Ti propeta ti Dios a ni Eliseo ket an-anupen ti ari ti Siria. Naammuanna nga adda iti nabakudan a siudad ti Dotan iti tapaw ti maysa a turod. Bayat ti rabii, nangibaon idiay Dotan kadagiti soldado a nakasakay kadagiti kabalio ken karuahe. Agbannawagen idi asidegdan iti siudad.—2 Ar. 6:13, 14.

Idi bimmangon ken rimmuar ti katulongan ni Eliseo, nakitana dagiti umay mangtiliw iti propeta. “Ay, apok! Ania ti aramidentayo?” inyikkisna. “Dika agbuteng,” kinuna ni Eliseo, “ta ad-adu ti kakaduatayo ngem dagidiay kakaduada.” Iti kasta, inkararag ti propeta: “O Jehova, luktam dagiti matana, pangngaasim, tapno makitana.” Intuloy a kinuna ti salaysay: “Dagus a linuktan ni Jehova dagiti mata ti katulongan, iti kasta nakitana; ket, adtoy! ti nakabambantay a rehion napno iti kabkabalio ken pakigubat a karkaruahe nga apuy iti intero nga aglikmut ni Eliseo.” (2 Ar. 6:15-17) Ania ti maadaltayo iti daytoy a salaysay ken iti dadduma a pasamak iti biag ni Eliseo?

Kalmado ni Eliseo uray laklakuben idan dagiti Sirio gapu ta agtalek ken Jehova ken nakitana nga agtigtignay ti nabileg a pannalaknib ti Dios. Nupay saantayo a namnamaen ita nga agaramid ni Jehova iti milagro, ammotayo a salsalaknibanna ti ilina kas maysa a grupo. Arigna napalawlawantayo kadagiti gumilgil-ayab a kabkabalio ken karkaruahe. No ‘makitatayo’ dagita babaen iti matmata ti pammatitayo ken kanayon nga agpannuraytayo iti Dios, ‘agnaedtayto iti kinatalged’ ken bendisionannatayo ni Jehova. (Sal. 4:8) Usigentayo no kasano a mabenepisiarantayo iti dadduma pay a pasamak iti biag ni Eliseo.

Iti naminsan, bayat nga agar-arado ni Eliseo, immasideg ni propeta Elias ken impalladawna kenkuana ti opisial a kawesna. Ammo ni Eliseo ti kaipapanan dayta, ket nangangay iti padaya, nagpakada kadagiti nagannakna, sa pimmanaw iti pagtaenganda tapno agserbi kas katulongan ni Elias. (1 Ar. 19:16, 19-21) Gapu ta sidadaan ni Eliseo nga agserbi iti Dios iti amin a kabaelanna, inaramat ni Jehova ket idi agangay, sinunuanna ni Elias kas propeta.

Nalabit innem a tawen a nagserbi ni Eliseo kas katulongan ni Elias. Kabayatan dayta a tiempo, ni Eliseo ti  ‘mangibukbok iti danum iti im-ima ni Elias.’ (2 Ar. 3:11) Kadagidi nga aldaw, gagangay nga agkammet a mangan dagiti tattao a dida agusar iti tinidor, kutsara, kutsilio, wenno dadduma pay a kubiertos. Kalpasan ti pannangan, ti adipen ti mangibukbok iti danum a pangbuggo ti apona iti im-imana. Isu a nanumo laeng ti dadduma nga annongen ni Eliseo. Ngem imbilangna a pribilehio ti agserbi kas katulongan ni Elias.

Adu a Kristiano ita ti simrek met iti nadumaduma a kita ti amin-tiempo a panagserbi. Natignayda a mangaramid iti dayta gapu iti pammati ken tarigagayda a mangusar a naan-anay iti pigsada nga agserbi ken Jehova. Ti dadduma nga annongen a maited kadakuada kalikagumanna a panawanda ti pagtaenganda ket agtrabahoda—iti Bethel, konstruksion, ken dadduma pay—a matmatan ti adu kas nanumo laeng a trabaho. Ngem saan koma a kasta ti panangmatmat dagiti pudno a Kristiano, gapu ta nakapatpateg dagita nga aramid iti imatang ni Jehova.—Heb. 6:10.

Sakbay a ti Dios ‘impangatona ni Elias iti langlangit babaen iti maysa nga allawig,’ imbaonna ti propeta manipud Gilgal a mapan idiay Bethel. Insingasing ni Elias nga agbati laengen ni Eliseo, ngem kinuna ni Eliseo: “Saankanto a panawan.” Bayat a magmagnada, namindua pay nga imbaga ni Elias nga agbati lattan ni Eliseo ngem simmurot latta. (2 Ar. 2:1-6) Saan a kayat a panawan ni Eliseo ni Elias, a kas met idi ken Ruth iti katuganganna a ni Noemi. (Ruth 1:8, 16, 17) Apay? Agsipud ta nakapatpateg kenkuana ti inted-Dios a pribilehiona nga agserbi ken Elias.

Nagsayaat nga ulidan ni Eliseo para kadatayo. No maipaayantayo iti pribilehio iti organisasion ti Dios, matagipategtayo dayta no laglagipentayo a ni Jehova ti pagserserbiantayo. Awanen ti dakdakkel pay a dayaw ngem iti dayta.—Sal. 65:4; 84:10.

