1. (a) Ania dagiti kualidad ni Jehova a mabalin nga usigen ti maysa a Kristiano? (b) Kasanotayo a magunggonaan iti panangusigtayo kadagiti kualidad ti Dios?

ANIA dagiti malagipmo a kualidad no pampanunotem ni Jehova? Mabalin nga adu ti mangibaga kadatayo iti ayat, kinahustisia, sirib, ken pannakabalin. Ngem ammotayo nga adu pay ti nagsasayaat a kualidad ni Jehova. Kinapudnona, nasurok nga 40 a nagduduma a kualidad ni Jehova ti nailawlawagen kadagiti publikasiontayo. Panunotem laengen ti kaadu ti masursurotayo no usigentayo ti tunggal maysa kadagitoy iti personal wenno sangapamiliaan a panagadal iti Biblia! Kasanotayo a magunggonaan iti kasta a panagadal? Umuneg ti panangtagipategtayo iti nailangitan nga Amatayo. Kas resultana, ad-adda a tarigagayantayo a tuladen ni Jehova ken agbalin a nasingsinged kenkuana.—Jos. 23:8; Sal. 73:28.

2. (a) Ilawlawagmo no kasano a mapauneg ti panangtagipategtayo kadagiti kualidad ni Jehova. (b) Ania dagiti mausig kadagitoy tallo nga agsasaruno nga artikulo?

² Ngem ania ti kayat a sawen ti “panangtagipateg” iti maysa a banag? Iti daytoy nga artikulo, tumukoy dayta iti panangbigbig iti pudpudno a pateg ti maysa a banag. Mabalin nga in-inut nga umuneg ti panangipateg wenno panangapresiartayo iti dayta. Kas pagarigan, ad-adda a matagipateg wenno magustuantayo ti raman ti maysa a putahe no umuna a say-upen, ramanan, ken sursuruentayo a lutuen dayta. Umasping iti dayta, mapaunegtayo ti panangtagipategtayo iti maysa a kualidad ni Jehova bayat nga adalen, mennamennaen, ken tuladentayo dayta. (Efe. 5:1) Panggep daytoy nga artikulo ken ti sumaruno a dua nga artikulo a paunegen ti panangipategtayo kadagiti kualidad ti Dios a saan unay a pamiliar kadatayo no idilig kadagiti kangrunaan a kualidadna. Bayat a maus-usig ti tunggal kualidad, sungbatantayo dagitoy a saludsod: Ania ti kaipapanan daytoy a kualidad? Kasano nga ipakpakita daytoy ni Jehova? Ken kasano a  matuladtayo ni Jehova iti panangipakitana iti dayta?

3, 4. (a) Kasanom a deskribiren ti maysa a nalaka a maas-asitgan? (b) Kasano nga ipaspasigurado ni Jehova nga isu ket nalaka a maas-asitgan?

³ Unaentayo ti kualidadna a nalaka a maas-asitgan. Kasanom a deskribiren ti indibidual a nalaka a maas-asitgan? Mabalin a kunaem, ‘Isu ket naayat, madadaan a tumulong, ken nalaka a kasarsarita.’ Masansan a mailasinmo ti tao a nalaka a maas-asitgan babaen iti panagsasao ken tigtignayna wenno iti ekspresion ti rupana.

⁴ Kasano nga ipakpakita ni Jehova ti kinalakana a maas-asitgan? Nupay isu ti Mannakabalin-amin ken Namarsua iti nakalawlawa nga unibersotayo, ipanamnama ni Jehova a madadaan nga umimdeng ken sumungbat kadagiti kararagtayo. (Basaen ti Salmo 145:18; Isaias 30:18, 19.) Mabalintay ti makisarita iti Dios iti mabayag, iti aniaman nga oras ken lugar. Nawayatayo a mangibaga iti aniaman a pakaseknantayo ken saannatayo a pulos umsien gapu iti dayta. (Sal. 65:2; Sant. 1:5) Iti Biblia, nailadawan ni Jehova iti wagas a maawatantayo tapno maipakita a kayatna nga umadanitayo kenkuana. Kas pagarigan, kinuna ni salmista David a “dagiti mata ni Jehova situturongda” kadatayo ken ‘ti makannawan nga imana agtultuloy a mangiggem a siiirut’ kadatayo. (Sal. 34:15; 63:8) Inyarig ni propeta Isaias ni Jehova iti maysa a pastor: “Babaen ti takiagna ummongennanto a sangsangkamaysa dagiti kordero; ket iti barukongna awitennanto ida.” (Isa. 40:11) Agasem! Kayat ni Jehova a mayasidegtay kenkuana kas iti masaksakruy a kordero iti barukong ti naayat a pastor. Anian a nagsayaat nga asitgan ti Amatayo! Kasanotayo a matulad ni Jehova?

