1, 2. (a) Ania ti dadduma a responsabilidad ti maysa nga Israelita a pastor? (b) Kasano a mayarig dagiti nagannak kadagiti pastor?

SAAN a nalaka ti biag dagiti pastor iti nagkauna nga Israel. Saanda laeng nga ibturan ti pudot ken lam-ek no di ket masapul pay a salaknibanda ti arbanda manipud kadagiti mangdangran—animal man wenno tao. Regular a sukimatenda dagiti karnero ken agasanda dagiti masakit wenno nadangran. Ipapaayanda iti espesial nga atension dagiti urbon gapu ta nakapkapuyda no idilig kadagiti nataengan a karnero.—Gen. 33:13.

² Dagiti Kristiano a nagannak ket mayarig kadagiti pastor. Masapul nga addaanda kadagiti kualidad a napateg iti maysa a literal a pastor. Responsabilidadda a padakkelen dagiti annakda “iti disiplina ken panangiturong-panunot ni Jehova.” (Efe. 6:4) Nalaka kadi dayta? Saan! Maipaspasango dagiti ubbing iti naulpit a propaganda ni Satanas ken iti bukodda nga imperpekto a pagannayasan. (2 Tim. 2:22; 1 Juan 2:16) No adda annakmo, kasanom a matulongan ida? Usigentayo ti tallo a banag a mabalinmo nga aramiden tapno maipastoram dagiti annakmo—am-ammuem ida, taraonam ida, ken iwanwanmo ida.

3. Kas nagannak, kasanom nga ad-adda a ‘maam-ammo’ dagiti annakmo?

³ Ti nasayaat a pastor sukimatenna a naimbag ti tunggal karnerona tapno masiguradona no nasalun-atda. Iti piguratibo a pamay-an, mabalinmo met nga aramiden dayta kadagiti annakmo. Ibaga ti Biblia: “Ammuem a [naimbag] ti langa ti arbanmo.” (Prov. 27:23) Tapno maaramidam dayta, masapul a paliiwem ti tigtignay dagiti annakmo agraman ti pampanunot ken rikriknada. Kasano? Ti maysa a kasayaatan a pamay-an ket ti masansan a pannakisaritam kadakuada.

4, 5. (a) Aniada a praktikal a singasing ti makatulong tapno mayebkas dagiti annak ti rikriknada kadagiti nagannakda? (Kitaen ti ladawan iti rugi ti artikulo.) (b) Ania a pamay-an ti napadasmon tapno nalaklaka nga iyebkas ti anakmo ti rikriknana?

⁴ Madlaw ti dadduma a nagannak a marigatanda a makisarita kadagiti tin-edyeren nga annakda. Mabalin nga agkedked dagiti tin-edyer a makisarita wenno mabainda a mangibaga iti kapanunotan ken rikriknada. No kasta dagiti annakmo, ania ti mabalinmo nga aramiden? Imbes a pilitem a katungtong ti baro wenno balasangmo, ikagumaam a kasarita kadagiti gagangay a situasion. (Deut. 6:6, 7) Mabalin a kasapulam ti agsakripisio tapno makapagkaduakayo a mangaramid iti maysa a banag. Nalabit awisem nga agpagnapagnakayo, agay-ayamkayo, wenno agkaduakayo a mangaramid kadagiti trabaho iti balay. Makatulong dagita a gundaway tapno agbalin a komportable dagiti agtutubo ken saanda a bumdeng a mangyebkas iti rikriknada.

⁵ Kasanon no bumdeng latta nga agsao ti anakmo? Mabalin a mangpadaska iti sabali a pamay-an. Kas pagarigan, imbes a komustaem ti nagmalem ti balasangmo, iyestoriam dagiti inaramidmo iti nagmalem. Nalabit agestorianto met maipapan kadagiti inaramidna. Wenno tapno maammuam no ania ti opinionna maipapan iti maysa a banag, agdamagka kadagiti bambanag a saan a maipapan kenkuana. Damagem no ania ti opinion ti maysa a gayyemna maipapan iti dayta a banag. Kalpasanna, damagem no ania ti maibalakadna iti gayyemna.

