1, 2. (a) Apay nga agpegpeggad ti kongregasion Kristiano idiay Colosas idi umuna a siglo? (b) Ania a balakad ti naipaay tapno matulongan dagiti kakabsat a taga-Colosas nga agtalinaed a natibker?

AGPEGPEGGAD ti panagkaykaysa ti kongregasion Kristiano idiay Colosas idi umuna a siglo! Adda dadduma iti uneg ti kongregasion a mangpatpataud iti panamagsisina babaen ti panangipilitda a masapul a maalagad ti Mosaiko a Linteg. Itantandudo met ti dadduma ti pagano a pilosopia nga asetisismo, wenno nalabes a panangpaidam iti bagi. Gapuna, sinuratan ni apostol Pablo dagiti taga-Colosas tapno paregtaenna ida. Impakdaarna: “Agaluadkayo: amangan no adda asinoman a mangkayawto kadakayo kas naanupanna babaen iti pilosopia ken ubbaw a panangallilaw maitunos iti tradision dagiti tattao, maitunos iti pagdamdamuan a bambanag ti lubong ket saan a maitunos ken Kristo.”—Col. 2:8.

² No ipamaysa dagidi a napulotan a Kristiano ti panunotda iti “pagdamdamuan a bambanag ti lubong,” arigna taltallikudanda ti probision ni Jehova agpaay iti pannakaisalakan. (Col. 2:20-23) Tapno matulonganna ida a mangsaluad iti napateg a relasionda iti Dios, imparegta ni Pablo: “Pagtalinaedenyo a naipamaysa dagiti panunotyo iti bambanag sadi ngato, saan nga iti bambanag iti rabaw ti daga.” (Col. 3:2) Wen, masapul a sipapanunot dagiti kakabsat  ni Kristo iti namnamada nga awatendanto ti di agrupsa a tawid a ‘naisagana maipaay kadakuada idiay langit.’—Col. 1:4, 5.

3. (a) Ania a namnama ti nakaipamaysaan ti panunot dagiti napulotan a Kristiano? (b) Aniada a saludsod ti usigentayo iti daytoy nga artikulo?

³ Ipampamaysa met dagiti napulotan a Kristiano ita ti panunotda iti nailangitan a Pagarian ti Dios ken iti namnamada a “makipagtawid ken Kristo.” (Roma 8:14-17) Ngem ania met ti nakaipamaysaan ti panunot dagidiay naindagaan ti namnamada? Kasano nga agaplikar kadakuada ti kinuna ni Pablo? Kasano nga ipampamaysa dagiti “sabsabali a karnero” ti pampanunotda iti “bambanag sadi ngato”? (Juan 10:16) Ken kasanotayo a magunggonaan iti panangusigtayo iti ulidan dagiti matalek a lallaki idi ugma a kas kada Abraham ken Moises a nangipamaysa iti panunotda iti bambanag sadi ngato iti laksid dagiti narigat a kasasaad?

4. Kasano a maipamaysa dagiti sabsabali a karnero ti panunotda iti bambanag sadi ngato?

⁴ Uray no saan a nailangitan ti namnama dagiti sabsabali a karnero, mabalinda met nga ipamaysa ti panunotda iti bambanag sadi ngato. Kasano? Babaen ti panangyun-unada ken Jehova a Dios ken kadagiti interes ti Pagarian. (Luc. 10:25-27) Maaramidantayo dayta no tuladentayo ti ulidan ni Kristo. (1 Ped. 2:21) Kas kadagiti kakabsattayo idi umuna a siglo, agraraira met ita iti lubong ni Satanas dagiti di umiso a panagrasrason, nailubongan a pilosopia, ken materialismo. (Basaen ti 2 Corinto 10:5.) Kas panangtulad ken Jesus, nasken nga alertotayo a mangsaluad iti espiritualidadtayo manipud kadagiti kasta nga impluensia.

5. Ania ti mabalin nga isaludsodtayo iti bagitayo maipapan kadagiti material a bambanag?

⁵ Naimpluensiaan kadin ti pampanunottayo iti panangmatmat ti lubong maipapan iti material a bambanag? Masansan nga ipakita ti panagpampanunot ken tigtignaytayo no ania ti bambanag a pagaayattayo. Kinuna ni Jesus: “No sadino ti ayan ti gamengmo, addanto met sadiay ti pusom.” (Mat. 6:21) Tapno maammuantayo no ania ti linaon ti pusotayo, nasayaat no isaludsodtayo iti bagitayo: ‘Kanayon kadi a pakaringgorak ti kuarta? Sangkapanunotko kadi ti maaddaan iti nasaysayaat a panggedan, wenno nanamnam-ay a biag? Wenno ikagkagumaak a taginayonen ti simple a biag a naipamaysa iti naespirituan a bambanag?’ (Mat. 6:22) Kinuna ni Jesus a dagidiay mangipangpangruna iti ‘panagurnong kadagiti gameng ditoy daga’ isagsagmakda ti espiritualidadda.—Mat. 6:19, 20, 24.

