1. Kasano nga impakita ni Pablo a maseknan kadagidiay naanep nga agserserbi ken Jehova?

KANAYON a silalagip ni apostol Pablo kadagiti napinget a nangikaskasaba iti naimbag a damag. Insuratna: “Di agressat a laglagipenmi ti matalek nga aramidyo ken ti naayat a panagbannogyo ken ti panagibturyo gapu iti namnamayo ken Apotayo a Jesu-Kristo iti sanguanan ti Dios ken Amatayo.” (1 Tes. 1:3) Silalagip met ni Jehova iti naayat a panagbannog ti amin a matalek nga agserserbi kenkuana, dakkel man wenno bassit ti maar-aramidanda gapu iti kasasaadda.—Heb. 6:10.

2. Ania ti usigentayo iti daytoy nga artikulo?

² Adu a padatayo nga agserserbi—idi ken ita—ti nangaramid iti dakkel a panagsakripisio tapno makapagserbida ken Jehova iti amin a tiempo. Ammuentayo no kasano a nagserbi ti dadduma idi umuna a siglo. Usigentayo met ti dadduma a kita ti amin-tiempo a panagserbi iti panawentayo ken no kasano a laglagipentayo dagiti ipatpategtayo a kakabsat nga agsaksakripisio iti nadumaduma a pamay-an.

3, 4. (a) Kasano a nagserbi ti dadduma a kakabsat idi umuna a siglo? (b) Kasano a naipaay dagiti material a kasapulanda?

³ Di nagbayag kalpasan a nabautisaran ni Jesus, inrugina ti maysa  a trabaho a maisaknapto iti intero a daga. (Luc. 3:21-23; 4:14, 15, 43) Kalpasan ti ipapatayna, indauluan dagiti apostolna ti pannakaisaknap ti trabaho a panangasaba. (Ara. 5:42; 6:7) Adda dagiti Kristiano, kas ken Felipe, a nagserbi kas ebanghelisador ken misionero idiay Palestina. (Ara. 8:5, 40; 21:8) Nangaskasaba met ni Pablo ken dagiti kakaduana iti ad-adayo pay a luglugar. (Ara. 13:2-4; 14:26; 2 Cor. 1:19) Adda met dagidiay nagserbi kas managkopia ken mannurat, kas kada Silvano (Silas), Marcos, ken Lucas. (1 Ped. 5:12) Nakipagtrabaho dagiti Kristiano a babbai kadagitoy a matalek a lallaki. (Ara. 18:26; Roma 16:1, 2) Makapagagar a basaen dagiti kapadasanda a naisurat iti Kristiano a Griego a Kasuratan, ket ipakita dagita a silalagip ni Jehova kadagiti agserserbi kenkuana.

⁴ Kasano a naipaay dagiti material a kasapulan dagiti agserserbi iti amin a tiempo idi umuna a siglo? Adda dagiti gundaway a pinadagus ida dagiti padada a Kristiano ken impaayanda ida iti dadduma pay a kita ti tulong, nupay saanda a kiniddaw dagita. (1 Cor. 9:11-15) Situtulok a tinulongan ida ti dadduma nga indibidual ken dagiti kongregasion. (Basaen ti Aramid 16:14, 15; Filipos 4:15-18.) Nagtrabaho met ni Pablo ken dagiti kakaduana iti part-time tapno masuportaranda ti pinansial a kasapulanda.

5. Ania ti naikuna ti maysa a pagassawaan maipapan iti panagserbida iti amin a tiempo?

⁵ Adu met ita ti naanep nga agsaksakripisio iti nadumaduma a kita ti amin-tiempo a panagserbi. (Kitaen ti kahon a “ Dagiti Amin-Tiempo a Panagserbi.”) Ania ti makunada iti karera a pinilida? Mabalin a mapabilegka no saludsodem dayta kadakuada. Usigem daytoy a kapadasan: Maysa a kabsat a lalaki a nagserbin kas regular pioneer, special pioneer, misionero, ken maysa itan a Bethelite iti sabali a pagilian ti nangikuna: “Maibagak a ti panagserbik iti amin a tiempo ti maysa kadagiti kasayaatan pay laeng a desision nga inaramidko. Idi agtawenak iti 18, marigatanak nga agdesision no ania ti piliek—panagadal iti unibersidad, nailubongan a karera, wenno panagpayunir. Ngem napaneknekak a saan a lipaten ni Jehova dagiti panagsakripisiotayo para iti amin-tiempo a panagserbi. Nausarko ti aniaman a talento wenno abilidad nga inted kaniak ni Jehova iti panagserbik, ket diak koma naaramidan dayta no nailubongan a karera ti pinilik.” Kastoy met ti komento ni baketna: “Tunggal annongen a naited kaniak ket nakatulong iti irarang-ayko. Maulit-ulit a nariknami ti proteksion ken panangiwanwan ni Jehova ket saanmi koma a napadasan dayta no saankami a nagsakripisio. Inaldaw nga agyamyamanak ken Jehova ta agserserbikami iti amin a tiempo.” Kayatmo met kadi ti kasta a biag?

