ken no dadduma, kabaelanna nga ammuen ti mapasamak uray pay rinibu a tawen sakbayna! Talaga kadi a kasapulanna ti agridam?’ (Mat. 24:37-39; Heb. 4:15) Pagsasaritaantayo nga umuna dagita a saludsod tapno maawatantayo no kasano kapateg ken kaganat ti agbalin a naridam.

² Makatulong kadi ti perpekto nga ulidan kadagiti imperpekto a tattao? Wen, gapu ta posible a makasursurotayo iti ulidan ti nalaing a mannursuro. Alaentayo a pagarigan ti maysa nga agsursuro nga agpana. Iti damo, mabalin a dina mapuntaan ti puntiriana isu a masapul nga ikagumaanna ti agtultuloy nga agsursuro ken agpraktis. Tapno lumaing, adalenna a naimbag ti pamay-an ti pumapana nga instruktorna. Siputanna no kasano ti panagtakder, posision dagiti takiag, ken panangiggem ti instruktorna iti parteng ti pana. In-inutton a masursuro ti determinado ken agdadamo nga agpana nga ikabilanganna ti angin ken no kasano kapigsa ti panangbennatna iti parteng. No itultuloyna ti agregget ken mangtulad iti instruktorna, mapuntaannanton ti puntiria. Umasping iti dayta, rumang-aytayo kas Kristiano no ikagumaantayo a suroten dagiti instruksion ni Jesus ken tuladen ti perpekto nga ulidanna.

3. (a) Kasano nga impakita ni Jesus a kasapulanna ti agridam? (b) Ania ti pagsasaritaantayo iti daytoy nga artikulo?

³ Ngem ti ngay kinaridam? Talaga kadi a kasapulan dayta ni Jesus? Wen. Kas pagarigan, iti rabii sakbay a natay, imparegtana kadagiti matalek nga apostolna: “Agtultuloykayo a makipagbantay kaniak.” Innayonna: “Agtultuloykayo nga agbantay ken agkararagkayo nga  agpatpatuloy, tapno saankayo a sumrek iti pannakasulisog.” (Mat. 26:38, 41) Nupay kanayon a naridam ni Jesus, nangnangruna a kayatna ti agridam ken agtalinaed a nasinged iti nailangitan nga Amana kadagidi a kritikal a tiempo. Ammona a masapul met a naridam dagiti pasurotna​—saan la nga idi no di ket iti pay masanguanan. Pagsasaritaantayo ngarud no apay a kayat ni Jesus nga agtalinaedtayo a naridam. Sa adalentayo ti tallo a pamay-an no kasano a matuladtayo ti kinaridam ni Jesus iti inaldaw a panagbiagtayo.

NO APAY A KAYAT NI JESUS A NARIDAMTAYO

4. Apay a masapul nga agtalinaedtayo a naridam?

⁴ Kayat ni Jesus nga agtalinaedtayo a naridam gapu iti bambanag nga ammotayo ken ditay ammo. Idi adda ni Jesus ditoy daga, ammona kadi ti amin a mapasamak iti masanguanan? Saan, ta sipapakumbaba nga inaminna: “Maipapan iti dayta nga aldaw ken oras awan ti asinoman a makaammo, uray dagiti anghel ti langlangit wenno uray ti Anak, no di laeng ti Ama.” (Mat. 24:36) Iti daydi a tiempo, “ti Anak” a ni Jesus dina ammo no kaano ti eksakto a panagpatingga daytoy dakes a lubong. Datayo met ngay? Ammotayo kadi ti amin a mapasamak iti masanguanan? Siempre, saan! Ditay ammo no kaano nga ibaon ni Jehova ti Anakna a mamagpatingga iti daytoy dakes a sistema ti bambanag. No ammotayo koma kasapulantayo pay kadi ti agtalinaed a naridam? Kinuna ni Jesus a kellaat ken di ninamnama ti aldaw nga iyaay ti panungpalan isu nga ad-adda a kasapulantayo ti agtalinaed a naridam.​—Basaen ti Mateo 24:43.