6. Kasanotayo a maparmek ti tarigagaytayo nga agaramid iti di umiso?

⁶ Gapu ta imperpektotayo, agannayastayo nga agaramid iti di umiso. (Basaen ti Roma 7:21-25.) No saan nga agtigtignay ti nasantuan nga espiritu iti biagtayo, mabalin a makaaramidtayo kadagiti “aramid nga agpaay iti sipnget,” a kas iti “naariwawa a panagragragsak ken panagbarbartek . . . [immoral] a pannakidenna ken nalulok a kababalin.” (Roma 13:12, 13) Tapno maparmektayo dagiti “bambanag iti rabaw ti daga”—dagiti bambanag a makaay-ayo iti lasag—masapul nga ipamaysatayo ti panunottayo iti bambanag sadi ngato. Agkasapulan daytoy iti panagregget. Isu a kinuna ni Pablo: “Disdisnogek ti bagik ket ad-adipenek.” (1 Cor. 9:27) Kas ken Pablo, kasapulantayo met a disiplinaen ti bagitayo tapno agtalinaedtayo iti lumba ti biag! Usigentayo ti inaramid ti dua a matalek a lallaki idi ugma a ‘nangay-ayo a naan-anay iti Dios.’—Heb. 11:6.

7, 8. (a) Ania dagiti parikut a nakaipasanguan da Abraham ken Sara? (b) Ania ti nangipamaysaan ni Abraham iti panunotna?

⁷ Situtulok a nagtulnog ni Abraham idi imbilin ni Jehova nga umakar iti daga ti  Canaan a kadua ti pamiliana. Gapu iti pammati ken kinatulnogna, nangaramid ni Jehova iti maysa a tulag kenkuana ket kinunana: “Mangaramidakto iti dakkel a nasion manipud kenka ket bendisionankanto.” (Gen. 12:2) Ngem limmabas ti adu a tawen ket kaskasdi nga awan ti anak da Abraham ken Sara. Nalipatan kadin ni Jehova ti karina ken Abraham? Iti daydi a tiempo, nagrigat ti biagda idiay Canaan. Pinanawan ni Abraham ken ti pamiliana ti pagtaenganda ken dagiti kakabagianda idiay Ur, maysa a narang-ay a siudad idiay Mesopotamia. Dinaliasatda ti nasurok a 1,600 kilometro (1,000 milia) nga agturong iti Canaan a sadiay, nagnanaedda kadagiti tolda, napadasanda ti nagbisin, ken nagpeggadda kadagiti mannanakaw. (Gen. 12:5, 10; 13:18; 14:10-16) Nupay kasta, saanda man la a pinanunot a sublian ti nanam-ay a biagda idiay Ur!—Basaen ti Hebreo 11:8-12, 15.

⁸ Imbes nga ipamaysana ti panunotna iti “bambanag iti rabaw ti daga,” “naaddaan [ni Abraham] iti pammati ken Jehova.” (Gen. 15:6) Wen, impamaysana ti panunotna kadagiti kari ti Dios. Kas resultana, nagunggonaan ti pammati ni Abraham idi nagparang kenkuana ti Kangatuan a Dios ket kinunana: “‘Tumangadka, pangngaasim, iti langlangit ket bilangem dagiti bituen, no kabaelam a bilangen ida.’ Ket intultuloyna a kunaen kenkuana: ‘Kasta ti pagbalinanto ti bin-im [wenno, kaputotam].’” (Gen. 15:5) Daytoy ti nangipasigurado ken Abraham a saan a linipat ni Jehova ti karina. Tunggal tumangad ni Abraham iti namituen a langlangit, maipalagip kenkuana ti kari ni Jehova a paaduenna ti kaputotanna. Kas inkari ti Dios, naaddaan met laeng ni Abraham iti anak a lalaki idi agangay.—Gen. 21:1, 2.