5. Apay a nakapatpateg kadagiti panglakayen ti panagbalin a nalaka a maas-asitgan?

⁵ Iti saan pay unay nabayag, naisaludsod kadagiti nareregta a Saksi iti nadumaduma a kontinente, “Ania ti magusgustuam unay a kualidad ti maysa a panglakayen?” Kaaduan  kadakuada ti nagkuna, “Ti kinalakana a maas-asitgan.” Agpayso a kasapulan a patanoren ken parayrayen ti tunggal Kristiano dayta a kualidad, ngem nangnangruna koma kadagiti panglakayen. (Isa. 32:1, 2) Inlawlawag ti maysa a kabsat a babai no apay a napateg kenkuana daytoy a kualidad: “Maapresiarmo ti dadduma pay a kualidad ti maysa a panglakayen no isu ket nalaka a maas-asitgan.” Sigurado nga umanamongka iti dayta. Ngem kasano nga agbalin a nalaka a maas-asitgan ti maysa a tao?

6. Ania ti maysa a tulbek iti panagbalin a nalaka a maas-asitgan?

⁶ Ti maysa a tulbek iti panagbalin a nalaka a maas-asitgan ket ti panangipakita iti pudpudno a pannakaseknan iti sabsabali. No maseknan ken madadaan a tumulong ti maysa a panglakayen, marikna dagiti kakabsat agraman dagiti ubbing a komportableda nga umasideg kenkuana. (Mar. 10:13-16) Kuna ti 12 anyos a ni Carlos: “Makitkitak idiay Kingdom Hall dagiti nakaisem ken naayat a panglakayen, ket dayta ti magusgustuak kadakuada.” Siempre, saan laeng nga umdas nga ibaga ti maysa a panglakayen a sidadaan a dumngeg ken tumulong. Masapul nga ipakitana dayta. (1 Juan 3:18) Kasano?

7. Apay a masansan a saan a bumdeng dagiti tattao a makisarita kadatayo no makitada dagiti badge-tayo, ken ania ti maadaltayo iti dayta?

⁷ Panunotem daytoy: Iti nabiit pay, adda maysa a kabsat a lalaki a naka-badge card a nakalugan iti eroplano nga agawiden manipud pannakikombensionna iti sabali a pagilian. Idi nakita ti flight attendant ti sasao nga “Umay Koma ti Pagarian ti Dios!” a naisurat iti badge, kinunana iti kabsat, “Wen, sapay koma. Interesadoak man iti dayta.” Nagsaritaanda dayta idi agangay, ket immawat ti attendant kadagiti magasintayo. Adu kadatayo ti addaan iti kasta a kapadasan. Apay ngata nga alisto a mairugi ti saritaan gapu iti badge-tayo? Kasla ngamin ibagbagana kadagiti tattao, “Dika koma mabain nga umasideg. Damagem laeng no papanak.” Ti badge ket maysa a pagilasinan a mangipakita kadagiti tattao a kayattayo nga iranud dagiti patpatientayo. Iti umasping a pamay-an, kayat met dagiti panglakayen ti mangipakita iti nalawag a pagilasinan a madadaanda a makisarita kadagiti kakabsat. Ania dagita a pagilasinan?

8. Kasano a maiparikna dagiti panglakayen a pudpudno a maseknanda iti sabsabali, ken ania ti epekto dayta kadagiti kakabsat?

⁸ Nagduduma ti kostumbre iti nadumaduma a lugar, ngem maipariknatayo a pudpudno a maseknantayo kadagiti kakabsat no umisemtayo, makialamano, ken kablaawantayo ida. Asino koma ti umuna a mangaramid kadagita? Panunotentayo ti ulidan ni Jesus. Insalaysay ni Mateo nga iti maysa a pannakitaripnong ni Jesus kadagiti adalanna, ‘immasideg ket nagsao kadakuada.’ (Mat. 28:18) Dagiti met koma panglakayen ti umuna nga umasideg ken makisarita kadagiti kakabsat. Ania ngata ti marikna dagiti kakabsat no kasta ti makitada iti uneg ti kongregasion? Kuna ti maysa nga 88 anyos a payunir a babai: “Magusgustuak dagiti panglakayen gapu iti nainggayyeman nga isem ken makapabileg a kablaawda no sumangpetak idiay Kingdom Hall.” Sabali pay a matalek a kabsat a babai ti nagkuna: “Kasla bassit la a banag no umisem ken kablaawannaka ti maysa a panglakayen iti gimong, ngem nagdakkel a banag dayta para kaniak.”