6. Kasanom a maipakita a nawayaka ken nalakaka a maas-asitgan?

⁶ Siempre no kayat ti anakmo ti makisarita kenka, masapul a makitana a nawayaka ken nalakaka a maas-asitgan. No kasla kanayon nga okupado dagiti nagannak, mabalin a bukbukodan lattan dagiti agtutubo dagiti problemada. Kasano ngarud a maipakitam a nalakaka a maas-asitgan? Saan laeng a basta ibagam, “Umasidegka latta no adda kayatmo nga ibaga.” Masapul a marikna dagiti annakmo a maseknanka kadagiti problemada ken saan a sobra ti reaksionmo kadagita. Adu a nagannak ti mangipakpakita iti nasayaat nga ulidan iti daytoy a banag. Kinuna ni Kayla nga agtawen iti 19: “Maibagak ti amin ken Daddy. Bay-annak latta nga agsao, ken saan a dagus nga agunget. Dumngeg laeng sa kanayon a mangipaay iti kasayaatan a balakad.”

7. (a) Kasano nga agbalin a balanse ti maysa a nagannak no makisarita iti anakna maipapan iti topiko a kas iti pannakideyt? (b) Kasano a nalabit di mapupuotan dagiti nagannak a marurodda dagiti annakda?

⁷ Uray kasaritam dagiti annakmo maipapan kadagiti sensitibo a topiko, kas iti pannakideyt, agannadka amangan no puro pakdaar ti ibagbagam ket malipatamon nga isuro ti umiso nga aramidenda. Kas panangyilustrar: Ipapanmo a napanka iti maysa a restawran ket nakitam a puro pakdaar maipapan iti makasabidong a taraon ti linaon ti menu. Sigurado a pumanawka ken agbirokka iti sabali a restawran. Kasta met laeng ti aramiden dagiti annakmo no umayda agpabalakad kenka ngem puro nainget a pakdaar ti adda iti “menu.” (Basaen ti Colosas 3:21.) Balanse koma ti pannakisaritam kadakuada. Kuna ti agtutubo a ni Emily: “No kasaritadak dagiti nagannakko maipapan iti pannakideyt, saanda a negatibo iti dayta.  Ibagada a naragsak ti panangam-ammo iti maysa a tao ken ti pannakasarak iti agbalinto nga asawam. Isu a saanak a mabain a makisarita kadakuada maipapan iti kasta a banag. Kinapudnona, no maipapan iti pannaki-boyfriend, diak kayat ti agilimed kadakuada.”

8, 9. (a) Ania dagiti pagsayaatanna no palpasem pay nga agsao ti anakmo sakbay nga agsaoka? (b) Ania dagiti nasayaat a resulta ti panangdengngegmo kadagiti annakmo?

⁸ Kas iti imbaga ni Kayla, maipakitam a nalakaka a maas-asitgan no siaanus a dumngegka kadagiti annakmo. (Basaen ti Santiago 1:19.) Inadmitir ti maysa nga agsolsolo nga ina nga agnagan Katia: “Awan idi ti aanusak iti balasangko. No adda ibagbagana, diakon palpasen nga agsao gapu ta nabambannogak wenno diak kayat ti maistorbo. Idi binaliwak ti kababalinko, nagbalbaliw met ti balasangko. Natultulnog itan.”

⁹ Kasta met idi ti kapadasan ni Ronald, nga adda tin-edyer a balasangna. Kinunana: “Kasta unay ti ungetko idi imbagana kaniak a na-in love iti maysa a lalaki a kaeskuelaanna. Ngem idi pinampanunotko ti kinaanus ken kinanainkalintegan ni Jehova kadagiti adipenna, naamirisko a nasaysayaat no bay-ak ti anakko a mangyebkas iti rikriknana sakbay a balakadak. Imbag laengen ta kasta ti inaramidko! Idi laeng a naawatak ti rikriknana. Idi nalpasnan ti agsao, nalaklakan para kaniak ti sidudungngo a makisarita kenkuana. Maragsakanak ta sinurotna ti balakadko. Sipapasnek nga imbagana a kayatna a balbaliwan ti kababalinna.” No masansan a kasaritam dagiti annakmo, nalaklakam a maammuan ti pampanunot ken rikriknada. Kas resultana, nalaklakamton a matulongan ida a mangaramid kadagiti desision. *

10, 11. Kasanom a matulongan dagiti annakmo tapno saanda a mayadayo?