6. Ania ti panangmatmat ni Jehova iti amin-kararua a panagserbitayo kenkuana?

⁶ Siempre, adda dagidiay saan a makapagserbi iti amin a tiempo iti agdama gapu iti kasasaadda. Ngem manamnamatayo a napateg met ken Jehova ti amin-kararua a panagserbida. Panunotem dagidiay innaganan ni Pablo iti Filemon 1-3, a pakairamanan ti dadduma pay a kameng ti kongregasion idiay Colosas. (Basaen.) Inapresiar ida ni Pablo, ken uray ni Jehova. Tagipatgen met ti nailangitan nga Amatayo ti panagserbim. Ngem kasanom a masuportaran dagidiay agserserbi ita iti amin a tiempo?

7, 8. Ania ti makalikaguman iti panagserbi kas payunir, ken kasano a matulongan dagiti kakabsat iti kongregasion dagiti payunir?

⁷ Mapabpabileg dagiti kongregasion gapu kadagiti nareregta a payunir, kas iti maar-aramidan dagiti ebanghelisador idi umuna a siglo. Adu kadakuada ti mangbusbusbos iti 70 nga oras iti ministerio iti kada bulan. Kasanom a matulongan ida?

⁸ Napaliiw ti maysa a payunir a babai nga agnagan Shari: “Kasla nakatibtibker dagiti  payunir ta inaldaw a rumrummuarda iti ministerio. Ngem kasapulanda met ti pammaregta.” (Roma 1:11, 12) Ti sabali pay a kabsat a babai a nakapagpayunir iti sumagmamano a tawen kinunana maipapan kadagiti payunir iti kongregasionda: “Nakagaggagetda ken kasla dida mabambannog. Ngem apresiarenda unay no iluganmo ida, awisem ida iti pannangan, ikkam ida iti paggasolina, wenno dadduma pay a pinansial a tulong, ta ipakpakitam a talaga nga ipatpategmo ida.”

9, 10. Ania ti inaramid ti dadduma a kakabsat tapno matulonganda dagiti payunir iti kongregasionda?

⁹ Kayatmo kadi a tulongan dagiti payunir iti ministerio? Kastoy ti impakaasi ti payunir a ni Bobbi: “Kasapulanmi ti ad-adu a suporta iti tengnga ti lawas.” Maysa a payunir iti dayta met la a kongregasion ti nangikuna: “Marigatankami nga agbirok iti kaduami iti ministerio iti malem.” Maysa a babai a Bethelite itan idiay Brooklyn ti nangisalaysay iti kapadasanna idi payunir pay. Kinunana: “Maysa a sister nga adda kotsena ti nangibaga kaniak, ‘No awan ti kaduam iti ministerio, tawagannak laeng ta kuyogenka.’ Nagdakkel ti naitulongna iti panagtultuloyko a payunir.” Kastoy met ti napaliiw ni Shari: “Kalpasan ti ministerio, masansan nga agmaymaysa dagiti awanan asawa a payunir. Mabalin nga awisem ida sagpaminsan iti panagdaydayaw ti pamiliayo. Mapabilegda met no iramanmo ida iti dadduma pay nga aktibidad.”

¹⁰ Maysa a kabsat a babai nga ag-50 a tawenen nga agserserbi iti amin a tiempo ti nagkomento maipapan iti kapadasanna idi payunir pay a kaduana ti dadduma a babbalasang: “Kada dua a bulan wenno nasursurok pay, bisitaendakami dagiti panglakayen. Komustaenda ti salun-atmi ken ti trabahomi sa ammuenda no adda aniaman a pakaseknanmi. Talaga a maseknanda. Bumisitada iti mismo nga apartmentmi tapno kitaenda no kasapulanmi ti tulong.” Ipalagip daytoy kadatayo ti panangapresiar ni Pablo iti tulong nga impaay kenkuana ti maysa nga ulo ti pamilia idiay Efeso.—2 Tim. 1:18.

