Ti makapainteres a silent film a napauluan iti A Trip Down Market Street ipakitana kadagiti agbuybuya ti kasasaad ti biag iti San Francisco, U.S.A., idi apagtapog ti maika-20 a siglo. Dagiti nagaramid iti dayta a film nangiplastarda iti manomano a kamera iti sango ti agtartaray a cable car ket in-video-da ti mapaspasamak iti maysa nga okupado a kalsada. Karaman iti film dagiti kalesa ken kareson a guyguyoden ti kabalio ken dagiti nagkauna a modelo ti lugan, kasta met dagiti mapan ag-shopping ken dagiti ubbing nga aglaklako iti newspaper.

Nagbalin a nakallalagip daytoy a film ta posible a naala idi Abril 1906, sakbay unay ti napigsa a ginggined ken dakkel nga uram idi Abril 18 a nakapukawan ti rinibu a biag ken gistay nakadadaelan dayta a paset ti siudad. Nalabit mabilbilang idin ti al-aldaw dagiti naragsak a ruprupa a naala iti kamera. Kuna ni Scott Miles nga apoko ti maysa kadagiti nangaramid iti dayta a film: “Makitak nga awan a pulos ti ammo dagiti tattao iti dandani idin mapasamak kadakuada. Ket talaga a maasianka kadakuada.”

Kasta met laeng ti nakaay-ay-ay a kasasaad ita. Maasiantayo met kadagiti kaarrubatayo. Ar-aramidenda dagiti inaldaw nga aktibidadda a dida pulos ammo no ania ti mabiiten a dumteng a didigra—ti pannakadadael daytoy a dakes a sistema ti bambanag. Ngem saan a kas iti di mapakpakadaan a ginggined, adda ababa a nabatbati a tiempotayo a mangpakdaar kadagiti kaarrubatayo maipapan iti aldaw a panangukom ni Jehova. Mabalin nga inyiskediulmo ti sumagmamano a tiempo iti kada lawas para iti trabaho a panangasaba, ngem mabalinmo kadi a nayonan ti panagreggetmo a mangpakdaar iti sabsabali?

Mapagulidanan ni Jesus iti sidadaan a panangasabana iti sabsabali. Kinasabaanna ti amin a maranaanna, maysa man nga agsingsingir iti buis a malabsanna iti dalan wenno maysa a babai a nakasaritana iti abay ti bubon bayat nga agin-inana iti tengnga ti aldaw. (Luc. 19:1-5; Juan 4:5-10, 21-24) Uray idi kayat koman ni Jesus ti aginana, sidadaan a nagsakripisio tapno maisurona pay ti sabsabali. Gapu iti panangngaasina iti tattao, impaayanna ida iti naan-anay a panangsaksi. (Mar. 6:30-34) Kasano a tultuladen ita ti dadduma ti kinaganetget ni Jesus a mangasaba?

Agnanaed ni Melika iti maguguardiaan nga apartment. Ganggannaet nga estudiante ti adu kadagiti  kaarrubana ket saan a nakalista dagiti nagan ken numero ti selponda iti directory iti lobby. Gunggundawayanna ti mangasaba kadagiti kaarrubana no adda iti lobby ken elebeytor. Kunana, “Pinagbalinko ti apartmentmi kas personal a teritoriak.” Mangitugot ni Melika kadagiti literatura iti nadumaduma a lengguahe, ket adu ti mayat nga umawat kadagiti tract ken magasin. Ibagana met a kitaenda ti Web site-tayo a jw.org. Gapuna, nakairugi iti sumagmamano a panagadal iti Biblia.

Nasiput met ni Sonia no asino ti mabalinna a kasabaan. Empleado isuna iti maysa a klinika, ket kalatna a naan-anay a makasabaan ti amin a katrabahuanna. Umuna nga inammona dagiti kasapulan ken paginteresan ti tunggal maysa. Kalpasanna, bayat ti pangngaldaw, ikagumaanna a saggaysaen a kasarita ida maipapan iti naespirituan a bambanag. Gapu iti dayta, nakairugi ni Sonia iti dua a panagadal iti Biblia. Planona met ti mapan iti main lobby ti medical center bayat ti breaktime tapno makasaritana dagiti agur-uray nga agpakonsulta.

Ti maysa a nakalasat iti ginggined idi 1906 inawaganna dayta a pasamak kas ti “kakaruan pay laeng a didigra iti maysa nga estado wenno siudad.” Ngem awanto a pulos ti kaimudingan ti amin a didigra no idilig iti aldaw ti pammales maibusor iti amin a “saan a makaammo iti Dios.” (2 Tes. 1:8) Tarigagayan unay ni Jehova nga agbalbaliw koma ti panunot ken puso dagiti tattao ket ipangagda ti pakdaar nga iwarwaragawag dagiti Saksina.—2 Ped. 3:9; Apoc. 14:6, 7.

Adda pribilehiom a mangipabigbig kadagiti tattao nga agbibiagtayon iti napeggad a tiempo ken matulongam met ida a mangiwaksi iti managimbubukodan a tarigagayda tapno masapulanda ni Jehova. (Sof. 2:2, 3) Mabalinmo kadi nga aprobetsaren ti tunggal gundaway tapno makasabaam dagiti katrabahuam, kaarrubam, ken dagiti makalangenmo bayat iti inaldaw nga aktibidadmo? Mabalin kadi a nayonam ti panagreggetmo a mangpakdaar iti sabsabali?