9, 10. (a) Ania a nasayaat nga ulidan ti impakita ni Jehova? (b) Kasano a maipakita dagiti panglakayen a sisasaganada a tumulong iti sabsabali?

 ⁹ Siempre, bumdeng dagiti kakabsat nga umasideg no madlawda nga awan panawentayo kadakuada. Nangipakita ni Jehova iti nasayaat nga ulidan mainaig iti dayta. Isu ket “saan nga adayo iti tunggal maysa kadatayo.” (Ara. 17:27) Ti maysa a pamay-an a sidadaan a tumulong dagiti panglakayen ket babaen ti panangiwayada iti tiempo sakbay ken  kalpasan dagiti gimong tapno makasaritada dagiti kakabsat—ubbing man wenno natataengan. Kinuna ti maysa a payunir a kabsat a lalaki: “Mariknak a maap-apresiar ti maar-aramidak no komustaennak ti maysa a panglakayen sa denggenna ti ibagak.” Inkomento ti maysa a kabsat a babai nga agserserbin ken Jehova iti gistay 50 a tawen: “Mariknak a napategak gapu ta iwaywayaan dagiti panglakayen ti makisarita kaniak.”

¹⁰ Siempre, adu ti annongen dagiti Kristiano a panglakayen. Ngem kadagiti gimong, pagbalinenda koma a kalat ti makisarita kadagiti kakabsat.

11, 12. (a) Ania ti ramanen ti saan a panangidumduma? (b) Kasano nga inyulidan ni Jehova ti saan a panangidumduma?

¹¹ Ti sabali pay a nagsayaat a kualidad ni Jehova ket ti di panangidumduma. Ania ti ramanen dayta? Isu ti panagbalin a patas, awan idaddadumana wenno awan pabpaboranna. Adda dua a saklawen ti pudpudno a di panangidumduma: ti panangmatmat ken tigtignay. Apay nga agpada a kasapulan dagita? Gapu ta no addaan ti maysa iti di mangidumduma a panangmatmat, matignay met a mangtrato iti amin buyogen ti di panangidumduma. Iti Kristiano a Griego a Kasuratan, ti ebkas a “saan a mangidumduma” literal a kaipapananna ti saan a “kumitkita kadagiti rupa,” kayatna a sawen, awan rupa a pabpaboranna. (Ara. 10:34; Kingdom Interlinear) Gapuna, ti maysa a di mangidumduma ikabilanganna, saan a ti makinruar a langa wenno kasasaad ti maysa nga indibidual, no di ket ti kababalin dayta.

¹² Ni Jehova ti kangrunaan nga ulidan ti di panangidumduma. Kuna ti Saona a “saan a mangidumduma” ken “awan tratuenna buyogen ti panangidumduma.” (Basaen ti Aramid 10:34, 35; Deuteronomio 10:17.) Naipakita dayta iti maysa a pasamak idi kaaldawan ni Moises.

13, 14. (a) Ania ti situasion ti lima a babbalasang ni Zelofehad? (b) Kasano nga impakita ni Jehova a di mangidumduma?

 ¹³ Sakbay unay ti iseserrek dagiti Israelita iti Naikari a Daga, adda parikut ti lima nga agkakabsat a babbalasang. Ania dayta? Ammoda nga umawat ti pamiliada iti bingay a daga a nailatang ken amada, kas iti dadduma a pamilia nga Israelita. (Num. 26:52-55) Ngem natay nga awanan iti anak a lalaki ti amada a ni Zelofehad, a maysa a kameng ti tribu ni Manases. Sigun iti Linteg, dagiti laeng annak a lallaki ti addaan iti kalintegan nga agtawid iti daga. (Num. 26:33) Ngem gapu ta awan ti anak a lalaki a mangala iti tawid ti pamilia, maited kadi ti daga kadagiti kakabagianda ket mabaybay-an nga awanan iti tawid dagiti annak a babbai?

¹⁴ Dagitoy a lima nga agkakabsat immasidegda ken Moises ket insaludsodda: “Apay koma a maikkat ti nagan ni amami iti tengnga ti pamiliana agsipud ta awanan anak a lalaki?” Impakaasida: “O ikkannakami iti sanikua iti tengnga ti kakabsat ni amami.”  Kinuna kadi ni Moises, ‘Saan a mabalin ta saan a kasta ti linteg’? Saan, “indatag[na] ti kasoda iti sanguanan ni Jehova.” (Num. 27:2-5) Ania ti sungbat ni Jehova? Imbagana ken Moises: “Umiso ti sasawen ti annak a babbai ni Zelofehad. Di bumurong nga itedmo kadakuada ti panagtagikua iti maysa a tawid iti tengnga ti kakabsat ni amada, ket masapul nga iyallawatmo kadakuada ti tawid ni amada.” Kinunana pay ken Moises nga inayonna daytoy iti Linteg: “No kas pagarigan ti maysa a lalaki matay nga awanan anak a lalaki, masapul ngarud nga iyallawatyo ti tawidna iti anakna a babai.” (Num. 27:6-8; Jos. 17:1-6) Sipud idin, maipaayanen iti tawid ti amin nga Israelita a babbai a kasta ti kasasaadda.