9. Kasanotayo a matulad ti ulidan ni Abraham?

⁹ Kas ken Abraham, ur-urayentayo met ti pannakatungpal dagiti kari ti Dios. (2 Ped. 3:13) No saantayo nga ipamaysa ti panunottayo iti bambanag sadi ngato, nalabit mariknatayo a kasla maitantantan ti pannakatungpal dagitoy a kari ket mabalin a bumaaw ti regtatayo. Kas pagarigan, nagsakripisioka kadi idin tapno makapagpayunirka wenno tapno makipasetka iti sabali a kita ti napalawa a panagserbi? Makomendaranka iti inaramidmo. Ngem ania ti ar-aramidem itan? Kaslaka kadi ken Abraham a nangipamaysa iti panunotna iti “siudad nga addaan kadagiti pudpudno a pamuon”? (Heb. 11:10) ‘Namati [ni Abraham] ken Jehova, ket naibilang dayta kenkuana kas kinalinteg.’—Roma 4:3.

10. Ania ti kasasaad ni Moises idi agtutubo pay?

¹⁰ Ti maysa pay a nangipamaysa iti panunotna iti bambanag sadi ngato ket ni Moises. Idi agtutubo pay, “nasursuruan . . . iti isuamin a kinasirib dagiti taga Egipto.” Saan a gagangay daytoy nga edukasion. Ti Egipto ti agdama idi a kabilgan a turay iti lubong ken dimmakkel ni Moises iti sangakabbalayan ni Faraon. Gapu iti nangato nga edukasionna, nagbalin a ‘mannakabalin iti sasao ken ar-aramid.’ (Ara. 7:22) Adu la ketdi ti gundaway ni Moises nga agbalin a nalatak! Ngem impamaysana ti panunotna iti natantan-ok a bambanag—ti panagaramid iti pagayatan ti Dios.

11, 12. Ania nga edukasion ti kapatgan ken Moises, ken kasano nga ammotayo dayta?

¹¹ Idi ubing pay ni Moises, insuro kenkuana ni nanangna a ni Jocabed ti maipapan iti Dios dagiti Hebreo. Imbilang ni Moises a napatpateg ti pannakaammo ken Jehova ngem iti aniaman a kinabaknang. Gapuna, binaybay-anna dagiti pribilehio ken oportunidad a silulukat kenkuana kas kameng ti sangakabbalayan ni Faraon. (Basaen ti Hebreo 11:24-27.) Wen, gapu iti naespirituan nga edukasion ni Moises ken iti pammatina ken Jehova, naipamaysana ti panunotna iti bambanag sadi ngato.

 ¹² Naipaay ken Moises ti kasayaatan a sekular nga edukasion idi kaaldawanna. Ngem inusarna kadi dayta tapno agbalin a mannakabalin, nalatak, wenno nabaknang idiay Egipto? Saan. No kasta koma ti inaramidna, saan koma a “nagkitakit . . . a maawagan ti anak daydi anak a babai ni Faraon, a pinilina ti dakes a pannakatrato a kadua ti ili ti Dios imbes a maaddaan iti temporario a panangtagiragsak iti basol.” Nalawag nga inusar ni Moises ti naespirituan nga edukasionna agpaay iti panggep ni Jehova.

13, 14. (a) Ania ti nakatulong ken Moises nga agbalin a kualipikado iti annongen nga inted kenkuana ni Jehova idi agangay? (b) Kas ken Moises, ania met ti kasapulan a sursuruentayo?

¹³ Ipatpateg ni Moises ni Jehova ken ti ilina. Idi agtawen iti 40, impagarupna a nakasaganan a mangwayawaya iti ili ti Dios a maad-adipen idi idiay Egipto. (Ara. 7:23-25) Ngem sakbay nga italek ni Jehova kenkuana dayta nga annongen, kasapulan pay a patanorenna dagiti kualidad a kas iti kinapakumbaba, kinaanus, kinaalumamay, ken panagteppel. (Prov. 15:33) Kasapulan ni Moises ti pannakasanay tapno maibturanna dagiti suot ken pakarigatan a pakaipasanguannanto. Makatulong kenkuana ti panagbalinna kas pastor iti 40 a tawen tapno mapatanorna dagitoy a nadiosan a kualidad.

¹⁴ Nakatulong kadi ken Moises dayta a praktikal a pannakasanay? Wen. Kuna ti Sao ti Dios a nagbalin ni Moises a “kaemmaan pay laeng iti amin a tattao nga adda [idi] iti rabaw ti daga.” (Num. 12:3) Gapu ta napatanorna ti kinapakumbaba, nagbalin a naanus kadagiti nagduduma a tattao ken iti naririgat a parikutda. (Ex. 18:26) Kasapulantayo met a patanoren dagita a nadiosan a kualidad tapno malasatantayo ti “dakkel a rigat” ket makastrektayo iti nalinteg a baro a lubong ti Dios. (Apoc. 7:14) Ikagkagumaantay kadi a pakibagayan dagiti sabsabali, uray dagidiay ibilangtayo a managpudpudot wenno nalaka a masaksaktan? Makatulong kadatayo dagitoy a sasao ni apostol Pedro: “Padayawanyo dagiti amin a kita ti tattao, maaddaankayo iti ayat iti intero a timpuyog dagiti kakabsat.”—1 Ped. 2:17.