5, 6. (a) Kasano a matulongannatayo nga agbalin a naridam ti pannakaammotayo iti masanguanan ken kadagiti panggep ti Dios? (b) Apay a ti pannakaammotayo maipapan ken Satanas pagbalinennatayo nga ad-adda a determinado nga agridam?

⁵ Ngem adu ti ammo ni Jesus a nakaskasdaaw a bambanag maipapan iti masanguanan​—dagiti kinapudno a saan nga ammo ti kaaduan a tattao idi kaaldawanna. Saan a pumada ken Jesus ti pannakaammotayo, ngem gapu kenkuana, adu ti ammotayo maipapan iti Pagarian ti Dios ken iti itungpal dayta iti asidegen a masanguanan. Dagita a nagsayaat a kinapudno ket saan nga ammo ti kaaduan a makasarsaritatayo iti eskuelaan, pagtrabahuan, wenno iti teritoriatayo. Dayta ti maysa pay a rason nga agridamtayo. Kas ken Jesus, kanayon a kasapulantayo ti agbalin nga alerto kadagiti oportunidad a mangiranud iti pannakaammotayo maipapan iti Pagarian ti Dios. Ditay kayat a sayangen dagita a napateg nga oportunidad gapu ta agpegpeggad ti biag dagiti tattao!​—1 Tim. 4:16.

⁶ Adda sabali pay nga ammo ni Jesus a nakatulong iti panagtalinaedna a naridam. Ammona a determinado ni Satanas a mangsulisog, mangidadanes, ken mangdadael iti kinatarnawna. Daytoy dakes a kabusor ket kanayon nga agsapsapul iti “sabali pay a mainugot a tiempo” tapno masubokna ni Jesus. (Luc. 4:13) Gapuna, kanayon nga alerto ni Jesus. Kayatna a nakasagana iti aniaman a pannubok, sulisog man dayta, ibubusor, wenno pannakaidadanes. Saan kadi nga umasping met ken Jesus ti kasasaadtayo? Ammotayo a ni Satanas ket “kasla leon a ngumerngernger, nga agsapsapul iti alun-onenna.” Isu nga imparegta ti Sao ti Dios iti amin a Kristiano: “Agtalinaedkayo a sipupuot, managbantaykayo koma.” (1 Ped. 5:8) Ngem kasanotayo a maaramid dayta?

NO KASANO TI AGBALIN A NARIDAM ITI KARARAG

7, 8. Ania ti imbalakad ni Jesus maipapan iti kararag, ken ania ti inyulidanna?

⁷ Ipakita ti Biblia a dakkel ti pagnaigan ti kinaalerto, wenno kinaridam iti naespirituan, ken ti panagkararag. (Col. 4:2; 1 Ped. 4:7) Di nagbayag kalpasan a kiniddaw ni Jesus kadagiti pasurotna nga agtultuloyda  a makipagbantay kenkuana, kinunana: “Agtultuloykayo nga agbantay ken agkararagkayo nga agpatpatuloy, tapno saankayo a sumrek iti pannakasulisog.” (Mat. 26:41) Ibagbagana kadi nga agaplikar laeng dayta a balakad iti kritikal a kasasaad a pakaipaspasanguanda? Saan, ti balakadna ket maysa a prinsipio a masapul nga iyaplikartayo iti inaldaw.

