No Apay a Paginteresam ti Salaysay Maipapan iti Eden

TI MAYSA kadagiti kangrunaan a makagapu a supiaten dagiti eskolar ti salaysay maipapan iti Eden ket saan kano a suportaran dayta ti dadduma a paset ti Biblia. Kas pagarigan, insurat ti propesor iti Religious Studies a ni Paul Morris: “Idi agangay, saanen a dinakamat ti Biblia ti salaysay maipapan iti Eden.” Mabalin nga adu nga “eksperto” ti umanamong kenkuana, ngem saan a pudno ti pagarupda.

Iti kinapudnona, namin-adu a tinukoy ti Biblia ti maipapan iti hardin ti Eden, da Adan, Eva, ken ti uleg. a Ngem adda nakarkaro a kamali ngem iti biddut ti sumagmamano nga eskolar. Ti panangpadakes dagiti lider ti relihion ken dagiti kritiko ti Biblia iti salaysay ti Genesis maipapan iti hardin ti Eden ket naan-anay a panangatakar iti Biblia. Kasano?

Tapno matarusantayo ti dadduma a paset ti Biblia, nasken a matarusantayo nga umuna ti napasamak idiay Eden. Kas pagarigan, naipaay kadatayo ti Sao ti Dios tapno maammuantayo ti sungbat dagiti karirigatan ken kapapatgan a saludsod ti tao. Ti sungbat ti Biblia kadagitoy a saludsod ket kanayon a mainaig iti napasamak iti hardin ti Eden. Usigem ti sumagmamano a pagarigan.

● Apay a lumakay ken mataytayo? Agbiag koma nga agnanayon da Adan ken Eva no agtultuloyda nga agpasakup ken Jehova. Matayda laeng no agsukirda. Iti daydi aldaw a panagsukirda, nangrugidan nga agturong iti ipapatay. (Genesis 2:16, 17; 3:19) Napukawda ti kinaperpekto ket ti laeng basol ken kinaimperpekto ti kabaelanda nga ipatawid iti kaputotanda. Kunaen ngarud ti Biblia: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.”​—Roma 5:12.

● Apay nga impalubos ti Dios ti kinadakes? Iti hardin ti Eden, kinuna ni Satanas nga ulbod ti Dios ken adda naimbag nga ipapaidamna kadagiti parsuana. (Genesis 3:3-5) Kinuestionaranna ngarud ti kinaumiso ti panangituray ni  Jehova. Pinili da Adan ken Eva ti sumurot ken Satanas, isu a linaksidda met ti kinasoberano ni Jehova ken arigna a kinunada a kabaelan ti tao nga ikeddeng no ania ti naimbag ken no ania ti dakes. Gapu ta naan-anay ti hustisia ken sirib ni Jehova, ammona a masungbatan laeng ti kinuna ni Satanas no ikkanna ti gundaway dagiti tattao a mangituray iti bagbagida. Nagresulta iti kinadakes ti saanda a panagpaituray iti Dios agraman ti agtultuloy nga impluensia ni Satanas, ket in-inut a napaneknekan ti kinapudno a saan a kabaelan nga iturayan ti tao ti bagina no awan ti Dios.​—Jeremias 10:23.

● Ania ti panggep ti Dios para iti daga? Iti hardin ti Eden, impasdek ni Jehova ti pagalagadan iti kinapintas nga agpaay iti daga. Binilinna da Adan ken Eva a punuenda dayta iti annakda tapno iturayan ken isaknapda ti kasta met laeng a kinapintas ken kinaurnos iti intero a daga. (Genesis 1:28) Panggep ngarud ti Dios nga agbalin a paraiso ti daga ken pagnaedan ti perpekto ken nagkaykaysa a pamilia dagiti kaputotan da Adan ken Eva. Kaaduan a linaon ti Biblia ket maipapan iti pamay-an ti Dios a mangitungpal iti orihinal a panggepna.