Bayat a magmagnada nga agturong idiay Bethel, kinuna ni Elias ken Eliseo: “Kiddawem no ania ti rebbeng nga aramidek maipaay kenka sakbay a maalaak kenka.” Kas ken Solomon, naespirituan a bambanag ti kiniddaw ni Eliseo. Kinunana nga ‘umay koma kenkuana ti dua a kapaset iti espiritu ni Elias.’ (1 Ar. 3:5, 9; 2 Ar. 2:9) Iti Israel, ti inauna nga anak a lalaki ket umawat iti dua a kapaset ti tawid. (Deut. 21:15-17) No kasta, nagkiddaw ni Eliseo iti naespirituan a tawid manipud ken Elias. Maysa pay, nabatad a kayatna ti agbalin a natured kas ken Elias, a “naan-anay nga agimon maipaay ken Jehova.”—1 Ar. 19:13, 14.

Ania ti reaksion ni Elias iti kiddaw ti katulonganna? “Nakarigrigat a banag ti kiniddawmo,” kinuna ti propeta. “No makitanak inton maalaak kenka, mapasamakto kenka ti kasta; ngem no saannak a makita, saanto a mapasamak dayta.” (2 Ar. 2:10) Adda dua a banag a maadaltayo iti sungbat ni Elias. Umuna, ti laeng Dios ti makaikeddeng no patganna ti kiddaw ni Eliseo. Maikadua, tapno mapatgan ti kiddaw ni Eliseo, masapul a dina pampanawan ni Elias, aniaman ti mapasamak.

Patgan ngata ti Dios ti kiddaw ni Eliseo a maipaay kenkuana ti dua a kapaset iti espiritu ni Elias? Kuna ti salaysay: “Bayat a magmagnada [ken agsarsaritada], ay ket, adtoy! [adda] maysa a gumilgil-ayab a karuahe a pakigubat ken gumilgil-ayab a kabkabalio, ket pinagsinada ida a dua; ket ni Elias nagpangato iti allawig nga agturong iti langlangit. Kabayatanna . . . kitkitaen idi ni Eliseo dayta.” * Dayta ti sungbat ni Jehova iti kiddaw ni Eliseo. Nakita ni Eliseo ti pannakaipanaw kenkuana ni Elias, immawat iti dua a kapaset iti espiritu ni Elias, ken isu ti simmaruno a propeta ti Dios.—2 Ar. 2:11-14.

Pinidut ni Eliseo ti opisial a kawes nga intinnag ni Elias sana inkagay dayta. Dayta a kawes ti mangipabigbig itan ken Eliseo kas propeta ti Dios. Ti kanayonan a pammaneknek a nadutokan kas propeta ket idi simimilagro a binisngayna ti Karayan Jordan.

Nagdakkel ti epektona ken Eliseo ti pannakakitana iti pannakaipangato ni Elias iti allawig. Siempre, karkarna no makakitatayo iti gumilgil-ayab a karuahe a pakigubat ken gumilgil-ayab a kabkabalio! Dagita ket pammaneknek laeng a pinatgan ni Jehova ti kiddaw ni Eliseo. No sungbatan ti Dios dagiti kararagtayo, saan a masapul a makakitatayo iti umap-apuy a karuahe a pakigubat ken gumilgil-ayab a kabkabalio. Ngem ammotayo nga us-usaren ti Dios ti nabileg a pannakabalinna tapno maitungpal ti pagayatanna. Ken no makitatayo a bembendisionan ni Jehova ti naindagaan a paset ti organisasionna, arigna a ‘makitkitatayo’ ti umab-abante a nailangitan a karuahena.—Ezeq. 10:9-13.

 Gapu iti adu a kapadasan ni Eliseo, kombinsido a nakabilbileg ti pannakabalin ni Jehova. Kinapudnona, iti tulong ti nasantuan nga espiritu ti Dios, nakaaramid ni Eliseo iti 16 a milagro—mamindua nga ad-adu ngem iti inaramid ni Elias. * Ti maikadua a gundaway a nakakita ni Eliseo iti gumilgil-ayab a kabkabalio ken karkaruahe a pakigubat ket idi malaklakub ti siudad ti Dotan, kas nailadawan iti rugi daytoy nga artikulo.

Nagtalinaed a kalmado ni Eliseo uray laklakuben dagiti kabusor ti siudad ti Dotan. Apay? Gapu ta nabileg ti pammatina ken Jehova. Kasapulantay met ti kasta a pammati. Ikararagtayo ngarud ti nasantuan nga espiritu ti Dios tapno maaddaantayo iti nabileg a pammati ken dadduma pay nga aspeto ti bunga ti espiritu.—Luc. 11:13; Gal. 5:22, 23.

Gapu iti napasamak idiay Dotan, adda panggapuan ni Eliseo nga agtalek ken Jehova ken iti di makita a buyotna a mangipapaay iti pannalaknib. Nabigbig ti propeta a nangibaon ti Dios kadagiti anghelna tapno palikmutanda ti siudad ken dagiti rimmaut a kabusor. Simimilagro nga inispal ti Dios ni Eliseo ken ti katulonganna babaen ti panangbulsekna kadagiti kabusor. (2 Ar. 6:17-23) Iti dayta a napeggad a kasasaad, kas iti dadduma pay a pasamak, impakita ni Eliseo ti nabileg a pammatina ken ti naan-anay a panagtalekna ken Jehova.

Kas ken Eliseo, agtalektayo koma ken Jehova a Dios. (Prov. 3:5, 6) No kasta ti aramidentayo, “ti met laeng Dios ipaayannatayto iti parabur ket bendisionannatayo.” (Sal. 67:1) Pudno a saantay a literal a napalikmutan iti gumilgil-ayab a karkaruahe ken kabkabalio. Ngem iti um-umay a “dakkel a rigat,” salaknibannatayto ni Jehova kas grupo a mangbukel iti maysa a sangalubongan a panagkakabsat. (Mat. 24:21; Apoc. 7:9, 14) Kabayatanna, kanayon koma a laglagipentayo a “ti Dios ket kamang maipaay kadatayo.”—Sal. 62:8.