⁸ Nagsayaat ti inyulidan ni Jesus maipapan iti panagkararag. Nalabit malagipmo a naminsan, nagpatnag a nagkararag iti Amana. Iladawanmo ti eksena. (Basaen ti Lucas 6:12, 13.) Nalabit napasamak dayta iti asideg ti pagkalapan nga ili ti Capernaum, a pagnanaedan ni Jesus iti rehion ti Galilea. Idi rumabiin, napan iti maysa kadagiti bantay a pakatannawaganna iti Baybay ti Galilea. Bayat a buybuyaenna ti sumipsipnget nga aglawlaw, nalabit nakitana dagiti rumimatrimat a silaw ti lampara iti Capernaum ken kadagiti kaabayna a purok. Ngem idi nagkararag ken Jehova, sipapasnek nga impamaysana dayta. Naglabas ti adu nga oras. Dinan nadlaw a saggaysa a maid-iddep dagiti silaw iti baba, wenno ti in-inut nga iraraniag ti bulan iti tangatang, wenno dagiti karasakas ti babassit nga animal iti kasamekan. Nalabit naipamaysa ti kararagna iti napateg a desision nga aramidenna​—ti panangpilina iti 12 nga apostolna. Mailadawantayo ti kinapasnek ni Jesus bayat nga iyeb-ebkasna ken Amana dagiti pampanunoten ken pakaseknanna maipapan iti tunggal adalanna ken naimpusuan a dumawdawat iti panangiwanwan ken sirib.

9. Ania ti masursurotayo iti nagpatnag a panagkararag ni Jesus?

⁹ Ania ti masursurotayo iti ulidan ni Jesus? Masapul kadi a mangbusbostayo iti adu nga oras nga agkararag? Saan, ta ammona ti limitasion dagiti pasurotna: “Ti espiritu, siempre, sigagagar, ngem ti lasag nakapuy.” (Mat. 26:41) Ngem matuladtayo ni Jesus. Kas pagarigan, agkararagtayo kadi nga umuna iti nailangitan nga Amatayo sakbay a mangaramidtayo iti aniaman a desision a mangapektar iti espiritualidadtayo, kasta met iti espiritualidad ti pamilia ken dagiti kapammatiantayo? Iramramantayo kadi dagiti kakabsattayo kadagiti kararagtayo? Naimpusuan kadi ti panagkararagtayo wenno ulit-ulitentayo laeng dagiti isu met la a sasao? Laglagipentayo met a napateg ken Jesus ti nasinged ken pribado a pannakisaritana iti Amana. Iti daytoy nakaok-okupado a lubong, naglakatayo laeng a malipatan ti kapatgan a banag. Naridridamtayo iti naespirituan no adu ti tiempotayo para iti napasnek ken pribado a panagkararag. (Mat. 6:6, 7) Ad-adda a sumingedtayo ken Jehova, magagarantayo a mangpatibker iti relasiontayo kenkuana, ken liklikantayo ti aniaman a mangdadael iti dayta.​—Sal. 25:14.

NO KASANO TI AGBALIN A NARIDAM ITI PANANGASABA

10. Ania a pagarigan ti mangipakita nga alerto ni Jesus kadagiti oportunidad a mangasaba?

¹⁰ Naridam ni Jesus iti trabaho nga inted kenkuana ni Jehova. Nalabit adda dagiti trabaho a mabalin nga agalla-alla ti panunot ti maysa bayat nga agtartrabaho ngem awan met ti dadakkel a problema nga ibungana. Ngem adu a trabaho ti agkasapulan iti konsentrasion ken kinaalerto. Kasta ti ministeriotayo kas Kristiano. Nakaal-alerto ni Jesus iti trabahona, a mangbirbirok kadagiti oportunidad a mangiranud iti naimbag a damag. Kas pagarigan, idi dimtengda kadagiti adalanna iti siudad ti Sicar kalpasan ti kagudua nga aldaw a pannagnada, napan gimmatang iti taraon dagiti adalanna. Nagbati ni Jesus iti asideg ti maysa a bubon ngem nagtalinaed nga alerto isu a nakakita iti gundaway a mangasaba idi adda Samaritana a sumakdo iti danum. Mabalin koma ni Jesus ti rumidep wenno agpambar tapno saan a makisarita. Ngem kinasabaanna ti babai isu  nga adu a tattao ti natulongan iti dayta a siudad. (Juan 4:4-26, 39-42) Mabalintayo kadi a tuladen ti kinaridam ni Jesus babaen ti panagbalintayo nga ad-adda nga alerto kadagiti oportunidad tapno makasabaantayo dagiti tattao a makasaritatayo iti inaldaw?