15. (a) Kasano ti panangtrato ni Jehova kadagiti adipenna, nangnangruna dagidiay nakakaasi? (b) Ania pay a salaysay iti Biblia ti mangipakita a di mangidumduma ni Jehova?

¹⁵ Pudno a naasi ken di mangidumduma dayta a desision! Trinato ni Jehova buyogen iti dignidad dagitoy a nakakaasi a babbai, kas iti panangtratona iti dadduma pay nga Israelita. (Sal. 68:5) Maysa laeng dayta kadagiti adu a salaysay iti Biblia a mangipakita iti daytoy a makaliwliwa a kinapudno: Tratuen ni Jehova ti amin nga adipenna nga awan idumdumana.—1 Sam. 16:1-13; Ara. 10:30-35, 44-48.

16. Kasanotayo nga agbalin a di mangidumduma ken agtultuloy a kasta?

¹⁶ Kasanotayo a matulad ti di panangidumduma ni Jehova? Laglagipentay koma nga adda dua a saklawen ti di panangidumduma. Satay la matrato ti sabsabali buyogen ti di panangidumduma no bigbigentayo a masapul a kasta ti pannakatrato ti tunggal maysa. Nalaka nga ibaga a ditay mangidumduma. Ngem nalabit umanamongka a narigat a maammuan no dadduma ti pudno a panagriknatayo iti sabsabali. Ania ngarud ti aramidentayo tapno maammuantayo no talaga a ditay mangidumduma? Idi kayat a maammuan ni Jesus ti ibagbaga dagiti tattao maipapan kenkuana, dinamagna dagiti pagtaltalkanna a gagayyem: “Siasino ti Anak ti tao sigun iti panagkuna dagiti tattao?” (Mat. 16:13, 14) Apay a dimo tuladen ti kasta nga inaramid ni Jesus? Mabalinmo a kiddawen iti maysa a pagtaltalkam a gayyem nga ibagana no talaga met laeng a saanka a mangidumduma. No ibagana a medio mangidumdumaka gapu iti puli, kasasaad iti kagimongan, wenno kasasaad ti panagbiag, ania ti masapul nga aramidem? Sipapasnek nga ikararagmo ken Jehova ti rikriknam, nga ipakaasim a tulongannaka a mangpasayaat iti kababalinmo tapno naan-anay a mayanninawmo ti dina panangidumduma.—Mat. 7:7; Col. 3:10, 11.

17. Ania ti dadduma a pamay-an a matratotayo ti sabsabali buyogen ti di panangidumduma?

 ¹⁷ Iti kongregasion Kristiano, ipakpakitatayo ti tarigagaytayo a mangtulad iti di panangidumduma ni Jehova no tratuentayo ti amin a kakabsat buyogen iti dignidad ken naayat a kinamanangngaasi. Kas pagarigan, mainaig iti panagpadagus, kayattayo nga imbitaran ti amin, pakairamanan dagidiay naiduma ti kulturada kasta met dagidiay napanglaw, ulila, wenno balo. (Basaen ti Galacia 2:10; Santiago 1:27.) Iti panangikasaba iti Pagarian, iranranudtayo met ti naimbag a damag, a kasabaantayo ti amin a kita ti tattao aniaman ti kultura wenno naggapuanda a pagilian. Makaparagsak ta magun-odantayo dagiti literatura ti Biblia iti agarup 600 a lengguahe. Anian a nagsayaat a pammaneknek a saantayo a mangidumduma!

18. Kasanom a maipakita a tagtagipatgem ti kinalaka ni Jehova a maas-asitgan ken ti dina panangidumduma?

¹⁸ Wen, bayat a mennamennaentayo ti kinalaka a maas-asitgan ni Jehova ken ti dina panangidumduma, ad-adda nga umuneg ti apresasiontayo kenkuana. Dayta met ti mangtignay kadatayo nga agregget a mangtulad kadagiti kualidadna iti pannakilangentayo kadagiti kapammatiantayo ken kadagidiay makasabaantayo.