¹⁰ Ammo ti nasayaat a pastor a mabalin a mayadayo ti maysa a karnero manipud iti arban. Nalabit maatrakar iti karuotan nga adda iti asideg sa addanto manen makitana iti ad-adayo, agingga a maisinan iti arban. Iti umasping a pamay-an, mabalin nga in-inut a mayadayo ti anak ket agpeggad ti espiritualidadna gapu kadagiti di nasayaat a kakadua wenno naalas a paglinglingayan. (Prov. 13:20) Kasano a matulongam ti anakmo a mangliklik iti kasta a peggad?

¹¹ Bayat nga isursurom dagiti annakmo,  agtignayka a dagus no adda makitam a masapul a parang-ayenda. Tulongam ida a mangparang-ay pay kadagiti Nakristianuan a kababalin nga addan kadakuada. (2 Ped. 1:5-8) Ti regular a panagdaydayaw ti pamilia ti maysa kadagiti kasayaatan a gundaway a maaramidam dayta. Maipapan iti daytoy nga urnos, kinuna ti Oktubre 2008 a Ministeriotayo iti Pagarian: “Maiparegta kadagiti ulo ti pamilia nga ibaklayda ti responsabilidad nga inted ni Jehova kadakuada, a siguraduenda a masurot ti makagunggona ken regular a programa ti panagadal iti Biblia kas pamilia.” Gunggundawayam kadi daytoy a naayat a probision tapno maipastoram dagiti annakmo? Agtalekka a tagipatgendanto ti panangyun-unam iti naespirituan a kasapulanda.—Mat. 5:3; Fil. 1:10.

12. (a) Kasano a nakatulong kadagiti agtutubo ti regular a panagdaydayaw ti pamiliada? (Iraman ti kahon nga “ Ap-apresiarenda Dayta.”) (b) Kasano a personal a nagunggonaanka iti panagdaydayaw ti pamiliayo?

¹² Usigem ti komento ti maysa a tin-edyer nga agnagan Carissa maipapan iti naitulong ti urnos a Panagdaydayaw ti Pamilia iti pamiliada: “Magusgustuak ti sangsangkamaysa a panagtugawmi nga agsasarita. Kadagita a gundaway, makapaglalangenkami ken makaaramidkami iti bambanag a malaglagipminto. Kanayon nga idauluan ni Daddy ti Panagdaydayaw ti Pamiliami. Makaparegta a makita ti kinapasnekna, isu a natignayak met a mangipateg iti dayta. Ad-adda pay itan a raemek isuna kas amak ken naespirituan nga ulo ti pamiliami.” Kinuna ti maysa nga agtutubo nga agnagan Brittney: “Simmingedak kadagiti nagannakko gapu iti panagdaydayaw ti pamiliami. Nakitak a talaga a kayatda nga ammuen dagiti problemak ken talaga a maseknanda kaniak. Tinulongannakami daytoy nga urnos nga agbalin a nabileg ken nagkaykaysa a pamilia.” Nalawag a ti panangtaraonmo kadagiti annakmo iti naespirituan—nangruna babaen iti panagdaydayaw ti pamilia—ket maysa kadagiti kangrunaan a pamay-an tapno agbalinka a nasayaat a pastor. *

13. Kasano a matignay ti maysa nga agtutubo nga agserbi ken Jehova?

¹³ Ti nasayaat a pastor ket agaramat iti sarukod tapno iturong ken salaknibanna ti arbanna. Ti maysa a kangrunaan a kalatna ket ti panangiturongna kadagiti karnerona iti “nasayaat a pagaraban.” (Ezeq. 34:13, 14) Kas maysa a nagannak, saan kadi a kasta met ti naespirituan a kalatmo? Kayatmo nga iwanwan dagiti annakmo tapno agserbidanto ken Jehova. Kayatmo a mariknada ti kas iti narikna ti salmista a nangisurat: “Ti panangaramid iti pagayatam, O Diosko, nagragsakak, ket ti lintegmo adda kadagiti makin-uneg a pasetko.” (Sal. 40:8) No addaan dagiti agtutubo iti kasta nga apresasion, matignayda a mangidedikar iti biagda ken Jehova ken agpabautisar. Siempre, aramidenda dayta inton nakasaganadan ken talaga a kayatdan ti agserbi ken Jehova.

14, 15. (a) Ania koma ti kalat dagiti Kristiano a nagannak? (b) Apay a nalabit pagduaduaan dagiti agtutubo ti pudno a panagdayaw?