● Apay nga immay ni Jesus ditoy daga? Ti panagsukir da Adan ken Eva iti hardin ti Eden ti nangituggod iti ipapatayda agraman ti amin a kaputotanda, ngem siaayat a nangipaay ti Dios iti namnama. Imbaonna ti Anakna ditoy daga tapno maipaay ti “subbot” a dinakamat ti Biblia. (Mateo 20:28) Ania ti kayat a sawen dayta? Sibubulos nga impaay ni Jesus ti biagna kas sakripisio wenno subbot. Iti kasta, nagbalin a “maudi nga Adan” ta nataginayonna a perpekto ti natauan a biagna babaen ti panagtalinaedna a natulnog ken Jehova, saan a kas ken Adan. Gapuna, magun-odan dagiti matalek a tattao ti pannakapakawan dagiti basolda ket inton agangay magtenganda ti kita ti biag a tinagiragsak da Adan ken Eva idiay Eden sakbay a nagbasolda. (1 Corinto 15:22, 45; Juan 3:16) Impanamnama ngarud ni Jesus a matungpalto ti panggep ni Jehova a pagbalinenna ti daga a paraiso a kas iti Eden. b

Ti panggep ti Dios ket pudno ken nalaka a maawatan, saan a kas iti narigat a matarusan a kapanunotan dagiti teologo. No kasano a ti hardin ti Eden ket pudno a lugar ditoy daga nga addaan kadagiti pudno nga animal ken tattao, sigurado met a matungpal ti kari ti Dios iti masanguanan, ket asidegen a mapasamak dayta. Daytanto kadi ti masanguanam? Agpannuray dayta kenka. Kayat ti Dios a kasta ti masanguanan ti adu a tattao, uray dagidiay managbasol.​—1 Timoteo 2:3, 4.

Idi matmatayen ni Jesus, nakisarita iti maysa a lalaki a managbasol. Kriminal dayta a lalaki ken ammona a maikari a matay. Ngem nagkiddaw ken Jesus iti liwliwa ken namnama. Ania ti sungbat ni Jesus? “Makikaduakanto kaniak idiay Paraiso.” (Lucas 23:43) No kayat ni Jesus a makita manen dayta a sigud a kriminal, a mapagungar ken maaddaan iti gundaway nga agbiag nga agnanayon iti paraiso a kas iti Eden, kayatna kadi met nga ipaay kenka ti kasta a bendision? Siempre! Kasta met ti kayat ni Amana! No kayatmo a magun-odan dayta a masanguanan, aramidem ti amin a kabaelam a mangammo ti maipapan iti Dios a nangaramid iti hardin ti Eden.

[Footnotes]

 [Kahon/Dagiti Ladawan iti panid 10]

PADTO A NAMAGTUTUNOS ITI INTERO A BIBLIA

“Mangikabilakto ti panagginnura iti nagbaetanyo [ti uleg ken] iti babai ken iti nagbaetan ti bin-im ken ti bin-ina. Dunorennakanto iti ulo ket dunoremto iti mukod.”​—Genesis 3:15.

Dayta ti kaunaan a padto iti Biblia nga insawang ti Dios idiay Eden. Siasino ti babai ken ti bin-ina; ti uleg ken ti bin-ina? Kasano a mapasamak ti naipadto a “panagginnura”?

TI ULEG

Ni Satanas a Diablo.​—Apocalipsis 12:9.

TI BABAI

Ti organisasion ni Jehova a buklen dagiti nailangitan a parsua. (Galacia 4:26, 27) Dinakamat ni Isaias dayta a “babai,” nga impadtona a mangipasngayto dayta iti maysa a naespirituan a nasion.​—Isaias 54:1; 66:8.

TI BIN-I TI ULEG

Dagidiay nangpili a mangaramid iti pagayatan ni Satanas.​—Juan 8:44.

TI BIN-I TI BABAI

Kangrunaan a tumukoy ken Jesu-Kristo, a nagtaud iti nailangitan nga organisasion ni Jehova. Karaman met ditoy dagiti naespirituan a kakabsat ni Kristo a kaduana nga agturay idiay langit. Dagidiay a napulotan a Kristiano buklenda ti naespirituan a nasion, ti “Israel ti Dios.”​—Galacia 3:16, 29; 6:16; Genesis 22:18.

TI SUGAT ITI MUKOD

Ti naut-ot ngem temporario a pannakasugat ti Mesias. Nagballigi ni Satanas a nangipamuspusan iti ipapatay ni Jesus ditoy daga. Napagungar ni Jesus.

TI SUGAT ITI ULO

Ti naan-anay a pannakatalipupos ni Satanas. Ni Jesus naan-anayton a pukawenna ni Satanas. Sakbay dayta, punasento ni Jesus ti kinadakes nga inrugi ti Satanas idiay Eden.​—1 Juan 3:8; Apocalipsis 20:10.

Para iti pamalatpatan iti kangrunaan a tema ti Biblia, kitaem ti broshur a Ti Biblia​—Ania ti Mensahena? nga impablaak dagiti Saksi ni Jehova.

[Ladawan iti panid 11]

Sinagaba da Adan ken Eva ti nakas-ang a resulta ti basolda