11, 12. (a) Ania ti imbaga ni Jesus kadagiti nangikagumaan a mangsinga kenkuana iti trabahona? (b) Kasano nga impakita ni Jesus ti kinabalanse iti trabahona?

¹¹ No dadduma, ikagumaan dagiti nasayaat ti motiboda a tattao a singaen ni Jesus iti trabahona. Kas pagarigan, kayat dagiti taga-Capernaum nga agtalinaed sadiay ni Jesus gapu iti simimilagro a panangpaimbagna kadagiti masakit. Maawatantayo ti riknada. Ngem mision ni Jesus a kasabaan ti amin a “napukaw a karnero iti balay ti Israel,” saan laeng a dagidiay adda iti maysa a siudad. (Mat. 15:24) Isu a kinunana kadakuada: “Kasta met nga iti sabsabali a siudad masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Luc. 4:40-44) Nalawag a naipamaysa ti biag ni Jesus iti ministeriona. Dina impalubos nga adda mangsinga kenkuana.

¹² Ti kadi panangipamaysa ni Jesus iti trabahona ipakitana nga isu ket panatiko wenno napaidam iti bagina? Wenno okupado kadi unay iti ministeriona isu a dinan ammo ti kasapulan dagiti pamilia? Saan. Perpekto ti ulidan ni Jesus mainaig iti kinabalanse. Nagragragsak met a kadua dagiti gagayyemna. Ipatpategna dagiti pamilia, natarusanna dagiti problema ken kasapulanda, ken nadungngo kadagiti ubbing.​—Basaen ti Marcos 10:13-16.

13. Kasanotayo a matulad ti kinaridam ken kinabalanse ni Jesus maipapan iti trabahotayo a panangikasaba iti Pagarian?

¹³ Bayat a tultuladentayo ti kinaridam ni Jesus, kasanotayo a matulad ti kinabalansena? Ditay ipalubos a singaennatayo daytoy a lubong iti trabahotayo. Uray dagiti nasayaat ti motiboda a gagayyem ken kakabagiantayo mabalin nga ibagada a kissayantayo ti panawentayo iti ministerio wenno agbiagtayo kas iti ibilangda a normal a biag. Ngem no tuladentayo ni Jesus, ibilangtayo kas taraon ti ministeriotayo. (Juan 4:34) Makaparagsak ti trabahotayo ken pabilgenna ti espiritualidadtayo. Ngem ditay kayat ti agbalin a panatiko, aginlilinteg, wenno napaidam iti bagitayo. Kas ken Jesus, kayattayo ti agbalin a naragsak ken balanse nga adipen ti “naragsak a Dios.”​—1 Tim. 1:11.

NO KASANO TI AGBALIN A NARIDAM NO MAIPASANGO ITI SUOT

14. No masuottayo, ania ti nasken a liklikantayo, ken apay?

¹⁴ Kas nakitatayon, ad-adda nga imbalakad ni Jesus ti panagtalinaed a naridam idi nagpasar iti nakaro a suot. (Basaen ti Marcos 14:37.) Ad-adda met a masapul nga agridamtayo no agpasartayo kadagiti pakarigatan. No masuot ti adu, masansan a malipatanda ti nagpateg a kinapudno a namindua a dinakamat ti libro a Proverbio: “Adda dalan a nalinteg iti sanguanan ti maysa a tao, ngem dagiti dalan ni patay isuda  ti tungpal dayta kalpasanna.” (Prov. 14:12; 16:25) No agpannuraytayo iti kapanunotantayo, nangruna no maipasangotayo kadagiti nadagsen a problema, irisrisgotayo ti biagtayo ken dagiti ipatpategtayo.