11. Ania ti ramanen ti panagserbi kas special pioneer?

¹¹ Dadduma a kongregasion ket addaan kadagiti special pioneer. Adu kadagitoy a kakabsat ti mangbusbusbos iti 130 nga oras iti ministerio iti kada bulan. Okupadoda iti ministerio ken iti dadduma pay nga aktibidad ti  kongregasion, isu a bassit laeng wenno awan tiempoda nga agtrabaho. Ipapaayan ida ti sanga nga opisina iti kalkalainganna a binulan nga allowance tapno maipamaysada ti ministerioda.

12. Kasano a makatulong dagiti panglakayen ken ti dadduma pay a kakabsat kadagiti special pioneer?

¹² Kasanotayo a matulongan dagiti special pioneer? Maysa a panglakayen iti maysa a sanga nga opisina a mangas-asikaso iti adu nga special pioneer ti nagkuna: “Masapul a kasarita ida dagiti panglakayen, ammuenda no ania ti kasasaadda, ken panunotenda no ania ti maitulongda. Adda dagiti kapammatiantayo a mangipapan a saanen nga agkasapulan iti tulong dagiti special pioneer ta adda met allowance nga aw-awatenda. Ngem kinapudnona, adu ti mabalin a maitulong kadakuada dagiti kakabsat.” Kas kadagiti regular pioneer, apresiaren dagiti special pioneer no makikadua dagiti kakabsat kadakuada iti ministerio. Mabalinmo kadi a tulongan ida iti kasta a pamay-an?

13, 14. (a) Ania koma ti laglagipentayo maipapan kadagiti manangaywan iti sirkito? (b) Ania ti mabalinmo a maitulong kadakuada ken kadagiti assawada?

¹³ Pudno a nabileg ti pammati dagiti manangaywan iti sirkito ken gubuayan ida iti pammaregta agraman dagiti assawada, ngem ditay liplipatan a kasapulanda met ti pammaregta ken kakadua iti ministerio. Nasayaat met no iramantayo ida iti panaglinglingaytayo. Kasanon no agsakit ken mayospitalda, nalabit kasapulanda ti agpa-opera wenno agpa-therapy? Maliwliwada unay no maseknan kadakuada dagiti kakabsat ken no maipaayanda iti tulong. Sigurado a kasta a pannakaseknan ti impakita ti “dungdungnguen a mangngagas” a ni Lucas, ti nangisurat iti libro nga Aramid, agpaay ken Pablo ken kadagiti kakaduana a bimmisita iti nadumaduma a kongregasion.—Col. 4:14; Ara. 20:5–21:18.

¹⁴ Kasapulan met dagiti manangaywan iti sirkito ken dagiti assawada ti ayat ken pammaregta dagiti nasinged a gagayyem. Insurat ti maysa a manangaywan iti sirkito: “Kasla ammo dagiti gagayyemko no kaano a kasapulak ti pammaregta. Sitataktika nga agsaludsodda, isu a mayebkasko ti problemak. Nagdakkel a tulong kaniak uray laeng ti sipapasnek a panagimdengda.” Apresiaren unay dagiti manangaywan iti sirkito ken dagiti assawada ti pannakaseknan nga ipakpakita kadakuada dagiti kakabsat.

15, 16. Apay a napateg ti trabaho dagiti Bethelite? Kasanotayo a matulongan ida?

¹⁵ Iti intero a lubong, napateg ti maar-aramidan dagiti Bethelite para iti trabaho ti Pagarian iti dagdaga a sakup ti sanga nga opisinada. No adda Bethelite iti kongregasion wenno sirkitoyo, kasanom a maipakita a silalagipka kadakuada?

¹⁶ Idi simmangpetda iti Bethel, mabalin a kailiwda ti pamilia ken dagiti nasinged a gagayyemda. Isu a talaga a yamanenda no gayyemen ida dagiti padada a Bethelite ken dagiti kakabsat iti baro a kongregasionda. (Mar. 10:29, 30) Nupay inaldaw ti trabahoda iti Bethel, adda latta panawenda a makigimong ken mangasaba iti kada lawas. Ngem no maminsan, adda dagiti ekstra a trabahoda. No maawatan daytoy ti kongregasion ken ipakita dagiti kakabsat ti apresasionda iti trabaho dagiti Bethelite, magunggonaan ti amin.—Basaen ti 1 Tesalonica 2:9.

17, 18. Ania ti nadumaduma a kita ti panagserbi iti sabali a pagilian?