¹⁴ Ngem kasanon no kasla saan a rumangrang-ay iti naespirituan dagiti annakmo—nalabit kuestionaranda pay ketdin ti kinapudno a naisuro kadakuada? Ikagumaam nga iyukuok iti pusoda ti panagayat ken Jehova a Dios ken ti panangapresiar iti amin a naaramidanna. (Apoc. 4:11) Inton nakasaganadan, isudanto a mismo ti mangikeddeng nga agserbi iti Dios.

¹⁵ Ngem ania ti mabalinmo nga aramiden no mangrugi nga agduadua dagiti annakmo? Kasanom nga ipastoran ken tulongan ida a mangbigbig a ti panagserbi ken Jehova ti kasayaatan a wagas ti panagbiag a mangyeg iti manayon a ragsak? Ammuem no apay  nga agduaduada. Kas pagarigan, talaga kadi a saan nga umanamong ti barom kadagiti sursuro ti Biblia, wenno kurang laeng ti kompiansana a mangidepensa kadagita kadagiti kapatadanna? Talaga kadi a pagduaduaan ti balasangmo a nainsiriban dagiti pagalagadan ti Dios, wenno mariknana laeng a kasla agmaymaysa wenno awan ti mayat a makigayyem kenkuana?

16, 17. Kasano a matulongan dagiti nagannak dagiti annakda a mangipapuso iti kinapudno?

¹⁶ Mabalinmo a tulongan ti anakmo iti aniaman a makagapu iti panagduaduana kadagiti sursuro ti Biblia. Kasano? Ti maysa kadagiti praktikal ken epektibo a pamay-an a napadasen ti adu a nagannak ket ti panangisaludsodda: “Ania ti panagriknam maipapan iti panagbalin a Kristiano? Ania dagiti nakitam a pagimbagan nga ibungana? Ania dagiti parikut a tumaud? Dagita kadi a parikut ket ad-adu ngem kadagiti pagimbagan, ita ken iti masanguanan? Apay a naibagam ti kasta?” Siempre, isaludsodmo dagita iti bukodmo a sasao iti naalumamay a pamay-an ken ipakitam a maseknanka, saan ket a kasla ‘tay agim-imbestigarka. Mabalin a pagsaritaanyo ti kunaen ti Marcos 10:29, 30. Mabalin a kayat ti dadduma nga agtutubo nga isurat dagiti kapanunotanda iti maysa a papel—nga ilistada iti maysa a kolum dagiti parikut a tumaud, sa dagiti pagimbagan iti sabali a kolum. No makitada dagita iti papel, mabalin a mailasinda ti aniaman a parikut ket makapanunotda iti solusion. No kasano a kasapulan nga iyadaltayo dagiti libro nga Isursuro ti Biblia ken ti Ayat ti Dios kadagiti interesado, nangnangruna koma nga aramidentayo dayta kadagiti annaktayo! Kasta kadi ti ar-aramidem?

¹⁷ Dumtengto ti tiempo nga agdesision dagiti annakmo no kayatda ti agserbi ken Jehova. Saanmo a namnamaen nga akseptarendanto lattan dagiti patpatiem inton agangay. Masapul nga agreggetda a mangipapuso iti kinapudno. (Prov. 3:1, 2) No marigatan ti anakmo a mangaramid iti dayta, mabalin a tulongam nga agrason kadagitoy a simple a saludsod: “Kasano nga ammok nga adda Dios? Ania dagiti nakakombinsirak a talaga a napategak ken Jehova a Dios? Apay a patiek a pagimbagak dagiti pagalagadan ni Jehova?” Agbalinka a nasayaat a pastor ket siaanus nga iwanwanmo dagiti annakmo. Tulongam ida a mangpaneknek a ti panagtulnog ken Jehova ti kasayaatan a wagas ti panagbiag. *—Roma 12:2.

18. Kasano a matulad dagiti nagannak ti Katan-okan a Pastor a ni Jehova?

¹⁸ Kayat ti amin a pudno a Kristiano a tuladen ti Katan-okan a Pastor. (Efe. 5:1; 1 Ped. 2:25) Masapul nga am-ammuen dagiti nagannak ti arbanda—dagiti patpatgenda nga annak—ken aramidenda ti amin a kabaelanda a mangiwanwan kadakuada tapno awatenda dagiti bendision ni Jehova. Ngarud, aramidem ti amin a kabaelam a mangipastor kadagiti annakmo babaen ti panangitultuloymo a mangpadakkel kadakuada iti dalan ti kinapudno!