15, 16. (a) Apay a nakapatpateg nga ipamaysatayo ti panunottayo iti umiso a bambanag? (b) Apay a kasapulan a pagtalinaeden dagiti Kristiano ti nasayaat a kababalinda?

¹⁵ Agbibiagtayo kadagiti “napeggad a tiempo a narigat a pakilangenan.” (2 Tim. 3:1) Tapno ngarud makapagtalinaedtayo a siririing iti naespirituan, masapul nga ipamaysatayo ti pampanunottayo iti umiso a bambanag. (1 Tes. 5:6-9) Usigentayo ti tallo a pamay-an no kasanotay a maaramidan dayta.

¹⁶ Babaen ti kababalintayo: Inlawlawag ni Pedro ti kinapateg ti nasayaat a kababalin idi kinunana: “Taginayonenyo a nasayaat ti kababalinyo iti tengnga dagiti nasion, tapno . . . dayawenda koma ti Dios . . . kas bunga ti nasayaat nga ar-aramidyo nga isuda ti saksi kadagita.” (1 Ped. 2:12) Addatay man iti pagtaengan, pagtrabahuan, eskuelaan, paglinglingayan, wenno iti ministerio, ikagumaantay koma nga idayaw ni Jehova babaen ti nasayaat a kababalintayo. Siempre, makaaramidtayo amin iti kamali gapu ta imperpektotayo. (Roma 3:23) Ngem no itultuloytayo ti ‘makirupak iti nasayaat a dangadang iti pammati,’ maparmektayo ti imperpekto a lasagtayo.—1 Tim. 6:12.

17. Kasanotayo a matulad ti kababalin nga adda ken Kristo Jesus? (Kitaen ti ladawan iti rugi ti artikulo.)

¹⁷ Babaen ti panagpampanunottayo: Tapno mapagtalinaedtayo a nasayaat ti kababalintayo, masapul nga umiso ti panagpampanunottayo. Kinuna ni apostol Pablo: “Pagtalinaedenyo kadakayo daytoy a kababalin iti isip nga adda met ken Kristo Jesus.” (Fil. 2:5) Ania a kababalin ti adda ken Jesus?  Kinapakumbaba. Daytoy ti nangtignay kenkuana nga agsakripisio iti ministeriona. Ti panangikasaba iti naimbag a damag ti Pagarian ti Dios ti kangrunaan idi a pampanunotenna. (Mar. 1:38; 13:10) Binigbig ni Jesus a ti Sao ti Dios ti rumbeng a masurot. (Juan 7:16; 8:28) Sisasaet nga inadalna ti Nasantuan a Kasuratan tapno makotar, maidepensa, ken mailawlawagna dagita. No agbalintayo a napakumbaba, naregta iti ministerio, ken nasaet iti personal a panagadaltayo iti Biblia, ad-adda a matuladtayo ti panagpampanunot ni Kristo.

18. Ania dagiti pamay-an a maipakitatayo a supsuportarantayo ti trabaho ni Jehova?

¹⁸ Babaen ti suportatayo: Panggep ni Jehova nga “iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga.” (Fil. 2:9-11) Uray iti naitan-oken a saadna, sipapakumbaba latta nga agpaspasakup ni Jesus iti pagayatan ni Amana. Kastatayo met koma. (1 Cor. 15:28) Kasano? Babaen ti naimpusuan a panangsuportatayo iti trabaho a naibilin nga aramidentayo—ti ‘panagaramid iti ad-adalan kadagiti tattao iti amin a nasion.’ (Mat. 28:19) Kayattayo met nga ‘aramiden ti naimbag iti amin’ babaen ti panagaramidtayo iti naimbag iti padatayo a tao ken kadagiti kapammatiantayo.—Gal. 6:10.

19. Ania koma ti determinasiontayo?

¹⁹ Anian a yamantayo ta ipalpalagip ni Jehova kadatayo nga ipamaysatayo ti panunottayo iti bambanag sadi ngato! Masapul ngarud a ‘tarayentayo ti lumba a naikabil iti sanguanantayo buyogen ti panagibtur.’ (Heb. 12:1) Sapay koma ta agtrabahotayo nga “amin-kararua a kas maipaay ken Jehova,” iti kasta gunggonaan ti nailangitan nga Amatayo dagiti napinget a panagreggettayo.—Col. 3:23, 24.