¹⁷ Mabalin a maikawa dagidiay nadutokan nga agserbi iti sabali a pagilian gapu ta naiduma unay ti taraon, lengguahe, kustombre, ken kasasaad a nakairuamanda. Ania ti annongen dagiti agserserbi iti amin a tiempo iti sabali a pagilian?

 ¹⁸ Agserserbi kas misionero ti dadduma kadakuada, nga adu a tiempo ti us-usarenda iti ministerio. Ket adu ti magunggonaan iti naisangsangayan a pannakasanayda. Ipapaayan ida ti sanga nga opisina iti simple a pagtaengan ken allowance para kadagiti kangrunaan a kasapulanda. Adda met dagidiay nadutokan nga agserbi iti sanga nga opisina iti sabali a pagilian wenno tumulong iti pannakaibangon dagiti sanga nga opisina, remote translation office, Assembly Hall, wenno Kingdom Hall. Maipapaayanda iti taraon, simple a pagtaengan, ken dadduma pay a kasapulanda. Kas kadagiti Bethelite, regularda a makigimong ken mangasaba. Talaga a bendisionda iti kongregasion.

19. Ania a bambanag ti ikabilangantayo maipapan kadagiti amin-tiempo nga agserserbi manipud iti sabali a pagilian?

¹⁹ Kasanom a matulongan dagiti agserserbi iti amin a tiempo iti sabali a pagilian? Laglagipem a mabalin a maikawada iti dadduma a taraon a dida pay naramramanan. Isu a no awisem ida iti pannangan, damagem nga umuna no ania ti mabalinda a kanen ken no ania ti kayatda a maramanan. An-anusam ida bayat a sursuruenda ti lengguahe ken kustombre iti lugaryo. Mabalin a lumabas pay ti sumagmamano a tiempo sakbay a maawatanda ti amin nga ibagam. Mabalin nga isurom kadakuada ti umiso a pannakaibalikas dagiti sasao iti lengguaheyo. Kayatda ti makasursuro!

20. Kasanotayo a matulongan dagiti agserserbi iti amin a tiempo ken dagiti nagannakda?

²⁰ Lumakay ken bumaket met dagiti agserserbi iti amin a tiempo, kasta met dagiti nagannakda. No Saksi dagiti nagannak, mabalin a dida kayat nga ibbatan dagiti annakda ti pribilehioda. (3 Juan 4) Siempre, no kasapulan a maaywanan dagiti nagannak dagiti agserserbi iti amin a tiempo, aramidenda ti amin a kabaelanda a tumulong ken masansan a bumisitada. Ngem mabalin met a tumulong dagiti kakongregasion dagiti nakapsuten a nagannak dagidiay agserserbi iti amin a tiempo. Laglagipem nga okupado unay dagiti agserserbi iti amin a tiempo para iti kapatgan pay laeng a trabaho ditoy daga. (Mat. 28:19, 20) Mabalinmo kadi ti tumulong wenno ti kongregasionmo kadagiti nagannakda no agkasapulanda iti tulong?

21. Ania ti makuna dagiti agserserbi iti amin a tiempo maipapan iti tulong ken pammaregta nga ipapaay dagiti kakabsat?

²¹ Agsaksakripisio ti adu a tattao gapu ta kayatda ti bumaknang. Ngem saan a kasta dagidiay adda iti amin-tiempo a ministerio ta agserserbida gapu ta kayatda nga ipaay ti kasayaatan ken Jehova ken tumulong iti sabsabali. Apresiarenda unay ti aniaman a tulong a maipaaymo. Kastoy ti kuna ti maysa a kabsat a babai nga agserserbi iti sabali a pagilian: “Maragsakanak iti uray bassit laeng a surat ti apresasion gapu ta dayta ti mangipakita a sipapanunot kenka dagiti kakabsat ken maragsakanda iti ar-aramidem.”

22. Ania ti makunam maipapan iti panagserbi iti amin a tiempo?

²² Talaga a ti panagserbi ken Jehova iti amin a tiempo ti kasayaatan a wagas ti panagbiag. Adda rigrigatna ngem makaisuro ken makapnek dayta. Ken dayta ti makatulong iti panagsagana iti agnanayon a naragsak a panagserbi dagiti amin a nasungdo nga ad-adipen ni Jehova inton baro a lubong. Sapay koma ta itultuloytayo a ‘laglagipen ti matalek nga aramid ken naayat a panagbannog’ dagiti agserserbi iti amin a tiempo.—1 Tes. 1:3.