15. Gapu iti kinarigat ti biag, ania a sulisog ti mabalin a pakaipasanguan ti ulo ti pamilia?

¹⁵ Kas pagarigan, baka marigatan ti ulo ti pamilia a mangipaay iti material a kasapulan “dagidiay kukuana.” (1 Tim. 5:8) Mabalin a masulisog a mangawat iti trabaho a pakaigapuan ti masansan a dina pannakigimong, panangidaulo iti panagdaydayaw ti pamiliana, wenno pannakiramanna iti ministerio. No agpannuray laeng iti kapanunotanna, kasla nainkalintegan ken umiso ti desisionna. Ngem mabalin nga agresulta dayta iti panagsakit ken ipapatay iti naespirituan. Nasaysayaat a suroten ti balakad ni Solomon iti Proverbio 3:5, 6: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.”

16. (a) Ania ti masursurotayo iti ulidan ni Jesus a panagtalek iti sirib ni Jehova? (b) Kasano a tultuladen ti adu nga ulo ti pamilia ti ulidan ni Jesus a panagtalek ken Jehova kadagiti narigat a kasasaad?

¹⁶ Idi nasuot ni Jesus, pulos a di nagtalek iti bukodna a pannakaawat. Panunotem dayta! Ti kasisiriban a tao a nagbiag ditoy daga saan a nagpannuray iti bukodna a sirib. Kas pagarigan, idi sinulisog ni Satanas, maulit-ulit nga insungbat ni Jesus: “Adda a naisurat.” (Mat. 4:4, 7, 10) Saan a kas ken Satanas a natangsit, sipapakumbaba a nagtalek ni Jesus iti sirib ni Amana tapno malabananna ti sulisog. Kastatay met kadi? Ti ulo ti pamilia a mangtultulad iti kinaridam ni Jesus ket agpaiwanwan iti Sao ti Dios, nangruna kadagiti narigat a kasasaad. Iti intero a lubong, rinibu nga ulo ti pamilia ti mangar-aramid iti dayta. Determinadoda a mangyun-una iti Pagarian ti Dios ken iti pudno a panagdayaw imbes a kadagiti material a bambanag. Iti kasta, ay-aywananda a naimbag ti pamiliada. Bembendisionan ni Jehova ti panagreggetda a mangipaay iti material a kasapulan ti pamiliada, kas inkari ti Biblia.​—Mat. 6:33.

17. Apay a kayatmo a tuladen ti kinaridam ni Jesus?

¹⁷ Awan duadua a ni Jesus ti kasayaatan nga ulidan iti kinaridam. Praktikal, makagunggona, ken makaispal-biag ti ulidanna. Laglagipem a kayat ni Satanas a maturogka iti naespirituan, kumapuy ti pammatim, mapukaw ti regtam nga agdayaw ken Jehova, ken madadael ti kinatarnawmo. (1 Tes. 5:6) Dimo ipalubos nga agballigi! Kas ken Jesus, agtalinaedka a naridam iti panagkararag, ministerio, ken iti panangsangom kadagiti pakasuotan. Iti kasta, maaddaanka iti nabunga, naragsak, ken makapnek a biag uray iti daytoy agngangabiten a sistema ti bambanag. No naridamka, masiguradom nga inton dumteng ti Apom a mamagpatingga iti daytoy a sistema, madanonannaka nga alerto ken aktibo a mangar-aramid iti pagayatan ni Amana. Maragsakan la ketdi ni Jehova a mangbendision iti kinamatalekmo!​—Apoc. 16:15.

[Salsaludsod]

[Ladawan iti panid 6]

Kinasabaan ni Jesus ti babai iti abay ti bubon. Mangbirbirokka kadi kadagiti oportunidad a mangasaba iti inaldaw?

[Ladawan iti panid 7]

Naridamka no ipapaaymo ti naespirituan a kasapulan ti pamiliam